Malinong nga Bag-ong Kalibutan sang Dios—Makapuyo ka Didto

GINBUTANG sang Dios si Adan kag si Eva sa hardin sang Eden. Bisan pa naglalis sila kag napatay, naghimo ang Dios sing paagi agod nga ang ila mga anak, lakip kita karon, magpuyo sing dayon sa Paraiso. Ang Biblia nagasaad: “Ang mga matarong magapanag-iya sang duta, kag magapuyo sila sing dayon sa sini.”​​—⁠Salmo 37:29.

Ang Biblia nagapatuhoy sa “bag-ong mga langit” kag “bag-ong duta.” (Isaias 65:17; 2 Pedro 3:13) Ang “langit” karon ginahuman sang mga gobierno sang tawo, apang si Jesucristo kag ang mga kaupod niya nga magagahom sa langit magahuman sa “bag-ong mga langit.” Makalilipay gid kon ining bag-ong mga langit, nga amo ang matarong nga gobierno sang Dios nga magapaluntad sing paghidait, magagahom na sa bug-os nga duta!

Ano naman ang “bag-ong duta”?⁠— Ang bag-ong duta amo ang maayo nga mga tawo nga nagahigugma kay Jehova. Kay man, kon ang Biblia nagapatuhoy sa “duta,” ginapatuhuyan sini kon kaisa ang mga tawo nga nagapuyo sa duta, indi ang duta mismo. (Genesis 11:⁠1; Salmo 66:⁠4; 96:⁠1) Gani, ang mga tawo nga magahuman sa bag-ong duta magapuyo diri mismo sa duta.

Ang kalibutan karon sang malaut nga mga tawo madula na. Dumduma, ginlaglag anay sang Anaw sang panahon ni Noe ang malaut nga kalibutan sang mga tawo. Kag natun-an na naton nga ang malaut nga kalibutan karon laglagon sa Armagedon. Binagbinagon naton kon ano ang pagkabuhi sa bag-ong kalibutan sang Dios pagkatapos sang Armagedon.

Luyag mo bala magpuyo sing dayon sa Paraiso sa malinong nga bag-ong kalibutan sang Dios?⁠— Wala sing doktor nga makabulig sa aton nga mabuhi kita sing dayon. Wala sing bulong nga makapugong sang kamatayon. Ang lamang nga paagi agod mabuhi kita sing dayon amo ang pagpakigsuod sa Dios. Kag ginatudluan kita sang Daku nga Manunudlo kon paano naton mahimo ini.

Buksan naton ang aton Biblia sa Juan kapitulo 17, bersikulo 3. Makita naton diri ining mga pulong sang Daku nga Manunudlo: “Ini nagakahulugan sing kabuhi nga walay katapusan, ang pagkuha nila sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.”

Gani, ano ang ginsiling ni Jesus nga dapat naton himuon agod mabuhi sing dayon?⁠— Una, dapat kita magkuha sing ihibalo tuhoy sa aton langitnon nga Amay, si Jehova, kag subong man tuhoy sa iya Anak, nga naghatag sang iya kabuhi para sa aton. Nagakahulugan ini nga dapat naton tun-an ang Biblia. Ini nga libro, Magtuon Gikan sa Daku nga Manunudlo, nagabulig sa aton sa paghimo sini.

Apang paano ang pagtuon tuhoy kay Jehova magabulig sa aton sa pagkabuhi sing dayon?⁠— Bueno, subong nga dapat kita magkaon kada adlaw, dapat man kita magtuon tuhoy kay Jehova kada adlaw. Ang Biblia nagasiling: ‘Ang tawo mabuhi, indi lamang sa tinapay, kundi sa tanan nga mga pulong nga nagaguwa sa baba ni Jehova.’​​—⁠Mateo 4:4.

Dapat man kita magkuha sing ihibalo tuhoy kay Jesucristo bangod ginpadala sang Dios ang iya Anak agod dulaon ang aton sala. Ang Biblia nagasiling: “Wala sing kaluwasan sa bisan kay sin-⁠o nga iban.” Kag nagasiling man ang Biblia: “Sia nga magtuo sa Anak may kabuhi nga walay katapusan.” (Binuhatan 4:​12; Juan 3:36) Karon, ano ang kahulugan sang “magtuo” kay Jesus?⁠— Nagakahulugan ini nga nagapati gid kita kay Jesus kag nahibaluan naton nga indi kita mabuhi sing dayon kon wala sia. Ginapatihan bala naton ini?⁠— Kon huo, padayunon naton ang pagtuon gikan sa Daku nga Manunudlo kada adlaw, kag himuon naton ang ginasiling niya.

Ang isa ka maayong paagi sa pagtuon gikan sa Daku nga Manunudlo amo ang pagbasa sini nga libro sing sulitsulit kag ang pagtan-aw kag pagbinagbinag sang tanan nga mga laragway sa sini. Tan-awa kon masabat mo ang mga pamangkot sa sining mga laragway. Subong man, basaha ang libro upod sa imo iloy ukon amay. Kon wala ang imo mga ginikanan, basaha ini upod sa iban pa nga daku na kag sa iban nga mga kabataan. Indi bala makalilipay kon mabuligan mo ang iban sa pagtuon gikan sa Daku nga Manunudlo kon ano ang dapat nila himuon agod makapuyo sila sing dayon sa bag-ong kalibutan sang Dios?⁠—

Ang Biblia nagasiling sa aton: “Ang kalibutan nagataliwan.” Apang ginapaathag man sang Biblia kon paano kita makapuyo sing dayon sa bag-ong kalibutan sang Dios. Ini nagasiling: “Sia nga nagahimo sang kabubut-on sang Dios nagapabilin sing dayon.” (1 Juan 2:17) Gani paano kita makapuyo sing dayon sa bag-ong kalibutan sang Dios?⁠— Huo, paagi sa pagkuha sing ihibalo tuhoy kay Jehova kag sa iya pinalangga nga Anak, si Jesus. Apang dapat man naton himuon, ukon iaplikar, ang matun-an naton. Kabay nga buligan ka sang imo pagtuon sini nga libro sa paghimo sining mga butang.