Ang Kaangtanan ni Jesus sa Iya Amay

Sang ginsumbong sang pila ka Judiyo si Jesus nga ginlapas niya ang Adlaw nga Inugpahuway sang gin-ayo niya ang tawo, si Jesus nagsabat: “Ang akon Amay padayon nga nagapangabudlay tubtob karon, kag ako man padayon nga nagapangabudlay.”—Juan 5:17.

Wala ginlapas ni Jesus ang kasuguan sang Dios sa Adlaw nga Inugpahuway. Ang iya pagbantala kag pag-ayo sa tawo pag-ilog sa maayo nga mga buhat sang Dios. Gani padayon sia nga nagahimo sing maayo kada adlaw. Pero ang iya sabat nagpaakig pa gid sa mga nagsumbong sa iya kag luyag nila sia patyon. Ngaa?

Magluwas sa ila sayop nga panumbungon nga ginlapas ni Jesus ang Adlaw nga Inugpahuway paagi sa pagpang-ayo, naakig man sila kay nagsiling sia nga Anak sia sang Dios. Para sa ila nagapasipala sia sang ginkabig niya ang Dios nga iya Amay, nga ang pagsiling ni Jesus nga si Jehova ang iya Amay daw luyag niya mangin tupong sa Dios. Pero wala mahadlok si Jesus kag ginsabat pa gid niya sila parte sa iya pinasahi nga kaangtanan sa Dios. “Palangga sang Amay ang Anak,” siling niya, “kag ginapakita niya sa iya ang tanan nga ginahimo niya.”—Juan 5:20.

Ang Amay amo ang Manughatag sing Kabuhi, kag ginpakita niya ini sang una paagi sa paghatag sa pila sing gahom nga magbanhaw. Si Jesus nagpadayon: “Subong nga ginabanhaw sang Amay ang mga patay kag ginahatagan sila sing kabuhi, hatagan man sang Anak sing kabuhi ang mga luyag niya hatagan.” (Juan 5:21) Importante gid ang iya ginsiling, nga nagahatag sing paglaum sa palaabuton! Bisan sa karon, ang Anak nagabanhaw sa espirituwal nga kahulugan. Gani si Jesus nagsiling: “Ang nagapamati sa akon pulong kag nagapati sa Isa nga nagpadala sa akon may kabuhi nga wala sing katapusan, kag indi sia paghukman kundi nagliton halin sa kamatayon pakadto sa kabuhi.”—Juan 5:24.

Wala pa sing ginbanhaw sadto si Jesus, pero ginsilingan niya ang mga nagasumbong sa iya nga ining literal nga pagbanhaw mahanabo. “Magaabot ang tion,” siling niya, “nga ang tanan nga yara sa handumanan nga mga lulubngan makabati sang iya tingog kag magagua.”—Juan 5:28, 29.

Tumalagsahon gid ang papel ni Jesus, pero ginpaathag niya nga mas mataas ang Dios sangsa iya: “Wala ako nagahimo sang bisan ano nga luyag ko. . . . Wala ako nagahimo sang akon kabubut-on, kundi sang kabubut-on sang nagpadala sa akon.” (Juan 5:30) Pero, ginlaragway ni Jesus ang iya importante nga papel sa katuyuan sang Dios, nga wala pa niya mapahayag halin sadto. Apang indi lamang ang pagpanaksi ni Jesus ang nabatian sang mga nagasumbong sa iya. “Nagpadala kamo sang mga tawo kay Juan [nga Manugbawtismo],” pahanumdom ni Jesus sa ila, “kag nagpanaksi sia sa kamatuoran.”—Juan 5:33.

Mahimo nabatian sang mga nagasumbong kay Jesus nga mga duha ka tuig antes sini, ginsilingan ni Juan ang mga lider sang relihion sang mga Judiyo parte sa Isa nga magasunod sa iya—nga nagagamit sing mga tinaga nga “ang gintagna nga manalagna” kag “ang Cristo.” (Juan 1:20-25) Ginpahanumdom sila ni Jesus sa ila mataas nga pagtan-aw kay Juan nga napriso na subong: “Sa malip-ot nga tion handa kamo nga magkalipay sa iya kapawa.” (Juan 5:35) Pero may labaw pa sia nga panaksi sangsa kay Juan nga Manugbawtismo.

‘Ang pagtuman ko sa hilikuton nga ginpahimo niya sa akon [lakip ang pagpang-ayo nga iya ginhimo] panaksi nga ginpadala ako sang Amay.’ Magluwas sini, si Jesus nagpadayon: “Ang Amay nga nagpadala sa akon nagpanaksi tuhoy sa akon.” (Juan 5:36, 37) Halimbawa, nagpanaksi ang Dios parte kay Jesus sang ginbawtismuhan sia.—Mateo 3:17.

Wala gid sing rason ang mga nagasumbong kay Jesus nga indi sia pagbatunon. Ang Kasulatan nga kuno ginausisa nila nagapamatuod parte sa iya. “Kon nagapati kamo kay Moises magapati man kamo sa akon,” hinakop ni Jesus, “kay nagsulat sia tuhoy sa akon. Apang kon wala kamo nagapati sa iya sinulatan, paano kamo magapati sa akon ginasiling?”—Juan 5:46, 47.