Ang Kabuhi kag Ministeryo ni Jesus

Ginlubong sang Biernes, Isa ka Wala sing Unod nga Lulubngan sang Domingo

KAHAPUNANON na karon sang Biernes, kag ang Adlaw nga Inugpahuway sang Nisan 15 magasugod pagtunod sang adlaw. Ang bangkay ni Jesus nagakabit pa gihapon sa usok, apang ang duha ka makawat sa tupad niya buhi pa. Ang Biernes sang hapon gintawag nga Adlaw sang Pag-aman bangod amo ini ang tion nga ang mga tawo nagaluto sang ila kalan-on kag ginatapos ang bisan anong hilikuton nga indi makahulat sa tapos sang Adlaw nga Inugpahuway.

Ang Adlaw nga Inugpahuway nga malapit na magsugod indi isa ka kinaandan nga Inugpahuway (ang ikapito nga adlaw sang semana) kundi doble man, ukon “daku,” nga Inugpahuway. Amo sini ang pagtawag bangod ang Nisan 15, nga amo ang nahauna nga adlaw sang pito-ka-adlaw nga Piesta sang Tinapay nga Wala sing Lebadura (kag isa pirme ka Adlaw nga Inugpahuway, bisan ano man nga adlaw sang semana ang matup-an sini), nagtupa sa pareho nga adlaw sang kinaandan nga Adlaw nga Inugpahuway.

Suno sa kasuguan sang Dios, ang bangkay indi dapat pag-ibilin nga nagakabit sa usok sa bug-os nga gab-i. Gani nangabay ang mga Judiyo kay Pilato nga padalion ang kamatayon sang mga palatyon paagi sa pagbalbag sang ila mga batiis. Busa, ginbalbag sang mga soldado ang mga batiis sang duha ka makawat. Apang bangod patay na si Jesus, wala pagbalbaga ang iya mga batiis. Nagtuman ini sang kasulatan: “Wala sing isa sang iya mga tul-an ang mabali.”

Apang, agod indi maduhaduhaan nga si Jesus napatay gid, ginbuno sang isa ka soldado ang iya kilid paagi sa bangkaw. Ang bangkaw naglapos sa iya tagipusuon, kag sa gilayon nag-agay ang dugo kag tubig. Si apostol Juan, nga isa ka saksi, nagreport nga gintuman sini ang isa pa ka kasulatan: “Ang mga tawo magatulok sa Iya nga ila ginbuno.”

Ang didto man sa tion sang pagpatay amo si Jose gikan sa siudad sang Arimatea, isa ka kilala nga katapo sang Sanhedrin. Wala sia magbotar pabor sa dimakatarunganon nga aksion sang mataas nga korte batok kay Jesus. Si Jose isa ka disipulo ni Jesus, bisan pa nahadlok sia nga magpakilala sini. Apang, sini nga tion, nagpakaisog sia kag ginkadtuan niya si Pilato agod pangayuon ang bangkay ni Jesus. Ginpatawag ni Pilato ang opisyal sang hangaway nga nagadumala, kag sa tapos mapamatud-an sang opisyal nga patay na si Jesus, ginhatag ni Pilato ang bangkay.

Ginkuha ni Jose ang bangkay kag ginsamburan ini sing matinlo nga panapton nga lino bilang paghanda para sa lubong. Ginbuligan sia ni Nicodemo, isa pa ka katapo sang Sanhedrin. Si Nicodemo wala man magtuad sang iya pagtuo kay Jesus kay nahadlok sia nga basi madula niya ang iya katungdanan. Apang sini nga tion nagdala sia sing treintay tres ka kilo sang mirra kag malahalon nga aloe. Ang bangkay ni Jesus ginputos sa mga bendahe nga ginhaplasan sining mga pahumot, suno sa kinabatasan sang mga Judiyo sa paghanda sang bangkay para sa lubong.

Nian ang bangkay ginbutang sa bag-o nga lulubngan ni Jose nga ginguhab sa igang sa isa ka malapit nga hardin. Kag ginpaligid ang isa ka daku nga bato sa ganhaan sang lulubngan. Agod matapos ang lubong sa wala pa ang Adlaw nga Inugpahuway, madasig nga ginhimo ang paghanda sa bangkay. Busa, si Maria Magdalena kag si Maria nga iloy ni Santiago nga Kubos, nga ayhan nagbulig sa paghanda, nagdalidali pauli agod maghimo sing dugang pa nga inughaplas kag pahamot. Sa tapos sang Adlaw nga Inugpahuway, nagplano sila nga haplasan sing dugang pa ang bangkay ni Jesus agod mapreserbar ini sa malawiglawig nga tion.

Sang masunod nga adlaw, Sabado (ang Adlaw nga Inugpahuway), ang puno nga mga saserdote kag ang mga Fariseo nagkadto kay Pilato kag nagsiling: “Ginuo, nadumduman namon nga yadtong madayaon sang buhi pa nagsiling, ‘Sa tapos sang tatlo ka adlaw mabanhaw ako.’ Busa magsugo ka nga lig-unon ang lulubngan tubtob sa ikatlong adlaw, basi nga magkara ang iya mga disipulo kag kawaton nila sia kag magsiling sa katawhan, ‘Nabanhaw sia!’ kag ining ulihi nga kabutigan mangin malain pa sa nahauna.”

“May manugbantay kamo,” sabat ni Pilato. “Kadto kamo kag lig-una ini suno sa inyo masarangan.” Gani nagkadto sila kag ginlig-on ang lulubngan paagi sa pagpat-in sa bato kag ginpabantayan nila ini sa Romano nga mga soldado.

Sang aga pa sang Domingo si Maria Magdalena, si Maria nga iloy ni Santiago, upod sanday Salome, Joana, kag iban pa nga mga babayi, nagdala sing inughaplas nga pangpresebar sa lulubngan agod ihaplas sa bangkay ni Jesus. Sa dalanon nagsinilingay sila: “Sin-o bala ang papaligiron ta sang bato gikan sa ganhaan sang lulubngan?” Apang pag-abot nila, nasapwan nila nga may linog nga natabo kag ginpaligid sang anghel ni Jehova ang bato. Wala na ang mga manugbantay, kag ang lulubngan wala sing unod! Mateo 27:57–28:​2; Marcos 15:42–16:​4; Lucas 23:50–24:3, 10; Juan 19:31–20:​1; 19:14; 12:42; Levitico 23:5-7; Deuteronomio 21:22, 23; Salmo 34:20; Zacarias 12:⁠10.

◆ Ngaa ang Biernes gintawag nga Adlaw sang Pag-aman, kag ano ang “daku” nga Adlaw nga Inugpahuway?

◆ Ano nga mga kasulatan ang natuman may kaangtanan sa lawas ni Jesus?

◆ Ano ang ginhimo ni Jose kag ni Nicodemo sa lubong ni Jesus, kag ano ang kaangtanan nila kay Jesus?

◆ Ano ang ginpangabay sang mga saserdote kay Pilato, kag ano ang iya ginsabat?

◆ Ano ang natabo sang aga pa sang Domingo?