Ang Kabuhi kag Ministeryo ni Jesus

“Matuod Gid nga Ini Anak sang Dios”

WALA pa dugay sa usok si Jesus sang may makatalanhaga kag tatlo ka oras nga kadudulman nga natabo sang udto. Indi ini solar nga eklipse, bangod nagakatabo lamang ini sa lati, kag ugsad ang bulan sa tion sang Paskuwa. Isa pa, ang solar nga eklipse nagalawig sing pila lamang ka minuto. Gani ang kadudulman naghalin sa Dios! Ayhan nagpahunahuna ini sa mga nagayaguta kay Jesus, nagpauntat sang ila mga uligyat.

Kon ang makahaladlok nga hitabo natabo antes ginsaway sang malaut ang iya kaupod kag nangabay kay Jesus nga dumdumon sia, ayhan tuga ini sang iya paghinulsol. Ayhan diri sini nga nagpalapit sa usok ang apat ka babayi, nga amo, ang iloy ni Jesus kag ang iya utod nga si Salome, si Maria Magdalena, kag si Maria nga iloy ni apostol Santiago nga Bataon Pa. Kaupod man nila si Juan, ang hinigugma nga apostol ni Jesus.

‘Masakit’ gid sa tagipusuon sang iloy ni Jesus nga makita ang anak nga ginbatiti kag ginpadaku niya nga nagakabit didto sa kasakit! Apang, wala ginahunahuna ni Jesus ang iya kaugalingon nga kasakit, kundi ang kaayuhan sang iya iloy. Upod ang daku nga panikasog, nagliso sia kay Juan kag nagsiling sa iya iloy: “Babayi, yara karon! Ang imo anak!” Nian, nagliso kay Maria, nagsiling sia kay Juan: “Yara karon! Ang imo iloy!”

Busa gintugyan ni Jesus ang pag-atipan sa iya iloy, nga karon isa na ka balo, sa iya hinigugma katama nga apostol. Ginhimo niya ini bangod ang iban nga mga anak ni Maria wala pa magtuo sa iya. Busa nagahatag sia sing maayo nga halimbawa sang pag-aman indi lamang para sa pisikal nga mga kinahanglanon sang iya iloy kundi para man sa iya espirituwal nga mga kinahanglanon.

Mga alas tres sang hapon, si Jesus nagsiling: “Ginauhaw ako.” Nian, natalupangdan nga daw ginkuha na sang iya Amay ang pangamlig sa iya agod matilawan sing bug-os ang iya integridad, nagsinggit sia sa mabaskog nga tingog: “Dios ko, Dios ko, ngaa ginpatumbayaan mo ako?” Pagkabati sini, ang iban nga nagtindog didto nagsiling: “Tan-awa! Nagatawag sia kay Elias.” Sa gilayon nagdalagan ang isa sa ila kag, nagkuha sing esponja, ginpalupsupan ini sing langgaw kag gintakud ang tabun-ak, kag ginpainum ini sa iya. Apang ang iban nagsiling: “Pabayai sia! Tan-awon ta kon makari si Elias sa pagluwas sa iya.”

Sang si Jesus nakabaton sang langgaw, nagsiling sia: “Natuman na!” Huo, gintapos niya ang tanan nga ginpahimo sa iya sang iya Amay sa duta. Sang ulihi, sia nagsiling: “Amay, sa imo mga kamot ginatugyan ko ang akon espiritu.” Gani gintugyan ni Jesus sa Dios ang iya puwersa sang kabuhi sa pagsalig nga ipasag-uli ini liwat sang Dios sa iya. Nian ginduko niya ang iya ulo kag napatay.

Sang nahunus ang ginhawa ni Jesus, ang duta nagtay-ug, kag naglitik ang mga igang. Tuman gid kabaskog ang linog sa bagay nga ang mga lulubngan sa guwa sang Jerusalem nagbukas, kag ang mga bangkay nagguwa. Sang nakita sang mga naglabay nga nagguwa ang mga bangkay, nagsulod sila sa siudad kag ginbalita ini.

Dugang pa, sang napatay si Jesus, ang kumbung nga nagatunga sang Balaan gikan sa Labing Balaan sa templo sang Dios napihak, kutob sa ibabaw tubtob sa idalom. Ayhan ining napunihan sing matahom nga kumbung mga 18 metros kataas kag tuman kabug-at! Ang makakulugmat nga milagro wala lamang nagapakita sang kasingkal sang Dios batok sa mga manugpatay sang Iya Anak kundi nagapakita man nga ang pagsulod sa Labing Balaan, ang langit mismo, ginpaposible na karon bangod sang kamatayon ni Jesus.

Ti, sang nabatyagan sang mga tawo ang linog kag nakita ang mga butang nga nagkalatabo, hinadlukan sila. Ang kapitan nga nagadumala sa pagpatay naghimaya sa Dios. “Matuod gid nga ini Anak sang Dios,” siling niya. Ayhan didto sia sang ginhambalan ang pangangkon sang pagkaanak sang Dios sa pagbista kay Jesus sa atubangan ni Pilato. Kag karon kombinsido sia nga si Jesus Anak sang Dios, huo, nga sia gid ang labing daku nga tawo nga nagkabuhi.

Hinadlukan man ang iban bangod sining milagruso nga mga hitabo, kag nagpauli sila nga nagapamukpuk sang ila mga dughan, tanda sang ila daku nga kasubo kag kahuya. Madamong kababayin-an nga mga disipulo nga natandog sing tudok sining importante nga mga hitabo ang nagatan-aw sa malayo. Yara man si apostol Juan. Mateo 27:45-56; Marcos 15:33-41; Lucas 23:44-49; 2:34, 35; Juan 19:25-30.

◆ Ngaa indi solar nga eklipse ang kabangdanan sang tatlo ka oras nga kadudulman?

◆ Antes sang iya kamatayon, anong maayo nga halimbawa ang ginhatag ni Jesus para sa tigulang nga mga ginikanan?

◆ Ano ang apat ka katapusan nga pinamulong ni Jesus antes sia napatay?

◆ Ano ang nahimo sang linog, kag ano ang importansia sang pagkapihak sang kumbung sa templo?

◆ Paano naapektuhan sang mga milagro ang kapitan nga nagadumala sa pagpatay?