Mga Pamangkot Gikan sa mga Bumalasa

◼ Ano ang buot silingon ni Jesus sang magsiling sia nga “ang tubig” nga ginahatag niya mangin “tuboran nga nagaibwal sa kabuhi nga walay katapusan”?

Ginsilingan ni Jesus ang isa ka Samaritanhon nga babayi: “Ang tagsatagsa nga nagainum sining tubig [sa bubon ni Jacob] uhawon liwat. Apang ang bisan sin-o nga nagainum sang tubig nga akon ihatag sa iya indi na gid pag-uhawon, ang tubig nga akon ihatag sa iya mangin tuboran sa sulod niya nga nagaibwal sa kabuhi nga walay katapusan.”—Juan 4:13, 14.

Ginapatalupangod diri ni Jesus ang espirituwal nga mga kaayohan nga maagom sang isa ka tawo nga nagbaton sang Iya pulong kag nangin disipulo ni Cristo. Ina nga tawo nga nagpadayon sa pagkuha sing sibu nga ihibalo tuhoy kay Jehova nga Dios kag kay Jesucristo kag nagahulag sa sini nga may pagtuo mangin yara sa posisyon nga makatigayon sing kabuhi nga walay katapusan. (Juan 17:3) Gin-ilustrar ni Jesus ini nga proseso sa hunahuna kag tagipusuon sang tawo kaangay sang tuboran nga nagapaibwal sang mga benepisyo, padayon nga nagapabakud sang iya pagtuo kag nagatuytuy sang iya mga tikang sa dalanon padulong sa kabuhi nga walay katapusan.

Samtang ang ginapadaku sa Juan 4:14 amo ang mga benepisyo nga batunon sang indibiduwal mismo, ang Cristianong disipulo nga may bugana sining espirituwal nga tubig kinaugali nga nagahandum sa pagpaambit sini sing dimakagud sa iban. Luyag niya nga mabatian sang iban ang Cristianong mensahe kag magapalapit sa tuboran nga nagaibwal sing espirituwal man nga mga benepisyo nga nagadul-ong sa kabuhi nga walay katapusan. Ini nga pagpaambit sang mensahe sa iban daw amo ang ideya sa likod sang ginsiling ni Jesus sa Juan 7:37-39: “‘Kon ang bisan sin-o ginauhaw, magkari sia sa akon kag mag-inum. Ang nagatuo sa akon, subong sang nasiling sa Kasulatan, “Gikan sa tagipusuon niya magailig ang mga suba sang tubig nga buhi.”’ Apang, ginsiling niya ini nahanungod sa espiritu nga batunon sadtong nagatuo sa iya.”

Ginpahulag sang buhi nga puwersa sang espiritu sang Dios, nga ginbaton kutob sang Pentecostes 33 C.E. padayon, ang mga apostoles kag mga disipulo ni Jesus naghimo sing mga katingalahan sa pagdala sing tubig nga buhi sa iban. Ang espiritu sang Dios may importante man nga papel sa pagsangkap kag sa pagpahulag sa mga disipulo ni Jesus karon, sa hinaplas nga nagkalabilin kag sa “dakung kadam-an” sang “iban nga mga karnero,” sa pagpaambit sang nagahatag-kabuhi nga tubig sa ginauhaw nga katawhan, samtang ginabantala nila ang maayong balita sang Ginharian sang Dios sa bug-os nga kalibutan. Gani ang ginauhaw makakari sa isa nga ginagamit sang Dios sa paghatag sing tubig sang kamatuoran nga nagadul-ong sa kabuhi nga walay katapusan.—Mateo 24:14; 28:19, 20; Juan 7:37; 10:16; Bugna 7:9.