Ang Pagtamod sang Biblia

May Yawa Gid Bala?

SANG bata ka pa, nahadlok ka bala sa dulom? Ayhan ginahanduraw mo nga may gadya nga nagapanago sa guwa sang inyo bintana, nga nagahulat sa pag-agaw sa imo gikan sa imo mga ginikanan. Karon nga daku ka na, bangod nakabasa ka sing matuod nga impormasyon kag makahunahuna sing kapin ka makatarunganon, ang imo kahadlok sang bata pa ikaw daw wala sing pulos. “Gani,” siling sang iban nga mga kritiko, “ngaa indi amo man sini ang himuon kag ibutang ang Yawa sa amo man nga kategoriya—indi matuod subong sang ginahanduraw nga gadya sang bata?”

Wala sing matuod nga Yawa? Amo gid sina ang ginapasalig sa imo sang isa ka relihioso nga pampleta: “Ang Biblia wala gid sing nahibal-an tuhoy sinang gadya nga yawa” kag, “Sa termino sang Yawa kag ni Satanas may yara kita . . . prinsipio sang sala kag kalautan nga duna sa kinaugali sang tawo.” Ukon suno sa ginsiling sang isa ka manunudlo sa Sunday school sa Estados Unidos: “Ang mga tawo amo ang mga yawa lamang.” Daw simple lamang bala ini—ayhan tuman ka simple?

Pagpaathag sang Tawhanon nga Panimuot

Kon kita nga mga tawo amo ang mga yawa lamang, nian ngaa ang kalabanan sa aton nagakabalaka sa kaayuhan sang aton pamilya? Halimbawa, subong mga indibiduwal ang kalabanan nga tawo nagaaman sing pagkaon para sa ila pamilya; wala ginahiluan sing hungod ang ila kaugalingon, kag ginalikawan nila ang mga katalagman sa kabuhi. Wala sing yawan-on sa sina! Apang, kon ini gihapon nga mga tawo maghikot sing tingob subong mga pungsod, may butang nga nagasablag sa ila pagtamod sang ila kaayuhan tanan. Subong mga pungsod, ginatugutan nila nga madunot ang ila sobra nga pagkaon sa baylo nga ipakaon ini sa ila nagakagutman nga mga pumuluyo. Ginahigkuan nila ang palibot sang duta. Nagahimo sila sing armas para sa pagpatyanay—nuklear nga inaway. Makatilingala, makalaglag sang kaugalingon nga panimuot!

Ano ang nagaimpluwensia sa sining malain nga panimuot sang tawo? Ang mentalidad bala sang mga tawo kon mag-inupdanay sila? Ang pila ka indi makatarunganon nga mga lider? Sa pagkamatuod kapin pa ang nadalahig. Ang Biblia lamang ang nagapakilala sa isa nga “nagbulag sang mga painoino” sang wala nagatuo nga bug-os kalibutan nga “sistema sang mga butang.” Sin-o? “Ang isa nga ginatawag Yawa kag Satanas, nga nagapatalang sa bug-os napuy-an nga duta.” Ginamaniobra nila ang organisado nga humanidad sing madinalag-on gid nga ginatawag sia sang Biblia “ang dios” sining bug-os kalibutan nga sistema.—2 Corinto 4:4; Bugna 12:9.

Ining “dios” indi isa ka imahinasyon nga malaut nga nagapanago sa guwa sang imo bintana. Kundi isa sia ka gamhanan nga politikal nga manugpadihot, isa ka dimakita nga espiritu, nga, sa indi madinalag-on nga pagtinguha sa katutom ni Jesus, nagtanyag kay Jesus sang tanan nga ginharian sang kalibutan. (Lucas 4:6, 7) Mahimo gid nga may ginhatagan na si Satanas sina nga gahom antes niya gintanyag ini kay Jesus, kay ginapadayag sang tulun-an nga Daniel sang Biblia subong mga deputado, ang rebelde nga mga anghel nga nagbaton sing gahom sa bug-os kalibutan nga mga emperyo—nga may opisyal nga mga titulo subong sang “prinsipe sang Persia,” kag “prinsipe sang Gresya.”—Daniel 10:20, 21.

Sa amo, nagtukod si Satanas sing daku nga organisasyon—subong “manuggahom sang [kitaon] nga kalibutan” kag “manuggahom sang [dikitaon] nga mga demonyo.” (Juan 14:30; 16:11; Mateo 12:24) Madamo ang ginapaathag sining paghantop nga ang Yawa nagadumala sing isa ka bug-os kalibutan nga organisasyon.

Kon Ngaa Nagadumala Sia sing Isa ka Organisasyon

Subong nga ang isa ka puno sang organisado nga krimen makadumala sang madamo sang ginadumilian nga operasyon—droga, prostitusyon, pangawat, sugal, ismagling, kag iban pa—nga wala sing personal nagapakilala sang iya kaugalingon sa tanan nga sakop niya, si Satanas man nagagamit sing organisasyon nga nagakontrol sa madamo nga tawo nga indi niya masarangan kon isahanon lamang sia. Ang iya estratehiya? Wala labot nga ginaatake nila ang mga indibiduwal, sia kag ang mga demonyo nagatratar sa mga masa sang katawhan nga subong nga daw isa sila ka panong sang mga baka. Indi na kinahanglan nga tuytuyan ang kada isa sa ila sing personal. Palisua lamang ang pila sa unahan sang panong, kag ang nabilin magasunod. Nian magkonsentrar sa mga nagtalang.

Huo, matuod gid ang Yawa, apang ang iya matuod nga identidad wala nagaanggid sa karikatura nga makita naton sa mga cartoon ukon sa malubog nga mga teoriya sang mga teologo. Malubog? Huo, subong ginasiling sang libro nga Satan, A Portrait: “Ang pagtuo kay Satanas indi na tanto kaathag” sa ika-19 nga siglo, kag ang mga teologo “nagtinguha sa pagpaathag nga si Satanas indi isa ka espiritu nga persona.”

Sin-o ang Nagasugid sing Kamatuoran Tuhoy sa Yawa?

Ang pagkahanda sang moderno nga mga relihion sa pagduhaduha sa ginasiling sang Biblia tuhoy sa Yawa nagapahamuot sa materyalistiko nga katilingban nga wala na nakapat-od tuhoy sa Dios. “Sa karon,” siling ni Ruth Ansher sa iya libro nga The Reality of the Devil, “ang Yawa nadula na kag . . . ang Dios nagpahigad na.”

Sa pagduhaduha sa pagtamod sang Biblia, ginsikway sang mga “eksperto” sang modernong mga relihion ang isa ka kamatuoran agod mahangpan ang maragtas. Subong ginbaton sang isa ka Romanianhon nga manunulat sing drama nga si Eugène Ionesco sa isa ka Aleman nga pamantalaan: “Ang maragtas indi mahangpan kon ipuwera naton ang mga demonyo.”—Welt am Sonntag, Septiembre 2, 1979.

May yara bala may kaisog sa pagsakdag sa kamatuoran tuhoy sa papel sang Yawa sa kasisit-an sa kalibutan karon? Sing maathag, huo! Binagbinaga ang “Deklarasyon Batok kay Satanas kag Para kay Jehova” nga may paghiusa nga ginbaton sa isa ka kombension sang 1928. Ginpapanaad sini ang mga Saksi ni Jehova nga iwali, kaangay sang singgit sa inaway batok sa kaaway sang tawo, si Satanas, nga ang nagapakari nga dakung inaway sang Armagedon magapadulog sa indi madugay kay Satanas kag sa iya malaut nga organisasyon.

Sa pagkamatuod, ang maragtas nagapamatuod nga ang Yawa isa ka matuod gid nga kaaway sang tagsatagsa sa aton. Apang, sing maathag, wala kita ginpabay-an ni Jehova nga Dios nga kita lamang. Ngaa indi magtuon sing dugang pa? Mapuslanon gid nga makilala ang aton kaaway, “agod nga indi kita madaug ni Satanas, kay indi kita ignorante sang iya mga pahito.”—2 Corinto 2:11.

[Laragway sa pahina 12]

Ang matuod nga Yawa wala gid sing pagkaanggid sa relihioso nga mga laragway ukon malubog nga mga teoriya sang mga teologo

[Piktyur sa pahina 13]

“Ang Yawa karon nadula na kag . . . ang Dios nagpahigad na.”

[Ginkuhaan]

Gustave Dore