Ipahayag sing Dayag ang Kaluwasan

“Ang tagsatagsa nga nagatawag sa ngalan ni Jehova maluwas.”​—⁠ROMA 10:⁠13.

1. Sa bug-os nga maragtas, anong mga paandam ang ginpalanog?

GINALARAGWAY sang maragtas ang pila ka ‘adlaw ni Jehova.’ Ang Anaw sang adlaw ni Noe, ang paghapay sa Sodoma kag Gomora, kag ang mga paglaglag sa Jerusalem sang 607 B.⁠C.⁠E. kag 70 C.⁠E. daku kag makakulugmat nga mga adlaw ni Jehova. Mga adlaw yadto sa pagpadapat sing katarungan sa mga nagrebelde batok kay Jehova. (Malaquias 4:​5; Lucas 21:22) Sadto nga mga adlaw, madamo ang napatay bangod sang ila kalautan. Apang ang iban nakalampuwas. Ginpalanog ni Jehova ang mga paandam, nga nagapahibalo sa mga malauton tuhoy sa nagahilapit nga kapahamakan kag nagahatag sing kahigayunan sa mga matarong sing tagipusuon nga masapwan ang kaluwasan.

2, 3. (a) Anong matagnaon nga paandam ang ginbalikwat sang Pentecostes? (b) Kutob sang Pentecostes 33 C.⁠E., ano ang ginkinahanglan sa pagpanawag sa ngalan ni Jehova?

² Ang paglaglag sa Jerusalem sang 70 C.⁠E. isa ka tumalagsahon nga halimbawa tuhoy sini. Nagatagna sadto nga hitabo sing halos 900 ka tuig sing abanse, si manalagna Joel nagsulat: “Magahatag ako sing mga tanda sa mga langit kag sa duta, dugo kag kalayo kag mga haligi nga aso. Ang adlaw magabaylo sa kadudulman, kag ang bulan sa dugo, sa wala pa mag-abot ang daku kag makakulugmat nga adlaw ni Jehova.” Paano makalampuwas ang bisan sin-o sa sining makahaladlok nga tion? Si Joel nagsulat sa idalom sang pag-inspirar: “Mahanabo nga ang tanan nga nagatawag sa ngalan ni Jehova maluwas; kay sa Bukid nga Sion kag sa Jerusalem may mga makapalagyo, subong sang ginsiling ni Jehova, kag sa tunga sang mga nakalampuwas, ang mga ginatawag ni Jehova.”​—⁠Joel 2:​30-32.

³ Sang Pentecostes 33 C.⁠E., si apostol Pedro nagpamulong sa kadam-an sang mga Judiyo kag mga proselita sa Jerusalem kag nagbalikwat sang tagna ni Joel, nga nagapakita nga ang iya mga tagpalamati makapaabot sing katumanan sa ila adlaw: “Magahatag ako sing mga palatandaan sa langit sa ibabaw kag mga tanda sa duta sa idalom, dugo kag kalayo kag usbong sang aso; ang adlaw magabaylo sa kadudulman kag ang bulan sa dugo sa wala pa mag-abot ang daku kag halangdon nga adlaw ni Jehova. Kag ang tanan nga nagatawag sa ngalan ni Jehova maluwas.” (Binuhatan 2:​16-21) Ang mga kadam-an nga namati kay Pedro napaidalom tanan sa Mosaikong Kasuguan, kag busa kilala nila ang ngalan ni Jehova. Busa, si Pedro nagpaathag nga ang pagtawag sa ngalan ni Jehova nagalakip sing labi pa. Sing tumalagsahon, naglakip ini sang pagpabawtismo sa ngalan ni Jesus, ang isa nga ginpatay kag nian ginbanhaw sa dimamalatyon nga langitnon nga kabuhi.​—⁠Binuhatan 2:​37, 38.

4. Anong mensahe ang ginpahayag sing lapnag sang mga Cristiano?

⁴ Kutob sang Pentecostes, ginpalapnag sang mga Cristiano ang pulong nahanungod sa ginbanhaw nga si Jesus. (1 Corinto 1:23) Ginpahibalo nila nga ang mga tawo sarang makabig subong espirituwal nga mga anak ni Jehova nga Dios kag mangin bahin sang bag-ong “Israel sang Dios,” isa ka espirituwal nga pungsod nga ‘magapahayag sing lapnag sang pagkahalangdon ni Jehova.’ (Galacia 6:​16; 1 Pedro 2:9) Ang mga nagpabilin nga matutom tubtob kamatayon magapanubli sing dimamalatyon nga langitnon nga kabuhi subong kaupod nga mga manunubli ni Jesus sa iya langitnon nga Ginharian. (Mateo 24:​13; Roma 8:​15, 16; 1 Corinto 15:​50-54) Dugang pa, dapat ibantala sining mga Cristiano ang pag-abot sang daku kag makakulugmat nga adlaw ni Jehova. Dapat nila paandaman ang mga Judiyo nga makasumalang sila sing kapipit-an nga labaw pa sa natabo sa Jerusalem kag sa nagapangangkon nga katawhan sang Dios tubtob sina nga tion. Apang, may mga makalampuwas. Sin-o? Ang mga nagatawag sa ngalan ni Jehova.

“Sa Katapusan nga mga Adlaw”

5. Anong mga katumanan sang tagna ang nagakatabo karon?

⁵ Sa madamong paagi, ang mga kahimtangan sadto naglandong sa kon ano ang makita naton karon. Sugod sang 1914, ang katawhan nagakabuhi sa isa ka pinasahi nga tion nga ginpatuhuyan sa Biblia subong “ang tion sang katapusan,” “ang katapusan sang sistema sang mga butang,” kag “ang katapusan nga mga adlaw.” (Daniel 12:​1, 4; Mateo 24:​3-8; 2 Timoteo 3:​1-5, 13) Sa aton siglo, ang mapintas nga mga inaway, dimapunggan nga kasingki, kag ang paglaglag sa katilingban kag sa palibot naghatag sing talalupangdon nga katumanan sa tagna sang Biblia. Bahin ini tanan sang tanda nga gintagna ni Jesus, nagapakita nga ang katawhan magaeksperiensia sing katapusan kag pat-od nga makakulugmat nga adlaw ni Jehova. Magadangat ini sa inaway sang Armagedon, ang talipuspusan sang “dakung kapipit-an nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo.”​—⁠Mateo 24:​21; Bugna 16:⁠16.

6. (a) Paano nagpanghikot si Jehova sa pagluwas sa mga mahagop? (b) Diin naton masapwan ang laygay ni Pablo sa kon paano maluwas?

⁶ Samtang ang adlaw sang paghapay labi nga nagahilapit, si Jehova nagapanghikot para sa kaluwasan sang mga mahagop. Sa sining “tion sang katapusan,” gintipon niya ang mga nagkalabilin sang espirituwal nga Israel sang Dios kag ginliso ang igtalupangod sang iya dutan-on nga mga alagad, kutob sang dekada 1930 padayon, sa pagtipon sa “dakung kadam-an nga wala sing tawo nga makaisip, gikan sa tanan nga pungsod kag tribo kag katawhan kag hambal.” Subong isa ka grupo, sila “nagguwa sa dakung kapipit-an” nga buhi. (Bugna 7:​9, 14) Apang paano mapat-od sang tagsa ka indibiduwal ang iya kaluwasan? Ginasabat ni apostol Pablo ina nga pamangkot. Sa Roma kapitulo 10, nagahatag sia sing maayong laygay para sa kaluwasan​—⁠laygay nga naaplikar sa iya adlaw kag maaplikar liwat sa aton adlaw.

Pangamuyo Para sa Kaluwasan

7. (a) Anong paglaum ang ginahatag sa Roma 10:​1, 2? (b) Ngaa may mas masangkad nga “maayong balita” si Jehova nga mabantala karon?

⁷ Sang ginsulat ni Pablo ang tulun-an sang Roma, ginsikway na ni Jehova ang Israel subong isa ka pungsod. Apang, ang apostol nagpasalig: “Ang maayong kabubut-on sang akon tagipusuon kag ang akon pagpangabay sa Dios tungod sa ila para gid sa ila kaluwasan.” Ginalauman niya nga ang indibiduwal nga mga Judiyo makatigayon sing sibu nga ihibalo tuhoy sa kabubut-on sang Dios, nga nagadul-ong sa ila kaluwasan. (Roma 10:​1, 2) Dugang pa, luyag ni Jehova nga makalampuwas ang katawhan nga nagapakita sing pagtuo, subong sang ginapakita sa Juan 3:​16: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” Ang halad-gawad ni Jesus nagbukas sang dalan para sa sinang daku nga kaluwasan. Kaangay sa adlaw ni Noe kag sa iban pa nga mga adlaw sang paghukom nga nagsunod, ginpabantala ni Jehova ang “maayong balita,” nga nagatudlo sang dalan sa kaluwasan.​—⁠Marcos 13:​10, 19, 20.

8. Nagailog kay Pablo, kay sin-o ginapakita sang matuod nga mga Cristiano ang maayong kabubut-on sa karon, kag paano?

⁸ Nagpakita sang iya maayong kabubut-on ayon sa mga Judiyo kag mga Gentil, si Pablo nagbantala sa tanan nga kahigayunan. ‘Ginabuyok [niya] ang mga Judiyo kag mga Griego.’ Nagsiling sia sa mga gulang sang Efeso: “Wala ako mag-isol sa pagsugid sa inyo sang bisan ano man sa mga butang nga mapuslanon ukon sa pagtudlo sa inyo sa dayag kag sa pamalaybalay. Kundi nagpanaksi ako sing maid-id sa mga Judiyo kag sa mga Griego tuhoy sa paghinulsol sa Dios kag pagtuo sa aton Ginuong Jesus.” (Binuhatan 18:​4; 20:​20, 21) Sa kaanggid nga paagi, ang mga Saksi ni Jehova nagabantala karon, indi lamang sa nagapangangkon nga mga Cristiano kundi sa tanan man nga katawhan, bisan tubtob sa “ukbong nga bahin sang duta.”​—⁠Binuhatan 1:​8; 18:⁠5.

Pagtu-ad sa “ ‘Pulong’ Sang Pagtuo”

9. (a) Ano nga sahi sang pagtuo ang ginapalig-on sang Roma 10:​8, 9? (b) San-o kag paano kita dapat magtu-ad sang aton pagtuo?

⁹ Ang dayon nga pagtuo ginakinahanglan para sa kaluwasan. Nagabalikwat sang Deuteronomio 30:​14, si Pablo nagsiling: “ ‘Ang pulong malapit sa imo, sa imo kaugalingon nga baba kag sa imo kaugalingon nga tagipusuon’; kon sayuron, ang ‘pulong’ sang pagtuo, nga amon ginabantala.” (Roma 10:8) Samtang ginabantala naton ang “ ‘pulong’ sang pagtuo,” labi pa gid ini nga nagatudok sa aton mga tagipusuon. Amo sini ang natabo kay Pablo, kag ang iya dugang pa nga pinamulong makapabakod sang aton pamat-od nga mangin kaangay niya sa pagpaambit sina nga pagtuo sa iban: “Kay kon ibantala mo sing dayag inang ‘pulong sa imo kaugalingon nga baba,’ nga si Jesus Ginuo, kag nagtuo sa imo tagipusuon nga ang Dios nagbanhaw sa iya gikan sa minatay, maluwas ka.” (Roma 10:9) Indi lamang nga ining pagtu-ad ginhimo sa atubangan sang iban sa tion sang bawtismo kundi dapat nga isa ini ka nagapadayon nga pagtu-ad, isa ka makugi nga dayag nga testimonya tuhoy sa tanan nga dalagku nga mga bahin sang kamatuoran. Ini nga kamatuoran nasentro sa hamili nga ngalan sang Soberanong Ginuo nga si Jehova; sa aton Mesianikong Hari kag Manuggawad, si Ginuong Jesucristo; kag sa halangdon nga mga saad sa Ginharian.

10. Nahisuno sa Roma 10:​10, 11, paano naton dapat tamdon ining “ ‘pulong’ sang pagtuo”?

¹⁰ Wala sing kaluwasan para kay bisan sin-o nga wala nagabaton kag nagaaplikar sining “ ‘pulong’ sang pagtuo,” subong sang padayon nga ginsiling sang apostol: “Paagi sa pagtuo ang isa nagatuo para sa pagkamatarong, apang paagi sa baba ang isa nagapahayag sing dayag para sa kaluwasan. Kay ang Kasulatan nagasiling: ‘Wala sing bisan sin-o nga nagabutang sang iya pagtuo sa iya ang mapaslawan.’ ” (Roma 10:​10, 11) Dapat naton tigayunon ang sibu nga ihibalo tuhoy sining “ ‘pulong’ sang pagtuo” kag padayon nga palambuon ini sa aton tagipusuon agod mapahulag kita sa pagsugid sini sa iban. Si Jesus mismo nagapahanumdom sa aton: “Ang bisan sin-o nga magkahuya sa akon kag sa akon mga pulong sa sining makihilahion kag makasasala nga kaliwatan, ang Anak sang tawo magakahuya man sa iya kon magaabot sia sa himaya sang iya Amay upod sang balaan nga mga anghel.”​—⁠Marcos 8:⁠38.

11. Daw ano kalapnag dapat ibantala ang maayong balita, kag ngaa?

¹¹ Suno sa gintagna ni manalagna Daniel, sa sining tion sang katapusan, “ang mga may ighalangop” nakita nga nagasidlak “kaangay sang kasanag sang kahawaan,” samtang ang panaksi sa Ginharian nagalapnag tubtob sa kaukbungan sang duta. ‘Ginadala [nila] ang madamo sa pagkamatarong,’ kag ang matuod nga ihibalo nangin bugana gid, kay si Jehova nagahatag sing mas masanag nga kapawa sa mga tagna nahanungod sa tion sang katapusan. (Daniel 12:​3, 4) Yari ang mensahe sang kaluwasan nga kinahanglanon sa kaluwasan sang tanan nga nagahigugma sang kamatuoran kag pagkamatarong.

12. Paano ang Roma 10:​12 nagahisanto sa sugo sang anghel nga ginlaragway sa Bugna 14:⁠6?

¹² Si apostol Pablo nagapadayon: “Wala sing kinatuhayan sa ulot sang Judiyo kag Griego, kay may isa lamang ka Ginuo sa tanan, nga manggaranon sa tanan nga mga nagapanawag sa iya.” (Roma 10:12) Ang “maayong balita” dapat karon ibantala sing mas masangkad pa sa kalibutan​—⁠sa tanan nga katawhan, sa kaukbungan mismo sang duta. Ang anghel sang Bugna 14:6 padayon nga nagalupad sa tunga sang langit, nagatugyan sa aton sing ‘walay katapusan nga maayong balita nga ibantala sa mga nagapuyo sa duta, kag sa tagsa ka pungsod kag tribo kag hambal kag katawhan.’ Paano ini makabulig sa mga nagahulag?

Pagpanawag sa Ngalan ni Jehova

13. (a) Ano ang aton tuigan nga teksto para sa 1998? (b) Ngaa ining tuigan nga teksto labi gid nga nagakaigo karon?

¹³ Nagabalikwat sang Joel 2:​32, si Pablo nagsiling: “Ang tagsatagsa nga nagatawag sa ngalan ni Jehova maluwas.” (Roma 10:13) Daw ano gid ka nagakaigo nga ining mga pulong ginpili subong ang tuigan nga teksto sang mga Saksi ni Jehova para sa 1998! Wala pa gid matabo sang una nga nangin mas importante ang mag-abante nga may pagsalig kay Jehova, nga nagapahibalo sang iya ngalan kag sang daku nga mga katuyuan nga ginapanindugan sini! Kaangay sadtong unang siglo, amo man sa katapusan nga mga adlaw sang karon malauton nga sistema sang mga butang, ang nagalanog nga singgit nagasiling: “Panginluwas kamo sa sining tiko nga kaliwatan.” (Binuhatan 2:40) Daw kaangay sa budyong nga imbitasyon para sa tanan mahinadlukon-sa-Dios nga katawhan ang manawag kay Jehova sa paghatag sing kaluwasan sa ila kag sa mga nagapamati man sa ila dayag nga pagpahayag sing maayong balita.​—⁠1 Timoteo 4:⁠16.

14. Sa anong Igang kita dapat manawag sing kaluwasan?

¹⁴ Ano ang mahanabo kon ang dakung adlaw ni Jehova hinali nga magaabot sa sining duta? Ang kalabanan wala nagalaum nga si Jehova magaaman sing kaluwasan. Ang katawhan sa kabilugan “padayon nga magasiling sa mga bukid kag sa mga igang: ‘Tiphag kamo sa amon kag tagua kami sa nawong sang Isa nga nagalingkod sa trono kag sa kasingkal sang Kordero.’ ” (Bugna 6:​15, 16) Magalaum sila sa kaangay sang bukid nga mga organisasyon kag mga institusyon sining sistema sang mga butang. Apang, daw ano pa kaayo kon magsalig sila sa labing daku nga Igang sa tanan, si Jehova nga Dios! (Deuteronomio 32:​3, 4) Tuhoy sa iya, si Hari David nagsiling: “Si Jehova amo ang akon igang kag ang akon kuta kag ang Manug-aman sing palalagyuhan para sa akon.” Si Jehova amo ang “aton Igang sang kaluwasan.” (Salmo 18:​2; 95:1) Ang iya ngalan “malig-on nga torre,” ang lamang nga “torre” nga tuman kalig-on sa pag-amlig sa aton sa tion sang nagapakari nga krisis. (Hulubaton 18:10) Gani, kon mahimo madamo sa halos anom ka bilyon ka tawo nga nagakabuhi karon ang kinahanglan nga matudluan sa pagtawag sa ngalan ni Jehova nga may katutom kag kahanuot.

15. Ano ang ginapakita sang Roma 10:​14 kon tuhoy sa pagtuo?

¹⁵ Sing nagakaigo, si apostol Pablo nagpadayon sa pagpamangkot: “Apang, paano bala ang pagpanawag nila sa iya nga wala nila matuuhi?” (Roma 10:14) Madamo pa ang dapat buligan sa pagbaton sa “ ‘pulong’ sang pagtuo,” agod manawag kay Jehova para sa kaluwasan. Ang pagtuo importante gid. Si Pablo nagsiling sa isa pa ka sulat: “Kon wala sing pagtuo imposible nga mapahamut-an sing maayo [ang Dios], kay sia nga nagapalapit sa Dios dapat magpati nga amo sia kag nga sia ang nangin manugpadya sadtong hanuot nga nagapangita sa iya.” (Hebreo 11:6) Apang, paano ang minilyon pa magatuo sa Dios? Sa sulat sa mga taga-Roma, si Pablo namangkot: “Paano naman bala ang pagtuo nila sa iya nga wala nila mabatii?” (Roma 10:14) Nagahatag bala si Jehova sing mga paagi agod makabati sila? Pat-od gid nga nagahatag sia! Pamatii ang dugang pa nga pinamulong ni Pablo: “Paano naman bala ang pagkabati nila kon walay manugwali?”

16. Sa kahimusan sang Dios, ngaa ang mga manugbantala kinahanglanon?

¹⁶ Gikan sa argumento ni Pablo maathag gid nga ang mga manugbantala ginakinahanglan. Ginpakita ni Jesus nga kinahanglan gid ini, “tubtob [mismo] sa katapusan sang sistema sang mga butang.” (Mateo 24:​14; 28:​18-20) Ang pagbantala isa ka kinahanglanon nga bahin sang kahimusan sang Dios para buligan ang mga tawo sa pagpanawag kay Jehova agod maluwas. Bisan sa Cristiandad ang kalabanan wala sing ginahimo sa pagpadungog sa hamili nga ngalan sang Dios. Madamo ang wala pulos nga nagagumon kay Jehova sa duha pa ka persona sang dimapaathag nga doktrina sang Trinidad. Subong man, madamo ang nalakip sa kategoriya nga ginpamulong sa Salmo 14:1 kag 53:​1: “Ang isa nga buangbuang nagsiling sa iya tagipusuon: ‘Wala sing Jehova.’ ” Dapat nila mahibaluan nga si Jehova amo ang buhi nga Dios, kag dapat nila mahangpan ang tanan nga kahulugan sang iya ngalan agod makalampuwas sila sa nagapakari nga dakung kapipit-an.

Ang ‘Matahom nga mga Tiil’ Sang mga Manugbantala

17. (a) Ngaa nagakaigo para kay Pablo nga balikwaton ang isa ka tagna sa pagpasag-uli? (b) Ano ang nalakip sa pagtigayon sing ‘matahom nga mga tiil’?

¹⁷ Si apostol Pablo may isa pa ka importante nga pamangkot: “Paano naman sila makabantala kon wala sila ginpadala? Subong sang nasulat: ‘Daw ano katahom sang mga tiil sang mga nagabantala sing maayong balita!’ ” (Roma 10:15) Ginabalikwat diri ni Pablo ang Isaias 52:​7, nga bahin sang tagna tuhoy sa pagpasag-uli nga natuman kutob sang 1919. Sa liwat, ginapadala karon ni Jehova ang “isa nga nagadala sing maayong balita, ang isa nga nagabantala sing paghidait, ang isa nga nagadala sing maayong balita tuhoy sa butang nga maayo pa, ang isa nga nagabantala sing kaluwasan.” Sing matinumanon, ang hinaplas nga “mga bantay” sang Dios kag ang ila mga kaupdanan padayon nga nagahugyaw sing malipayon. (Isaias 52:​7, 8) Ang mga tiil sang mga nagabantala sing kaluwasan sa karon mahimo nga makapuyan, mayab-ukan pa gani, samtang nagalakat sila sa pamalaybalay, apang ang ila mga nawong nagaudyak gid sa kalipay! Nakahibalo sila nga ginsugo sila ni Jehova sa pagbantala sing maayong balita sang paghidait kag sa paglugpay sa mga nagalalaw, nga nagabulig sa ila sa pagtawag sa ngalan ni Jehova nga nagapaabot sing kaluwasan.

18. Ano ang ginasiling sang Roma 10:​16-18 tuhoy sa katapusan nga resulta sang pagpalanog sang maayong balita?

¹⁸ Kon bala ‘nagatuo [man ang katawhan] sa butang nga nabatian’ ukon namat-od sa paglapas sa sini, ang mga pulong ni Pablo matuod gid: “Wala sila mapaslawan sa pagpamati, indi bala? Aba, sa katunayan, ‘sa bug-os nga duta ang ila tunog nagguwa, kag tubtob sa mga ukbong sang napuy-an nga duta ang ila mga pulong.’ ” (Roma 10:​16-18) Subong nga “ang mga langit nagapahayag sang himaya sang Dios,” suno sa ginpakita sa iya mga buhat sa pagpanuga, ang iya mga Saksi sa duta dapat man magbantala sang “tuig sang maayong kabubut-on ni Jehova kag sang adlaw sang pagtimalos sang aton Dios . . . sa paglugpay sa tanan nga nagalalaw.”​—⁠Salmo 19:​1-4; Isaias 61:⁠2.

19. Ano ang magaresulta sa mga ‘nagatawag sa ngalan ni Jehova’ karon?

¹⁹ Ang daku kag makakulugmat nga adlaw ni Jehova labi pa nga nagalapit. “Kailo sang adlaw; bangod ang adlaw ni Jehova malapit na, kag kaangay sang pagpang-ati gikan sa Isa nga Labing Gamhanan ini magaabot!” (Joel 1:​15; 2:31) Ginapangamuyo naton nga madamo pa ang magahulag nga may pagkahilingagawon sa maayong balita, nga nagadugok sa organisasyon ni Jehova. (Isaias 60:​8; Habacuc 2:3) Dumduma nga ang iban pa nga mga adlaw ni Jehova naglaglag sa mga malauton​—⁠sang adlaw ni Noe, sang adlaw ni Lot, kag sang mga adlaw sang apostata nga Israel kag Juda. Yara na kita karon sa bibi sang pinakadaku nga kapipit-an sa tanan, kon ang buhawi ni Jehova magahapay sang kalautan gikan sa kadaygan sining duta, nga nagahawan sang dalan para sa isa ka paraiso nga may dayon nga paghidait. Mangin isa ka bala sa “nagatawag sa ngalan ni Jehova” nga may katutom? Kon amo, magkasadya! Ang Dios nanaad nga maluwas ka.​—⁠Roma 10:⁠13.

Paano Mo Sabton?

◻ Anong bag-ong mga butang ang ginbantala pagkatapos sang Pentecostes 33 C.⁠E.?

◻ Paano dapat talupangdon sang mga Cristiano ang “ ‘pulong’ sang pagtuo”?

◻ Ano ang kahulugan sang ‘pagtawag sa ngalan ni Jehova’?

◻ Sa anong kahulugan ang mga mensahero sang Ginharian may ‘matahom nga mga tiil’?

[Kapsion sa pahina 18]

Ang katawhan sang Dios nagabantala sang iya pagkahalangdon sa Puerto Rico, Senegal, Peru, Papua New Guinea​—⁠huo, sa bug-os nga globo