Mangin Handa Pirme sa Adlaw ni Jehova

1. Ano ang dapat naton himuon para maluwas kita sa adlaw ni Jehova?

SA Biblia, ang “adlaw ni Jehova” amo ang tion nga laglagon ni Jehova ang iya mga kaaway kag luwason ang iya katawhan. Sang una, may ginhukman si Jehova nga mga pungsod. (Isa. 13:1, 6; Ezeq. 13:5; Sof. 1:8) Sa aton tion subong, ang “adlaw ni Jehova” magasugod kon laglagon na sang mga gobierno ang Babilonia nga Daku kag matapos ini sa inaway sa Armageddon. Para maluwas kita sa sina nga “adlaw,” dapat kita maghanda subong. Nagsiling si Jesus nga dapat kita “maghanda” para sa “dakung kapipit-an” nga nagapahangop nga dapat padayon naton ini nga himuon.—Mat. 24:21; Luc. 12:40.

2. Ngaa makabenepisyo kita sa 1 Tesalonica?

² Sa una nga sulat ni apostol Pablo para sa mga taga-Tesalonica, naggamit sia sang mga ilustrasyon para buligan ang mga Cristiano nga mangin handa pirme sa daku nga adlaw ni Jehova. Kabalo si Pablo nga ang adlaw ni Jehova indi pa matabo sadto. (2 Tes. 2:1-3) Pero, ginpalig-on niya ang iya mga kauturan nga handaan ini nga adlaw nga daw pareho lang nga matabo na ini buas. Dapat man naton iaplikar ang laygay ni Pablo. Gani, binagbinagon naton ang ginsiling niya parte sa sini. Binagbinagon naton ang: (1) kon paano magaabot ang adlaw ni Jehova, (2) kon sin-o ang mga indi maluwas sa sini nga adlaw, kag (3) kon ano ang himuon naton para maluwas kita.

3. Ngaa subong sang kawatan sa kagab-ihon ang pag-abot sang adlaw ni Jehova? (Tan-awa man ang piktyur.)

³ “Subong sang kawatan sa kagab-ihon.” (1 Tes. 5:2) Amo ini ang una sa tatlo ka ilustrasyon nga gingamit ni Pablo parte sa pag-abot sang adlaw ni Jehova. Sa masami, gab-i nagapangawat ang mga kawatan kay wala nagabantay ang ila gusto kawatan, kag madasig nila ini nga ginahimo. Amo man sini ang adlaw ni Jehova. Hinali lang ini nga magaabot kag makibot gid ang kalabanan nga tawo sa sini. Bisan gani ang matuod nga mga Cristiano posible nga makibot man kay madasig lang nga magabag-o ang mga sitwasyon. Pero indi pareho sa matabo sa mga malauton, indi kita malaglag.

4. Ngaa kaangay sang pagpasakit sang isa ka babayi nga nagabusong ang adlaw ni Jehova?

⁴ “Kaangay sang pagpasakit sang isa ka babayi nga nagabusong.” (1 Tes. 5:3) Wala kabalo ang isa ka babayi nga nagabusong kon san-o gid ang eksakto nga petsa sang iya pagbata. Pero sigurado gid sia nga mabata sia. Kon manugbata na sia, posible nga hinali lang sia nga magapasakit kag indi na ini mapunggan. Sing kaanggid, wala man kita kabalo kon ano nga adlaw kag oras magasugod ang adlaw ni Jehova. Pero, kabalo kita nga maabot gid ini. Kabalo man kita nga indi mapunggan sang mga malauton ang paghukom sang Dios sa ila kag magaabot ini sa ila sing hinali.

5. Ngaa pareho sa kaagahon ang dakung kapipit-an?

⁵ Pareho sa kaagahon. Ginsambit liwat ni Pablo sa iya ikatlo nga ilustrasyon ang parte sa mga kawatan nga nagapangawat sa kagab-ihon. Pero sa sini nga tion, daw ginapaanggid ni Pablo sa kaagahon ang adlaw ni Jehova. (1 Tes. 5:4) Kon gab-i mangawat ang mga kawatan, posible nga indi nila matalupangdan ang oras. Gani, posible nga makibot sila kon magsanag na kay madakpan sila kag makilal-an. Sa tion sang dakung kapipit-an, makilala man ang mga tawo nga padayon nga nagahimo sang mga buhat nga ginadumtan sang Dios. Daw pareho sila sa kawatan nga gusto dulom lang pirme. Indi gid kita pareho sa sini nga mga tawo kay ginapakita naton nga nagahanda kita. Wala naton ginahimo ang mga buhat nga ginadumtan ni Jehova kag ginapanikasugan naton ang “tanan nga sahi sang kaayo, pagkamatarong kag kamatuoran.” (Efe. 5:8-12) Ang masunod nga duha ka ilustrasyon ni Pablo nagapakita kon sin-o ang mga indi maluwas.

6. Ngaa masiling naton nga nagatulog ang kalabanan nga tawo subong? (1 Tesalonica 5:6, 7)

⁶ “Ang mga nagatulog.” (Basaha ang 1 Tesalonica 5:6, 7.) Ginpaanggid ni Pablo ang mga tawo nga indi maluwas sa adlaw ni Jehova sa mga tawo nga nagatulog. Wala sila kabalo sang nagakatabo sa ila palibot kag indi nila matalupangdan ang oras. Gani, wala gid sila sang reaksion kon may importante nga nagakatabo sa ila palibot. Subong, ang kalabanan nga tawo daw pareho sa mga tawo nga nagatulog. (Roma 11:8) Bisan pa sang mga ebidensia nga nagakabuhi na kita sa “katapusan nga mga adlaw” kag malapit na lang ang dakung kapipit-an, indi sila magpati sa sini. Kon may talalupangdon nga matabo sa kalibutan, ang pila ka tawo nagapamati sa mensahe sang Ginharian nga ginasugid naton. Pero sa baylo nga magpabilin nga nagamata, madamo ang nagatulog liwat. Bisan gani ang pila nga nagapati nga maabot gid ang adlaw sang paghukom posible maghunahuna nga madugay pa ini matabo. (2 Ped. 3:3, 4) Pero, importante gid nga magpabilin kita nga nagamata kada adlaw.

7. Ngaa daw pareho sa mga nagapahubog ang mga tawo nga laglagon sang Dios?

⁷ “Ang mga nagapahubog.” Ginpaanggid ni apostol Pablo sa mga nagapahubog ang mga tawo nga laglagon sang Dios. Ang mga tawo nga hubog indi dayon maka-react sa nagakatabo sa ila palibot, kag indi maayo ang ila mga desisyon. Sing kaanggid, wala man sing reaksion ang mga malauton sa mga paandam sang Dios. Ang ila mga desisyon sa ila kabuhi magaresulta gid sa ila kalaglagan. Pero ginapalig-on ang mga Cristiano nga huptan nila ang ila ikasarang sa paghunahuna sing maayo. (1 Tes. 5:6) Suno sa isa ka eksperto sa Biblia, ang isa ka tawo nga nagahunahuna sing maayo wala naga-panic kag kalmado lang. Gani, makahimo gid sia sang husto nga desisyon. Ngaa importante nga mangin kalmado kita? Para makapabilin kita nga neutral sa mga isyu sa pulitika ukon sa mga isyu sa kalibutan subong. Samtang nagahilapit na gid ang adlaw ni Jehova, mas mangin mabudlay pa gid para sa aton nga magpabilin nga neutral. Pero, indi kita dapat mabalaka kon ano ang himuon naton. Buligan kita sang espiritu sang Dios nga mangin kalmado kag indi mag-panic para makahimo kita sang husto nga desisyon.—Luc. 12:11, 12.

8. Suno sa 1 Tesalonica 5:8, sa diin ginpaanggid ang mga kinaiya nga makabulig sa aton para makapabilin kita nga nagamata kag mahuptan naton ang aton ikasarang sa paghunahuna sing maayo? (Tan-awa man ang piktyur.)

⁸ ‘Isuklob ang panaming sa dughan kag ang helmet.’ Ginpaanggid kita ni Pablo sa mga soldado nga nagasuksok sang kompleto nga hinganib kag handa sa pagpakig-away. (Basaha ang 1 Tesalonica 5:8.) Ang isa ka soldado nakahanda gid pirme kon may matabo nga inaway. Amo man kita. Ginapakita naton nga handa kita pirme sa adlaw ni Jehova paagi sa pagsuksok sang pagtuo kag gugma bilang panaming sa dughan kag sang paglaum bilang helmet. Makabulig gid sa aton ini nga mga kinaiya.

9. Paano kita ginaamligan sang aton pagtuo?

⁹ Ang panaming sa dughan nagaamlig sa tagipusuon sang isa ka soldado. Sing kaanggid, ang pagtuo kag gugma nagaamlig man sa aton malaragwayon nga tagipusuon. Ini nga mga kinaiya makabulig sa aton nga padayon nga mag-alagad sa Dios kag sundon si Jesus. Halimbawa, buligan kita sang aton pagtuo nga magsalig nga padyaan gid ni Jehova ang aton pag-alagad sa iya sing bug-os tagipusuon. (Heb. 11:6) Magapalig-on ini sa aton nga padayon nga mangin matutom sa aton Lider nga si Jesus bisan pa makaeksperiensia kita sang mga kabudlayan. Importante gid nga mabakod ang aton pagtuo para mabatas naton ang mga kabudlayan. Para mahimo ini, makabulig sa aton ang pagtuon sa mga halimbawa sang mga kauturan sa aton tion subong nga padayon nga nangin matutom bisan pa ginahingabot sila ukon pigado. Kag kon ilugon naton ang mga kauturan nga nagpasimple sang ila kabuhi para unahon ang Ginharian, malikawan naton nga mangin materyalistiko.b

10. Paano ang aton gugma sa Dios kag sa mga tawo makabulig sa aton nga magbatas?

¹⁰ Importante man ang gugma para makapadayon kita nga nagamata kag mahuptan naton ang aton ikasarang sa paghunahuna sing maayo. (Mat. 22:37-39) Ang aton gugma sa Dios makabulig sa aton nga padayon nga magbantala kag batason ang mga kabudlayan. (2 Tim. 1:7, 8) Ginahigugma man naton ang mga tawo nga wala nagaalagad kay Jehova, gani padayon kita nga nagabantala sa aton teritoryo. Nagabantala pa gani kita paagi sa telepono kag mga sulat. Wala kita nagakadulaan sang paglaum nga sa ulihi magabag-o ang mga tawo kag himuon nila ang husto.—Ezeq. 18:27, 28.

11. Paano ang gugma naton sa aton mga kauturan makabulig sa aton? (1 Tesalonica 5:11)

¹¹ Ginahigugma man naton ang aton mga kauturan. Bangod sini, ‘ginapalig-on kag ginapabaskog naton ang isa kag isa.’ (Basaha ang 1 Tesalonica 5:11.) Pareho sa mga soldado nga nagabuligay sa tion sang inaway, ginapalig-on man naton ang isa kag isa. Kon kaisa, posible nga mahalitan sang isa ka soldado ang iya kaupod sa tion sang inaway, pero sigurado nga wala niya ini ginhungod. Sing kaanggid, indi gid naton gusto nga hungod nga sakiton ang aton mga kauturan ukon balusan sila bangod sa halit nga nahimo nila sa aton. (1 Tes. 5:13, 15) Mapakita man naton nga ginahigugma naton ang aton mga kauturan kon ginarespeto naton ang mga nagapanguna sa kongregasyon. (1 Tes. 5:12) Sang ginsulatan ni Pablo ang mga taga-Tesalonica, wala pa isa ka tuig nga naporma ang ila kongregasyon. Gani, posible nga indi pa eksperiensiado ang mga nagapanguna sa ila kongregasyon kag makahimo sila sang sala. Pero, dapat sila gihapon respetuhon. Samtang nagahilapit ang dakung kapipit-an, dapat naton pabakuron ang aton pagsalig sa mga instruksion nga ginahatag sang aton mga gulang. Sa tion sang dakung kapipit-an, posible nga indi makalab-ot sa aton ang mga instruksion halin sa world headquarters kag sa branch office, gani importante gid subong nga higugmaon kag respetuhon naton ang aton mga gulang. Bisan ano man ang matabo, dapat naton huptan ang aton ikasarang sa paghunahuna sing maayo. Imbes nga magpokus sa ila mga kaluyahon, dapat naton hunahunaon nga ginagamit ni Jehova ang Cristo para giyahan ining matutom nga mga lalaki.

12. Paano ginaamligan sang aton paglaum ang aton hunahuna?

¹² Pareho sa helmet nga nagaamlig sa ulo sang isa ka soldado, ang aton paglaum nagaamlig man sa aton hunahuna kay ginabuligan kita sini nga makapamensar sing maayo. Bangod sigurado gid kita sa aton paglaum, ginatamod naton nga wala sing pulos ang mga butang nga ginapabaloran sang kalibutan. (Fil. 3:8) Ang aton paglaum nagabulig sa aton nga mangin kalmado kag indi mag-panic. Amo ini ang naeksperiensiahan ni Wallace kag ni Laurinda, nga nagaalagad sa Africa. Sa sulod lang sang tatlo ka semana, napatay ang iloy ni Laurinda kag ang amay ni Wallace. Bangod sa COVID-19 nga pandemic, wala sila nakapauli para makaupod ang ila mga pamilya. Si Wallace nagsulat: “Bangod sa paglaum nga pagkabanhaw, ginaimadyin ko na kon ano ang ila himuon kon mabanhaw na sila sa bag-ong kalibutan. Nakabulig ini sa akon nga indi magpokus sa ila sitwasyon antes sila napatay. Ini nga paglaum nagapaumpaw man sa akon kon nasubuan ako ukon kon nahidlaw ako sa ila.”

13. Ano ang himuon naton para mabaton naton ang balaan nga espiritu?

¹³ “Indi ninyo pagpalunga ang kalayo sang espiritu.” (1 Tes. 5:19) Suno kay Pablo, ang balaan nga espiritu daw pareho sa kalayo nga nagadabdab sa sulod naton. Kon may espiritu kita sang Dios, nagabulig ini sa aton nga mangin mapisan sa pag-alagad kay Jehova kag mangin handa nga himuon ang husto. (Roma 12:11) Ano ang himuon naton para mabaton naton ang balaan nga espiritu? Dapat naton ini ipangamuyo, tun-an naton ang Pulong sang Dios, kag magpakigbahin kita sa mga hilikuton sang organisasyon nga ginatuytuyan sang iya espiritu. Kon himuon naton ini, makabulig ini sa aton nga mapakita “ang mga kinaiya nga ginapatubas sang espiritu.”—Gal. 5:22, 23.

14. Ano ang indi naton dapat paghimuon para padayon naton nga mabaton ang espiritu sang Dios? (Tan-awa man ang piktyur.)

¹⁴ Kon mabaton na naton ang balaan nga espiritu sang Dios, dapat naton panikasugan nga ‘indi naton mapalong ang kalayo sang espiritu.’ Ginahatag lang sang Dios ang iya espiritu sa mga nagatinguha nga mangin matinlo pirme sa ila hunahuna kag paggawi. Kon indi naton pagdulaon ang indi maayo nga mga handum sa aton hunahuna kag kon ginahimo naton ini nga mga handum, untaton niya ang paghatag sang iya espiritu. (1 Tes. 4:7, 8) Para padayon naton nga mabaton ang balaan nga espiritu, dapat ‘indi man naton pagtamayon ang mga tagna.’ (1 Tes. 5:20) Ang “mga tagna” amo ang mga mensahe nga ginahatag sa aton ni Jehova paagi sa iya balaan nga espiritu. Nalakip sa sini nga mensahe ang parte sa adlaw ni Jehova kag kon daw ano na lang kalip-ot sang nabilin nga tion. Wala naton ginapamensar nga indi pa matabo ang adlaw ni Jehova, ukon ang Armageddon, sa aton tion subong. Sa baylo, pirme naton ginadumdom nga malapit na lang gid ini. Gani masako kita sa paghimo sang “mga buhat sang diosnon nga debosyon” kag padayon naton nga ginatinguhaan nga himuon ang matarong nga paggawi kada adlaw.—2 Ped. 3:11, 12.

15. Ano ang himuon naton para indi kita mapatalang sang indi matuod nga mga impormasyon nga ginapalapta sang mga demonyo? (1 Tesalonica 5:21)

¹⁵ Sa indi na lang madugay, ang mga kaaway sang Dios magasiling nga may ara na “paghidait kag kalig-unan!” (1 Tes. 5:3) Madamo sing indi matuod nga impormasyon ang ipalapta sang mga demonyo sa sina nga tion, kag ang kalabanan nga tawo magapati gid sa sini. (Bug. 16:13, 14) Kamusta kita? Para indi kita mapatalang, dapat naton ‘pat-uron ang tanan nga butang.’ (Basaha ang 1 Tesalonica 5:21.) Ang Griego nga tinaga nga gin-translate “pat-ura” nagalaragway sa ginahimo sang mga tawo para hibaluon kon bala matuod ukon peke ang mga metal pareho sang bulawan ukon pilak. Gani, dapat man naton hibaluon kon bala matuod gid ang mga impormasyon nga aton mabatian ukon mabasahan. Amo sini ang ginhimo sang mga taga-Tesalonica, kag amo man sini ang dapat naton himuon subong kay malapit na gid ang dakung kapipit-an. Imbes nga patihan lang dayon ang tanan nga ginasiling sang iban, dapat naton gamiton ang aton ikasarang sa paghunahuna sing maayo. Kon may nabasahan kita ukon nabatian, ipaanggid naton ini sa ginasiling sang Biblia kag sang organisasyon ni Jehova. Kon himuon naton ini, indi gid kita mapatalang sang indi matuod nga mga impormasyon nga ginapalapta sang mga demonyo.—Hulu. 14:15; 1 Tim. 4:1.

16. Ano ang aton paglaum, kag ano ang determinado naton nga himuon?

¹⁶ Kabalo kita nga ang katawhan ni Jehova maluwas sa tion sang dakung kapipit-an. Pero, wala kita kabalo kon ano ang matabo sa kada isa sa aton samtang wala pa ini nga tion. (Sant. 4:14) Posible nga mapatay kita antes sang dakung kapipit-an ukon posible man nga makalampuwas kita sa dakung kapipit-an. Ano man ang matabo sa aton, sigurado nga padyaan gid kita sang kabuhi nga wala sing katapusan kon padayon kita nga mangin matutom. Makaupod sang mga hinaplas ang Cristo sa langit, kag magakabuhi sa paraiso sa duta ang iban nga mga karnero. Kabay pa nga pirme naton dumdumon ang aton matahom nga paglaum kag mangin handa pirme sa adlaw ni Jehova.