Ang Espiritu sang Krismas sa Bug-os nga Tuig?

“Himaya sa Dios sa kahitaasan, kag sa duta paghidait sa mga tawo nga iya nahamut-an.”—Lucas 2:14.

MINILYON ka tawo ang pamilyar sa sining mga tinaga sang mga anghel sang Dios nga nagapahibalo sang pagkabun-ag ni Jesus sa mga manugbantay sang karnero nga nagabantay sang ila mga panong sa gab-i. Kon mag-abot gani ang petsa, nga suno sa mga simbahan amo ang tion sang pagkabun-ag ni Jesus, madamo nga nagapangangkon nga Cristiano ang nagatinguha nga bag-uhon ang ila pamatasan. Ang pulupanag-on nga pagpatuhoy sa kalipay, paghidait, kag maayong kabubut-on—mga kinaiya nga ginpahibalo sang mga anghel—amo pirme ang ginapatuhuyan subong espiritu sang Krismas.

Ining positibo nga mga kinaiya nagaganyat pa gani sa mga tawo nga nagaselebrar sang Krismas indi bangod sa relihioso nga rason. Ginapasalamatan man nila ang dalayawon nga mga kinaiya nga ginapasanyog sang selebrasyon. Ang tion sang Krismas tion man nga wala sing klase ukon trabaho, gani kahigayunan ini sang mga tawo nga magpatawhay, maghinguyang sing tion upod sa ila mga pamilya kag mga abyan, ukon magpangalipay. Siempre pa, madamo sing sinsero nga tawo ang nagatamod sa Krismas subong tion sa pagpadungog kay Jesucristo.

Bisan ano pa nga importansia ang ginaangot nila sa Krismas, madamo ang nagabaton nga ang tanan nga positibo nga panimuot nga ginpadayag sa tion sining selebrasyon masami nga wala nagadugay. Gilayon nga nagabalik ang kinaandan nga kinaiya sang mga tawo. Ang isa ka salaysay nga may tig-ulo “Ang Espiritu sang Krismas,” sa sulat sang Royal Bank of Canada, nagsiling: “Ginapakita sang madamo nga nagapangangkon nga ‘Cristiano’ ini nga mga kinaiya sa sulod lang sang pila ka semana kada tuig, nagapadayag sing kaayo sa ila isigkatawo tubtob nga matapos ang Bag-ong Tuig, kag nagabalik naman sila sa ila makagod nga pagkabuhi kag pagkawalay pasunaid sa iban.” Ang “indi maayo” sa espiritu sang Krismas, padayon sini nga sulat, amo nga wala ini ginapakita sang mga tawo sa “bug-os nga tuig.”

Nagaugyon ka man sa sining pangatarungan ukon wala, sa gihapon nagabangon ini sing importante nga mga pamangkot. Sarang bala mapadayag sang mga tawo ang kaalwan kag paghangop sa tagsatagsa sing mapinadayunon? Malauman gid bala nga matuman ang pahibalo sang mga anghel sang gab-i nga nabun-ag si Jesus? Ukon indi ayhan damgo lamang ang ginalauman nga matuod nga paghidait?