Ang Kabuhi kag Ministeryo ni Jesus

Gintugyan kag Ginpatay

SANG gintilawan liwat ni Pilato, nga natandog bangod sang mahim-ong nga dignidad sang ginsakit nga si Jesus, nga hilwayon sia, ang pangulong mga saserdote labi nga naakig. Determinado sila nga indi pagtugutan ang bisan ano nga magbalabag sa ila malaut nga tuyo. Gani ginliwat nila ang ila singgit: “Ilansang sia! Ilansang sia!”

“Dalha ninyo sia kag ilansang sia,” sabat nga may kaugot ni Pilato. Kabaliskaran sa ila nagligad nga mga pangabay, ang mga Judiyo mahimo nga may awtoridad sa pagpatay sa mga kriminal bangod sang relihioso nga mga sala nga bulubug-at diutay. Nian, sa makalima ka beses, gindeklarar ni Pilato si Jesus nga wala sing sala, nga nagasiling: “Wala ako sing nakita nga kasal-anan sa iya.”

Sang nakita sang mga Judiyo nga ang ila politikal nga mga sumbong wala magpatubas sing mga resulta, nagbalik sila sa relihioso nga sumbong sang pasipala nga gingamit nila sang nagligad nga mga takna sang ginbista si Jesus sa atubangan sang Sanhedrin. “Kami may kasuguan,” siling nila, “kag sa sinang kasuguan dapat sia mapatay, bangod nga sia nagpaka-anak sang Dios.”

Ining sumbong bag-o kay Pilato, kag nagtiklod ini sa iya nga magkahadlok sing labi. Narealisar niya karon nga si Jesus indi ordinaryo nga tawo, subong sang ginapakita sang damgo sang iya asawa kag sang tumalagsahon nga kabakud sa personalidad ni Jesus. Apang “anak sang Dios”? Nahibaluan ni Pilato nga si Jesus naghalin sa Galilea. Apang, mahimo bala nga nagkabuhi sia anay? Nagdala liwat sa iya sa palasyo, si Pilato nagpamangkot: “Diin ka bala maghalin?”

Si Jesus nagpabilin nga hipos. Sang nagligad ginsingganan niya si Pilato nga hari sia, apang nga ang iya Ginharian indi bahin sining kalibutan. Wala sing dugang nga paathag ang may mapuslanon nga katuyuan karon. Apang, nasaklaw ang bugal ni Pilato bangod sang indi niya pagsabat, kag nagsilabo sia kay Jesus paagi sa mga pulong: “Indi ka bala maghambal sa akon? Wala ka bala makahibalo nga ako may gahom sa pagbuhi sa imo kag may gahom sa paglansang sa imo?”

“Ikaw wala kuntani sing gahom sa akon kon wala mahatag ini sa imo gikan sa ibabaw,” sabat ni Jesus sing matinahuron. Ginapatuhuyan niya ang ginhatag sang Dios nga awtoridad sa tawhanon nga mga gumalahom sa pagdumala sang mga hilikuton sa duta. Si Jesus nagadugang: “Busa ang nagtugyan sa akon sa imo may daku pa nga sala.” Sa pagkamatuod, ang mataas nga saserdote nga si Caifas kag ang iya mga kaupdanan kag si Judas Iscariote may mabug-at pa nga salabton sang sa kay Pilato bangod sang dimakatarunganon nga pagtrato kay Jesus.

Labi pa nga natingala kay Jesus kag hinadlukan nga basi may balaan Sia nga ginhalinan, ginliwat ni Pilato ang iya mga panikasog nga buhian Sia. Apang, ang mga Judiyo nagpamatok kay Pilato. Ginliwat nila ang ila politikal nga sumbong, malimbungon nga nagpahog: “Kon buhian mo ining tawo, indi ka abyan ni Cesar. Ang tagsatagsa nga nagapakahari sa iya kaugalingon nagasumpong kay Cesar.”

Walay sapayan sang makahaladlok nga implikasyon, gindala liwat ni Pilato si Jesus sa guwa. “Tan-awa! Ang inyo hari!” apelar niya liwat sa ila.

“Patya sia! Patya sia! Ilansang sia!” amo ang sabat.

“Ilansang ko bala ang inyo hari?” desperado nga pamangkot ni Pilato.

Akig ang mga Judiyo sa idalom sang pagginahom sang mga Romano. Sa pagkamatuod, ginatamay nila ang paggahom sang Roma! Apang, sing salimpapaw, ang pangulong saserdote nagsiling: “Wala kami sing hari kundi si Cesar.”

Natahap tungod sang iya politikal nga posisyon kag reputasyon, ginsunod sang ulihi ni Pilato ang wala sing kaluoy kag nagapamahog nga luyag sang mga Judiyo. Gintugyan niya si Jesus. Gin-ubahan si Jesus sang mga soldado sang kunup kag ginsul-uban sang iya mga panapton. Sang gindul-ong si Jesus agod ilansang, ginpapas-an sa iya ang iya kaugalingon nga usok sang pag-antos.

Uluadlaw na diutay sang Biernes, Nisan 14; ayhan manug-udto na. Wala sing tulog si Jesus kutob pa sang Huebes sang kaagahon, kag nag-antos sia sing mabudlay nga mga eksperiensia. Sing halangpunon, naubos sang ulihi ang iya kusog bangod sang kabug-at sang usok. Gani isa ka naglabay, si Simon nga taga-Cirene sang Aprika, ang ginpilit nga magpas-an sini para sa iya. Samtang nagalakat sila, nagsunod ang dakung kadam-an sang katawhan, lakip ang madamong mga babayi nga nagahaya kag nagapanalabiton kay Jesus.

Nagbalikid sa mga babayi, si Jesus nagsiling: “Mga babaying anak sang Jerusalem, dili kamo maghibi tungod sa akon. Kundi, maghibi kamo tungod sa inyo kaugalingon kag tungod sa inyo mga anak; kay, yari karon! nagaabot ang mga adlaw nga magasiling sila, ‘Bulahan ang mga baw-as, kag ang mga tiyan nga wala makadala kag ang mga suso nga wala makapasuso!” Nian magasugod sila sa pagsiling sa mga kabukiran, ‘Pukani kami!’ kag sa kabakoloran, ‘Tabuni kami!’ Kay kon ginahimo nila ini sa hilaw pa nga kahoy, ano bala ang mahanabo kon laya na ini?”

Ginapatuhuyan ni Jesus ang kahoy sang Judiyong pungsod, nga may diutay pa nga kabuhi sa sini bangod sang presensia ni Jesus kag sang pagluntad sang nagkalabilin nga nagapati sa iya. Apang sang ginkuha ini gikan sa pungsod, ang patay sa espirituwal nga kahoy lamang ang mabilin, huo, ang laya nga organisasyon sang pungsod. O daku gid nga paghibi kon ang Romanong mga hangaway, nga nagaalagad subong mga manugpatay sang Dios, magahapay sa Judiyong pungsod! Juan 19:6-17; 18:31; Lucas 23:24-31; Mateo 27:31, 32; Marcos 15:20, 21.

◆ Ano nga sumbong ang ginhimo sang relihiosong mga lider batok kay Jesus sang ang ila politikal nga sumbong wala makapatubas sing mga resulta?

◆ Ngaa ayhan labi nga nagkahadlok si Pilato?

◆ Sin-o ang may daku pa ang sala sa natabo kay Jesus?

◆ Paano nahimo sang mga saserdote nga itugyan ni Pilato si Jesus para patyon?

◆ Ano ang ginsiling ni Jesus sa mga babayi nga nagahibi tungod sa iya, kag ano ang buot niya silingon sang ginpatuhuyan niya ang kahoy nga “hilaw” kag “laya”?