Ang Kabuhi kag Ministeryo ni Jesus

Ang mga Luha Nangin Daku nga Kalipay

SANG makita ni Jairo nga nag-ayo ang babayi nga may tagas sang dugo, ang iya pagsalig sa milagruso nga gahom ni Jesus walay duhaduha nga nagdugang. Sang temprano sina nga adlaw, ginpangabay ni Jai­ro si Jesus nga magkadto kag buligan ang iya palangga nga 12-anyos nga bata nga babayi, nga nagatagumatayon. Apang samtang nagapakadto sila sa balay ni Jairo, nga yara ukon malapit sa Capernaum, ang babayi nga nagtandog lamang sang kunup ni Jesus nag-ayo.

Walay sapayan, ginakulbaan si Jairo. Samtang nagapakighambal pa gihapon si Jesus sa babayi, ang iban nga lalaki nag-abot kag hipos nga nagsugid kay Jairo: “Ang imo anak nga babayi patay na. Ngaa bala budlayon mo pa ang manunudlo?”

Makapulung-aw gid ang balita! Hunahunaa lamang: Ini nga tawo, nga ginatahod sing daku sa komunidad, halos wala sing mahimo karon sang mahibaluan niya nga patay na ang iya anak. Apang, nabatian ni Jesus hambalanay. Gani, nagabalikid kay Jairo, nagsiling sia sing makapalig-on: “Dili ka mahadlok, magtuo ka lamang.”

Gin-updan ni Jesus ang masinulub-on nga tawo sa iya balay. Sang mag-abot sila, nakita nila ang kinagahud sang nagahibi kag nagahaya. Ang kadam-an nagtipon, kag nagapangasubo gid sila. Sang magsulud si Jesus, namangkot sia: “Ngaa bala nagagahud kamo kag nagahibi? Ang bata indi patay kundi nagakatulog.”

Pagkabati sini, ginkadlawan sing mayugataon sang mga tawo si Jesus bangod nahibaluan nila nga ang dalagita patay gid. Apang, si Jesus nagsiling nga nagakatulog lamang sia, agod ipakita nga, paagi sa iya hatag-Dios nga mga gahom, ang mga tawo mabanhaw gikan sa kamatayon sing subong kadali sang pagbugtaw nila gikan sa mahamuok nga katulugon.

Ginpaguwa ni Jesus ang tanan luwas kay Pedro, kay Juan, kay Santiago, kag sa iloy kag amay sang patay nga dalagita. Nian gin-upod niya ining lima pakadto sa ginahamyangan sang dalagita. Nagakaput sa iya kamut, si Jesus nagsiling: “Talʹi·tha cuʹmi,” nga, kon badbaron, nagakahulugan sing, “Inday, nagasiling ako sa imo, Bangon!” Kag sa gilayon nagtindog ang dalagita kag naglakat! Naorongan ang iya mga ginikanan.

Sang nagsugo sia nga dalhan sing pagkaon ang dalagita, gintugunan niya si Jairo kag ang iya asawa nga indi pag-ipanugid ang natabo. Apang walay sapayan sang ginsiling ni Jesus, ang balita nahanungod sini naglapnag sa bug-os sina nga rehiyon. Amo ini ang ikaduha nga pagbanhaw nga ginhimo ni Jesus. Mateo 9:18-26; Marcos 5:35-43; Lucas 8:41-56.

◆ Ano nga balita ang nabaton ni Jairo, kag paano sia ginpalig-on ni Jesus?

◆ Ano ang kahimtangan sang mag-abot sila sa balay ni Jairo?

◆ Ngaa nagsiling si Jesus nga ang dalagita nagakatulog lamang?

◆ Sin-o ang lima nga kaupod ni Jesus nga nakasaksi sang pagbanhaw?