Ginhimo Nila ang Kabubut-on ni Jehova

Ginpadala ni Jesus ang 70 ka Disipulo

TIGRAGAS sadto sang 32 C.E. Anom ka bulan na lamang antes mapatay si Jesus. Busa, agod mapadasig ang pagbantala nga hilikuton kag mapauswag ang paghanas sang pila sang iya mga alagad, gintangdo niya ang 70 ka disipulo kag “ginpadala sila sing tagduha-duha sa unahan niya sa tagsa ka siudad kag duog nga kadtuan niya mismo.”​—⁠Lucas 10:⁠1.a

Ginpadala ni Jesus ang iya mga disipulo “sa unahan niya” agod nga ang mga tawo makadesisyon gilayon kon bala dampig sila ukon batok sa Mesias kon mag-abot na mismo si Jesus. Apang ngaa ginpadala niya sila “sing tagduha-duha”? Sing maathag, agod nga makapalig-on sila sa isa kag isa kon makaatubang sing mga pagpamatok.

Ginapadaku ang pagkahilingagawon sang ila pagbantala nga hilikuton, ginsilingan ni Jesus ang iya mga sumulunod: “Sa pagkamatuod, ang alanyon bugana, apang ang mga mamumugon diutay. Busa pangabay kamo sa Agalon sang alanyon nga magpadala sia sing mga mamumugon sa iya alanyon.” (Lucas 10:⁠2) Ang pagpaanggid sa alanyon nagakaigo, kay ang pagkaatrasar sa tig-alani mahimo makauyang sing malahalon nga mga produkto. Sa amo man nga paagi, kon patumbayaan sang mga disipulo ang ila pagbantala nga hilikuton, mahimo mawasi ang malahalon nga mga kabuhi!​—⁠Ezequiel 33:⁠6.

Wala sing Tublag nga mga Ministro

Dugang nga ginsilingan ni Jesus ang iya mga disipulo: “Indi kamo magdala sing puyo-puyo, ukon sing balalunan sang pagkaon, ukon mga sandalyas, kag indi paghaksa sa pag-abi-abi ang bisan sin-o sa dalan.” (Lucas 10:⁠4) Kinabatasan na para sa isa nga nagalakbay nga magdala indi lamang sing puyo-puyo kag kalan-on kundi sing isa man ka paris nga sandalyas, kay ang mga suwelas mahimo maupod kag ang mga liston mahimo magkalabugto. Apang indi dapat magkabalaka ang mga disipulo ni Jesus tuhoy sinang mga butang. Sa baylo, dapat sila magsalig nga atipanon sila ni Jehova paagi sa masigka-Israelinhon, nga kinabatasan ang pagkamaabiabihon.

Apang ngaa ginsilingan ni Jesus ang iya mga disipulo nga indi paghakson sa pag-abiabi ang bisan sin-o? Mangin dimaabiabihon bala sila, kag dimainabyanon pa gani? Indi gid! Ang Griegong tinaga nga a·spaʹzo·mai, buot silingon paghakos sa pag-abiabi, mahimo nagakahulugan sing kapin pa sa matinahuron nga pagtamyaw. Mahimo man ini maglakip sa kinabatasan nga paghalukay, paghaksanay, kag malawig nga pag-istoryahanay kon magkit-anay ang duha ka magkilalahay. Ang isa ka komentarista nagsiling: “Ang mga panamyaw sa Sidlangan wala lamang nagalakip, subong sa aton sa Nakatundan, sing pagduko diutay sing ulo, ukon pagpangamusta, kundi ginahimo ini paagi sa madamo nga paghaksanay, kag pagduko tudo, kag pagyaub pa gani sa duta. Tanan ini nagakinahanglan sing daku nga tion.” (Ipaanggid ang 2 Hari 4:29.) Sa amo ginbuligan ni Jesus ang iya mga sumulunod nga likawan ang indi kinahanglanon, bisan pa kinabatasan, nga mga tublag.

Sang ulihi, ginsilingan ni Jesus ang iya mga disipulo nga kon magsulod sila sa balay kag gin-abiabi, dapat sila ‘magpabilin sa amo nga balay, nga nagakaon kag nagainom sing mga butang nga ila iaman.’ Apang kon magsulod sila sa isa ka siudad kag wala sila ginabaton, dapat sila “magguwa sa malapad nga mga dalan sini kag magsiling, ‘Bisan ang yab-ok nga nagtapik sa amon mga tiil gikan sa inyo siudad, ginapipi namon batok sa inyo.’ ” (Lucas 10:​7, 10, 11) Ang pagpipi ukon pagtaktak sing yab-ok gikan sa tiil sang isa nagapahangop nga ang mga disipulo mahidaiton nga nagatugyan sang dimabinatunon nga balay ukon siudad sa mga resulta nga magaabot sa ulihi gikan sa Dios. Apang yadtong mainayuhon nga nagbaton sa mga disipulo ni Jesus pagapakamaayuhon. Ginsilingan ni Jesus ang iya mga apostoles sa isa pa ka higayon: “Sia nga nagabaton sa inyo nagabaton man sa akon, kag sia nga nagabaton sa akon nagabaton man sa iya nga nagpadala sa akon. Kag ang bisan sin-o nga nagahatag sa isa sining mga kubos sing isa lamang ka tagayan sang mabugnaw nga tubig nga mainom bangod isa sia ka disipulo, sa pagkamatuod nagasiling ako sa inyo, indi gid niya madula ang iya padya.”​—⁠Mateo 10:​40, 42.

Mga Leksion Para sa Aton

Ang komisyon sa pagbantala sing maayong balita sang Ginharian sang Dios kag sa paghimo sing mga disipulo ginatuman na karon sang kapin sa 5,000,000 ka mga Saksi ni Jehova sa bug-os nga kalibutan. (Mateo 24:14; 28:​19, 20) Nahisayran nila nga ang ila mensahe hilingagawon. Busa, ginagamit nila sing maayo gid ang ila tion, ginalikawan ang mga tublag nga magaupang sa ila sa paghatag sing bug-os nga atension sa ila importante nga hilikuton.

Ginatinguhaan sang mga Saksi ni Jehova nga mangin mainabyanon sa tanan nga ila masugata. Apang, wala lamang sila nagauluistorya sing walay pulos, ukon nagapakigdebate tuhoy sa mga problema sang katilingban ukon sa napaslawan nga mga pagtinguha sining kalibutan nga tadlungon ang mga inhustisya. (Juan 17:16) Sa baylo, ginasentro nila ang ila paghambalanay sa lamang nga solusyon sa mga problema sang tawo​—⁠ang Ginharian sang Dios.

Sa masami, ang mga Saksi ni Jehova makita nga nagapanghikot nga paris-paris. Indi bala dugang pa ang mahimo kon ang tagsa sa ila manghikot sing isahanon? Siguro. Apang, nakita sang mga Cristiano karon ang kaayuhan sang pagpanghikot nga kaupod ang isa ka masigkatumuluo. Nagahatag ini sing proteksion sa pila ka kasangkaron kon nagapanaksi sa makatalagam nga mga duog. Ang pagpanghikot nga may kaupod nagabulig man sa mga bag-uhan nga makabenepisyo gikan sa kalantip sang mas eksperiensiado nga mga manugbantala sing maayong balita. Sa pagkamatuod, makapalig-unay sila nga duha.​—⁠Hulubaton 27:⁠17.

Wala sing duhaduha, ang pagbantala nga hilikuton amo ang labing hilingagawon nga hilikuton nga ginahimo sa sining “katapusan nga mga adlaw.” (2 Timoteo 3:⁠1) Malipayon ang mga Saksi ni Jehova nga matigayon ang suporta sang bug-os kalibutan nga paghiliutod nga nagapangabudlay sila “sing tingob tungod sa pagtuo sa maayong balita.”​—⁠Filipos 1:⁠27.

[Footnote]