• Palangga ni Jehova ang mga “Nagapamunga Samtang Nagabatas”
    Ang Lalantawan (Tulun-an)—2018 | Mayo

    •  7. (a) Sin-o ang ginapatuhuyan sang “mangunguma,” “puno sang ubas,” kag “mga sanga”? (b) Ano nga pamangkot ang dapat naton sabton?

      7 Basaha ang Juan 15:1-5, 8. Sa sini nga ilustrasyon, ginpaanggid ni Jesus si Jehova sa “mangunguma,” ang iya kaugalingon sa “puno sang ubas,” kag ang iya mga disipulo sa “mga sanga.”b Dayon nagsiling si Jesus sa iya mga apostoles: “Ang akon Amay ginahimaya kon padayon kamo nga nagapamunga sing madamo kag ginapamatud-an ninyo nga kamo mga disipulo ko.” Gani ano ang buot silingon sang pagpamunga? Sa sini nga ilustrasyon, may ginsiling si Jesus nga makabulig sa aton para masabat ini.

       8. (a) Sa ilustrasyon ni Jesus, ngaa wala nagapatuhoy ang pagpamunga sa paghimo sing bag-o nga mga disipulo? (b) Ano ang masiling naton sa tanan nga ginasugo ni Jehova sa aton?

      8 Nagsiling si Jesus parte sa iya Amay: “Ang akon tagsa ka sanga nga wala nagapamunga ginautod niya.” Buot silingon, mangin alagad lang kita ni Jehova kon nagapamunga kita. (Mat. 13:23; 21:43) Gani sa sini nga ilustrasyon, ang pagpamunga wala nagapatuhoy sa paghimo sing bag-o nga mga disipulo. (Mat. 28:19) Kay kon amo sini ang ginapatuhuyan, ang matutom nga mga Saksi nga wala sing nabuligan nga mangin disipulo, bangod wala nagapamati ang kalabanan sa ila ginabantalaan, daw pareho sang mga sanga nga wala nagapamunga sa ilustrasyon ni Jesus. Pero indi ini makatarunganon! Ngaa? Bangod indi naton mapilit ang mga tawo nga mangin disipulo. Mahigugmaon si Jehova, gani indi niya pag-ipahimo sa iya mga alagad ang indi nila masarangan. Ang tanan nga ginasugo ni Jehova sa aton masarangan gid naton himuon.—Deut. 30:11-14.

       9. (a) Paano kita makapamunga? (b) Ano nga ilustrasyon ang binagbinagon naton, kag ngaa?

      9 Gani ano ang buot silingon sang pagpamunga? Isa ini ka hilikuton nga mahimo naton tanan. Ano nga hilikuton ang ginsugo ni Jehova sa tanan niya nga alagad? Ang pagbantala sang maayong balita sang Ginharian sang Dios.c (Mat. 24:14) Maathag ini sa ilustrasyon ni Jesus parte sa manugsab-ug. Binagbinagon naton ining ikaduha nga ilustrasyon.