Ang Kabuhi kag Ministeryo ni Jesus

Ang Mabuot nga Samariahanon

AYHAN si Jesus malapit sa Betania, isa ka minuro nga mga tatlo ka kilometro halin sa Jerusalem. Ginpalapitan sia sang isa ka tawo nga eksperto sa Kasuguan ni Moises kag namangkot sia: “Manunudlo, ano bala ang himuon ko sa pagpanubli sang kabuhi nga walay katapusan?”

Namutikan ni Jesus nga ang tawo, nga isa ka abogado, wala nagapamangkot agod makakuha sing impormasyon kundi bangod luyag niya nga tilawan sia. Mahimo nga tuyo sang abogado nga pasabton si Jesus sa paagi nga magasaklaw sa pagtuluohan kag paghantop sang mga Judiyo. Gani ang abogado ang ginpasabat ni Jesus, sa pagpamangkot: “Ano bala ang nasulat sa Kasuguan? Paano bala ang pagbasa mo?”

Bilang sabat, ang abogado, nga nagpakita sing dikinaandan nga paghantop, nagbalikwat gikan sa kasuguan sang Dios sa Deuteronomio 6:5 kag Levitico 19:​18, nga nagasiling: “Higugmaa si Jehova nga imo Dios sa bug-os mong tagipusuon, kag sa bug-os mong kalag, kag sa bug-os mong kusog, kag sa bug-os mong hunahuna,’ kag ‘ang imo isigkatawo subong sang imo kaugalingon.’ ”

“Nagsabat ka sing matadlong,” sabat ni Jesus. “Himua ini sing padayon kag magakabuhi ka.”

Apang, wala maayawi ang abogado. Para sa iya indi bastante ang sabat ni Jesus. Luyag niya nga lig-unon ni Jesus nga ang iya kaugalingon nga pagtamod matadlong kag busa matarong sia sa iya pagtratar sa iban. Gani, namangkot sia: “Sin-o bala ang akon isigkatawo?”

Nagapati ang mga Judiyo nga ang termino nga “isigkatawo” nagapatuhoy lamang sa mga masigka Judiyo, subong sang daw ginapakita sang konteksto sa Levitico 19:18. Sa katunayan, bisan si apostol Pedro nagsiling sang ulihi: “Kamo gid nakahibalo nga indi tugut sa isa ka Judiyo ang pagpakig-impon ukon pagpalapit sa isa nga tuhay sing rasa.” Busa ang abogado, kag ayhan ang mga disipulo man ni Jesus, nagapati nga matarong sila kon mangin malulo sila sa mga masigka Judiyo lamang, bangod, sa ila pagtamod, ang mga di-Judiyo indi nila mga isigkatawo.

Wala nagasaklaw sa iya mga tagpalamati, paano matadlong ni Jesus ang ila pagtamod? Nagsugid sia sang isa ka sugilanon, ayhan pasad sa isa ka matuod nga hitabo. “May isa ka [Judiyo],” paathag ni Jesus, “nga nagapakadto sa Jerico gikan sa Jerusalem, kag ginbanggaan sia sang mga buyong, nga naghublas kag nagbakul sa iya, kag nagtaliwan, nga nagabiya sa iya nga daw patay.”

“Karon natabo,” padayon ni Jesus, “nga may saserdote nga nagadulhog sa sadtong dalan, kag, sang nakita niya sia nagligad sia sa pihak. Sa among bagay, ang Levita man, sang nag-abot sia sa sadtong duog kag nakakita sa iya, nagligad sa pihak. Apang ang isa ka Samariahanon sang nagpanlakatan nag-abot diin sia kag, sang nakita niya sia, naluoy sia.”

Madamong saserdote kag mga kabulig nila nga mga Levita sa templo ang nagapuyo sa Jerico, nga 23 ka kilometro ang kalayuon sa makatalagam nga dalan nga dulhugon sing 900 ka kilometro gikan sa ginaalagaran nila sa templo sa Jerusalem. Ginapaabot nga ang saserdote kag Levita magabulig sa isa ka masigka Judiyo nga nagakinahanglan. Apang wala sila magbulig. Sa baylo, ang Samariahanon amo ang nagbulig. Daku ang kaugot sang mga Judiyo sa mga Samariahanon sa bagay nga sining karon lang gin-insulto nila si Jesus sa matigdas nga hambal paagi sa pagtawag sa iya nga “isa ka Samariahanon.”

Ano ang ginhimo sang Samariahanon agod buligan ang Judiyo? “Nagpalapit sia sa iya,” siling ni Jesus, “kag ginsamburan ang iya mga pilas, nga ginabubuan sing lana kag alak. Kag ginpasakay niya sia sa iya kaugalingon nga hayup kag gindala sia sa dalayunan kag gin-atipan sia. Kag sang madason nga adlaw nagkuha sia sing duha ka denario [sueldo sa mga duha ka adlaw], ginhatag sila sa tagbalay, nga nagasiling, ‘Atipana sia, kag bisan ano nga magamit mo nga dugang, ako sa akon pagbalik magabayad sa imo.’ ”

Sa tapos masugid ang sugilanon, ginpamangkot ni Jesus ang abogado: “Sin-o bala sining tatlo, sa hunahuna mo, ang nangin isigkatawo sa ginbanggaan sang mga buyong?”

Nasaw-ahan sa paghatag sing merito sa isa ka Samariahanon, ang abogado nagsabat sing simple: “Ang nagpakita sing kaluoy sa iya.”

“Lakat kag himua ang subong,” siling ni Jesus.

Kon ginsilingan kuntani sing direkta ni Jesus ang abogado nga ang mga di-Judiyo mga isigkatawo man niya, mahimo nga indi lamang nga wala niya ini pagbatuna kundi mahimo nga ang kalabanan sa tumalambong magadampig sa iya sa pagpakigsugilanon kay Jesus. Apang, ining matuodtuod nga sugilanon nagapaathag sa dimabais nga paagi nga ang aton mga isigkatawo nagalakip sa mga tawo nga luwas sadtong yara sa aton kaugalingon nga rasa kag nasyonalidad. Daw ano gid katahom ang paagi ni Jesus sa pagpanudlo. Lucas 10:​25-37; Binuhatan 10:28; Juan 4:9; 8:⁠48.

◆ Ano ang ginpamangkot sang abogado kay Jesus, kag ano gid ang tuyo niya sa pagpamangkot?

◆ Sin-o ang ginapatihan sang mga Judiyo nga isigkatawo nila, kag ano ang rason sa pagpati nga bisan ang mga disipulo may amo man nga pagpati?

◆ Paano ginpaguwa ni Jesus ang matadlong nga pagtamod agod indi ini mabais sang abogado?