Si Jehova ang Amon Manuggahom!

“Dapat namon tumanon ang Dios subong manuggahom sa baylo sang mga tawo.”​—⁠BINUHATAN 5:⁠29.

 1, 2. Ano nga tindog anay sang mga apostoles ang ginasunod sang mga Saksi ni Jehova kon ang ginapangayo sang tawo nagasumpakil sa kabubut-on sang Dios?

GINTUGUTAN ni Jehova nga Dios nga dalhon ang 12 ka lalaki sa atubangan sang mataas nga korte. Ang tuig 33 C.⁠E. sadto, kag ang korte amo ang Judiyong Sanhedrin. Ang may kasaba amo ang mga apostoles ni Jesucristo. Pamatii ninyo! ‘Ginamanduan gid namon kamo nga indi magpanudlo sa sining ngalan,’ siling sang puno nga saserdote, ‘apang ginpuno ninyo ang Jerusalem sang iya panudlo.’ Sa sina, si Pedro kag ang iban pa nga mga apostoles nagsiling: “Dapat namon tumanon ang Dios subong manuggahom sa baylo sang mga tawo.” (Binuhatan 5:​27-29) Sa epekto, nagsiling sila: “Si Jehova ang amon Manuggahom!”

² Huo, si Jehova amo ang Manuggahom sang matuod nga mga sumulunod ni Jesus. Maathag ini nga ginapakita sa tulun-an nga Mga Binuhatan sang mga Apostoles sa Biblia, nga ginsulat sa Roma sang mga 61 C.⁠E. ni “Lucas nga manugbulong nga hinigugma.” (Colosas 4:14) Kaangay sang mga apostoles, ang katawhan ni Jehova karon nagatuman sa ila langitnon nga Manuggahom kon ang ginapangayo sang tawo nagasumpakil sa iya kabubut-on. Apang ano pa ang matun-an naton gikan sa Binuhatan? (Sa personal nga pagtuon, ginapanugda namon nga basahon mo ang mga bahin sang tulun-an nga ginapakita sa madukot nga kinutlo.)

Nagsugo si Jesus sing mga Saksi

 3. Sang ang mga sumulunod ni Jesus “ginbawtismuhan sa balaan nga espiritu,” ano ang ila una nga ginkabalak-an?

³ Ang mga apostoles nakatindog sing malig-on sa bahin sang Dios bangod napalig-on sila sa espirituwal. Si Cristo napatay sa usok sang pag-antos, apang nahibaluan nila nga ginbanhaw sia. (1:​1-5) Si Jesus “nagpakita sang ila kaugalingon nga buhi” kag nagtudlo sia sing mga kamatuoran sang Ginharian nga ginagamit ang nagmateryalisar nga mga lawas sa sulod sang 40 ka adlaw. Ginsilingan man niya ang iya mga disipulo nga maghulat sa Jerusalem agod mabawtismuhan “sa balaan nga espiritu.” Ang pagbantala amo ang unahon nila, subong amo karon sa mga Saksi ni Jehova.​—⁠Lucas 24:​27, 49; Juan 20:​19⁠–​21:⁠24.

 4. Ano ang matabo kon ang balaan nga espiritu mag-abot sa mga sumulunod ni Jesus?

⁴ Sang wala pa mabawtismuhan sa balaan nga espiritu, sayop nga ginhunahuna sang mga apostoles ang isa ka paggahom sa duta nga magatapos sang paggahom sang Roma sang mamangkot sila: “Ginuo, ipasag-uli mo bala ang ginharian sa Israel sa sining tion?” (1:​6-8) Sa epekto, nagsiling si Jesus nga indi, kay ‘indi ila ang paghibalo sang mga tion ukon mga dag-on.’ ‘Kon mabaton nila ang balaan nga espiritu,’ magahatag ini sa ila sing gahom sa pagpanaksi nahanungod sa langitnon nga Ginharian sang Dios, indi sa sini nga duta. Magabantala sila sa Jerusalem, sa Judea, kag sa Samaria, “kag tubtob sa ukbong sang duta.” Sa bulig sang espiritu, ginahimo sang mga Saksi ni Jehova ina nga hilikuton sa bilog nga globo sa sining katapusan nga mga adlaw.

 5. Paano si Jesus magabalik sa amo man nga bagay sang magtaliwan sia?

⁵ Bag-o lang mahatag ni Jesus inang komisyon sa pagbantala sa bug-os nga kalibutan sang magkayab sia sa langit. Yadto nga pagkayab nagsugod paagi sa iya pagpaibabaw gikan sa iya mga disipulo, kag sang ulihi nagsulod si Jesus sa presensiya sang iya langitnon nga Manuggahom kag nagpanghikot sa duog sang mga espiritu. (1:​9-11) Sang gintabunan na sang panganod ang pagtan-aw sang mga apostoles kay Jesus, gin-uba niya ang iya undanon nga lawas. Duha ka anghel ang nagpakita kag nagsiling nga sia ‘magabalik sa amo nga bagay.’ Kag amo gid ang natabo. Ang mga disipulo lamang ni Jesus ang nakakita sa iya nga nagtaliwan, subong man nga ang mga Saksi ni Jehova lamang ang nakakilala sang iya dimakita nga pagbalik.

Nagpili si Jehova

 6. Paano ginpili ang tal-us para kay Judas Iscariote?

⁶ Wala madugay nagbalik na ang mga apostoles sa Jerusalem. (1:​12-26) Sa isa ka hulot sa ibabaw (ayhan sa puluy-an sang iloy ni Marcos, nga si Maria), ang 11 ka matutom nga mga apostoles wala sing untat nga nangamuyo upod sa mga utod ni Jesus sa iloy, sa iya iban pa nga mga disipulo, kag sa iya iloy, nga si Maria. (Marcos 6:​3; Santiago 1:1) Apang sin-o ang magabaton sang “palangakuan” ni Judas? (Salmo 109:8) Mga 120 ka disipulo ang yadto didto sang magpili ang Dios sing lalaki nga ibulos kay Judas nga nagtugyan kay Jesus, kag ipasag-uli ang kadamuon sang mga apostoles sa 12. Ang dapat pilion amo ang tawo nga isa na ka disipulo sa tion sang ministeryo ni Jesus kag nakasaksi sang iya pagkabanhaw. Sa pagkamatuod, dapat man niya kilalahon si Jehova subong iya Manuggahom. Sa tapos mangamuyo, ginpagabutgabutan si Matias kag si Jose Barsabas. Ginpahanabo sang Dios nga ang mapilian amo si Matias.​—⁠Hulubaton 16:⁠33.

 7. (a) Paano nga si Judas “nagtaba sing latagon paagi sa kuwarta sang pagkamalaut”? (b) Paano napatay si Judas?

⁷ Sa pagkamatuod wala ginkilala ni Judas Iscariote si Jehova subong iya Manuggahom. Ti, gintugyan niya ang Anak sang Dios sa 30 ka bilog nga pilak! Gin-uli ni Judas yadto nga kuwarta sa puno nga mga saserdote, apang si Pedro nagsiling nga ang manugtugyan “nagtaba sing latagon paagi sa kuwarta sang pagkamalaut.” Sa anong paagi? Sia ang naghatag sang kuwarta kag sang rason nga tabaon ang “Latagon sang Dugo,” subong amo ang pagtawag sa sini. Ginkilala nga amo ini ang matapan nga duta sa bagatnan nga bahin sang Nalupyakan sang Hinnom. Bangod nalaglag sing bug-os ang iya kaangtanan sa langitnon nga Manuggahom, si Judas “nagbitay sang iya kaugalingon.” (Mateo 27:​3-10) Mahimo nga nautod ang kalat ukon sanga sang kahoy, amo kon ngaa sia ‘nahulog nga suli, kag nawasak ang iya tiyan’ sang magtupa sia sa taliwis nga mga bato. Kabay nga wala sing isa sa aton ang mangin butig nga utod!

Napuno sing Balaan nga Espiritu!

 8. San-o ginbawtismuhan sa balaan nga espiritu ang mga disipulo ni Jesus, kag ano ang epekto?

⁸ Kamusta ang ginsaad nga bawtismo sa balaan nga espiritu? Natabo ini sang Pentecostes 33 C.⁠E., napulo ka adlaw sa tapos makakayab si Jesus. (2:​1-4) Daw ano ka makakulunyag nga hitabo yadto nga bawtismo! Handurawa ang natabo. Mga 120 ka disipulo ang nagtipon sa naibabaw nga hulot sang ‘sa hinali napuno ang balay sang hagunos gikan sa langit nga subong sang mamadlos nga hangin.’ Indi yadto mamadlos nga hangin, apang daw subong sadto. Ang dila “nga daw kalayo” nagtungtong sa tagsa ka disipulo kag apostoles. “Napuno sila tanan sang balaan nga espiritu kag nagsugod sa pagpamulong sa iban nga mga hambal.” Sang matabo yadto nga bawtismo, ginpanganak man sila sang balaan nga espiritu, ginhaplas, kag ginpat-inan bilang tanda sang isa ka espirituwal nga panublion.​—⁠Juan 3:​3, 5; 2 Corinto 1:​21, 22; 1 Juan 2:⁠20.

 9. Ang napuno sing espiritu nga mga disipulo naghambal nahanungod sa ano?

⁹ Naapektohan sini nga hitabo ang mga Judiyo kag mga proselita sa Jerusalem gikan sa “tagsa ka pungsod sa idalom sang langit.” (2:​5-13) Sa katingala, namangkot sila: ‘Paano bala nga ginapamatian naton, ang tagsa ka tawo sa aton kaugalingon nga hambal nga natawhan?’ Mahimo nga amo yadto ang hambal sang mga duog subong sang Media (sidlangan sang Judea), Frigia (sa Asia Minor), kag Roma (sa Europa). Samtang ang mga disipulo naghambal sa nanuhaytuhay nga mga hambal “nahanungod sa dalagku nga mga butang sang Dios,” madamo sang nakabati ang naurungan, apang ang mga manugyubit nagsiling nga hubog sila.

Naghatag si Pedro sing Makapapukaw nga Panaksi

10. Ang natabo sang Pentecostes 33 C.⁠E. nagtuman sang anong tagna, kag may kaanggid bala ini sa karon?

¹⁰ Nagsugod si Pedro sa pagpanaksi paagi sa pagpakita nga ang oras nga alas nuebe sang aga tuman pa kaaga nga mahubog sila. (2:​14-21) Sa baylo, ining natabo isa ka katumanan sang saad sang Dios nga ipasagahay ang balaan nga espiritu sa iya katawhan. Gin-inspirar sang Dios si Pedro nga itudlo ang aton tion paagi sa pagdugang sang mga pulong “sa katapusan nga mga adlaw” kag “magapanagna sila.” (Joel 2:​28-32) Si Jehova magahatag sing mga katingalahan sa langit kag mga tanda sa duta sa wala pa ang iya daku nga adlaw, kag ang nagapanawag lamang sa iya ngalan nga may pagtuo ang maluwas. Ang kaanggid man sini nga pagpasagahay sing espiritu sa mga hinaplas nagahatag sa ila sing ikasarang sa ‘pagpanagna’ nga may daku nga kapagsik kag pagkaepektibo karon.

11. Tuhoy kay Jesus, ano ang ginhimo sang mga Judiyo kag sang Dios?

¹¹ Masunod nga ginpakilala ni Pedro ang Mesias. (2:​22-28) Ginpamatud-an sang Dios ang Pagkamesias ni Jesus paagi sa paghatag sa iya sing gahom sa paghimo sing mga buhat nga gamhanan, mga tanda, kag mga katingalahan. (Hebreo 2:​3, 4) Apang ginpalansang sia sang mga Judiyo sa usok “paagi sa kamot sang mga malinapason,” ang mga Romano nga wala nagapamati sa sugo sang Dios. Si Jesus ‘gintugyan suno sa pat-od nga katuyuan kag nahibaluan na sang Dios’ bangod kabubut-on ini sang Dios. Apang, ginbanhaw sang Dios si Jesus, kag ginhaboy niya ang iya tawhanon nga lawas sa isa ka paagi nga wala ini makaeksperiensia sing kaduluntan.​—⁠Salmo 16:​8-11.

12. Ano ang ginpanan-aw ni David, kag sa ano nasandig ang kaluwasan?

¹² Ang tagna tuhoy sa Mesias dugang pa nga ginpadaku samtang nagapadayon si Pedro sa pagpanaksi. (2:​29-36) Nagsiling sia nga ginpanan-aw ni David ang pagkabanhaw sang iya labing daku nga anak, si Jesus nga Mesias. Gikan sa isa ka nabayaw nga duog sa tuuhan sang Dios sa langit, ginpasagahay ni Jesus ang balaan nga espiritu nga nabaton niya gikan sa iya Amay. (Salmo 110:1) ‘Nakita kag nabatian’ sang mga nagapamati kay Pedro ang pagpanghikot sini sang makita nila ang mga dila nga daw kalayo nga nagtungtong sa mga ulo sang mga disipulo kag mabatian ang dumuluong nga mga hambal nga ila ginhambal. Ginpakita man niya nga ang kaluwasan nasandig sa pagkilala kay Jesus subong Ginuo kag Mesias.​—⁠Roma 10:​9; Filipos 2:​9-11.

Ginhatag ni Jehova ang Pagdugang

13. (a) Agod mabawtismuhan sing nagakaigo, ano dapat ang kilalahon sang mga Judiyo kag mga proselita? (b) Pila ang nabawtismuhan, kag ano ang epekto sini sa Jerusalem?

¹³ Daw ano ka epektibo yadtong mga pulong ni Pedro! (2:​37-42) Ang iya mga tagpalamati ginbuno sa tagipusuon kay nagsugot sila sa pagpatay sa Mesias. Gani nagpalig-on sia: “Hinulsol kamo, kag magpabawtismo ang tagsatagsa sa inyo sa ngalan ni Jesucristo sa kapatawaran sang mga sala, kag mabaton ninyo ang regalo nga balaan nga espiritu.” Ginkilala na sang mga Judiyo kag sang mga proselita si Jehova subong Dios kag ang ila pagkinahanglan sa iya espiritu. Dapat sila maghinulsol kag batunon si Jesus subong ang Mesias agod mabawtismuhan sa ngalan (nga nagakilala sa palangakuan ukon hilikuton) sang Amay, sang Anak, kag sang balaan nga espiritu. (Mateo 28:​19, 20) paagi sa pagpanaksi sa mga Judiyo kag mga proselita, gingamit ni Pedro ang nahauna nga espirituwal nga yabi nga ginhatag sa iya ni Jesus sa pagbukas sang ganhaan sang ihibalo kag kahigayunan para sa tumuluo nga mga Judiyo agod makasulod sila sa langitnon nga Ginharian. (Mateo 16:19) Sadtong isa ka adlaw, 3,000 ang nabawtismuhan! Handurawa ang subong sina kadamo nga mga Saksi ni Jehova nga nagabantala sa diutay nga teritoryo sang Jerusalem!

14. Ngaa kag sa anong paagi ang tanan nga tumuluo “nag-ambitay sa pagkabutang”?

¹⁴ Madamo gikan sa malayo nga mga duog ang nawad-an sing mga kinahanglanon para sa madugay pa nga pagtener apang luyag nila nga makatuon sing dugang pa nahanungod sa ila bag-o masapwan nga pagtuo kag magbantala sa iban. Gani ang unang mga sumulunod ni Jesus mahigugmaon nga nagbinuligay, subong sang ginahimo man karon sang mga Saksi ni Jehova. (2:​43-47) Ang mga tumuluo temporaryo nga “nag-ambitay sa pagkabutang.” Ginbaligya sang iban ang ila propiedad, kag ang kuwarta ginpanagtag sa bisan sin-o nga nagakinahanglan sing bulig. Nakabulig ini sa maayo nga umpisa sang kongregasyon samtang ‘gindugang sa ila ni Jehova adlaw-adlaw ang nagakalaluwas.’

Ang Pagpang-ayo kag ang mga Resulta Sini

15. Ano ang natabo sang magsulod sa templo si Pedro kag si Juan, kag ano ang reaksion sang mga tawo?

¹⁵ Ginsakdag ni Jehova ang mga sumulunod ni Jesus paagi sa “mga tanda.” (3:​1-10) Sa amo, sang magsulod si Pedro kag si Juan sa templo sang alas 3:​00 s.h. nga amo ang oras sang pagpangamuyo may kaangtanan sa panggab-i nga halad, ang isa ka tawo nga piang halin sang pagkatawo nga yara sa tupad sang Matahom nga Gawang nangayo sing “limos.” ‘Wala ako sing pilak kag bulawan,’ siling ni Pedro, ‘apang ihatag ko sa imo ang yari sa akon: Sa ngalan ni Jesucristo nga Nazaretnon, lakat ka!’ Ang tawo nag-ayo sa gilayon! Sang magsulod sia sa templo nga “nagalakat kag nagatumbo kag nagadayaw sa Dios,” ang mga tawo ‘napuno sing katingala.’ Ayhan nadumduman sang iban ang mga pulong nga: “Ang piang magalumpat subong sang usa.”​—⁠Isaias 35:⁠6.

16. Paano napaayo sang mga apostoles ang piang nga tawo?

¹⁶ Ang nakibot nga mga tawo nagtipon sa kolumnata ni Solomon, isa ka may tabon nga portico sa nasidlangan nga bahin sang templo. Nagpanaksi didto si Pedro. (3:​11-18) Ginpakita niya nga ginhatagan sang Dios sing gahom ang mga apostoles agod ayuhon ang piang nga tawo paagi sa Iya ginhimaya nga Alagad, si Jesus. (Isaias 52:​13⁠–​53:12) Ginpanghiwala sang mga Judiyo ang “balaan kag matarong nga isa”; apang, ginbanhaw sia ni Jehova. Bisan pa wala mahibalui sang mga tawo kag sang ila mga manuggahom nga ang ila ginapatay Mesias, sa amo nga paagi gintuman sang Dios ang matagnaon nga mga pulong nga ang “iya Cristo magaantos.”​—⁠Daniel 9:⁠26.

17. (a) Ano nga buhat ang dapat himuon sang mga Judiyo? (b) Ano ang natabo kutob sang ‘ginpadala si Cristo’ sa aton adlaw?

¹⁷ Bangod sang ila ginhimo sa Mesias, ginpakita sa ila ni Pedro kon ano dapat ang himuon sang mga Judiyo. (3:​19-26) Dapat sila “maghinulsol,” ukon mangil-ad sa ila mga sala, kag “magliso,” ukon makombertir, nga ginahimo ang kabaliskaran nga dalanon. Kon magtuo sila kay Jesus subong Mesias, batunon ang gawad, ang pagpalig-on magaabot sa ila gikan kay Jehova subong mga tawo nga pinatawad sa ila mga sala. (Roma 5:​6-11) Ginpahanumdom ang mga Judiyo nga sila mga anak sang katipan nga ginhimo sang Dios upod sa ila mga katigulangan, nga ginasugiran si Abraham: “Paagi sa imo binhi pakamaayuhon ang tanan nga pamilya sang duta.” Gani una nga ginpadala sang Dios ang iya Mesianiko nga Alagad agod luwason ang mahinulsulon nga mga Judiyo. Sing makawiwili, kutob sang ‘ginpadala si Cristo’ sa langitnon nga paggahom sa Ginharian sang 1914, natabo ang makapapagsik nga pagpasag-uli sang mga kamatuoran kag sang teokratiko nga organisasyon sa tunga sang mga Saksi ni Jehova.​—⁠Genesis 12:​3; 18:​18; 22:⁠18.

Wala Sila Mag-untat!

18. Ano nga “bato” ang ginsikway sang mga Judiyong “mga manunukod,” kag sa kay sin-o lamang may kaluwasan?

¹⁸ Bangod sa kaakig nga ginbantala ni Pedro kag ni Juan ang pagkabanhaw ni Jesus, ginpabilanggo sila sang puno nga mga saserdote, sang kapitan sang templo, kag sang mga Saduceo. (4:​1-12) Ang mga Saduceo wala magpati sa pagkabanhaw, apang madamo ang nangin tumuluo, ang mga lalaki lamang mga 5,000. Sang ginpamangkot sa atubangan sang mataas nga korte sang Jerusalem, si Pedro nagsiling nga ang piang nga tawo ginpaayo “sa ngalan ni Jesus nga Nazaretnon,” nga ginlansang nila apang ginbanhaw sang Dios. Ining “bato” nga ginsikway sang Judiyong “mga manunukod” nangin “pamakod nga bato.” (Salmo 118:22) “Dugang pa,” siling ni Pedro, “wala sing kaluwasan sa bisan kay sin-o nga iban.”

19. Sang ginmanduan nga mag-untat sa pagbantala, ano ang ginsabat sang mga apostoles?

¹⁹ Gintinguhaan nga untaton ini nga mensahe. (4:​13-22) Bangod didto mismo ang gin-ayo nga tawo, indi mahimo nga ipanghiwala ining “talalupangdon nga tanda,” apang ginmanduan si Pedro kag si Juan nga ‘indi na sila magpamulong sa bisan kay sin-o sa ngalan ni Jesus.’ Ang ila sabat? ‘Indi kami makauntat sa paghambal nahanungod sa amon nakita kag nabatian.’ Gintuman nila si Jehova subong ila Manuggahom!

Ginsabat ang mga Pangamuyo!

20. Para sa ano nangamuyo ang mga disipulo, kag ano ang resulta?

²⁰ Subong nga ang mga Saksi ni Jehova nagapangamuyo sa mga miting, ang mga disipulo man nangamuyo sang magreport ang ginhilway nga mga apostoles sang natabo sa ila. (4:​23-31) Ginpatalupangod sadto nga ang mga manuggahom nga sanday Herodes Antipas kag si Poncio Pilato, upod ang Gentil nga mga Romano kag ang katawhan sang Israel, nagtipon batok sa Mesias. (Salmo 2:​1, 2; Lucas 23:​1-12) Bilang sabat sa pangamuyo, ginpuno ni Jehova ang mga disipulo sing balaan nga espiritu, amo kon ngaa masidla nga ginpamulong nila ang pulong sang Dios. Wala nila ginpangabay ang ila Manuggahom nga untaton ang paghingabot kundi hatagan sila sing kaisog sa pagbantala walay sapayan sini.

21. Sin-o si Bernabe, kag ano ang iya mga kinaiya?

²¹ Ang mga tumuluo nagpadayon nga nagtingob sang ila pagkabutang, kag wala sing isa sa ila nga kinulang. (4:​32-37) Ang isa nga nag-amot amo ang Levinhon nga si Jose nga taga-Cipre. Ginhayuan sia sang mga apostoles nga Bernabe, buot silingon “Anak sang Paglipay,” mahimo nga bangod mabinuligon sia kag mahinuklugon. Sa pagkamatuod, luyag naton tanan nga mangin subong sina nga tawo.​—⁠Binuhatan 11:​22-24.

Ginbuyagyag ang mga Butigon

22, 23. Ano ang sala ni Ananias kag ni Safira, kag paano kita makabenepisyo gikan sa ila eksperiensia?

²² Apang, si Ananias kag ang iya asawa nga si Safira, nag-untat sa pagkilala kay Jehova subong ila Manuggahom. (5:​1-11) Nagbaligya sila sing uma kag gintago ang iban nga kuwarta samtang nagpakunokuno sila nga ginhatag nila sa mga apostoles ang kabilugan sini. Bangod sang ihibalo nga ginhatag sang espiritu sang Dios kay Pedro, nahantupan niya ang ila pagkasalimpapaw, nga nagdul-ong sa ila kamatayon. Daw ano nga paandam para sa mga ginahaylo ni Satanas nga mangin malimbungon!​—⁠Hulubaton 3:​32; 6:​16-19.

²³ Sa tapos sining hitabo, wala sing bisan sin-o nga may malain nga motibo ang nagpangahas sa pag-impon sa mga disipulo. Ang iban nangin mga tumuluo. (5:​12-16) Dugang pa, sang magtuo sa gahom sang Dios ang mga masakiton kag ang mga gintublag sang dimatinlo nga mga espiritu, ‘ang tagsatagsa sa ila nag-ayo.’

Tumana ang Dios sa Baylo sang mga Tawo

24, 25. Ngaa ginhingabot sang Judiyong mga lider ang mga apostoles, apang anong talaksan ang ginpahamtang sining mga matutom para sa tanan nga alagad ni Jehova?

²⁴ Nagtinguha karon ang mataas nga saserdote kag ang mga Saduceo nga punggan ang makatilingala nga pag-uswag paagi sa pagbilanggo sa tanan nga apostoles. (5:​17-25) Apang sadto nga gab-i ginhilway sila sang anghel sang Dios. Kag sang kaagahon nagpanudlo sila sa templo! Ang paghingabot indi makapadulog sa mga alagad ni Jehova.

²⁵ Gin-ipit ang mga apostoles sang ginpaatubang sila sa Sanhedrin. (5:​26-42) Apang, sang ginmanduan sila nga mag-untat sa pagpanudlo, sila nagsiling: “Dapat namon tumanon ang Dios subong manuggahom sa baylo sang mga tawo.” Amo ini ang nagpahamtang sing talaksan para sa mga disipulo ni Jehova, nga ginasunod man karon sang mga Saksi ni Jehova. Sa tapos sang paandam gikan sa manunudlo sang Abogasiya nga si Gamaliel, ginsakit sang mga lider ang mga apostoles, ginmanduan sila nga mag-untat sa pagbantala, kag ginhilway sila.

26. Ano ang ministeryo sang mga apostoles kon ipaanggid sa ministeryo sang mga Saksi ni Jehova karon?

²⁶ Malipayon ang mga apostoles nga naisipan sila nga takus nga pakahuy-an tungod sa ngalan ni Jesus. “Kag sa adlaw-adlaw sa templo kag sa puluy-an wala sila mag-untat sa pagpanudlo kag pagwali sang maayong balita.” Huo, mga ministro sila nga nagpamalaybalay. Amo man sa karon ang mga Saksi sang Dios, nga nakabaton man sang iya espiritu bangod ginatuman nila sia kag nagasiling, “Si Jehova ang amon Manuggahom!”

Paano Mo Sabton?

◻ Ano nga komisyon ang dapat tumanon sang mga sumulunod ni Jesus, sang una kag sa karon?

◻ Ano ang natabo sang adlaw sang Pentecostes 33 C.⁠E.?

◻ San-o kag paano gingamit ni Pedro ang nahauna nga espirituwal nga yabi nga ginhatag sa iya ni Jesus?

◻ Ano ang matun-an naton gikan sa eksperiensia ni Ananias kag ni Safira?

◻ Sang ginmanduan nga mag-untat sa pagbantala, anong talaksan ang ginpahamtang sang mga apostoles para sa tanan nga mga Saksi ni Jehova?