Ngaa Dapat Saulugon ang Panihapon sang Ginuo?

“Ginbaton ko gikan sa Ginuo ang ginpaalinton ko man sa inyo.”​​—⁠1 CORINTO 11:23.

1, 2. Ano ang ginhimo ni Jesus sang gab-i sang Paskuwa sang 33 C.⁠E.?

PRESENTE ang bugtong nga Anak ni Jehova. Amo man ang 11 ka lalaki nga ‘nag-unong sa iya sa mga pagtilaw sa iya.’ (Lucas 22:28) Huebes sang gab-⁠i sadto, Marso 31, 33 C.⁠E., kag mahimo gid nga ginpatahom sang ugsad nga bulan ang kalangitan sa Jerusalem. Bag-o lang masaulog ni Jesucristo kag sang iya mga apostoles ang Paskuwa. Napahalin na ang maluib nga si Judas Iscariote, apang indi pa tion nga maghalin ang iban pa. Ngaa? Bangod buot na sugdan ni Jesus ang isa ka tuman ka importante nga butang. Ano yadto?

² Sanglit didto sadto ang manunulat sang Ebanghelyo nga si Mateo, pasugiron naton sia. Sia nagsulat: “Nagkuha si Jesus sing tinapay kag, pagkatapos makapangamuyo, gintipiktipik niya ini kag, sang ginahatag ini sa mga disipulo, sia nagsiling: ‘Kuha kamo, kaon kamo. Ini nagakahulugan sang akon lawas.’ Subong man, nagkuha sia sing isa ka kopa kag, pagkatapos makapasalamat, ginhatag niya ini sa ila, nga nagasiling: ‘Inom kamo gikan sa sini, kamo tanan; kay ini nagakahulugan sang akon “dugo sang katipan,” nga ibubo para sa madamo sa kapatawaran sang mga sala.’” (Mateo 26:26-​28) Isa bala ini ka okasyon nga indi na masulit? Ano ang importansia sini? May kahulugan bala ini para sa aton karon?

“Padayon nga Himua Ninyo Ini”

 3. Ngaa makahulugan ang ginhimo ni Jesus sang gab-i sang Nisan 14, 33 C.⁠E.?

³ Wala matabuan lamang ang ginhimo ni Jesucristo sang gab-⁠i sang Nisan 14, 33 C.⁠E. Ginpaathag ini ni apostol Pablo sang magsulat sia sa hinaplas nga mga Cristiano sa Corinto, diin ginasaulog ini gihapon pagligad sang 20 ka tuig. Bisan pa indi upod si Pablo kay Jesus kag sa 11 ka apostoles sang 33 C.⁠E., pat-od nga nabatian niya gikan sa iban nga mga apostoles kon ano ang natabo sadto nga okasyon. Dugang pa, mahimo gid nga napamatud-an ni Pablo ang mga natabo sadto sang ginbugnaan sia sang Dios. Si Pablo nagsiling: “Ginbaton ko gikan sa Ginuo ang ginpaalinton ko man sa inyo, nga si Ginuong Jesus sang gab-⁠i nga gintugyan sia nagkuha sing tinapay kag, sang nakapasalamat, gintipiktipik niya ini kag nagsiling: ‘Ini nagakahulugan sang akon lawas para sa inyo. Padayon nga himua ninyo ini subong pagdumdom sa akon.’ Amo man ang ginhimo niya sa kopa, sa tapos sia makapanihapon, nga nagasiling: ‘Ini nga kopa nagakahulugan sang bag-ong katipan tungod sa akon dugo. Padayon nga himua ninyo ini, sa kada tion nga imnon ninyo ini, subong pagdumdom sa akon.’”​​—⁠1 Corinto 11:23-​25.

 4. Ngaa dapat saulugon sang mga Cristiano ang Panihapon sang Ginuo?

⁴ Ang manunulat sang Ebanghelyo nga si Lucas nagapamatuod man nga si Jesus nagsugo: “Padayon nga himua ninyo ini subong pagdumdom sa akon.” (Lucas 22:19) Ining mga pulong ginbadbad man nga: “Himua ninyo ini sa handumanan nakon” (Today’s English Version) kag “Himua ninyo ini subong memoryal para sa akon.” (The Jerusalem Bible) Sa katunayan, ini nga pagsaulog masami ginatawag nga Memoryal sang kamatayon ni Cristo. Gintawag man ini ni Pablo nga Panihapon sang Ginuo​​—⁠isa ka nagakaigo nga termino, bangod gab-⁠i sadto sang ginpasad ini. (1 Corinto 11:20) Ginasugo ang mga Cristiano nga saulugon ang Panihapon sang Ginuo. Apang ngaa ginpasad ini nga pagsaulog?

Kon Ngaa Ginpasad Ini

5, 6. (a) Ano ang isa ka rason kon ngaa ginpasad ni Jesus ang Memoryal? (b) Ihatag ang isa pa ka rason kon ngaa ginpasad ang Panihapon sang Ginuo.

⁵ Ang isa ka rason kon ngaa ginpasad ang Memoryal naangot sa isa ka katuyuan nga gintuman sang kamatayon ni Jesus. Napatay sia nga isa ka manugbindikar sang pagkasoberano sang iya langitnon nga Amay. Sa amo, ginpamatud-an ni Cristo nga butig ang panumbungon ni Satanas nga Yawa nga ang mga tawo nagaalagad sa Dios bangod lamang sang makagod nga mga motibo. (Job 2:​1-5) Ginpamatud-an sang katutom ni Jesus tubtob kamatayon nga butig ang ginsiling sang Yawa kag napahalipay niya ang tagipusuon ni Jehova.​​—⁠Hulubaton 27:11.

⁶ Ang isa pa ka rason kon ngaa ginpasad ang Panihapon sang Ginuo amo ang pagpahanumdom sa aton nga paagi sa iya kamatayon subong isa ka himpit kag walay sala nga tawo, ‘ginhatag ni Jesus ang iya kalag subong gawad nga kabaylo sang madamo.’ (Mateo 20:28) Sang makasala ang una nga tawo sa Dios, nadula niya ang himpit nga tawhanon nga kabuhi kag ang tanan nga paglaum sini. Apang, si Jesus nagsiling: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-⁠o nga magtuo sa iya indi malaglag kundi may kabuhi nga walay katapusan.” (Juan 3:16) Sa pagkamatuod, “ang bayad nga ginabayad sa sala amo ang kamatayon, apang ang dulot nga ginahatag sang Dios amo ang kabuhi nga walay katapusan paagi kay Cristo Jesus nga aton Ginuo.” (Roma 6:23) Ang pagsaulog sa Panihapon sang Ginuo nagapahanumdom sa aton sang daku nga gugma nga ginpakita ni Jehova kag sang iya Anak may kaangtanan sa mahalaron nga kamatayon ni Jesus. Dapat gid naton pasalamatan ini nga gugma!

San-o Ini Saulugon?

 7. Ngaa ang hinaplas nga mga Cristiano nagaambit sa Memoryal “sa kada tion”?

⁷ Tuhoy sa Panihapon sang Ginuo, si Pablo nagsiling: “Sa kada tion nga nagakaon kamo sining tinapay kag nagainom sa sini nga kopa, padayon nga ginabantala ninyo ang kamatayon sang Ginuo, tubtob nga mag-abot sia.” (1 Corinto 11:26) Ang indibiduwal nga hinaplas nga mga Cristiano magaambit sa mga emblema sang Memoryal tubtob mapatay sila. Sa amo, sa atubangan ni Jehova nga Dios kag sang kalibutan, sulit-sulit nga ipahayag nila ang ila pagtuo sa halad nga gawad ni Jesus nga gin-aman sang Dios.

 8. Tubtob san-o saulugon sang mga hinaplas ang Panihapon sang Ginuo?

⁸ Tubtob san-o saulugon sang hinaplas nga mga Cristiano ang Memoryal sang kamatayon ni Cristo? “Tubtob nga mag-abot sia,” siling ni Pablo, nga mahimo gid nagakahulugan nga ining pagsaulog magapadayon tubtob nga mag-abot si Jesus agod batunon ang iya hinaplas nga mga sumulunod sa langit paagi sa pagkabanhaw sa tion sang iya “presensia.” (1 Tesalonica 4:​14-​17) Nagahisanto ini sa ginsiling ni Jesus sa 11 ka matutom nga apostoles: “Kon magalakat ako kag magahanda sing duog para sa inyo, magakari ako liwat kag batunon ko kamo sa akon kaugalingon, agod nga kon diin ako didto man kamo.”​​—⁠Juan 14:3.

 9. Ano ang buot silingon sang ginsiling ni Jesus nga narekord sa Marcos 14:25?

⁹ Sang ginpasad ni Jesus ang Memoryal, ginpatuhuyan niya ang kopa sang alak kag nagsiling sa iya matutom nga mga apostoles: “Indi na gid ako mag-inom sing produkto sang ubas tubtob sa sina nga adlaw nga magainom ako sini sing bag-⁠o sa ginharian sang Dios.” (Marcos 14:25) Sanglit indi mag-inom si Jesus sing literal nga alak sa langit, mahimo gid nga ginahunahuna niya ang kalipay nga kon kaisa ginasimbulo sang alak. (Salmo 104:15; Manugwali 10:19) Ang pag-updanay nila sang iya mga sumulunod sa Ginharian mangin isa ka makalilipay nga eksperiensia nga ila gid ginakalangkagan.​​—⁠Roma 8:​23; 2 Corinto 5:2.

10. Daw ano kasunson dapat saulugon ang Memoryal?

¹⁰ Dapat bala dumdumon ang kamatayon ni Jesus kada bulan, kada semana, ukon kada adlaw pa gani? Indi. Ginpasad ni Jesus ang Panihapon sang Ginuo kag ginpatay sia sa adlaw sang Paskuwa, nga ginsaulog subong “isa ka handumanan” sang kahilwayan sang Israel gikan sa pagkaulipon sa Egipto sang 1513 B.⁠C.⁠E. (Exodo 12:14) Ang Paskuwa ginhiwat sing makaisa lamang kada tuig, sa ika-14 nga adlaw sang Judiyong bulan sang Nisan. (Exodo 12:​1-6; Levitico 23:5) Ginapakita sini nga ang kamatayon ni Jesus dapat lamang dumdumon sing subong kasunson sa Paskuwa​—⁠kada tuig⁠​—⁠indi kada bulan, kada semana, ukon kada adlaw.

11, 12. Ano ang ginasugid sang maragtas tuhoy sa una nga mga pagsaulog sing Memoryal?

¹¹ Gani, nagakaigo nga saulugon ang Memoryal sing kada tuig sa Nisan 14. Ang isa ka reperensia nagsiling: “Ang mga Cristiano sa Asia Minor gintawag nga mga Quartodeciman [Katorsehon] bangod sang ila kustombre nga pagsaulog sing pascha [Panihapon sang Ginuo] sa ika-14 sang Nisan . . . Ang petsa mahimo magtupa sa Biernes ukon sa bisan ano nga adlaw sang semana.”​​—⁠The New Schaff-Herzog Encyclopedia of Religious Knowledge, Tomo IV, pahina 44.

¹² Nagkomento tuhoy isa ka padugi sang ikaduha nga siglo C.⁠E., ang istoryador nga si J. L. Von Mosheim nagsiling nga ginsaulog sang mga Quartodeciman ang Memoryal sa Nisan 14 bangod “ginkabig nila ang halimbawa ni Cristo subong amo ang may awtoridad sa kasuguan.” Ang isa pa ka istoryador nagsiling: “Ang padugi sang mga iglesia sang mga Quartodeciman sa Asia nagahisanto gihapon sa padugi sang iglesia sa Jerusalem. Sang ikaduha nga siglo, gindumdom sining mga iglesia sa ila Pascha sa ika-14 sang Nisan ang gawad nga gin-aman sang kamatayon ni Cristo.”​​—⁠Studia Patristica, Tomo V, 1962, pahina 8.

Ang Kahulugan sang Tinapay

13. Ano nga sahi sang tinapay ang gingamit ni Jesus sang ginpasad niya ang Panihapon sang Ginuo?

¹³ Sang ginpasad ni Jesus ang Memoryal, “nagkuha sia sing tinapay, nagpasalamat, gintipiktipik ini kag ginhatag ini sa [mga apostoles].” (Marcos 14:22) Ang tinapay nga sarang magamit sadto nga okasyon amo ang bag-o lamang magamit sa Paskuwa. (Exodo 13:​6-​10) Sanglit ginluto ini nga wala sing lebadura, manipis ini kag mahagpok, gani dapat ini tipiktipikon agod ipanagtag. Sang milagruso nga ginpadamo ni Jesus ang tinapay para sa linibo, manipis man yadto kag mahagpok, kay gintipiktipik niya yadto agod mapanagtag. (Mateo 14:19; 15:36) Busa, mahimo gid nga wala sing espirituwal nga kahulugan ang pagtipiktipik sa tinapay sang Memoryal.

14. (a) Ngaa nagakaigo nga wala sing lebadura ang tinapay para sa Memoryal? (b) Ano nga sahi sang tinapay ang mabakal ukon maluto agod gamiton sa Panihapon sang Ginuo?

¹⁴ Tuhoy sa tinapay nga gingamit sang ginpasad ang Memoryal, si Jesus nagsiling: “Ini nagakahulugan sang akon lawas para sa inyo.” (1 Corinto 11:24; Marcos 14:22) Nagakaigo nga ang tinapay sadto wala sing lebadura. Ngaa? Bangod ang lebadura nagakahulugan sing kalainan, kalautan, ukon sala. (1 Corinto 5:​6-8) Ang tinapay naglaragway sa himpit, walay sala nga tawhanon nga lawas ni Jesus, nga nagakaigo nga gindulot subong isa ka halad nga gawad. (Hebreo 7:​26; 10:​5-​10) Ginatandaan ini sang mga Saksi ni Jehova kag ginasunod nila ang ginhimo ni Jesus paagi sa paggamit sing walay lebadura nga tinapay kon ginasaulog ang Memoryal. Sa pila ka kaso, ginagamit nila ang wala matimplahan nga matzo sang mga Judiyo, nga wala sing dugang pa nga mga ingrediente, subong sang sibuyas ukon itlog. Sa iban nga paagi, ang tinapay nga walay lebadura sarang mahimo nga ginagamit ang puro nga harina (kon mahimo, trigo) nga ginbutangan sing diutay nga tubig. Ang linamas nga harina dapat ligison sing manipis kag lutuon sa namantikaan diutay nga kalaha tubtob nga magmala kag maghagpok ang tinapay.

Ang Kahulugan sang Alak

15. Ano ang unod sang kopa nga gingamit sang ginpasad ni Cristo ang Memoryal sang iya kamatayon?

¹⁵ Sa tapos mapasa ang tinapay nga walay lebadura, nagkuha si Jesus sing isa ka kopa, “nagpasalamat sia kag ginhatag ini sa [mga apostoles], kag sila tanan nag-inom gikan sa sini.” Si Jesus nagpaathag: “Ini nagakahulugan sang akon ‘dugo sang katipan,’ nga ibubo para sa madamo.” (Marcos 14:​23, 24) Ano ang unod sang kopa? Ginpadalisay nga alak, indi ang wala ginpadalisay nga duga sang ubas. Sa kada tion nga ginapatuhuyan sang Kasulatan ang alak, indi ang wala ginpadalisay nga duga sang ubas ang buot silingon. Halimbawa, ginpadalisay nga alak, indi duga sang ubas, ang magapabusdik sa “daan nga mga suludlan sang alak,” nga ginsiling ni Jesus. Kag ginsumbong si Cristo sang iya mga kaaway nga “palainom sing alak.” Walay pulos nga panumbungon ini kon ang alak duga lamang gali sang ubas. (Mateo 9:17; 11:19) Alak ang gin-inom sang ginsaulog ang Paskuwa, kag gingamit ini ni Cristo sang ginpasad niya ang Memoryal sang iya kamatayon.

16, 17. Ano nga sahi sang alak ang nagakaigo para sa pagsaulog sing Memoryal, kag ngaa?

¹⁶ Mapula lamang nga alak ang nagakaigo nga simbulo sang ginalaragway sang unod sang kopa, kon sayuron, ang ginpaagay nga dugo ni Jesus. Sia mismo nagsiling: “Ini nagakahulugan sang akon ‘dugo sang katipan,’ nga ibubo para sa madamo.” Kag si apostol Pedro nagsulat: “Nahibaluan ninyo [hinaplas nga mga Cristiano] nga indi paagi sa madinulunton nga mga butang, paagi sa pilak ukon bulawan, nga ginluwas kamo gikan sa inyo wala sing pulos nga paggawi nga nabaton paagi sa tradisyon gikan sa inyo mga katigulangan. Kundi paagi sa hamili nga dugo, subong sang kordero nga wala sing kasawayan kag wala sing dagta, kay Cristo mismo.”​​—⁠1 Pedro 1:​18, 19.

¹⁷ Walay duhaduha nga mapula nga alak gikan sa ubas ang gingamit ni Jesus sang ginpasad niya ang Memoryal. Apang, ang iban nga mapula nga mga alak karon, indi nagakaigo nga gamiton bangod ginsimbugan ini sing alkohol ukon brandy ukon gindugangan sing mga herb kag panimpla. Ang dugo ni Jesus tuman na, gani wala nagakinahanglan sing bisan ano nga dugang pa. Busa, ang mga alak subong sang port, sherry, kag vermouth indi nagakaigo. Ang kopa nga ginagamit sa Memoryal dapat mag-unod sing mapula nga alak nga wala ginpatam-is kag wala gindugangan sing alkohol. Ang mapula kag wala ginpatam-is nga alak gikan sa ubas nga ginhimo sa balay sarang magamit, kag amo man ang mga alak subong sang mapula nga burgundy kag claret.

18. Ngaa wala maghimo si Jesus sing milagro sa tinapay kag alak sang Memoryal?

¹⁸ Sang ginpasad ni Jesus ini nga panihapon, wala sia maghimo sing milagro, paagi sa paghimo sa mga emblema nga mangin literal nga unod kag dugo niya. Ang pagkaon sing unod sang tawo kag pag-inom sing dugo mangin kanibalismo, isa ka paglapas sa sugo sang Dios. (Genesis 9:​3, 4; Levitico 17:10) Yara pa sadto kay Jesus ang iya bug-os nga tawhanon nga lawas kag ang iya tanan nga dugo. Ang iya lawas gindulot subong isa ka himpit nga halad, kag ang iya dugo ginbubo pagkadason pa nga hapon sang amo gihapon nga adlaw sang mga Judiyo, Nisan 14. Busa, ang tinapay kag alak sang Memoryal mga emblema lamang, nga nagasimbulo sa unod kag dugo ni Cristo.⁠a

Ang Memoryal​​—⁠Isa ka Ginasaluhan nga Pagkaon

19. Ngaa mahimo nga kapin sa isa ka plato kag isa ka kopa ang magamit sa pagsaulog sang Panihapon sang Ginuo?

¹⁹ Sang ginpasad ni Jesus ang Memoryal, gin-agda niya ang iya matutom nga mga apostoles nga mag-inom gikan sa isa lamang ka kopa. Ang Ebanghelyo ni Mateo nagsiling: “Nagkuha [si Jesus] sing isa ka kopa kag, pagkatapos makapasalamat, ginhatag niya ini sa ila, nga nagasiling: ‘Inom kamo gikan sa sini, kamo tanan.’” (Mateo 26:27) Ang paggamit sing “isa ka kopa” lamang, indi pila ka kopa, indi problema, kay sadto nga okasyon 11 lamang ka umalambit ang yara sa palibot sang isa ka lamesa, gani madali nila mapasapasa ang kopa. Karon nga tuig, minilyon ang magatipon para sa Panihapon sang Ginuo sa kapin sa 94,000 ka kongregasyon sang mga Saksi ni Jehova sa bug-os nga kalibutan. Bangod tuman kadamo ang magatipon para sa sini nga pagsaulog sa isa ka gab-⁠i, indi mahimo nga isa lamang ka kopa ang gamiton para sa tanan. Apang mahuptan gihapon ang prinsipio sa dalagku nga mga kongregasyon paagi sa paggamit sing kapin sa isa ka kopa agod mapasa ini sa tumalambong sa rasonable nga kalawigon sang tion. Subong man, kapin sa isa ka pinggan ang magamit para sa tinapay. Wala ginapakita sa Kasulatan nga dapat may espesipiko nga desinyo ang kopa ukon baso. Apang, dapat nga bagay ang kopa kag plato sa dignidad sang okasyon. Maalamon nga indi pagbutaon ang kopa agod indi mag-alwak ang alak samtang ginapasa ini.

20, 21. Ngaa makasiling kita nga ang Memoryal isa ka ginasaluhan nga pagkaon?

²⁰ Bisan pa kapin sa isa ka plato sang tinapay kag isa ka kopa sang alak ang mahimo gamiton, ang Memoryal isa ka ginasaluhan nga pagkaon. Sa dumaan nga Israel, ang isa ka tawo makaaman sing masaluhan nga pagkaon paagi sa pagdala sing isa ka sapat sa santuaryo sang Dios, diin ginaihaw ini. Ang bahin sang sapat ginasunog sa altar, ang isa ka bahin nagakadto sa nagadumala nga saserdote kag ang isa pa gid ka bahin sa saserdotenhon nga mga anak nga lalaki ni Aaron, kag nagaambit man sa pagkaon ang tawo nga naghalad kag ang iya panimalay. (Levitico 3:​1-​16; 7:​28-​36) Ang Memoryal isa man ka ginasaluhan nga pagkaon bangod ginaambitan ini.

²¹ Nadalahig si Jehova sa sining ginasaluhan nga pagkaon subong amo ang Awtor sini nga kahimusan. Si Jesus amo ang halad, kag ang hinaplas nga mga Cristiano nagaambit sa mga emblema. Ang pagkaon sa lamesa ni Jehova nagakahulugan nga ang mga umalambit may paghidait sa iya. Busa, si Pablo nagsulat: “Ang kopa sang pagpakamaayo nga ginapakamaayo naton, indi bala ini isa ka pagpakig-ambit sa dugo ni Cristo? Ang tinapay nga gintipiktipik naton, indi bala ini isa ka pagpakig-ambit sa lawas ni Cristo? Bangod nga may isa ka tinapay, kita, bisan pa madamo, isa ka lawas, kay nagapakig-ambit kita tanan sa sinang isa ka tinapay.”​​—⁠1 Corinto 10:​16, 17.

22. Ano nga mga pamangkot tuhoy sa Memoryal ang binagbinagon pa naton?

²² Ang Panihapon sang Ginuo amo lamang ang relihiosong pagsaulog nga ginasaulog sang mga Saksi ni Jehova kada tuig. Nagakaigo ini bangod ginsugo ni Jesus ang iya mga sumulunod: “Padayon nga himua ninyo ini sa pagdumdom sa akon.” Sa Memoryal, ginadumdom naton ang kamatayon ni Jesus, isa ka kamatayon nga nagtib-ong sang pagkasoberano ni Jehova. Subong nasambit na naton, sa sining ginasaluhan nga pagkaon, ang tinapay nagasimbulo sa ginhalad nga tawhanon nga lawas ni Cristo kag ang alak sa iya ginpaagay nga dugo. Apang, diutay lamang ang nagaambit sa emblema nga tinapay kag alak. Ngaa? May kahulugan gid bala ang Memoryal para sa minilyon nga indi umalambit? Sa pagkamatuod, ano dapat ang mangin kahulugan sa imo sang Panihapon sang Ginuo?

[Nota]

Ano ang Imo mga Sabat?

• Ngaa ginpasad ni Jesus ang Panihapon sang Ginuo?

• Daw ano kasunson dapat saulugon ang Memoryal?

• Ano ang kahulugan sang tinapay nga walay lebadura sang Memoryal?

• Ano ang ginalaragway sang alak sang Memoryal?

[Retrato sa pahina 15]

Ginpasad ni Jesus ang Panihapon sang Ginuo