Mga Pamangkot Gikan sa mga Bumalasa

Si Jesus nagsiling: “Kon patawaron ninyo ang mga sala sang bisan sin-o nga tawo, patawaron ini sa ila; kon ipabilin ninyo yadtong sa bisan sin-o nga tawo, magapabilin ini?” Ining mga pulong nagakahulugan bala nga ang mga Cristiano mahimo makapatawad sang mga sala?

Wala sing Makasulatanhon nga sadsaran sa paghinakop nga ang mga Cristiano sa kabilugan, ukon bisan ang gintangdo nga mga gulang sa kongregasyon, may balaan nga awtoridad sa pagpatawad sang mga sala. Apang, ang ginsiling ni Jesus sa iya mga disipulo sa Juan 20:​23, nga ginbalikwat sa ibabaw, nagapakita nga ginhatagan sang Dios ang mga apostoles sing pinasahi nga mga gahom may kaangtanan sini. Kag ang pinamulong ni Jesus didto mahimo maangot sa kon ano ang ginsiling niya sa Mateo 18:18 nahanungod sa langitnon nga mga desisyon.

Ang mga Cristiano mahimo makapatawad sang pila ka sala, nahisanto sa ginlaygay ni apostol Pablo nga narekord sa Efeso 4:32: “Magmainayuhon kamo ang isa sa isa, maluluy-on sing mapinalanggaon, hilway nga nagapatawad sa isa kag isa subong nga ang Dios man kay Cristo nagpatawad sa inyo.” Ginahambalan diri ni Pablo ang nahanungod sa personal nga mga problema sa ulot sang mga Cristiano, subong sang dimahalungon nga hambalanon. Dapat sila manikasog nga lubaron ining mga butang, nagapatawad sa isa kag isa. Dumduma ang pinamulong ni Jesus: “Gani, kon nagadala ka sang imo mga dulot sa halaran kag didto makadumdom ka nga ang imo utod may aligutgot sa imo, bayai didto ang imo dulot sa atubangan sang halaran, kag lakat ka; makighidait anay sa imo utod, kag ugaling, sa pagbalik mo, ihalad mo ang imo dulot.”​—⁠Mateo 5:​23, 24; 1 Pedro 4:⁠8.

Walay sapayan, ang konteksto sang Juan 20:23 nagapanugda nga ginapatuhuyan ni Jesus ang mas mabug-at nga mga sala, subong sang ginpakita sang ginsiling pa niya sa sining espesipiko nga tumalambong. Tan-awon naton kon ngaa.

Sang adlaw nga ginbanhaw sia, si Jesus nagpakita sa mga disipulo sa nakandaduhan nga hulot sa Jerusalem. Ang report nagasiling: “Busa, si Jesus nagsiling liwat sa ila: ‘May paghidait kuntani sa inyo. Subong nga ang Amay nagpadala sa akon, ako man nagapadala sa inyo.’ Kag sang nakasiling sia sini ginhuypan niya sila kag nagsiling sa ila: ‘Batuna ninyo ang balaan nga espiritu. Kon patawaron ninyo ang mga sala sang bisan sin-o nga tawo, patawaron ini sa ila; kon ipabilin ninyo yadtong sa bisan sin-o nga tawo, magapabilin ini.’ ”​—⁠Juan 20:​21-23.

Mahimo nga ang mga disipulo nga ginhinambitan amo labi na ang matutom nga mga apostoles. (Ipaanggid ang bersikulo 24.) Paagi sa paghuyop sini kag sa pagsiling, “Batuna ninyo ang balaan nga espiritu,” malaragwayon sila nga ginpahibalo ni Jesus nga sa dili madugay ang balaan nga espiritu ipasagahay sa ila. Si Jesus nagpadayon sa pagsiling nga makatigayon sila sing awtoridad nahanungod sa pagpatawad sa mga sala. Sing makatarunganon, ining duha ka pinamulong naangot, ang isa nagadul-ong sa masunod.

Kalim-an ka adlaw pagkatapos sang iya pagkabanhaw, sang adlaw sang Pentecostes, ginpasagahay ni Jesus ang balaan nga espiritu. Ano ang nahimo sina? Una, yadtong nakabaton sing espiritu natawo liwat subong espirituwal nga mga anak sang Dios nga may paglaum nga mangin mga gumalahom kaupod ni Cristo sa langit. (Juan 3:​3-5; Roma 8:​15-17; 2 Corinto 1:22) Apang labi pa ang nahimo sadtong pagpasagahay sang espiritu. Ang pila nga nagbaton nakatigayon sing milagruso nga mga gahom. Paagi sina ang pila nakahambal sing dumuluong nga mga hambal nga wala anay nila mahibalui. Ang iban nakapanagna. Apang ang iban pa nakaayo sang masakiton ukon nakabanhaw sang minatay.​—⁠1 Corinto 12:​4-11.

Sanglit ang pinamulong ni Jesus sa Juan 20:22 nagatudlo sa sining pagpasagahay sang balaan nga espiritu sa mga disipulo, ang iya may kaangtanan nga mga pulong nahanungod sa pagpatawad sa mga sala daw nagakahulugan nga ang mga apostoles gin-amanan sang Dios paagi sa pagpanghikot sang espiritu sing pinasahi nga awtoridad sa pagpatawad ukon sa pagpabilin sang mga sala.​—⁠Tan-awa ang The Watchtower, Marso 1, 1949, pahina 78.

Ang Biblia wala nagahatag sa aton sing kompleto nga report sang kada tion nga gingamit sang mga apostoles ina nga awtoridad, apang wala man sini ginrekord ang tanan nga kaso sang gingamit nila ang milagruso nga dulot sa pagpamulong sing mga hambal, sa pagpanagna, ukon sa pagpang-ayo.​—⁠2 Corinto 12:12; Galacia 3:5; Hebreo 2:⁠4.

Ang isa ka kaso nga nagadalahig sang apostoliko nga awtoridad sa pagpatawad ukon sa pagpabilin sang mga sala nagadalahig kay Ananias kag kay Safira, nga naglikom sa espiritu. Si Pedro, nga nakabati kay Jesus nga nagbungat sang mabasa naton sa Juan 20:​22, 23, nagbuyagyag kanday Ananias kag Safira. Ginhinambitan una ni Pedro si Ananias, nga napatay sa gilayon. Sang nagsulod sang ulihi si Sapira kag ginpadayon ang pagbinutig, ginpabutyag ni Pedro ang paghukom sa iya. Wala pagpatawara ni Pedro ang iya sala kundi nagsiling: “Toloka! Sa ganhaan ang mga tiil sang naglubong sang imo bana, kag dalhon ka nila sa guwa.” Sia man napatay sa gilayon.​—⁠Binuhatan 5:​1-11.

Sa sining hitabo gingamit ni apostol Pedro ang pinasahi nga awtoridad sa pagpabutyag sing pat-od nga pagpabilin sang sala, ang milagruso nga ihibalo nga indi mapatawad sang Dios ang sala ni Ananias kag Safira. Ang mga apostoles daw may labaw sa tawo man nga ihibalo sa mga kaso diin sigurado sila nga ang mga sala ginpatawad pasad sa halad ni Cristo. Gani yadtong ginhatagan sing gahom sang espiritu nga mga apostoles makapabutyag sing kapatawaran ukon pagpabilin sang mga sala.a

Wala ini nagasiling nga ang tanan gintangdo sang espiritu nga mga gulang sadto anay may milagruso nga awtoridad. Makita naton ina gikan sa ginsiling ni apostol Pablo nahanungod sa tawo nga ginpaguwa sa kongregasyon sang Corinto. Si Pablo wala magsilling, ‘Ginpatawad ko ang mga sala sina nga tawo’ ukon bisan sing, ‘Nahibaluan ko nga ang tawo ginpatawad na sa langit, gani batuna ninyo sia liwat.’ Sa baylo, ginlaygayan ni Pablo ang bug-os nga kongregasyon nga patawaron ining ginpasag-uli liwat nga Cristiano kag pakitaan sia sing gugma. Si Pablo nagdugang: “Ang bisan ano nga butang nga ginpatawad ninyo sing maluluy-on kay bisan sin-o, ginahimo ko man.”​—⁠2 Corinto 2:​5-11.

Sa tion nga ang tawo napasag-uli liwat sa kongregasyon, ang tanan nga Cristianong mga kauturan nga lalaki kag babayi mahimo makapatawad sa kahulugan sang indi paghupot sing aligutgot sa iya sa kon ano ang iya ginhimo. Apang, una, dapat sia maghinulsol kag ipasag-uli liwat. Paano ina mahanabo?

May mabug-at nga mga sala nga dapat lubaron sang mga gulang sa kongregasyon, subong sang pagpangawat, pagbutig, ukon malubha nga imoralidad. Ginatinguhaan nila nga tadlungon kag badlungon ina nga mga makasasala, nga nagapahulag sa ila sa paghinulsol. Apang kon ang isa dimahinulsulon nga nagahimo sing malubha nga sala, ginaaplikar sining mga gulang ang balaan nga panuytoy sa pag-dis­fellow­ship sa nakasala. (1 Corinto 5:​1-5, 11-13) Kon ano ang ginsiling ni Jesus sa Juan 20:23 wala naaplikar sa sina nga mga kaso. Ining mga gulang wala sing milagruso nga mga dulot sang espiritu, subong sang ikasarang sa pag-ayo sa nagamasakit sa pisikal ukon sa pagbanhaw sang minatay; nahimo na sadtong mga dulot ang ila katuyuan sang nahaunang siglo kag natapos na sadto. (1 Corinto 13:​8-10) Dugang pa, ang mga gulang karon wala sing balaan nga awtoridad sa pagpatawad sang malubha nga sala sa kahulugan sang pagpahibalo nga ang isa nga nakasala sing malubha matinlo sa mata ni Jehova. Ini nga sahi sang pagpatawad dapat nga nasandig sa halad nga gawad, kag si Jehova lamang ang makapatawad sa sina nga sadsaran.​—⁠Salmo 32:5; Mateo 6:​9, 12; 1 Juan 1:⁠9.

Subong sa kaso sang isa ka tawo sa dumaan nga Corinto, sang ang nakasala sing malubha wala maghinulsol, dapat sia i-disfellow­ship. Kon magahinulsol sia sa ulihi kag magapatubas sang mga buhat nga nagakabagay sa paghinulsol, ang balaan nga kapatawaran posible. (Binuhatan 26:20) Sa sina nga kahimtangan, ang Kasulatan nagahatag sa mga gulang sing rason sa pagpati nga ginpatawad matuod ni Jehova ang nakasala. Nian, sa tion nga napasag-uli liwat ang tawo, sarang sia mabuligan sang mga gulang sa espirituwal agod mangin malig-on sa pagtuo. Ang iban sa kongregasyon makapatawad man sa paagi nga ginpatawad sang mga Cristiano sa Corinto ang gindisfellow­ship nga tawo nga ginpasag-uli liwat sadto.

Sa paglubad sang mga problema sa sini nga paagi, ang mga gulang wala nagahimo sang ila kaugalingon nga mga talaksan sa pagdesisyon. Ginaaplikar nila ang mga prinsipio sang Biblia kag mahalungon nga ginasunod ang Makasulatanhon nga mga paagi nga ginpahamtang ni Jehova. Hanti, ang bisan anong pagpatawad ukon indi pagpatawad sang mga gulang mahimo mangin sa kahulugan sang pinamulong ni Jesus sa Mateo 18:18: “Sa pagkamatuod nagasiling ako sa inyo, Bisan anong mga butang nga inyo gapuson sa duta mangin mga butang nga nagapos sa langit, kag bisan anong mga butang nga inyo hubaran sa duta mangin mga butang nga nahubaran sa langit.” Ang ila mga buhat magapabanaag lamang sang pagtamod ni Jehova subong sang ginhatag sa Biblia.

Gani, ang ginsiling ni Jesus, subong sang narekord sa Juan 20:​23, wala nagasumpakil sa iban nga bahin sang Kasulatan, kundi ginapakita sini nga ang mga apostoles may pinasahi nga awtoridad nahanungod sa kapatawaran, nahisanto sa ila pinasahi nga katungdanan sang bag-o pa lamang ang Cristianong kongregasyon.

[Footnote]