Ano ang Buot Silingon nga Mangin Neutral?

Si Jesus nagsiling sa iya mga sumulunod nga dapat ‘indi sila bahin sang kalibutan.’ (Juan 15:19) Nalakip sa sini ang mangin neutral, buot silingon indi magdampig sa pulitika kag sa mga inaway sang kalibutan. Ang matuod, indi pirme mahapos mangin neutral. Mahimo pa gani kita insultuhon bangod sini. Paano kita padayon nga mangin neutral kag mangin mainunungon kay Jehova nga Dios?

1. Ano ang pagtamod sang matuod nga mga Cristiano sa gobierno sang tawo?

Ginarespeto sang mga Cristiano ang gobierno. Ginahimo naton ang ginsiling ni Jesus nga ‘ihatag sa Cesar ang mga butang nga iya sang Cesar’—buot silingon, ginasunod naton ang mga kasuguan sang pungsod, pareho sang pagbayad sang buhis. (Marcos 12:17) Ginatudlo sang Biblia nga nagagahom lang ang gobierno sang tawo bangod gintugutan sila ni Jehova. (Roma 13:1) Gani naintiendihan naton nga limitado lang ang awtoridad sang gobierno sang tawo. Nagasalig kita nga ang aton Dios kag ang iya Ginharian sa langit lamang ang magasolbar sang mga problema sang tawo.

2. Paano naton mapakita nga neutral kita?

Pareho kay Jesus, wala kita nagaentra sa pulitika. Sang nakita sang mga tawo ang isa sa mga milagro ni Jesus, gusto nila sia mangin hari, pero nangindi sia. (Juan 6:15) Ngaa? Bangod sang ulihi nagsiling si Jesus: “Ang akon Ginharian indi bahin sini nga kalibutan.” (Juan 18:36) Bilang mga disipulo ni Jesus, mapakita naton nga neutral kita sa madamo nga paagi. Halimbawa, wala kita nagaentra sa inaway. (Basaha ang Miqueas 4:3.) Ginarespeto naton ang mga simbulo sang pungsod, pareho sang bandera, pero wala naton ini ginapadunggan ukon ginasimba. (1 Juan 5:21) Wala man kita nagadampig ukon nagakontra sa mga partido ukon kandidato sang pulitika. Mapakita naton sa sini nga mga paagi kag sa iban pa nga mainunungon gid kita sa gobierno ukon Ginharian sang Dios.

USISAA PA GID

3. Neutral ang matuod nga mga Cristiano

Si Jesus kag ang iya mga sumulunod maayo gid nga halimbawa sa aton. Basaha ang Roma 13:1, 5-7 kag 1 Pedro 2:13, 14. Dayon, tan-awa ang VIDEO kag binagbinaga ang masunod nga mga pamangkot.

VIDEO: Neutral ang Matuod nga mga Cristiano—Bahin 1 (4:28)

• Ngaa dapat naton respetuhon ang gobierno sang tawo?

• Ano ang pila ka paagi nga mapakita naton nga nagapasakop kita sa ila?

Sa tion sang inaway, ang pila ka pungsod nagasiling nga neutral sila. Pero pareho nila nga ginasuportahan ang duha ka pungsod nga nagakontrahanay. Ano gid bala ang buot silingon nga mangin neutral? Basaha ang Juan 17:16. Dayon, tan-awa ang VIDEO kag binagbinaga ang masunod nga pamangkot.

VIDEO: Neutral ang Matuod nga mga Cristiano—Bahin 2 (3:11)

• Ano ang buot silingon nga mangin neutral?

Ano abi kon may ginapahimo ang gobierno nga wala nagahisanto sa kasuguan sang Dios? Basaha ang Binuhatan 5:28, 29. Dayon, tan-awa ang VIDEO kag binagbinaga ang masunod nga mga pamangkot.

VIDEO: Neutral ang Matuod nga mga Cristiano—Bahin 3 (1:18)

• Kon wala nagahisanto ang kasuguan sang tawo sa kasuguan sang Dios, kay sin-o kasuguan ang dapat naton sundon?

• Ano pa nga mga sitwasyon nga indi pagsundon sang mga Cristiano ang gobierno sang tawo?

4. Mangin neutral sa imo ginahunahuna kag ginahimo

Basaha ang 1 Juan 5:21. Dayon, tan-awa ang VIDEO kag binagbinaga ang masunod nga mga pamangkot.

VIDEO: Kon Ngaa Kinahanglan sang Matuod nga mga Cristiano ang Kaisog—Sa Pagpabilin nga Neutral (2:49)

• Sa video, ngaa wala nagsaludo sa bandera si Ayenge kag wala sia nag-entra sa partido sang pulitika?

• Sa banta mo, husto bala ang iya desisyon?

Sa ano pa nga sitwasyon mahimo matestingan ang aton neutralidad? Tan-awa ang VIDEO, dayon binagbinaga ang masunod nga mga pamangkot.

VIDEO: Mga Leksion Halin sa Ang Lalantawan—Magpabilin nga Neutral sa Nabahinbahin nga Kalibutan (5:16)

• Paano kita padayon nga mangin neutral kon nagatan-aw kita sang sports nga nagakontrahanay ang lainlain nga pungsod?

• Paano kita padayon nga mangin neutral kon personal kita nga maapektuhan sang desisyon sang mga pulitiko?

• Paano ang mga balita ukon ang aton kaupdanan makaimpluwensia sa aton neutralidad?

SUMARYO

Ginatinguhaan gid sang mga Cristiano nga mangin neutral sa pulitika sa ila ginahunahuna, ginahambal, kag ginahimo.

Rebyu

• Ano ang obligasyon naton sa gobierno sang tawo?

• Ngaa dapat padayon kita nga mangin neutral sa pulitika?

• Ano nga mga sitwasyon nga matestingan ang aton neutralidad?

DUGANG NGA IMPORMASYON

Ano nga mga sakripisyo ang mahimo kinahanglan naton himuon para padayon nga mangin neutral?

Wala Gid Kami Ginpabay-an ni Jehova (3:14)

Ano ang puede himuon sang pamilya para mangin handa sila kon testingan ang ila neutralidad?

Pagpabilin nga Neutral sa Nanuhaytuhay nga Sitwasyon (4:25)

Ngaa ang pagpangapin sa pungsod indi ang pinakamataas nga kadungganan nga mabaton sang isa?

“Sa Dios ang Tanan nga Butang Posible” (5:19)

Hibalua kon paano padayon kita nga indi bahin sang kalibutan kon nagadesisyon parte sa imo obra.

“Ang Tagsatagsa Magadala sang Iya Kaugalingon nga Lulan” (Ang Lalantawan, Marso 15, 2006)

Ang tanan nga Cristiano makaeksperiensia gid sang pagpamatok, ukon paghingabot pa gani. Mahadlok bala kita sa sini?

1. Ngaa hingabuton gid kita?

Ang Biblia nagsiling: “Ang tanan nga luyag magkabuhi nga may diosnon nga debosyon may kaangtanan kay Cristo Jesus pagahingabuton man.” (2 Timoteo 3:12) Ginhingabot si Jesus bangod indi sia bahin sang kalibutan ni Satanas. Indi man kita bahin sang kalibutan, gani wala kita natingala kon hingabuton man kita sang mga gobierno sang kalibutan kag sang mga relihion.—Juan 15:18, 19.

2. Ano ang dapat naton himuon para mangin handa sa paghingabot?

Dapat naton pabakuron subong ang aton pagsalig kay Jehova. Mangamuyo sa iya kada adlaw kag pirme basaha ang iya Pulong. Magtambong sing regular sa mga miting sang kongregasyon. Tanan ini makahatag sa imo sing kaisog kon hingabuton ka, bisan sang imo pamilya. Si apostol Pablo nga nakaeksperiensia sang madamo nga paghingabot, nagsulat: “Si Jehova ang akon manugbulig; indi ako magkahadlok.”—Hebreo 13:6.

Makahatag man sa aton sing kaisog ang pagbantala. Kon pirme kita nagabantala, nagabakod ang aton pagsalig kay Jehova kag indi na kita mahadlok sa mga tawo. (Hulubaton 29:25) Kon may kaisog ka sa pagbantala subong, makapadayon ka sa pagbantala bisan pa dumilian sang gobierno ang aton hilikuton.—1 Tesalonica 2:2.

3. Ano ang aton mabenepisyo kon ginabatas naton ang paghingabot?

Siempre, wala kita nalipay kon ginahingabot kita, pero kon ginabatas naton ini, nagabakod ang aton pagtuo. Mangin malapit pa gid kita kay Jehova bangod mabatyagan naton ang iya bulig sa tion nga daw mangampo na kita. (Basaha ang Santiago 1:2-4.) Nasakitan si Jehova kon nagaantos kita, pero nalipay sia kon ginabatas naton ini. Ang Biblia nagasiling: “Kon nagabatas kamo sang pag-antos bangod sa paghimo sing maayo, kalahamut-an ini sa Dios.” (1 Pedro 2:20) Kon matutom kita nga nagabatas, hatagan kita ni Jehova sang kabuhi nga wala sing katapusan sa kalibutan nga wala na sing may nagapamatok sa matuod nga pagsimba.—Mateo 24:13.

USISAA PA GID

4. Masarangan mo ang pagpamatok sang imo pamilya

Kabalo gid si Jesus nga mahimo indi gusto sang aton pamilya nga magsimba kita kay Jehova. Basaha ang Mateo 10:34-36, dayon binagbinaga ini nga pamangkot:

• Ano ang posible matabo kon ang isa ka miembro sang pamilya magdesisyon nga mag-alagad kay Jehova?

VIDEO: Ginsapupo Kami ni Jehova (5:13)

• Ano ang himuon mo kon pauntaton ka sang imo pamilya ukon abyan sa pag-alagad kay Jehova?

Basaha ang Salmo 27:10 kag Marcos 10:29, 30. Pagkatapos mabasa ang kada teksto, binagbinaga ini nga pamangkot:

• Paano ini nga promisa makabulig sa imo kon pamatukan ka sang imo pamilya ukon mga abyan?

5. Padayon nga mag-alagad kay Jehova bisan may paghingabot

VIDEO: Pagpakita sing Kaisog Bisan May Paghingabot (6:27)

• Paano ang mga halimbawa sa video nakapabakod sa imo?

Basaha ang Binuhatan 5:27-29 kag Hebreo 10:24, 25. Pagkatapos mabasa ang kada teksto, binagbinaga ini nga pamangkot:

• Ngaa importante gid nga padayon kita nga mag-alagad kay Jehova bisan pa dumilian ang aton pagbantala ukon mga miting?

6. Buligan ka ni Jehova nga makabatas

VIDEO: Pabakuron Ako ni Jehova nga Dios (3:40)

• Sa video, ano ang nakabulig sa sini nga mga Saksi nga makabatas?

Basaha ang Roma 8:35, 37-39 kag Filipos 4:13. Pagkatapos mabasa ang kada teksto, binagbinaga ini nga pamangkot:

• Paano ini nga mga bersikulo nagapasalig sa imo nga mabatas mo ang bisan ano nga paghingabot?

Basaha ang Mateo 5:10-12, dayon binagbinaga ini nga pamangkot:

• Ngaa puede ka mangin malipayon bisan ginahingabot ka?

SUMARYO

Ginapabaloran gid ni Jehova ang aton pagtinguha nga alagaron sia bisan may paghingabot. Sa bulig niya, mabatas naton ini!

Rebyu

• Ngaa hingabuton gid ang mga Cristiano?

• Ano ang himuon mo subong para mangin handa sa paghingabot sa ulihi?

• Ano ang makabulig sa imo para padayon ka nga mag-alagad kay Jehova bisan may paghingabot?

DUGANG NGA IMPORMASYON

Tan-awa kon paano ginbuligan ni Jehova ang pamatan-on nga brother nga makabatas sang ginpriso sia bangod sa iya neutralidad.

Magbatas Bisan sang Paghingabot (2:34)

Hibalua kon ano ang nakabulig sa mag-asawa nga padayon nga maalagad si Jehova sing tinuig bisan may pagpamatok.

Mag-alagad kay Jehova Bisan Magbag-o ang Sitwasyon (7:11)

Hibalua kon paano mo mabatas ang paghingabot nga may kaisog.

“Handai Na Subong ang Paghingabot” (Ang Lalantawan, Hulyo 2019)

Ano dapat ang aton pagtamod kon ginapamatukan kita sang aton pamilya, kag paano naton ini masarangan?

“Ang Kamatuoran ‘Wala Nagadala sing Paghidait, Kundi sing Espada’” (Ang Lalantawan, Oktubre 2017)