Ang Kabuhi kag Ministeryo ni Jesus

Ang Pamangkot Tuhoy sa Palanublion

MAATHAG nga nahibaluan sang mga tawo nga si Jesus nagkaon sa balay sang Fariseo. Gani linibo sa ila ang nagtipon sa guwa kag naghulat sa pagguwa ni Jesus. Indi kaangay sang mga Fariseo nga nagpamatok kay Jesus kag nagtinguha sa pagpahambal sa iya sing sayop, ang katawhan malangkagon nga nagapamati sa iya upod ang apresasyon.

Nagsiling sing una sa iya mga disipulo, si Jesus nagsiling: “Andam kamo sang tapay sang mga Fariseo, nga amo ang pagkasalimpapaw.” Subong sang ginpakita sa tion sang pagkaon, ang bug-os nga relihiosong sistema sang mga Fariseo puno sing pagkasalimpapaw. Apang bisan pa nga ang kalautan sang mga Fariseo mahimo nga matago paagi sa pakitakita nga pagkadiosnon, sa ulihi mabuyagyag ini. “Walay bisan ano nga natabunan,” siling ni Jesus, “nga indi magdayag, ukon natago nga indi mahibaluan.”

Ginsulit liwat ni Jesus ang pagpalig-on nga ginhatag niya sa 12 sang ginpadala niya sila sa pagbantala sa Galilea. Nagsiling sia: “Dili kamo mahadlok sa mga nagapatay sang lawas kag sa tapos sina wala na sila sing sarang mahimo.” Bangod wala ginakalimti sang Dios bisan ang isa ka maya, ginpasalig ni Jesus ang iya mga sumulunod nga indi sila pagkalimtan sang Dios. Nagsiling sia: “Kon dalhon kamo nila sa atubangan sang mga publiko nga asambleya kag sang mga punoan kag sang mga pagbulut-an, . . . ang balaan nga espiritu magatudlo sa inyo sa sina gid nga takna kon ano ang dapat ninyo isiling.”

Ang isa sang kadam-an nagsiling. “Manunudlo,” pangabay niya, “sugua ang akon utod nga lalaki nga bahinon namon ang palanublion.” Ang Kasuguan ni Moises nagasugo nga ang panganay nga anak magabaton sing duha ka bahin sang palanublion, busa wala sing rason sa pagbais. Apang maathag nga luyag sang tawo ang labi pa sang sa iya legal nga bahin sa palanublion.

Si Jesus nagakaigo nga nagdumili nga maulamid. “Tawo, sin-o bala ang naghimo sa akon nga hukom ukon manugbahin sa inyo?” pamangkot niya. Nian ginhatag niya ining importante nga paandam sa kadam-an: “Andam kamo kag maglikaw sa tanan nga pagkamahamkunon, kay ang kabuhi sang tawo indi sa kabuganaan sang mga butang nga naangkon niya.” Huo, bisan kon daw ano kadamo ang pagkabutang sang tawo, sing normal mapatay sia kag ibilin ini tanan. Agod ipadaku ini nga punto, subong man agod ipakita ang kabuangan sang indi pagtukod sing maayo nga reputasyon upod sa Dios, si Jesus naggamit sang ilustrasyon. Nagsiling sia:

“Ang palangumhan sang tawo nga manggaranon nagpatubas sing madamo gid. Kag nagpainoino sia sa iya kaugalingon, nagasiling, ‘Ano bala ang himuon ko, kay wala ako sing tiponan sang akon patubas?’ Gani nagsiling sia, ‘Amo ini ang buhaton ko: Gub-on ko ang akon mga tambobo kag magpatindog sing dalagku pa, kag dira tiponon ko ang bug-os ko nga patubas kag ang akon pagkabutang; kag magasiling ako sa akon kalag: “Kalag, may madamo ka nga pagkabutang nga natigana sa madamong tuig; magpatawhay ka, magkaon, mag-inum, magkasadya.” ’ Apang ang Dios nagsiling sa iya, ‘Buangbuang, karon nga gab-i ginakinahanglan sa imo ang imo kalag. Sin-o bala ang magatag-iya sang mga butang nga imo naaman?’ ”

Sa paghinakop, si Jesus nagsiling: “Amo man sia nga nagatigana sang bahandi sa iya kaugalingon kag indi manggaranon sa Dios.” Bisan pa nga ang mga disipulo mahimo nga indi masiod sang kabuangan sang pagtipon sing manggad, mahimo sila madali nga mapahilayo sa pag-alagad kay Jehova sing bug-os kalag paagi sa matag-adlaw nga alatipanon sa kabuhi. Busa gingamit ni Jesus ang okasyon sa pagsulit sa matahom nga laygay nga ginhatag niya sang nagligad nga isa ka tuig kag tunga sa Wali sa Bukid. Nagaliso sa iya mga alagad, nagsiling sia:

“Busa nagasiling ako sa inyo, Dili kamo maghimud-os nahanungod sa inyo kalag kon ano ang inyo kaonon ukon nahanungod sa inyo lawas pa kon ano ang inyo ipanapot. . . . Talupangda ang mga uwak, wala sila nagasab-ug ukon nagaani, kag sila walay damisag ukon tambobo, apang ang Dios nagapakaon sa ila. . . . Talupangda ang mga lirio, kon daw ano ang pagtubo nila; wala sila nagapangabudlay ukon nagapamorong; apang nagasiling ako sa inyo, Bisan si Solomon sa bug-os niyang himaya wala makapanapot subong sang isa sini sa ila. . . .

“Busa dili kamo magtinguha kon ano ang inyo kaonon kag kon ano ang inyo imnon, ukon magmahimud-oson sing hunahuna; kay ang tanan nga kapungsoran sang kalibutan nagatinguha sini tanan nga butang, apang ang inyo Amay nakahibalo nga kamo may kinahanglan sining mga butang.”

Labi na sa panahon sang kapiot sa pangabuhi nga ang mga pinamulong ni Jesus nagakinahanglan gid nga binagbinagon. Ang tawo nga nangin sobra ka mahimud-oson sa iya materyal nga kinahanglanon kag magasugod sa pagpatumbaya sa espirituwal nga paghimud-os sa katunayan nagapakita sang kakulang sing pagtuo sa ikasarang sang Dios sa pag-aman para sa Iya mga alagad. Lucas 12:​1-31; Deuteronomio 21:⁠17.

◆ Ngaa, ayhan, ang tawo namangkot nahanungod sa palanublion, kag ano nga paandam ang ginhatag ni Jesus?

◆ Anong ilustrasyon ang gingamit ni Jesus, kag ano ang punto sini?

◆ Ano nga laygay ang ginsulit ni Jesus, kag ngaa nagakaigo ini para sa sining okasyon?