Ginsugid ni Jesus ang Ginahalinan sang Kalipay

Bag-o lang ginsulit ni Jesus ang iya mga instruksion parte sa pangamuyo, pero indi lang amo ini nga topiko ang iya ginpadaku liwat sa iya ministeryo. Sang naghimo sia sing mga milagro sa Galilea, ginsumbong sia sing sayop nga ginhimo niya ini paagi sa gahom sang manuggahom sang mga demonyo. Nasulit ini nga panumbungon sa Judea.

Sang gintabog ni Jesus ang demonyo nga nagpaapa sa isa ka tawo, natingala ang kadam-an. Pero wala matingala ang mga nagapakalain sa iya. Ginsulit nila ang sayop nga panumbungon: “Nagatabog sia sang mga demonyo paagi kay Beelzebub, ang manuggahom sang mga demonyo.” (Lucas 11:15) Ang iban, nga luyag makakita sing dugang nga pamatuod kon sin-o si Jesus, nangayo sa iya sing tanda halin sa langit.

Nakahibalo si Jesus nga ginatilawan nila sia, gani nagsabat sia sa ila pareho sa iya ginsiling sa mga nagapakalain sa iya sa Galilea. Nagsiling sia nga ang tanan nga ginharian nga nabahinbahin mapukan, kag nangatarungan: “Kon si Satanas nabahinbahin man, paano makatindog ang iya ginharian?” Ginprangka dayon sila ni Jesus: “Kon nagatabog ako sang mga demonyo paagi sa tudlo sang Dios, ang Ginharian sang Dios nag-abot kag wala ninyo ini matalupangdi.”—Lucas 11:18-20.

Ang pagsambit ni Jesus sa “tudlo sang Dios” dapat magpahanumdom sa iya mga tagpalamati sa natabo sang una sa kasaysayan sang Israel. Ang mga yara sa palasyo sang Paraon nga nakakita sang milagro ni Moises nagsinggit: “Tudlo ini sang Dios!” Ang nagsulat sang Napulo ka Sugo sa duha ka tapitapi nga bato ‘tudlo man sang Dios.’ (Exodo 8:19; 31:18) Sing kaanggid, ang “tudlo sang Dios”—ang iya balaan nga espiritu, ukon aktibo nga puersa—amo ang gingamit ni Jesus para matabog ang mga demonyo kag mapaayo ang mga masakiton. Gani ang Ginharian sang Dios nag-abot kag wala ini matalupangdan sining mga manugpamatok, kay ang gintangdo nga Hari sang Ginharian, si Jesus, didto mismo nga nagahimo sining mga buhat.

Ang ikasarang ni Jesus sa pagtabog sang mga demonyo pamatuod nga mas gamhanan sia kay Satanas, pareho sang makusog nga tawo nga naglutos sa may hinganiban nga guardia sang palasyo. Ginsulit man ni Jesus ang iya ilustrasyon parte sa indi matinlo nga espiritu nga nagbiya sa tawo. Kon indi pagsudlan sang tawo sing maayo nga mga butang ang bakante, ina nga espiritu magabalik upod sa pito pa, kag ang kahimtangan sina nga tawo mangin malain pa sangsa una. (Mateo 12:22, 25-29, 43-45) Gani amo gid sini ang natabo sa pungsod sang Israel.

Ang isa ka babayi nga nagapamati kay Jesus nagsiling: “Malipayon ang nagpanganak kag nagpasuso sa imo!” Nagalaum ang mga babayi nga Judiyo nga mangin iloy sang isa ka manalagna, ilabi na sang Mesias. Gani mahimo naghunahuna ining babayi nga nalipay gid si Maria kay iloy sia sini nga manunudlo. Pero gintadlong ni Jesus ang babayi parte sa matuod nga ginahalinan sang kalipay: “Mas malipayon ang mga nagapamati sa pulong sang Dios kag nagatuman sini!” (Lucas 11:27, 28) Wala gid magpanugda si Jesus nga hatagan sing espesyal nga kadungganan si Maria. Sa baylo, mangin matuod nga malipayon ang bisan sin-o nga lalaki ukon babayi kon mangin matutom sila nga alagad sang Dios, indi paagi sa kaangtanan sa dugo ukon sa mga hinimuan.

Pareho sa ginhimo ni Jesus sa Galilea, ginsabdong niya ang mga tawo nga nagapangita sang isa ka tanda halin sa langit. Nagsiling sia nga wala sing tanda nga ihatag sa ila luwas “sa tanda ni Jonas.” Si Jonas nangin tanda bangod sang tatlo niya ka adlaw nga pagtener sa tiyan sang isda kag sang iya maisog nga pagbantala, amo nga naghinulsol ang mga taga-Ninive. Si Jesus nagsiling: “Apang ang isa nga labaw pa kay Jonas yari diri.” (Lucas 11:29-32) Labaw man si Jesus kay Solomon, nga bangod sang kaalam sini, nagkadto ang Rayna sang Sheba para mamati sa iya.

“Sa tapos magsindi sang suga,” siling pa ni Jesus, “wala ini ginabutang sa talaguan ukon sa idalom sang alat, kundi sa ibabaw sang tulungtungan.” (Lucas 11:33) Mahimo ang buot niya silingon amo nga ang pagtudlo kag paghimo sing mga milagro sa sining mga tawo kaangay sa pagtago sa kasanag sang suga. Bangod ang ila mga mata wala nakapokus, wala nila mahangpan ang katuyuan sang iya mga buhat.

Bag-o lang gintabog ni Jesus ang demonyo amo nga nakahambal na ang apa. Dapat ini magpahulag sa mga tawo nga himayaon ang Dios kag sugiran ang iban sang ginahimo ni Jehova. Amo nga ginpaandaman ni Jesus ang nagapakalain sa iya: “Gani, magbantay ka nga ang kapawa nga yara sa imo indi kadudulman. Gani, kon ang imo bug-os nga lawas masanag kag wala gid sing bahin nga madulom, mangin masanag ini kaangay sang suga nga nagahatag sang kasanag sa imo.”—Lucas 11:35, 36.