Ang Katawhan nga Nagasunod sa mga Tikang ni Jesus

“Naglakat kami sa amo man nga espiritu, indi bala? Sa amo man nga mga tikang, indi bala?”​—⁠2 CORINTO 12:⁠18.

 1. Ngaa masami nga indi mabudlay makilala ang isa sang mga Saksi ni Jehova?

“SUBONG isa ka grupo, mabuot sila, responsable, kag maayo sa eskwelahan. Indi ini masiling sa iban nga mga grupo.” Amo ang ginsiling sang prinsipal sang isa ka elementarya nga eskwelahan sa Estados Unidos. Sin-o ang iya ginahambal? Amo ang mga anak sang mga Saksi ni Jehova nga mga bumulutho sa iya eskwelahan. Sa pagkamatuod, madamo ang nakatalupangod nga ang mga Saksi ni Jehova, lakip ang ila kabataan, masami nga nagaanggid sa iban nga mga Saksi sa pila ka dalanon. Sa sulod sang mga tinuig nangin maathag sing dugang pa nga sila talalupangdon nga nahiusa sa mga pagtuluohan kag sa paggawi. Gani indi mabudlay makilal-an ang mga Saksi.

 2. Ano ang nagapakilala nga kinaiya sang nahaunang Cristianong kongregasyon, kag ano ang ginasiling ni Pablo nahanungod sini?

² Ang paghiusa sang mga Saksi ni Jehova butang nga tumalagsahon sa sining wala nahiusa nga kalibutan. Apang indi ini mabudlay hangpon kon dumdumon naton nga sila tanan nagatinguha sa pagsunod sa mga tikang ni Jesus. (1 Pedro 2:21) Ina nga paghiusa nangin kinaiya man sang mga Cristiano sang nahaunang siglo. Sang isa ka okasyon, ginlaygayan ni Pablo ang kongregasyon sa Corinto: “Karon ginalaygayan ko kamo, kauturan, sa ngalan sang aton Ginuong Jesucristo nga dapat kamo tanan maghambal nga may paghilisugot, kag nga wala dapat sing mga pagbinahinbahin sa tunga ninyo, kundi mag-isa kamo sa painoino kag sa kaisipan.” (1 Corinto 1:10) Naghatag man si Pablo sing inspirado nga laygay kon paano makig-angot sa mga tawo nga indi handa sa paghupot sing Cristianong paghiusa.​—⁠Tan-awa ang Roma 16:17; 2 Tesalonica 3:⁠6.

 3, 4. Paano ginlaragway ni Pablo ang paghiusa sa ulot niya kag ni Tito, kag ano ang sadsaran sining paghiusa?

³ Sang mga tuig 55 C.E., ginpadala ni Pablo si Tito sa Corinto agod magbulig sa pagpangolekta para sa imol nga mga kauturan sa Judea kag ayhan agod tan-awon kon ano ang reaksion sang kongregasyon sa laygay ni Pablo. Sang magsulat sa mga taga-Corinto, ginsambit ni Pablo ang bag-o lang magligad nga pagduaw ni Tito kag namangkot: “Wala mamentaha sa inyo si Tito, indi bala? Naglakat kami sa amo man nga espiritu, indi bala? Sa amo man nga mga tikang, indi bala?” (2 Corinto 12:18) Ano ang buot silingon ni Pablo sang ila paglakat sa “amo man nga espiritu” kag “sa amo man nga mga tikang”?

⁴ Ginhambal niya ang paghiusa nga nagluntad sa ulot niya kag ni Tito. Si Tito amo kon kaisa ang kaupod ni Pablo sa paglakbay, kag wala sing duhaduha nga daku ang iya naton-an gikan kay Pablo sa sining paagi. Apang ang paghiusa sa ulot sang duha napasad sa butang nga mas mabaskog sang sa sina. Napasad ini sa ila maayong kaangtanan kay Jehova kag sa kamatuoran nga sila nga duha lunsay nga nagasunod sa mga tikang ni Cristo. Gin-ilog ni Tito si Pablo subong nga gin-ilog man ni Pablo si Cristo. (Lucas 6:40; 1 Corinto 11:⁠1) Gani ginsunod nila ang espiritu ni Jesus kag ang iya mga tikang.

 5. Ano ang mapaabot sa mga tawo karon nga nagailog kay Pablo kag kay Tito samtang nagalakat sila “sa amo man nga espiritu” kag “sa amo man nga mga tikang”?

⁵ Gani, indi makatilingala nga ang mga Cristiano sa sining ika-20 nga siglo, nga nagasunod sa “amo man nga espiritu” kag sa “amo man nga mga tikang” subong sang ginhimo ni Pablo kag ni Tito, nagaagom sing walay tupong nga paghiusa. Sa kamatuoran, ang indi paghiusa sang mga Cristiano sa ngalan lamang nagapakilala sa ila subong huwad nga mga Cristiano, wala nagasunod sa mga tikang sang Lider nga ila ginapangangkon nga ginasunod nila. (Lucas 11:17) Ining talalupangdon nga kinatuhayan sa ulot sang matuod kag sang mga Cristiano sa ngalan lamang sarang mailustrar sa nanuhaytuhay nga mga paagi. Sambiton naton ang apat.

Ang Pagkabalaan sang Dugo

 6, 7. (a) Anong husto nga pagtamod sa dugo ang nadalahig sa pagsunod sa mga tikang ni Jesus? (b) Ano ang kinatuhayan sa ulot sang mga Saksi ni Jehova kag sang iban karon nga nagadumili sa pagpatayhon sing dugo?

⁶ Sang mga tuig 49 C.E., ang nagadumala nga hubon sang kongregasyon sang nahaunang siglo nagpadala sing sulat nga nagsabat sa pamangkot nga: Dapat bala tumanon sang di-Judiyo nga mga Cristiano ang Kasuguan ni Moises? Ang sulat nagsiling sini: “Ginpakamaayo sang balaan nga espiritu kag namon nga indi na kamo paglulanan pa luwas sining mga butang nga kinahanglan, nga maglihi kamo sa mga butang nga ginhalad sa mga diosdios kag sa dugo kag sa nakuga kag sa pagkamakihilawason.” (Binuhatan 15:​28, 29) Talupangda nga lakip sa “mga butang nga kinahanglan” amo ang paglihi sa dugo. Ang pagsunod sa mga tikang ni Jesus nagakahulugan sing indi pagpasulod sing dugo sa lawas paagi sa baba ukon sa bisan anong paagi.

⁷ Ining prinsipio ginlalis sang Cristiandad paagi sa buhat nga pagpatayhon sing dugo. Matuod, sining karon nga mga tinuig madamo nga mga indibiduwal ang nakahibalo na sang mga katalagman sa lawas sang pagpatayhon sing dugo kag nagdumili sini bangod sa medikal nga mga rason. Matuod gid ini kay madamo ang gintapikan sing AIDS gikan sa dugo nga gintayhon. Apang sin-o ang nagasakdag sa pagkabalaan sang dugo bangod sa pagtahod sa kasuguan sang Dios, nagahimo sini subong isa ka grupo? Kon ang isa ka pasyente mamatok sa pagpatayhon, ano dayon ang pagkakilala sa iya sang doktor? Indi bala masami nga nagasiling ang doktor: ‘Pat-od nga isa ikaw sa mga Saksi ni Jehova’?

 8. Paano ang isa ka Saksi sa Italya ginpakamaayo bangod sang iya determinasyon sa pagtuman sang sugo sang Dios sa sining bahin?

⁸ Si Antonietta nagapuyo sa Italya. Sang mga walo ka tuig nga nagligad tama gid sa iya ka masakiton, kag ang iya blood count manubo gid amo kon ngaa nagpamilit ang mga doktor nga magpatayhon sia agod maluwas ang iya kabuhi. Nagdumili sia kag ginpamatukan sia sang doktor kag sang iya mga paryente. Bisan ang iya duha ka magagmay nga anak nga lalaki nagpakiluoy: “Mama, kon palangga mo gid kami, batuna ang dugo.” Apang determinado si Antonietta sa pagpabilin nga matutom, kag sing makalilipay wala sia mapatay. Sa gihapon, ang iya kondisyon malala nga ang doktor nagsiling: “Indi namon mahangpan kon ngaa buhi pa sia gihapon.” Apang sang gingamit ang isa ka sahi sang pagbulong nga wala niya ginpamatukan, madasig sia nga nag-uswag amo kon ngaa ang isa ka doktor nakasiling: “Indi ako makapati​—⁠indi ka dapat mag-ayo sa malip-ot nga tion, indi bisan pa kon ginbombahan ka namon sing dugo sa bug-os nga adlaw.” Regular payunir sia karon, kag ang iya duha ka anak nga lalaki, karon 12 kag 14, nagauswag sing maayo sa kamatuoran. Maisugon nga ginsunod ni Antonietta ang ‘butang nga kinahanglan,’ ang pagkabalaan sang dugo. Amo man sina ang pagtamod sang tanan nga Saksi ni Jehova samtang ginasunod nila ang mga tikang ni Jesus.

Maayong mga Moral

 9. Anong isa pa ka “butang nga kinahanglan” ang nadalahig sa pagsunod sa mga tikang ni Jesus, kag ano ang matabo sa mga mapaslawan sa pagtuman sini?

⁹ Ang isa pa ka “butang nga kinahanglan” nga ginpadaku sa sadto nga sulat gikan sa nagadumala nga hubon sang nahaunang siglo amo ang “maglihi . . . sa pagkamakihilawason.” Sa iya nahauna nga sulat sa mga taga-Corinto, ginpadaku ini ni Pablo, nga nagasiling: “Bisan ang mga makihilawason, ukon mga diwatahan, ukon mga makihilahion, ukon babayinhon, ukon mga lalaki nga nagahulid sa mga lalaki . . . indi makapanubli sang ginharian sang Dios.” (1 Corinto 6:​9, 10) Ginabuligan sang mga Cristiano ang mga tawo nga luyag mag-alagad kay Jehova nga utdon ining dimatinlo nga mga buhat. Bisan ang mga katapo sang kongregasyon nga nasiod sini ginabuligan sa pagpadalisay sang ila kaugalingon kon magliso sila kag maghinulsol. (Santiago 5:​13-15) Apang kon ang isa ka Cristiano mahulog sa sinang mahigko nga mga buhat kag indi maghinulsol, naaplikar ang prangka nga pagsulundan sang Biblia. Gin-inspirar si Pablo sang Dios sa pagsiling: “Mag-untat sa pagpakig-upod sa bisan kay sin-o nga ginatawag nga utod nga makihilawason. . . . Isikway ninyo ang tawo nga malaut gikan sa tunga ninyo.”​—⁠1 Corinto 5:​11, 13.

10, 11. (a) Sin-o ang dapat may salabton sa manubo nga mga talaksan sa moral sa Cristiandad, kag ngaa? (b) Paano ang eksperiensia sang isa ka tawo sa Pilipinas nagapakita nga, subong isa ka grupo, ang mga Saksi ni Jehova nagahupot sing mataas nga mga talaksan sa moral?

¹⁰ Walay sapayan sining maathag nga panudlo, ang Cristiandad puno sing imoralidad. Ang mga klerigo nga nagapaluya sa balaan nga mga talaksan amo ang balasulon sa sining kahimtangan, subong man ang mga nagabaton sa mga talaksan sang Biblia sa bibig lamang apang wala nagapatuman sini sing maisugon sa ila mga kongregasyon. Apang, sa sini man, ang mga Saksi ni Jehova subong katawhan nagasunod sa mga tikang ni Jesus.

¹¹ Binagbinaga si Jose, gikan sa Pilipinas. Sa edad nga 17 kilala na sia nga manuggamo kag sugarol. Pirme lang sia hubog, may imoral nga kabuhi, kag pirme lang nagatupa sa bilangguan bangod sa pagpangawat. Nian nakilala niya ang mga Saksi ni Jehova. “Ang pagtuon sa Biblia nagbalhin sang akon kabuhi sing bug-os,” siling niya. “Wala na ako nagainom kag nagapanigarilyo, kag nakatuon ako sa pagkontrol sang akon kaakig. Matinlo na karon ang akon konsiensia, bangod isa lang ang akon asawa. Natigayon ko man ang pagtahod sang akon mga kaingod, nga sang una nagatawag sa akon ‘Jose, nga tonto’ kag ‘Jose, nga morto.’ Karon ginatawag na nila ako nga ‘Jose, nga Saksi ni Jehova.’ Ang akon anak nga lalaki kag ang akon hinablos mga ministeryal nga alagad sa kongregasyon nga akon karon ginaalagdan subong gulang kag regular nga payunir.” Si Jose kag ang minilyon pa sang iban nga Cristianong mga saksi ni Jehova nagsunod sa mga tikang ni Jesus subong matinlo sa moral nga mga Cristiano.

Neutralidad

12. Ano nga panimuot sang matuod nga mga Cristiano ang ginpadaku ni Jesus sa iya pangamuyo nga narekord sa Juan kapitulo 17?

¹² Sa malaba nga pangamuyo nga ginhalad ni Jesus sang katapusan nga gab-i kaupod sa iya mga disipulo, ginsambit niya ang isa pa ka paagi nga ang iya mga sumulunod ‘magasunod sa iya mga tikang.’ Nagahambal tuhoy sa iya mga disipulo, sia nagsiling: “Indi sila bahin sang kalibutan, subong nga ako indi bahin sang kalibutan.” (Juan 17:16) Nagakahulugan ini nga ang mga Cristiano neutral. Sa baylo nga magpakigbahin sa politika ukon sa pungsudnon nga mga inaway, ginasugiran nila ang iban nahanungod sa Ginharian sang Dios, ang lamang nga solusyon sa mga problema sining kalibutan.​—⁠Mateo 6:​9, 10; Juan 18:⁠36.

13, 14. (a) Paano ang Cristiandad nagakatuhay sa mga Saksi ni Jehova tuhoy sa neutralidad? (b) Paano ang paghupot sing neutralidad sa politika sa bahin sang isa ka Saksi sa Hapon nangin sa kaayuhan sang bug-os nga pag-ululutod?

¹³ Ining prinsipio sang neutralidad nalipatan na sang kalabanan nga mga katapo sang Cristiandad, nga para sa ila ang pungsod nga ginhalinan masami nga labi pa ka importante sang sa ila relihion. Ang nagabaligya sing mga artikulo nga kolumnista nga si Mike Royko nagsiling nga ang “mga Cristiano” wala gid “ginatublag sang mga pagpakig-away batok sa iban nga mga Cristiano,” nga nagdugang: “Kon ginatublag sila kuntani, ang kalabanan sang pinakamainit nga mga inaway sa Europa wala matabo.” Isa ka kilala nga kamatuoran nga ang mga Saksi ni Jehova nagahupot sing estrikto nga Cristianong neutralidad sa tion sang inaway. Apang subong mga sumulunod sa tikang ni Jesus, neutral man sila sa sosyal kag politikal nga mga hulusayon. Sa amo, wala sing bisan ano nga nagatublag sa ila talalupangdon nga paghiusa sa bug-os nga kalibutan.​—⁠1 Pedro 2:⁠17.

¹⁴ Ang ila neutralidad nagadala kon kaisa sing wala ginapaabot nga mga resulta. Sa distrito sang Tsugaru sa naaminhan sang Hapon, halimbawa, ang mga eleksion ginakabig sing serioso. Apang si Toshio, kabulig nga manedyer sa Departamento sang Panguwarta sang isa ka lokal nga opisina sang pangulohan, nagdumili bangod sang konsiensia sa pagpakigbahin sa kampanya sang meyor para sa pagpapili liwat. Bangod sini, ginhalin sia sa manubo nga posisyon sa Departamento sang mga Higko sa Imburnal. Apang, pagligad sang isa ka tuig, gindakop ang meyor kag ginpilit sa paghalin bangod sang dibunayag nga mga buhat. Ginpili ang bag-o nga meyor. Sang mabatian niya ang pagpanubo sa posisyon ni Toshio, ginpabalik niya sia sa isa ka mataas nga posisyon sa pagdumala, kag nagdala ini sing mga pagpakamaayo sa Cristianong mga kauturan ni Toshio. Paano? Nagpaathag si Toshio nga kabudlay gid magkuha sing permiso sa paggamit sa mga gymnasium para sa mga pagtinipon luwas kon para sa mga hampang. Apang sa iya posisyon karon, “ginagamit ako ni Jehova”​—⁠sa pagbalikwat sang kaugalingon nga mga pulong ni Toshio​—⁠“agod makuha ang mga gymnasium para sa tatlo ka distrito nga mga kombension kag apat ka sirkito nga mga asambleya.” Sia nagahinakop: “Basta magpabilin kita nga matutom, buksan ni Jehova ang indi mahanduraw nga mga paagi sa paggamit sa aton.”

Sa Puluy-an

15. Paano si Jesus nagbilin sing modelo para sa mga sumulunod sang iya tikang tuhoy sa mga relasyon sa pamilya?

¹⁵ Ang isa pa ka latagon nga sa diin ang mga Cristiano ‘nagasunod sa mga tikang ni Jesus’ amo ang sa puluy-an. Ginabaton sang Biblia ang halimbawa ni Jesus subong modelo para sa mga relasyon sa sulod sang puluy-an sang ini magsiling: “Magpasakop kamo ang isa sa isa sa pagkahadlok kay Cristo. Magpasakop ang mga asawa sa ila mga bana subong nga sa Ginuo, bangod ang bana ang ulo sang iya asawa subong nga si Cristo man ang ulo sang kongregasyon . . . Sa kamatuoran, subong nga ang kongregasyon nagapasakop kay Cristo, subong man ang mga asawa sa ila mga bana sa tagsa ka butang. Mga bana, higugmaa ang inyo mga asawa, subong nga si Cristo man naghigugma ang inyo mga asawa, subong nga si Cristo man naghigugma sa kongregasyon kag nagtugyan sang iya kaugalingon para sa sini.”​—⁠Efeso 5:​21-25.

16, 17. (a) Anong malain nga kahimtangan ang nagaluntad sa Cristiandad tuhoy sa mga relasyon sa puluy-an? (b) Paano lamang mapauswag ang mga relasyon sa puluy-an, subong ginpakita sang eksperiensia sang isa ka mag-asawa sa Brazil?

¹⁶ Ang Cristiandad sa kabilugan nagasikway sa sining laygay kag sa amo puno sing nabungkag nga mga pamilya. Kinaandan ang nabungkag nga mga puluy-an, kag masami nga nagalala pa ang pag-inaway sang ginikanan kag anak. “Nabahinbahin ang pamilya,” siling sang isa ka propesor sa sikolohiya sang nagligad nga pila ka tuig. Ang mga sikologo sa bata, mga manuglaygay sa pag-asawahay, kag ang mga saykayatris may limitado lamang nga kadalagan sa pagtingob sa buot na marumpag nga mga pamilya. Apang ang mga Saksi ni Jehova nagapanikasog sing lakas sa pag-aplikar sang mga prinsipio sang Biblia kag kilala sa mas maayo sa kinaandan nga mga relasyon sa pamilya.

¹⁷ Si Aldemar, halimbawa, isa ka tinyente sa polisiya sang militar sang Brazil kag may mga problema sa pamilya. Ginbiyaan sia sang iya asawa kag nagtinguha sa pagtigayon sing legal nga pagbulagay. Nagsugod sia sa pag-inom sing lakas kag nagtinguha pa gani sa paghikog. Sang ulihi, ang iya mga paryente, nga mga Saksi ni Jehova, nagpakighambal sa iya nahanungod sa Biblia. Naluyagan niya ang iya nabatian kag nagsugod sa pagtuon. Sa handum nga ipahisanto ang iya kabuhi sa tindog nga wala sing nadampigan nga sa amo kilala ang mga Saksi ni Jehova, nangabay sia nga maghalin sa militar. Nalubad ni Aldemar kag sang iya asawa ang ila mga problema subong mag-asawa paagi sa pag-aplikar sang mga prinsipio sang Biblia nga ginaton-an ni Aldemar. Sa karon, ginasunod nila ang mga tikang ni Jesus, kag nagaalagad kay Jehova subong regular nga mga payunir.

Matinumanon Bangod sang Gugma

18. (a) Ngaa ginapakamaayo karon sa espirituwal ang mga Saksi ni Jehova? (b) Paano nagakatuman karon ang Isaias 2:​2-4?

¹⁸ Maathag nga ang mga Saksi ni Jehova nahiusa nga nagalakat sa espiritu kag mga tikang ni Cristo Jesus. Subong mga indibiduwal kag subong isa ka grupo, ginapakamaayo sila sa espirituwal sa paghimo sini. (Salmo 133:​1-3) Ang maathag nga mga pamatuod sang pagpakamaayo sa ila sang Dios nagpahulag sa madamo sang bunayag sing tagipusuon nga mga tawo sa paghikot nga nahisuno sa tagna sa Isaias 2:​2-4. Sa nagligad nga lima ka tuig lamang, 987,828 ang naghimo sing kinahanglanon nga mga tikang sa pagdedikar kag sa pagpresentar sang ila kaugalingon para sa pagpabawtismo sa tubig. Sing mahigugmaon, wala ginlimitehan ni Jehova ang kadamuon sang mga tawo nga makahimo sini sa indi pa magbunal ang “dakung kapipit-an!”​—⁠Bugna 7:​9, 14.

19. (a) Anong kitaon nga mga benepisyo ang mahimo magresulta gikan sa pag-alagad kay Jehova, kag paano ini dapat tamdon? (b) Ano ang aton sadsaran nga rason sa pagtuman sa mga sugo ni Jehova?

¹⁹ Subong ginapakita sang mga eksperiensia sa ibabaw, ang espirituwal nga mga pagpakamaayo nga ginaagom sang katawhan sang Dios masami nga ginaupdan sang kitaon nga mga benepisyo. Halimbawa, paagi sa paglikaw sa pagpanigarilyo, paagi sa moral nga mga pagkabuhi, kag paagi sa pagtahod sa pagkabalaan sang dugo, mahimo nga malikawan nila nga mabiktima sang pila ka balatian. Ukon bangod sang pagkabuhi nga nahisanto sa kamatuoran, mahimo nga makabenepisyo sila sa ekonomiko, sosyal, ukon domestiko nga paagi. Ang bisan diin sinang kitaon nga mga benepisyo ginatamod subong pagpakamaayo gikan kay Jehova, kag ginapamatud-an sini ang pagkapraktikal sang mga kasuguan ni Jehova. Apang ang posibilidad sa pagtigayon sinang praktikal nga mga bentaha indi ang panguna nga rason sa pagtuman sa mga kasuguan sang Dios. Ang matuod nga mga Cristiano nagatuman kay Jehova bangod ginahigugma nila sia, bangod takus sia sang ila pagsimba, kag bangod ang paghimo sang iya kabubut-on amo ang lamang husto nga butang. (1 Juan 5:​2, 3; Bugna 4:11) Nagsiling si Satanas nga ang mga tawo nagaalagad sa Dios bangod lamang sa makagod nga mga benepisyo.​—⁠Tan-awa ang Job 1:​9-11; 2:​4, 5.

20. Paano ang mga Saksi ni Jehova karon nagalakat sa amo man nga espiritu nga ginpakita sang tatlo ka matutom nga Hebreong mga saksi sang dumaan nga mga tion?

²⁰ Ang modernong-adlaw nga mga saksi ni Jehova nagalakat sa amo man nga espiritu nga ginpakita sang tatlo ka matutom nga pamatanon nga Hebreong mga saksi sang adlaw ni Daniel. Sang ginpahog nga ihaboy sa nagadabdab nga hurno sang kalayo, ini sila nagsiling: “Kon amo ini, ang amon Dios nga ginaalagad namon makasarang magluwas sa amon. Gikan sa nagadabdab nga horno sang kalayo kag gikan sa imo kamot, O hari, luwason niya kami. Apang kon indi [kon sayoron, kon tugutan niya nga mapatay kami], hibalua, O hari, nga indi ang imo mga dios ang ginaalagad namon, kag indi kami magsimba sa larawan nga bulawan nga imo napatindog.” (Daniel 3:​17, 18) Walay sapayan sang kitaon nga mga benepisyo ukon mga resulta karon, ang mga Saksi ni Jehova magapadayon sa pagsunod sing suod sa mga tikang ni Jesus, nga nakahibalo nga sigurado ang kabuhi nga walay katapusan sa bag-ong kalibutan sang Dios! Subong nahiusa nga katawhan, magapadayon sila sa paglakat “sa amo man nga espiritu” kag “sa amo man nga mga tikang,” bisan ano man ang matabo!

Mapaathag Mo Bala:

◻ Ngaa nahiusa ang mga Saksi ni Jehova?

◻ Sa anong mga bahin tuhay ang mga Saksi ni Jehova sa mga Cristiano sa ngalan lamang?

◻ Ano ang daku nga rason kon ngaa ang matuod nga mga Cristiano nagaalagad kay Jehova?

◻ Paano ginatamod sang katawhan sang Dios ang mga benepisyo nga nagaresulta gikan sa pagtuman kay Jehova?

[Laragway sa pahina 16]

Kon magpamatok ang isa ka pasyente sa pagpatayhon sing dugo, ginahaumhaum sa masami nga sia isa sang mga Saksi ni Jehova

[Laragway sa pahina 18]

Madamo sang nagapangangkon nga mga Cristiano ang wala ginatublag sang pag-inaway batok sa isa kag isa—⁠nga ginabendisyonan sang ila klero