Pareho Bala kay Jehova ang Imo Panghunahuna?

 1, 2. Samtang nagasuod pa gid kita kay Jehova, ano ang matun-an naton nga himuon? Maghatag sing halimbawa.

MAY nabaton nga regalo ang isa ka bata. Ginsilingan sia sang iya mga ginikanan, “Magpasalamat ka.” Nagtuman ang bata kay ginsugo sia. Pero samtang nagadaku sia, nahangpan niya kon ngaa nagapati ang iya mga ginikanan nga importante nga magpasalamat kon may ginhimo nga maayo ang iban. Gani nagapasalamat na sia dayon sing kinabubut-on. Ngaa? Bangod nagapati na sia nga dapat ini himuon.

² Sang una naton nga mabal-an ang kamatuoran, natun-an naton nga importante nga tumanon ang mga ginasugo ni Jehova. Pero samtang nagasuod pa gid kita kay Jehova, madamo pa kita sing matun-an parte sa iya panghunahuna, kon ano ang iya nahamut-an, ginadumtan, kag ang iya pagtamod sa mga sitwasyon. Kon tugutan naton ang panghunahuna ni Jehova nga mag-impluwensia sa aton paggawi kag mga desisyon, mangin pareho sa iya ang aton panghunahuna.

3. Ngaa mahimo kita mabudlayan nga mangin pareho kay Jehova ang aton panghunahuna?

³ Makalilipay magtuon para mangin pareho kay Jehova ang aton panghunahuna, pero mabudlay ini himuon kon kaisa bangod indi kita perpekto. Halimbawa, mahimo nga wala naton mahangpan sing maayo ang pagtamod ni Jehova sa katinlo sa moral, materyalismo, pagbantala, sala nga paggamit sa dugo, ukon sa iban pa. Ano ang himuon naton para mangin pareho sa Dios ang aton panghunahuna? Kag paano ini makabulig para makahimo kita sing maayo nga mga desisyon subong kag sa ulihi?

4. Ano ang kahulugan sang ginsiling ni Pablo nga “bag-uha na ninyo ang inyo panghunahuna”?

⁴ Basaha ang Roma 12:2. Ginhambal diri ni apostol Pablo kon ano ang dapat naton himuon para mangin pareho kay Jehova ang aton panghunahuna. Sa nagligad nga artikulo, ginpalig-on kita nga ‘untatan na ang pagpadihon sa mga dalanon sang katawhan sini nga sistema sang mga butang’ paagi sa pagsikway sa mga ideya kag panimuot sang kalibutan. Pero nagsiling man si Pablo nga dapat ‘bag-uhon na naton ang aton panghunahuna.’ Nagakahulugan ini nga dapat naton tun-an ang Pulong sang Dios, hangpon ang iya panghunahuna, pamalandungan ini, kag ipahisuno sa sini ang aton panghunahuna.

5. Ipaathag kon ngaa ang pagtuon tuhay sa pahapyaw nga pagbasa.

⁵ Ang pagtuon tuhay sa pahapyaw nga pagbasa kag sa pagkurit sang mga sabat sa mga pamangkot sa tulun-an nga mga artikulo. Kon nagatuon kita, ginabinagbinag naton kon ano ang ginasugid sang aton ginatun-an parte kay Jehova, sa iya mga pamaagi, kag sa iya panghunahuna. Ginatinguhaan naton nga mahangpan kon ngaa ginasugo kita sang Dios nga himuon ang isa ka butang kag likawan ang isa ka butang. Ginapamensaran man naton kon ano ang dapat naton bag-uhon sa aton paggawi kag panghunahuna. Matuod, indi man posible nga tanan ini mapamalandungan naton kada magtuon kita. Pero mas maayo kon maghatag kita sing tion sa pagpamalandong sa aton ginabasa, ayhan katunga sang tion nga ginagamit naton sa kada pagtuon.—Sal. 119:97; 1 Tim. 4:15.

6. Ano ang resulta kon pamalandungan naton ang panghunahuna ni Jehova?

⁶ Maayo gid ang resulta kon pirme kita nagapamalandong sa Pulong sang Dios. ‘Mapamatud-an naton sa aton kaugalingon,’ ukon makumbinsi kita, nga himpit gid ang panghunahuna ni Jehova. Mahangpan naton ang iya pagtamod kag magaugyon kita sa sini. Mangin ‘bag-o na’ ang aton paagi sang paghunahuna. Amat-amat nga mangin pareho kay Jehova ang aton panghunahuna.

 7, 8. (a) Ano ang pagtamod ni Jehova sa materyal nga mga butang? (Tan-awa ang mga piktyur sa umpisa sini nga artikulo.) (b) Kon pareho sa iya ang aton pagtamod, ano dapat ang pinakaimportante sa aton?

⁷ May epekto ang aton panghunahuna indi lang sa aton pagtamod kundi sa aton man paggawi. (Mar. 7:21-23; Sant. 2:17) Binagbinagon naton ang pila ka halimbawa para mahangpan naton ini. Una, maathag nga ginapakita sang mga Ebanghelyo kon paano ginatamod ni Jehova ang materyal nga mga butang. Ang Dios mismo ang nagpili kanday Jose kag Maria nga magpadaku kag mag-atipan sa iya Anak bisan pa indi sila manggaranon. (Lev. 12:8; Luc. 2:24) Sang natawo si Jesus, “ginpahigda [sia ni Maria] sa pasungan, bangod wala na sing kuarto para sa ila sa dalayunan.” (Luc. 2:7) Kon gustuhon ni Jehova nga matawo ang iya Anak sa mas maayo nga lugar, puede gid niya ini himuon. Pero mas importante kay Jehova nga magdaku si Jesus sa isa ka pamilya nga ginauna ang pagsimba sa Dios.

⁸ Base sa sini nga rekord sang Biblia sang natawo si Jesus, matun-an naton ang pagtamod ni Jehova sa materyal nga mga butang. Gusto sang pila ka ginikanan nga matigayon sang ila kabataan ang pinakamaayo nga materyal nga mga butang, bisan pa paluyahon sini ang kaangtanan sang ila kabataan kay Jehova. Pero maathag nga ang pinakaimportante kay Jehova amo ang aton kaangtanan sa iya. Pareho bala kay Jehova ang imo pagtamod? Makita bala ini sa imo ginahimo?—Basaha ang Hebreo 13:5.

 9, 10. Paano naton mapakita nga pareho kay Jehova ang pagtamod naton parte sa pagpasandad sa iban?

⁹ Ang isa pa ka halimbawa amo ang pagtamod sang Dios sa isa nga nagapasandad sa iban. Nagsiling si Jesus: “Ang bisan sin-o nga nagapasandad sa isa sining mga kubos nga nagatuo, maayo pa sa iya nga higtan sa liog sing daku nga galingan nga bato kag itagbong sa dagat.” (Mar. 9:42) Ginapakita sini nga serioso gid nga mapasandad ang iban. Pareho gid si Jesus sa iya Amay, gani sigurado kita nga amo man sini ang ginabatyag ni Jehova kon daw sa wala lang sa isa nga napasandad niya ang isa ka sumulunod ni Jesus.—Juan 14:9.

¹⁰ Pareho bala kay Jehova kag kay Jesus ang aton pagtamod? Makita bala ini sa aton ginahimo? Halimbawa, ibutang ta nga may nanamian gid kita nga estilo sang bayo ukon pamustura nga mahimo makapasandad sa iban sa kongregasyon ukon makapukaw sang imoral nga balatyagon sa ila. Palig-unon bala kita sang aton gugma kag kabalaka sa aton mga kauturan nga indi na pagsundon ang estilo nga gusto naton?—1 Tim. 2:9, 10.

11, 12. Paano naton malikawan ang paghimo sang malain kon pareho sa Dios ang aton pagtamod kag may pagpugong kita sa kaugalingon?

¹¹ Ari ang ikatlo nga halimbawa: Ginadumtan ni Jehova ang pagkadimatarong. (Isa. 61:8) Matuod, kabalo sia nga bangod indi kita perpekto, nabudlayan kita nga himuon ang husto kon kaisa. Pero ginapalig-on niya kita nga dumtan man ang pagkadimatarong. (Basaha ang Salmo 97:10.) Kon pamalandungan naton kon ngaa ginadumtan ni Jehova ang malain, magabulig ini sa aton nga mangin pareho sa iya ang aton pagtamod kag magapalig-on ini sa aton nga batuan ang paghimo sang malain.

¹² Kon pareho kay Jehova ang aton pagtamod sa pagkadimatarong, magabulig man ini sa aton nga tamdon nga malain bisan ang mga buhat nga wala ginasambit sa Pulong sang Dios. Halimbawa, nangin kinaandan na sa kalibutan subong ang lap dancing, isa ka klase sang pagsaot nga imoral. Para sa iban, okey lang ini kay indi ini kuno pareho sa pagpakig-sex.a Pero amo bala ini ang pagtamod sang Dios, nga nangil-ad sa tanan nga klase sang kalainan? Dapat naton likawan ang paghimo sang malain paagi sa pagpugong sa aton kaugalingon kag pagkangil-ad sa ginadumtan ni Jehova.—Roma 12:9.

13. Ngaa dapat naton hunahunaon na subong ang pagtamod ni Jehova parte sa mahimo mangin desisyon naton sa ulihi?

¹³ Kon nagatuon kita, dapat naton hunahunaon ang pagtamod ni Jehova sa mga sitwasyon nga mahimo naton maatubang sa ulihi. Gani kon mag-abot ang isa ka sitwasyon nga dapat kita magdesisyon dayon, handa na kita kag kabalo kita sang aton himuon. (Hulu. 22:3) Binagbinaga ang pila ka halimbawa sa Biblia.

14. Ano ang matun-an naton sa ginsiling ni Jose sa asawa ni Potifar?

¹⁴ Sang ginsulay si Jose sang asawa ni Potifar, ginsikway ini dayon ni Jose. Maathag nga nahunahuna na nga daan ni Jose ang pagtamod ni Jehova sa pag-asawahay. (Basaha ang Genesis 39:8, 9.) Pareho man sa Dios ang iya pagtamod, kay nagsiling sia sa asawa ni Potifar: “Paano ko mahimo ining daku nga kalainan kag magpakasala batok sa Dios?” Kamusta kita? Halimbawa, ano ang himuon mo kon ang kaupod mo sa trabaho naga-flirt sa imo? Ukon ano abi kon may nagpadala sa imo cell phone sing binastos nga text ukon piktyur?b Mahapusan kita sa paghimo sang husto kon nahunahuna na naton ang pagtamod ni Jehova sa sini kag pareho sa iya ang aton pagtamod, kag nakadesisyon na kita kon ano ang aton himuon.

15. Paano kita makapabilin nga matutom kay Jehova pareho sang tatlo ka Hebreo?

¹⁵ Binagbinagon naman naton ang halimbawa sang tatlo ka Hebreo nga sanday Sadrac, Mesac, kag Abednego. Sang ginsugo sila ni Hari Nabocodonosor nga magsimba sa estatwa nga bulawan nga iya ginpatindog, malig-on sila nga nangindi. Ang ila maathag nga ginsiling sa hari nagapakita nga ginhunahuna na nila antes sini kon ano ang ila himuon para magpabilin nga matutom kay Jehova. (Ex. 20:4, 5; Dan. 3:4-6, 12, 16-18) Halimbawa, ibutang ta nga ginsilingan ka sang imo boss nga mag-amot para sa isa ka selebrasyon nga may labot sa butig nga relihion. Ano ang himuon mo? Sa baylo nga hulaton pa naton nga mabutang kita sa mga sitwasyon nga pareho sini, mas maayo kon subong pa lang hunahunaon na naton ang pagtamod ni Jehova sa sini. Gani kon mag-abot ini nga mga sitwasyon, mahapusan kita sa paghimo kag paghambal sang husto, pareho sa tatlo ka Hebreo.

16. Kon nahangpan naton ang pagtamod ni Jehova, paano ini makabulig nga mangin handa kita kon may emerhensia sa pagpabulong?

¹⁶ Ang paghunahuna na nga daan sa pagtamod ni Jehova makabulig man sa aton nga magpabilin nga matutom sa iya kon may emerhensia sa pagpabulong. Wala kita nagapatughong sang dugo ukon sang apat ka panguna nga bahin sini. Pero may pila ka pamaagi sa pagbulong nga nagagamit sing dugo nga dapat desisyunan sang kada isa base sa mga prinsipio sa Biblia nga nagapakita sang pagtamod ni Jehova. (Binu. 15:28, 29) Mahimo nga indi na kita makapamensar sing maayo kon ara na kita sa ospital kay basi nagabatyag na kita sang kasakit kag ginapadesisyon na kita dayon. Mas maayo kon subong pa lang mag-research na kita parte sa sini, maghimo sang legal nga dokumento sa pagpabulong nga nagapaathag sang gusto naton, kag makighambal sa aton doktor.c

17-19. Ngaa dapat naton hibaluon subong pa lang ang pagtamod ni Jehova? Maghatag sing halimbawa sang sitwasyon nga dapat kita mangin handa.

¹⁷ Binagbinaga naman ang ginhambal dayon ni Jesus sang ginsilingan sia ni Pedro: “Maluoy ka sa imo kaugalingon, Ginuo.” Mahimo gid nga napamalandungan na nga daan ni Jesus ang ginapahimo sa iya sang Dios kag ang mga tagna sa Kasulatan parte sa iya kabuhi kag kamatayon sa duta. Nagpalig-on ini sa iya desisyon nga magpabilin nga matutom kay Jehova kag mangin handa sa pagsakripisyo.—Basaha ang Mateo 16:21-23.

¹⁸ Subong, gusto sang Dios nga mangin abyan naton sia kag himuon naton ang aton bug-os nga masarangan sa pagbantala sang maayong balita. (Mat. 6:33; 28:19, 20; Sant. 4:8) Pero basi indi naton ini mahimo sing bug-os bangod sang isiling sa aton sang mga tawo nga daw maayo man ang intension, pareho sang ginsiling ni Pedro kay Jesus. Halimbawa, ano abi kon hatagan ka sang imo boss sing mas maayo nga trabaho nga mas daku ang sueldo pero ibanan sini ang imo tion para sa pagtambong sa mga miting ukon sa pagbantala? Kon estudyante ka pa, ibutang ta nga ginhatagan ka sing kahigayunan nga mag-eskwela sing dugang pa pero malayo ka sa imo pamilya. Ano ang himuon mo? Indi na paghulata nga mag-abot ini nga mga sitwasyon kag sa sina pa lang nga tion ikaw mangamuyo, maga-research, mangayo sang panugda sa imo pamilya kag sa mga gulang, kag magadesisyon. Mas maayo kon hibaluon mo na nga daan subong pa lang ang pagtamod ni Jehova sa sini kag tinguhaan nga mangin pareho sa iya ang imo panghunahuna. Kon maatubang mo ini nga mga sitwasyon, indi na ini mangin pagsulay sa imo. Kabalo ka na kon ano ang himuon mo kay nakadesisyon ka na nga unahon ang pag-alagad kay Jehova.

¹⁹ Basi may mapensaran ka pa nga mga sitwasyon nga mahimo magtilaw dayon sang imo katutom kay Jehova. Matuod, indi naton mahandaan ang tanan nga sitwasyon nga puede matabo. Pero kon pamalandungan naton ang panghunahuna ni Jehova kon nagatuon kita, madali naton madumduman ang aton natun-an kag maaplikar ini sa bisan ano nga sitwasyon nga maatubang naton. Gani hibaluon gid naton ang pagtamod ni Jehova, panikasugan nga mangin pareho sa iya ang aton panghunahuna, kag pamalandungan kon paano ini makabulig sa aton para makahimo kita sing maayo nga mga desisyon subong kag sa ulihi.

20, 21. (a) Ano ang mangin kahimtangan naton sa bag-ong kalibutan? (b) Paano kita malipay subong?

²⁰ Gusto na gid naton mag-abot ang bag-ong kalibutan. Ang kalabanan sa aton nagalaum nga mabuhi sing dayon sa paraiso sa duta. Kon maggahom na ang Ginharian sang Dios, madula na ang kasakit kag pag-antos nga naeksperiensiahan naton sa sini nga sistema. Kag sa bag-ong kalibutan, may kahilwayan kita gihapon sa paghimo sing mga desisyon depende sa gusto naton.

²¹ Pero indi bug-os ini nga kahilwayan. Kon magadesisyon ang mga mahagop kon ano ang husto kag sala, sundon nila ang mga kasuguan kag panghunahuna ni Jehova. Magaresulta gid ini sa kalipay kag paghidait. (Sal. 37:11) Bisan subong, malipay man kita kon pareho kay Jehova ang aton panghunahuna.