Paglakat Upod sa Dios—Tubtob sa Walay Katubtuban

“Kita . . . magalakat sa ngalan ni Jehova nga aton Dios tubtob sa tion nga walay latid, tubtob sa walay katubtuban.”​—⁠MIQUEAS 4:⁠5.

1. Ngaa matawag si Jehova nga “Hari nga dayon”?

SI Jehova nga Dios wala sing ginsuguran. Sia nagakaigo nga ginatawag “ang Dumaan sang mga Adlaw,” kay ang iya nagligad wala sing ginsuguran. (Daniel 7:​9, 13) Ang palaabuton ni Jehova wala man sing katapusan. Sia lamang ang “Hari nga dayon.” (Bugna 10:​6; 15:3) Kag sa iya itululok, ang isa ka libo ka tuig “subong lamang sang kahapon kon magligad, kag subong sang isa ka hinugna sang kagab-ihon.”​—⁠Salmo 90:⁠4.

2. (a) Ano ang katuyuan sang Dios para sa matinumanon nga mga tawo? (b) Sa ano naton dapat ipansal ang aton paglaum kag mga plano?

² Sanglit ang Taghatag sing kabuhi wala sing katapusan, sarang niya matanyag sa unang mag-asawa, si Adan kag si Eva, ang paglaum nga mabuhi sing dayon sa Paraiso. Apang, bangod sang paglalis, nadula ni Adan ang kinamatarong sa kabuhi nga walay katapusan, kag ginliton niya sa iya mga kaliwat ang sala kag kamatayon. (Roma 5:12) Walay sapayan, ang pagrebelde ni Adan wala mag-upang sa orihinal nga katuyuan sang Dios. Kabubut-on ni Jehova nga ang matinumanon nga mga tawo mabuhi tubtob sa walay katubtuban, kag pat-od nga tumanon niya ang iya katuyuan. (Isaias 55:11) Daw ano ka nagakaigo, nian, nga ipansal naton ang aton paglaum kag mga plano sa pag-alagad kay Jehova tubtob sa walay katubtuban. Samtang ginatandaan naton “ang adlaw ni Jehova,” importante dumdumon nga ang aton tulumuron amo ang paglakat upod sa Dios tubtob sa walay katubtuban.​—⁠2 Pedro 3:⁠12.

Si Jehova Nagahikot sa Iya Gintalana nga Tion

3. Paano naton nahibaluan nga si Jehova may “gintalana nga tion” sa pagtuman sang iya mga katuyuan?

³ Subong mga nagalakat upod sa Dios, interesado gid kita sa pagtuman sang iya kabubut-on. Nahibaluan naton nga si Jehova amo ang Daku nga Manugbantay sang Tion, kag nagasalig kita nga wala gid sia nagakapaslawan sa pagtuman sang iya mga katuyuan sa iya gintalana nga tion. Halimbawa, “sang mag-abot ang kabug-usan sang tion, ginpadala sang Dios ang iya Anak.” (Galacia 4:⁠4) Si apostol Juan ginsugiran nga may “gintalana nga tion” para sa katumanan sang matagnaon nga mga butang nga nakita niya paagi sa mga tanda. (Bugna 1:​1-3) May “gintalana nga tion sa paghukom sa mga patay.” (Bugna 11:⁠18) Sang nagligad nga kapin sa 1,900 ka tuig, si apostol Pablo gin-inspirar sa pagsiling nga ang Dios ‘nagtalana sing isa ka adlaw nga tuyo niya nga hukman ang napuy-an nga duta sa pagkamatarong.’​—⁠Binuhatan 17:⁠31.

4. Paano naton nahibaluan nga si Jehova nagahandum nga laglagon ang malaut nga sistema sang mga butang karon?

⁴ Laglagon ni Jehova ang malaut nga sistema sang mga butang karon, kay ang iya ngalan ginapakahuy-an sa kalibutan karon. Ang mga malaut nag-uswag. (Salmo 92:7) Paagi sa ila mga pulong kag mga buhat, ginainsulto nila ang Dios, kag nagasakit ang iya buot sa pagtan-aw nga ang iya mga alagad ginapasipalahan kag ginahingabot. (Zacarias 2:8) Indi katingalahan nga si Jehova nagmando nga sa indi madugay laglagon ang bug-os nga organisasyon ni Satanas! Natalana na sang Dios ang sibu nga tion kon san-o ini mahanabo, kag maathag nga ginapakita sang katumanan sang mga tagna sa Biblia nga nagakabuhi kita karon sa “tion sang katapusan.” (Daniel 12:4) Sa indi madugay magahikot sia agod pakamaayuhon ang tanan nga nagahigugma sa iya.

5. Paano gintamod ni Lot kag ni Habacuc ang mga kahimtangan sa ila palibot?

⁵ Ang mga alagad ni Jehova sang una nalangkag nga makita ang katapusan sang kalautan. Ang matarong nga si Lot “natublag sing daku sang pagpatuyang sang nagabato-sa-kasuguan nga mga tawo sa maulag nga paggawi.” (2 Pedro 2:⁠7) Nahanusbo sa mga kahimtangan sa palibot niya, si manalagna Habacuc nakitluoy: “Tubtob san-o, O Jehova, magapangayo ako sing bulig, kag indi ka magpamati? Tubtob san-o ako magapangayo sa imo sing bulig gikan sa kasingki, kag indi ikaw magaluwas? Ngaa ginapakita mo sa akon ang makapasubo, kag ginatulok mo lang ang kagamo? Kag ngaa ang kalaglagan kag ang panglugos yara sa atubangan ko, kag ngaa may nagailinaway, kag ngaa may nagasinuay?”​—⁠Habacuc 1:​2, 3.

6. Ano ang ginsiling ni Jehova subong sabat sa pangamuyo ni Habacuc, kag ano ang matun-an naton gikan sa sini?

⁶ Sa bahin, ginsabat ni Jehova si Habacuc sa sining mga pulong: “Ang palanan-awon naigo pa sa gintalana nga tion, kag nagadalidali ini sa katapusan, kag indi ini magbutig. Bisan pa magpalantang ini, padayon nga paabuta ini; kay pat-od nga magaabot ini. Indi ini magpalantang.” (Habacuc 2:⁠3) Sa amo, ginpahibalo sang Dios nga magahikot sia sa “gintalana nga tion.” Bisan pa daw nagalantang, tumanon ni Jehova ang iya katuyuan​—⁠nga walay kapaslawan!​—⁠2 Pedro 3:⁠9.

Pag-alagad Upod ang Walay Kalapyo nga Kakugi

7. Bisan pa wala mahibaluan ni Jesus sing sibu kon san-o maabot ang adlaw ni Jehova, paano niya ginhimo ang iya mga hilikuton?

⁷ Kinahanglan bala nga mahibaluan naton ang sibu nga tion nga gintalana ni Jehova para sa mga butang nga matabo agod makalakat kita upod sa Dios sing makugi? Indi. Binagbinaga ang pila ka halimbawa. Si Jesus nagpakita sing hanuot nga interes kon san-o himuon ang kabubut-on sang Dios sa duta subong sang sa langit. Sa pagkamatuod, gintudluan ni Cristo ang iya mga sumulunod nga mangamuyo: “Amay namon nga yara sa mga langit, pakabalaanon ang imo ngalan. Magkari ang imo ginharian. Paghimuon ang imo kabubut-on, subong sang sa langit, amo man sa duta.” (Mateo 6:​9, 10) Bisan pa nahibaluan ni Jesus nga sabton ining pangabay, wala sia makahibalo sang sibu nga petsa. Sa iya daku nga tagna tuhoy sa katapusan sining sistema sang mga butang, sia nagsiling: “May kaangtanan sa sinang adlaw kag oras wala sing nakahibalo, bisan pa ang mga anghel sang mga langit bisan pa ang Anak, kundi ang Amay lamang.” (Mateo 24:36) Sanglit importante gid si Jesucristo sa katumanan sang mga katuyuan sang Dios, direkta nga makigbahin sia sa paglaglag sa mga kaaway sang iya langitnon nga Amay. Apang, sang si Jesus yari sa duta, bisan gani sia wala makahibalo kon san-o magahikot ang Dios. Nabuhinan bala sini ang iya kakugi sa pag-alagad kay Jehova? Sa pagkamatuod wala! Sang makita nila si Jesus nga makugi nga nagatinlo sang templo, “nadumduman sang iya mga disipulo nga nasulat: ‘Ang kakugi para sa imo balay magahalunhon sa akon.’ ” (Juan 2:⁠17; Salmo 69:9) Makugi nga ginhimo ni Jesus mismo ang hilikuton nga ginpahimo sa iya, kag ginhimo niya ini upod ang walay kalapyo nga kakugi. Nag-alagad man sia sa Dios nga ginahunahuna ini tubtob sa walay katubtuban.

8, 9. Sang mamangkot ang mga disipulo tuhoy sa pagpasag-uli sa Ginharian, ano ang ginsugid sa ila, kag ano ang ila reaksion?

⁸ Amo man sini ang mga disipulo ni Cristo. Nakigkita si Jesus sa ila antes sia magkayab sa langit. Ang rekord nagasiling: “Karon, sang nagtipon sila, nagpamangkot sila sa iya: ‘Ginuo, ipasag-uli mo bala ang ginharian sa Israel sa sining tion?’ ” Subong sang ila Agalon, nalangkag sila sa pag-abot sang Ginharian. Apang, si Jesus nagsabat: “Indi inyo ang paghibalo sang mga tion ukon mga panahon nga ginpat-od sang Amay sa iya kaugalingon nga pagbulut-an; apang magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem kag sa bug-os nga Judea kag Samaria kag tubtob sa ukbong sang duta.”​—⁠Binuhatan 1:⁠6-8.

⁹ Wala sing nagapakita nga ginlas-ayan ang mga disipulo sa sini nga sabat. Sa baylo, makugi nga nagbantala sila. Sa sulod sang mga semana, ginpuno nila ang Jerusalem sang ila pagpanudlo. (Binuhatan 5:28) Kag sa sulod sang 30 ka tuig, napasangkad nila ang ila pagbantala nga hilikuton tubtob sa kasangkaron nga si Pablo nakasiling nga ang maayong balita ginbantala “sa tanan nga tinuga sa idalom sang langit.” (Colosas 1:⁠23) Bisan pa ang Ginharian wala ‘ginpasag-uli sa Israel’ subong sang sayop nga pagpaabot sang mga disipulo kag wala ini gintukod sa langit sang nagakabuhi sila, padayon sila nga nag-alagad kay Jehova sing makugi nga ginahunahuna ini tubtob sa walay katubtuban.

Pag-usisa sang Aton mga Motibo

10. Ang aton indi pagkahibalo kon san-o laglagon sang Dios ang sistema ni Satanas nagatugot sa aton nga pamatud-an ang ano?

¹⁰ Ang modernong-adlaw nga mga alagad ni Jehova nalangkag man nga makita ang katapusan sang malaut nga sistema sang mga butang karon. Apang, ang aton panguna nga ginakabalak-an, indi ang aton kaluwasan pasulod sa bag-ong kalibutan nga ginsaad sang Dios. Luyag naton makita nga pakabalaanon ang ngalan ni Jehova kag ibindikar ang iya pagkasoberano. Bangod sini, nalipay kita nga wala ginsugid sang Dios sa aton ang ‘adlaw ukon oras’ nga gintalana para sa kalaglagan sang sistema ni Satanas. Nagatugot ini sa aton sa pagpamatuod nga determinado kita sa paglakat upod sa Dios sa walay katubtuban bangod ginahigugma naton sia kag indi bangod may yara kita ginadalian, makagod nga mga tulumuron.

11, 12. Sa anong paagi ginhangkat ang integridad ni Job, kag paano yadto nga hangkat naangot sa aton?

¹¹ Ang paghupot sang aton integridad sa Dios nagabulig man sa pagpamatuod nga ang Yawa sayop sang magsumbong sia nga ang matarong nga si Job​—⁠kag busa ang mga tawo kaangay niya​—⁠nagaalagad sa Dios bangod lamang sang kakagod. Sa tapos malaragway ni Jehova ang iya alagad nga si Job subong isa ka maayo, matarong, mahinadlukon-sa-Dios nga tawo, si Satanas malaut nga nagsiling: “Nahadlok bala si Job sa Dios sa wala sing pulos? Wala mo bala sia pagkudali kag sa iya balay kag sa tanan nga yara sa palibot niya? Ginpakamaayo mo ang kinabudlayan sang iya mga kamot, kag ang iya kasapatan nagdamo sa duta. Apang, subong pagbaylo sang kahimtangan, untaya ang imo kamot, palihug, kag tanduga ang tanan nga iya kag tan-awa kon indi ka niya pagpakalainon sa imo nawong.” (Job 1:​8-11) Paagi sa paghupot sang iya integridad sa idalom sang pagtilaw, ginpamatud-an ni Job nga sayop ining malaut nga panumbungon.

¹² Paagi sa paghupot man sang aton integridad, mapamatud-an naton nga sayop ang bisan anong sataniko nga panumbungon nga nagaalagad lamang kita sa Dios bangod nahibaluan naton nga malapit na ang padya. Ang indi pagkahibalo sa sibu nga tion sang pagtimalos sang Dios sa mga malauton nagahatag sa aton sing kahigayunan nga pamatud-an nga ginahigugma gid naton si Jehova kag luyag naton maglakat sa iya mga dalanon tubtob sa walay katubtuban. Ginapakita sini nga mainunungon kita sa Dios kag ginasaligan naton ang iya paagi sang paghusay sa mga butang. Dugang pa, ang indi pagkahibalo sa adlaw kag oras nagabulig sa aton nga magpabilin nga nagabantay kag nagamata sa espirituwal bangod nahibaluan naton nga ang katapusan mahimo mag-abot sa bisan anong tion, subong sang isa ka makawat sa kagab-ihon. (Mateo 24:​42-44) Paagi sa paglakat upod kay Jehova sa adlaw-adlaw, ginapahalipay naton ang iya tagipusuon kag nagahatag kita sing sabat sa Yawa, nga nagayaguta sa iya.​—⁠Hulubaton 27:⁠11.

Magplano Para sa Walay Katubtuban!

13. Ano ang ginapakita sang Biblia tuhoy sa pagplano para sa palaabuton?

¹³ Ang mga nagalakat upod sa Dios nakahibalo nga maalamon ang maghimo sing makatarunganon nga mga plano para sa palaabuton. Bangod nahibaluan ang mga problema kag mga limitasyon sang katigulangon, madamo nga tawo ang nagatinguha nga gamiton sing maayo ang ila pagkapamatan-on kag kusog agod sa pagtigulang nila may pinansial nga kasiguruhan sila. Kamusta naman ang aton mas importante nga espirituwal nga palaabuton? Ang Hulubaton 21:5 nagasiling: “Ang mga plano sang maukod nagapadulong gid sa kaayuhan, apang ang tagsatagsa nga padasudaso nagapadulong gid sa kinawad-on.” Ang pagplano nga ginahunahuna ang walay katubtuban may kaayuhan gid. Sanglit wala naton mahibaluan sing sibu kon san-o matapos ining sistema, dapat naton binagbinagon ang aton mga kinahanglanon sa palaabuton. Apang dapat kita mangin balanse kag unahon sa kabuhi ang para sa Dios. Ang mga tawo nga wala sing pagtuo mahimo magahinakop nga indi maalamon kon ipansal mo ang imo igtalupangod sa paghimo sang kabubut-on sang Dios. Apang amo bala?

14, 15. (a) Ano nga ilustrasyon ang ginsugid ni Jesus tuhoy sa pagplano para sa palaabuton? (b) Ngaa indi maalamon ang manggaranon nga tawo sa ilustrasyon ni Jesus?

¹⁴ Si Jesus nagsugid sing isa ka ilustrasyon nga makahatag sing kasanagan sa sining bahin. Sia nagsiling: “Ang palangumhan sang isa ka tawo nga manggaranon nagapatubas sing madamo gid. Bangod sini nagsugod sia sa pagpangatarungan sa iya kaugalingon, nga nagasiling, ‘Ano ang himuon ko, karon nga wala na ako sing tipunan sang akon patubas?’ Gani nagsiling sia, ‘Amo ini ang buhaton ko: Gub-on ko ang akon mga tambobo kag magpatindog sing dalagku pa, kag didto tipunon ko ang tanan ko nga patubas kag ang tanan ko nga maayong mga butang; kag isiling ko sa akon kalag: “Kalag, may madamo ka nga pagkabutang nga natigana sa madamong tuig; magpatawhay ka, magkaon ka, mag-inom ka, magkasadya ka.” ’ Apang ang Dios nagsiling sa iya, ‘Buangbuang, karon nga gab-i ginakinahanglan nila sa imo ang imo kalag. Sin-o, nian, ang magatag-iya sang tanan nga butang nga gintigana mo?’ Gani amo sina ang nagakatabo sa tawo nga nagatigana sing bahandi para sa iya kaugalingon apang indi manggaranon sa Dios.”​—⁠Lucas 12:⁠16-21.

¹⁵ Buot bala silingon ni Jesus nga dapat kuntani ang manggaranon nga tawo wala magpangabudlay agod makatigayon sing materyal nga kasiguruhan sa palaabuton? Indi, kay ginapalig-on sang Kasulatan ang pagpangabudlay sing lakas. (2 Tesalonica 3:10) Ang sayop sang manggaranon nga tawo amo nga wala niya paghimua ang butang nga kinahanglanon agod mangin “manggaranon sa Dios.” Bisan pa kon ginkalipayan niya ang iya materyal nga manggad sa sulod sang madamo nga tuig, napatay sia sang ulihi. Indi sia nangin maalamon, wala ginahunahuna ang walay katubtuban.

16. Ngaa masaligan naton si Jehova para sa isa ka sigurado nga palaabuton?

¹⁶ Ang paglakat upod kay Jehova nga ginahunahuna ang walay katubtuban praktikal kag maalamon. Amo ini ang labing maayo nga paagi sa pagplano para sa palaabuton. Bisan pa maalamon ang maghimo sing praktikal nga mga plano tuhoy sa pag-eskwela, palamugnan, kag sa mga salabton sa pamilya, dapat naton dumdumon pirme nga wala gid ginabiyaan ni Jehova ang iya mainunungon nga mga alagad. Si Hari David nag-amba: “Nangin pamatan-on ako, kag karon tigulang na, apang wala ako makakita nga ang bisan sin-o nga matarong ginpabayaan, ukon ang iya kaliwat nga nagapakilimos sing tinapay.” (Salmo 37:⁠25) Naghatag man si Jesus sing pasalig nga ang Dios magaaman para sa tanan nga nagauna sang Ginharian kag nagalakat sa matarong nga mga dalanon ni Jehova.​—⁠Mateo 6:⁠33.

17. Paano naton nahibaluan nga malapit na ang katapusan?

¹⁷ Bisan pa nagaalagad kita sa Dios nga ginahunahuna ang walay katubtuban, dapat gihapon naton tandaan ang adlaw ni Jehova. Ang katumanan sang tagna sa Biblia maathag nga nagapamatuod nga malapit na ina nga adlaw. Ini nga siglo ginatandaan sang mga inaway, mga piste, mga linog, kag mga kakulang sing kalan-on, upod sang paghingabot sa matuod nga mga Cristiano kag sang bug-os globo nga pagbantala sing maayong balita sang Ginharian sang Dios. Bahin ini tanan sang tion sang katapusan sang malaut nga sistema sang mga butang karon. (Mateo 24:​7-14; Lucas 21:11) Ang kalibutan puno sing “mga mahigugmaon sang kaugalingon, mga mahigugmaon sang kuwarta, mga bugalon, mga palabilabihon, mga mapasipalahon, mga malalison sa mga ginikanan, mga dimapinasalamaton, mga dimatutom, mga wala sing kinaugali nga gugma, mga indi tampad sa bisan anong kasugtanan, mga mapatupatuon, mga wala sing pagpugong sa kaugalingon, mga mabangis, mga wala sing gugma sa kaayuhan, mga maluib, mga matig-a sing ulo, mga nagahabok sa pagpadayaw, mga mahigugmaon sa kinasadya sa baylo sang sa Dios.” (2 Timoteo 3:​1-5) Sa sining makahalanguyos katapusan nga mga adlaw, ang kabuhi mabudlay para sa aton nga mga alagad ni Jehova. Ginakalangkagan gid naton ang adlaw nga dulaon sang Ginharian ni Jehova ang tanan nga kalautan! Samtang wala pa ina, mangin determinado kita nga maglakat upod sa Dios nga ginahunahuna ang walay katubtuban.

Pag-alagad nga Ginahunahuna ang Kabuhi nga Walay Katapusan

18, 19. Ano ang nagapakita nga ang mga matutom sang una nag-alagad sa Dios nga ginahunahuna ang walay katubtuban?

¹⁸ Samtang nagalakat kita upod kay Jehova, dapat naton dumdumon ang pagtuo ni Abel, ni Enoc, ni Noe, ni Abraham, kag ni Sara. Sa tapos sila masambit, si Pablo nagsulat: “Ini sila tanan napatay sa pagtuo, bisan pa wala nila matigayon ang katumanan sang mga saad, apang nakita nila ini gikan sa malayo kag gin-abiabi ini kag dayag nga nagpahayag nga sila mga dumuluong kag umalagi nga mga pumuluyo sa duta.” (Hebreo 11:⁠13) Yadtong mga matutom ‘naghimulat sa maayo pa nga duog, kon sayuron, ang isa nga langitnon.’ (Hebreo 11:⁠16) Sa pagtuo, ginpaabot nila ang maayo pa nga duog sa idalom sang paggahom sang Mesianikong Ginharian sang Dios. Mahimo makapat-od kita nga padyaan sila sang Dios sing dayon nga kabuhi sa sinang maayo pa nga duog​—⁠ang dutan-on nga Paraiso sa idalom sang paggahom sang Ginharian.​—⁠Hebreo 11:​39, 40.

¹⁹ Ginpabutyag ni manalagna Miqueas ang determinasyon sang katawhan ni Jehova sa pagsimba sa Dios tubtob sa walay katubtuban. Sia nagsulat: “Ang tanan nga katawhan, sa ila bahin, magalakat ang tagsa sa ngalan sang ila dios; apang kita, sa aton bahin, magalakat sa ngalan ni Jehova nga aton Dios tubtob sa tion nga walay latid, tubtob sa walay katubtuban.” (Miqueas 4:⁠5) Si Miqueas mainunungon nga nag-alagad kay Jehova tubtob sa iya kamatayon. Sa iya pagkabanhaw sa bag-ong kalibutan, walay duhaduha nga ang manalagna padayon nga magalakat upod sa Dios tubtob sa walay katubtuban. Daw ano kaayo nga huwaran para sa aton nga nagakabuhi samtang nagahingapos ang tion sang katapusan!

20. Ano dapat ang mangin determinasyon naton?

²⁰ Ginaapresyar ni Jehova ang gugma nga ginapakita naton sa iya ngalan. (Hebreo 6:10) Nahibaluan niya nga mabudlay huptan ang integridad sa iya sa sining kalibutan nga ginagamhan sang Yawa. Ang “kalibutan nagataliwan,” apang, “sia nga nagahimo sang kabubut-on sang Dios nagapabilin sing dayon.” (1 Juan 2:⁠17; 5:19) Busa, upod sa bulig ni Jehova, mangin determinado kita nga batason ang mga pagtilaw nga ginaatubang naton sa adlaw-adlaw. Kabay nga ang aton panghunahuna kag dalanon sang pagkabuhi mapansal sa dalayawon nga mga pagpakamaayo nga ginsaad sang aton mahigugmaon langitnon nga Amay. Matigayon naton ini kon padayon kita nga magalakat upod sa Dios nga ginahunahuna ang walay katubtuban.​—⁠Judas 20, 21.

Paano Mo Sabton?

◻ Ano ang katuyuan sang Dios para sa matinumanon nga mga tawo?

◻ Ngaa wala pa ginalaglag ni Jehova ang didiosnon nga kalibutan?

◻ Ngaa indi dapat mabuhinan ang aton kakugi bangod wala naton mahibaluan sing sibu kon san-o magahikot ang Dios?

◻ Ano ang pila ka benepisyo sang paglakat upod sa Dios nga ginahunahuna ang walay katubtuban?

[Retrato sa pahina 17]

Sa paglakat upod sa Dios dapat kita mag-alagad sa iya sing makugi subong sang una nga mga disipulo ni Cristo