Ang Kabuhi kag Ministeryo ni Jesus

Isa ka Misyon sang Kaluoy sa Judea

MGA senemana ang nagligad, sa Piesta sang Dedikasyon sa Jerusalem, gintinguhaan sang mga Judiyo nga patyon si Jesus. Gani naglakbay sia paaminhan, ayhan sa isa ka lugar nga indi malayo gikan sa Dagat sang Galilea.

Sining ulihi, nagapabagatnan sia liwat padulong sa Jerusalem, nagabantala sa mga minuro sang Perea, isa ka distrito sidlangan sang Suba Jordan. Bag-o lang ginsugid ang ilustrasyon nahanungod sa tawo nga manggaranon kag kay Lazaro. Karon padayon niya nga ginatudluan ang iya mga disipulo sang mga butang nga gintudlo niya anay sa ila sa Galilea.

Nagsiling sia, halimbawa, nga mas maayo para sa isa nga “bitayan sa iya liog sing bato nga galingan kag itagbong sia sa dagat” sang sa magpasandad sia sa isa sining “mga magamay” sang Dios. Ginpadaku man niya ang pagkakinahanglanon sang pagpatawad, nagasiling: “Bisan pa kon makasala [ang isa ka utod] sa imo sing makapito sa isa ka adlaw kag makapito magbalik sia sa imo, nga nagasiling, ‘Nagahinulsul ako,’ patawara sia.”

Sang ang mga disipulo nagpangabay, “Dugangi ang amon pagtuo,” si Jesus nagsabat: “Kon kamo may pagtuo subong sang lamigas sang binhi nga mustasa, makasiling kamo sa sining sicamino, ‘Magabut ka kag matanum ka sa dagat!’ kag magatuman ini sa inyo.” Gani bisan ang diutay nga pagtuo daku ang mahimo.

Masunod, si Jesus nagsugid sing matuodtuod nga hitabo nga nagailustrar sang nagakaigo nga panimuot sang isa ka alagad sang labing gamhanan nga Dios. “Sin-o bala sa inyo nga may ulipon nga nagaarado ukon nagabantay sang karnero,” siling ni Jesus, “nga magasiling sa iya sang nakaabot sia gikan sa uma, ‘Kari ka sa gilayon kag maglingkod sa pagkaon’? Sa baylo, indi bala magasiling sia sa iya, ‘Ihanda ang panihapon ko, kag mag-ilis ka kag mag-alagad sa akon tubtob nga makakaon ako kag makainum, kag sa tapos sini magkaon ka kag mag-inum’? Nagapasalamat bala sia sa ulipon bangod nga naghimo sia sang ginsugo? Subong man kamo, sang nahimo ninyo ang tanan nga ginsugo sa inyo, magsiling kamo, ‘Mga ulipon kami nga walay pulus. Ginhimo lamang namon ang amon katungdanan.’ ” Busa, ang mga alagad sang Dios indi dapat magbatyag nga nagahimo sila sa Dios sing pabor paagi sa pag-alagad sa iya. Sa baylo, dapat nila pirme dumdumon ang ila pribilehiyo sa pag-alagad sa iya subong ginsaligan nga mga katapo sang iya panimalay.

Ayhan dili madugay sa tapos niya nahatag ining ilustrasyon nga ang isa ka mensahero nag-abot. Ginpadala sia nanday Maria kag Marta, nga mga utod ni Lazaro, nga nagapuyo sa Betania sang Judea. “Ginuo, tan-awa! ang imo ginahigugma nagamasakit,” siling sang mensahero.

Si Jesus nagsabat: “Ining masakit indi ikamatay, kundi ini tungod sa himaya sang Dios, agod nga ang Anak sang Dios mahimaya paagi sini.” Sa tapos magpabilin sing duha ka adlaw sa kon diin sia, si Jesus nagsiling sa iya mga disipulo: “Makadto kita liwat sa Judea.” Apang, ginpahanumdom nila sia: “Rabbi, bag-o pa lamang ang mga Judiyo magtinguha sa pagbato sa imo, kag makadto ka liwat didto?”

“Indi bala napulog duha ka takna sa isa ka adlaw?” pamangkot ni Jesus sa pagsabat. “Kon ang tawo nagalakat sa adlaw wala sia nagakasandad, bangod nga makakita sang kapawa sining kalibutan. Apang kon ang tawo nagalakat sa kagab-ihon, nagakasandad sia, bangod nga ang kapawa wala sa iya.”

Sing hayag ang buot silingon ni Jesus amo nga ang “takna sa isa ka adlaw,” ukon ang tion nga gintugot sang Dios para sa iya ministeryo sa duta, wala pa matapos, kag tubtob nga ginatugot pa, wala sing makahalit sa iya. Dapat niya gamiton sing bug-os ang malip-ot nga tion sang “isa ka adlaw” nga nabilin sa iya, kay pagkatapos sina magaabot ang “kagab-ihon” nga patyon sia sang iya mga kaaway.

Si Jesus nagadugang: “Ang aton abyan nga si Lazaro natulugan, apang makadto ako agod nga mapukaw sia sa katulugon.”

Nagahunahuna nga si Lazaro nagapahuway sa katulugon kag isa ina ka positibo nga tanda nga magaayo sia, ang mga disipulo nagsabat: “Ginuo, kon sia natulugan, maumpawan sia.”

Nian ginsilingan sila ni Jesus sing maathag: “Si Lazaro napatay, kag nagakalipay ako bangod sa inyo nga wala ako didto, sa katuyuan nga magtuo kamo. Apang makadto kita sa iya.”

Nakahibalo nga si Jesus mahimo nga mapatay sa Judea, apang sa luyag nga sakdagon sia, ginsilingan ni Tomas ang iya mga masigka disipulo: “Makadto man kita, agod nga manginmatay kita upod sa iya.” Gani sa katalagman sang ila kabuhi, gin-updan sang mga disipulo si Jesus sa iya misyon sang kaluoy sa Judea. Lucas 13:​22; 17:​1-10; Juan 10:​22, 31, 40-42; 11:​1-16.

◆ Diin sining karon nagbantala si Jesus?

◆ Anong mga panudlo ang ginliwat ni Jesus, kag anong matuodtuod nga hitabo ang ginsugid niya sa paglaragway sa anong punto?

◆ Anong balita ang nabaton ni Jesus, kag ano ang buot niya silingon sang “isa ka adlaw” kag “sa kagab-ihon”?

◆ Ano ang buot silingon ni Tomas sang magsiling sia, ‘Makadto kita agod nga manginmatay kita upod sa iya’?