Ginpadala ni Jesus ang 70 ka Disipulo sa Pagbantala

Manugtapos na ang tuig 32 C.E., mga tatlo ka tuig sugod sang nabawtismuhan si Jesus. Bag-o lang sila nagtambong sang iya mga disipulo sa Kapiestahan sang mga Tabernakulo sa Jerusalem. Mahimo nga wala pa sila makapalayo. (Lucas 10:38; Juan 11:1) Ang matuod, ginhinguyang ni Jesus ang halos nabilin nga anom niya ka bulan sa pagministeryo sa Judea ukon sa tabok sang Suba Jordan sa distrito sang Perea. Kinahanglan man nga bantalaan ini nga mga duog.

Pagkatapos sang Paskua sang 30 C.E., pila ka bulan nga nagbantala si Jesus sa Judea kag naglakbay sa Samaria. Nian sang tion sang Paskua sang 31 C.E., gintinguhaan sia nga patyon sang mga Judiyo sa Jerusalem. Sa masunod nga isa ka tuig kag tunga, pirme nagpanudlo si Jesus sa aminhan, sa Galilea. Madamo ang nangin sumulunod niya didto. Sa Galilea, ginhanas ni Jesus ang iya mga apostoles kag ginhatagan sila sing instruksion: “Magbantala kamo nga nagasiling, ‘Ang Ginharian sang langit malapit na.’” (Mateo 10:5-7) Dayon, gin-organisar niya ang kampanya sa pagpanaksi sa Judea.

Sa pagsugod sini nga kampanya, ginpili ni Jesus ang 70 ka disipulo kag ginpadala sila sing tagduhaduha. Gani may 35 ka paris sang manugbantala sang Ginharian sa teritoryo, diin “madamo ang alanyon, apang diutay lamang ang mangangani.” (Lucas 10:2) Sila ang mauna sa mga lugar nga mahimo kadtuan man ni Jesus. Magapang-ayo sila kag magapalapnag sang mensahe nga ginproklamar man ni Jesus.

Ini nga mga disipulo indi magpokus sa pagpanudlo sa mga sinagoga. Ginsilingan sila ni Jesus nga magkadto sa mga balay. “Kon magsulod kamo sa isa ka balay,” siling niya, “magsiling kamo anay: ‘Kabay nga may paghidait sa sini nga balay.’ Kag kon may tawo didto nga mahidaiton, ang inyo paghidait magapabilin sa iya.” Ano ang ila mensahe? Nagsiling si Jesus: “Isiling sa ila: ‘Ang Ginharian sang Dios malapit na.’”—Lucas 10:5-9.

Ang mga instruksion ni Jesus sa 70 ka disipulo kaanggid sa ginhatag niya sa 12 ka apostoles nga iya ginpadala mga isa ka tuig ang nagligad. Ginpaandaman niya sila nga indi tanan magabaton sa ila sing maayo. Pero ang ila mga panikasog magahanda sa mga mabinatunon amo nga kon mag-abot sa indi madugay si Jesus, madamo ang malipay sa pagbaton kag pagtuon sa Agalon.

Wala madugay, ang 35 ka paris sang manugbantala sang Ginharian nagbalik kay Jesus. Malipayon sila nga nagsiling sa iya: “Ginuo, paagi sa paggamit sang imo ngalan, bisan ang mga demonyo nagtuman sa amon.” Nalipay gid si Jesus sa sining maayo nga report kay nagsabat sia: “Nakita ko si Satanas nga nahulog na kaangay sang kilat halin sa langit. Ginhatagan ko kamo sing awtoridad sa pagtasak sa mga man-ug kag sa mga iwiiwi.”—Lucas 10:17-19.

Gani ginapasalig ni Jesus ang iya mga sumulunod nga magadaug sila sa makahalalit nga mga butang, nga malaragwayon nga nagatasak sang mga man-ug kag mga iwiiwi. Dugang pa, makapat-od sila nga mahulog sa ulihi si Satanas halin sa langit. Ginbuligan man ni Jesus ang 70 ka disipulo nga mahangpan kon ano gid ang importante. Sia nagsiling: “Indi kamo magkalipay bangod gintuman kamo sang mga espiritu, kundi magkalipay kamo bangod ang inyo ngalan nasulat na sa langit.”—Lucas 10:20.

Nalipay gid si Jesus kag gindayaw niya sa publiko ang iya Amay sa paggamit sa sining mapainubuson nga mga alagad sa gamhanan nga paagi. Nagbalikid sia sa iya mga disipulo kag ginsilingan sila: “Malipayon ang mga mata nga nakakita sang mga butang nga inyo nakita. Kay nagasiling ako sa inyo, madamo nga manalagna kag mga hari ang naghandum nga makita ang mga butang nga inyo nakita apang wala nila ini makita, kag naghandum nga mabatian ang mga butang nga inyo nabatian apang wala nila ini mabatii.”—Lucas 10:23, 24.