Indi Pagpaligara ang Kamatuoran

AYHAN nahibaloan ni Poncio Pilato nga ang pagbaton sang kamatuoran may bili sa iya. Ang mangin sumulunod ni Cristo nagakahulugan sing pagbaton sang iya pagkahari kag sing bug-os nga pagbaylo sa moral. Apang, si Solomon nga nagsulat sang Hulubaton 23:23, nagsiling: “Bakla ang kamatuoran kag dili pag-ibaligya—ang kaalam kag ang disiplina kag ang paghangop.”

‘Baklon ang kamatuoran’? mahimo ipalibog mo. Huo, kay ang Biblia diri nagabulig sa aton sa paghangop nga matigayon sang isa ang kamatuoran, kaalam, kag ang paghangop paagi lamang sa bili! Apang, ang kamatuoran amo ang labing hamili nga butang. Ti, si Solomon naglaygay, “Dili pag-ibaligya”! Ginapahangop sini nga ang kamatuoran indi matupungan sa bili.

‘Apang, ano gid bala ang kamatuoran?’ pamangkot sang madamo, nga ginasulit ang pamangkot ni Pilato. Para sa madamo karon, ang “kamatuoran” isa ka indi mahangpan nga ideya. Binagbinaga, halimbawa, ang ginsiling anay ni Albert Einstein: “Mabudlay hatagan sing sibu nga kahulugan ang termino nga ‘sientipiko nga kamatuoran.’ Sa amo, ang kahulugan sang tinaga nga “kamatuoran” nagakatuhaytuhay suno sa kon bala ginabinagbinag naton ang kamatuoran sang eksperiensia, matematika, ukon sientipiko nga teoriya. Ang ‘relihioso nga mga kamatuoran’ indi gid maathag sa akon.” (Ideas and Opinions, ni Albert Einstein) Apang bangod bala indi mahangpan ni Einstein ang kamatuoran nagakahulugan nga dapat mo ini paligaron? Indi gid.

Si Jesus maathag nga nagsiling: “Ako amo ang dalan kag ang kamatuoran kag kabuhi.” (Juan 14:6) Huo, “ang kamatuoran” nasentro kay Cristo Jesus kag sa iya bahin sa mga katuyoan ni Jehova nga Dios subong ang Manugtuman sang mga tagna, Manunubos para sa makasasala nga katawhan, gintangdo nga Hari sang Ginharian sang Dios, Mataas nga Saserdote, kag Manuglaglag sa mga malauton. (Roma 15:8; 1 Timoteo 2:5, 6; Juan 3:16; Efeso 1:20-22; Daniel 7:13, 14; Mateo 6:9, 10; Hebreo 4:14; Bugna 19:11-21; 2 Tesalonica 1:7-9) Apang, paano ang isa ‘makabakal’ sining kamatuoran?

“Pagkuha sing Ihibalo”

Ang isa nagasugod sa pagbakal sing kamatuoran paagi sa pagsunod sang mga pulong ni Jesus sa Juan 17:3: “Ini nagakahulugan sing kabuhi nga walay katapusan, ang ila pagkuha sing ihibalo tuhoy sa imo, ang lamang matuod nga Dios, kag tuhoy sa isa nga imo ginpadala, si Jesucristo.” Sa pagkamatuod, daw mabudlay ini himuon kon isahanon lamang ikaw. Sadtong unang siglo, may isa ka Etiopianhon nga eunuco ukon opisyal sang korte, nga nagtinguha sa paghimo sini. Apang sang makita ang eunuco nga nagatinguha sa pagtuon sang mabudlay nga tagna sang Biblia, ang ebanghelisador nga si Felipe namangkot, “Nakahangop ka bala sang imo ginabasa?” Sa sini ang tawo nagsabat, “Sa pagkamatuod, paano ako makahangop kon wala sing isa nga magtuytoy sa akon?” (Binuhatan 8:28-31) Ayhan amo man sina ang imo ginabatyag.

Busa, ang mga Saksi ni Jehova nagatanyag sa pagtuon sang Biblia upod sa imo sa inyo puluy-an.a Ina nga mga sesyon wala sing bayad. “Ginbaton ninyo sa walay bayad, ihatag sa walay bayad,” siling ni Jesus. (Mateo 10:8) Apang ang pagbakal sing kamatuoran may bili sa imo sa isa pa ka paagi—kinahanglan sini ang imo tion kag panikasog. Apang, dumduma nga si Jesucristo—buhi kag aktibo sa langit—luyag magbulig sa imo sa pagtuon sing kamatuoran. (Ipaanggid ang Lucas 5:13.) Ginsaaran niya ang iya una nga mga disipulo nga ang espiritu sang Dios magatuytoy sa ila “sa bug-os nga kamatuoran.” (Juan 16:13) Sa pagpasangkad, maaplikar man ini sa imo. Gani indi pagbatyaga nga ang pagtuon sing kamatuoran mabudlay gid para sa imo.

Ang serioso nga pagtuon sing Biblia ginpahapos man paagi sa mga bulig sa pagtuon sing Biblia nga ginbalhag sang mga Saksi ni Jehova. Ang halimbawa lamang sang mga tig-ulo sang pila sining mga publikasyon nagapukaw sang gana sang sinsero nga mga nagapangita sing kamatuoran: Ang Kamatuoran nga Nagadul-ong sa Kabuhi nga Dayon, Mahimu Ka Mabuhi sing Dayon sa Paraiso sa Duta, Survival Into a New Earth, United in Worship of the Only True God, kag Life—How Did It Get Here? By Evolution or by Creation? sa pagsambit sing pila lamang.b

Ginapaathag sining mga publikasyon ang Kasulatan sa pulong nga madali hangpon, nga makagalanyat indi lamang sa imo pangatarungan kundi sa imo man tagipusuon. Ang kamatuoran hayag sa sini bangod sang pagkaprangka, sang pagpanalawsaw, kag sang praktikal nga laygay. Samtang ginaton-an mo ang mga kamatuoran sang Biblia upod sa bulig sining mga publikasyon, mahangpan mo ang buot silingon ni Jesus sang sia nagsiling: “Kamo makakilala sang kamatuoran, kag ang kamatuoran magahilway sa inyo.” (Juan 8:32) Ang tinaga diri nga “kamatuoran” nagalakip sang bug-os nga hubon sang Cristianong mga panudlo nga masapwan karon sa nasulat nga Pulong sang kamatuoran sang Dios—ang Biblia. (2 Timoteo 2:15; Efeso 1:13) Apang, ngaa ang pagtuon sing kamatuoran makahilway gid?

Bilang halimbawa, binagbinaga nga ang “kahadlok sa kamatayon” ‘nag-ulipon [sa katawhan] sa bug-os nila nga kabuhi.’ (Hebreo 2:15) Amo sini walay sapayan sang kamatuoran nga ang kalabanan nga tawo nagapangangkon nga sila may dimaathag nga paglaum nga mangin malipayon sa langit kon mapatay sila. Apang, ang kamatuoran sang Biblia nagahilway sa isa gikan sa sina nga mga kahadlok. Naton-an sang isa nga ang patay wala nagaantos sa isa ka kalayuhon nga duog, kay “ang patay wala makahibalo sang bisan ano.” (Manugwali 9:5, 10; tan-awa man ang Salmo 146:4 kag Manugwali 3:19, 20.) Ginapakita man sang Biblia nga ang tawo wala sing natawhan nga sugyot nga mapatay kag magpalangit. Sa kabaliskaran, ‘ginbutang [sang Dios] ang wala sing katapusan sa tagipusuon sang katawhan’; ang normal nga tawo nagahandum nga mabuhi sing dayon!—Manugwali 3:11; tan-awa man ang Roma 5:12; 6:23.

Ina nga handum matuman sa ginatawag sang Biblia ang “bag-ong duta.” (2 Pedro 3:13; ipaanggid ang Mateo 6:9, 10.) Ginpakita ni Jesus nga ang makatigayon sing kabuhi sa “bag-ong duta” magapuyo sa “Paraiso.” (Lucas 23:43) Ang iban pa nga kasulatan nagabulig sa aton sa paghangop nga mangin isa ini ka kalibutan nga wala sing kasakit kag mga luha! (Bugna 21:4; Isaias 11:6-9) Hunahunaa lamang kon paano mabalhin sining paglaum ang imo kabuhi! Apang dapat anay ikaw magkuha sing ihibalo.

Nagasakripisyo nga Bugal

Sa Salmo 25:9 ang Biblia nagasiling: “Tuytuyan niya ang mga mapainubuson sa paglakat sa iya hudisyal nga desisyon, kag tudloan niya sang iya dalanon ang mga mapainubuson.” Indi, indi pag-ihatag sang Dios ang kamatuoran sa mga indibiduwal nga matinaastaason kag bugalon. “Ang Dios nagasumpong sa mga bugalon, apang nagahatag sing dibagay nga kaluoy sa mga mapainubuson.” (1 Pedro 5:5) Mahimo nga si Poncio Pilato sa dimagkubos interesado sa kamatuoran. Apang ang dumaan nga mga manunulat nagalaragway kay Pilato subong matinaastaason nga tawo. Sa mga Romano, ang mga Judiyo talamayon nga mga tawo nga may makatilingala nga relihion nga ila ginatamay! Ang bugal kag politikal nga ambisyon mahimo nga nagsablag kay Pilato.—Hulubaton 16:18.

Madamo sa karon ang interesado man sa mensahe nga ginadala sang mga Saksi ni Jehova. Apang, mahimo natalupangdan nila nga ang mga Saksi ni Jehova masami nga indi manggaranon, nga ang ila simple lamang nga tiliponan (Kingdom Hall) wala-wala kon ipaanggid sa matahom nga mga simbahan sang Cristiandad, nga pila lamang sa mga Saksi ang makapabugal sing mataas nga tinon-an. Apang talupangda ang ginasiling sang Biblia sa 1 Corinto 1:26-29: “Kay tan-awa ang pagtawag sa inyo, mga kauturan, nga indi madamo sa inyo ang maalam suno sa undanon nga mga paagi, indi madamo ang mga gamhanan, indi madamo ang mga dungganon; kundi ginpili sang Dios ang mga buangbuang sang kalibutan sa pagpakahuya sang maalam; kag ginpili sang Dios ang maluya sa kalibutan, sa pagpakahuya sang makusog; kag ginpili sang Dios ang kubos kag talamayon sa kalibutan, ang mga butang nga indi amo, sa pagpakawalay pulos sang mga butang nga amo, agod nga walay tawo nga magpabugal sa atubangan sang Dios.”

Busa ang pagtuon gikan sa ‘manubo’ nga mga tawo mahimo nga magbili sang imo bugal. Apang tuman bala ina kataas nga bili nga ibayad para sa kamatuoran?

Pag-aplikar sang Ihibalo

Ang paghibalo lamang sang impormasyon—bisan kamatuoran—indi pa tuman. Amo kon ngaa ginapalig-on kita nga ‘baklon ang kaalam.’ (Hulubaton 23:23) Ang kaalam amo ang pag-aplikar sang ihibalo! Sa kamatuoran, si Solomon nagsiling nga ang “kaalam amo ang pamuno nga butang.” (Hulubaton 4:5-7) Huo, ano ang pulos sang ihibalo kon wala ini ginaaplikar? Gani sa tapos maton-an ang iya sang Dios mga dalanon, mga sugo, mga kasugoan, mga pahanumdom, kag laygay, ton-i nga iaplikar ini sa imo kabuhi. “Ang kaalam ginapakamatarong sang iya mga binuhatan,” siling ni Jesus.—Mateo 11:19.

Ginsikway ni Pilato ang kamatuoran. Apang, indi dapat nga himuon mo ina nga sayop. Ang pagpaligad sa kamatuoran bangod sang bugal, ambisyon, ukon gugma sa dimakasulatanhon nga bisyo binuang sa pagkamatuod. Iloga ang salmista nga nangamuyo, “Pahangpa ako, agod nga mabuhi ako.” (Salmo 119:144) Huo, ang isa nga handa sa pagbayad sang bili sang pagtigayon sing kamatuoran kag kaalam ‘mabuhi,’ kay ang isa nga nagabakal sini “pat-od nga makasapo sing kabuhi, kag makatigayon sing maayong kabubut-on gikan kay Jehova.”—Hulubaton 8:35.

Ang isa ka tawo nga nagsugod sa pagtuon sang Biblia upod sa mga Saksi ni Jehova nagsiling: “Isa ka pagpakamaayo hambalon nga ginbalhin sang kamatuoran ang amon kabuhi.” (Italiko amon.) Mabalhin man sini ang imo kabuhi. Gani indi pagpaligara ang kamatuoran! Himusli ining tumalagsahon nga kahigayunan sa pagbakal sing kamatuoran, kaalam, kag sing paghangop. Indi gid ikaw maghinulsol.

[Mga footnote]

[Laragway sa pahina 4]

Ayhan bangod sang bugal ginpaligad ni Poncio Pilato ang kamatuoran