Ang Pagtamod sang Biblia

Kalahamut-an Bala sa Dios ang Pagsimba sang mga Sekta?

ANO ang ginahunahuna mo kon mabatian mo ang tinaga nga “sekta”? Mga grupo bala sang mga tawo nga may makatilingala nga mga panapton nga nagapangadi kag nagasinaot sa mga pamusod sang kalye? Mga panong bala sang mga debotado nga nagayaub sa atubangan sang isa ka misteryoso nga guru? Mga makahaladlok bala nga sugilanon nahanungod sa ginakidnap ukon ginaabusohan nga kabataan? Ukon, ayhan, makahaladlok nga mga hitabo sang sunodsunod nga mga pagpatay ukon mga paghikog sang madamo?

Sing makapasubo, ini nga sahi sang mga report masunson nga nagaguwa, sa masami tuman kasunson. Ang resulta amo nga, sa kalabanan nga tawo, ang tinaga nga “sekta” nangin pareho na sa kon ano ang makatilingala, indi tradisyonal, kag ayhan makatalagam. Para sa ila, ang tanan nga relihioso nga grupo nga indi natungod sa ginatawag nga malig-on, dalagku nga mga iglesia mga sekta na. Makatarunganon bala ini nga pagtamod? Kag, kapin ka importante, amo bala sina ang pagtamod sang Biblia?

Ano ang Sekta?

Sing makawiwili, amo sina anay ang pagtamod sang madamo nga Judiyo sang nahaunang siglo sa mga sumulunod ni Jesucristo, labi na si apostol Pablo. Bangod sang iya makugi nga pagbantala sing maayong balita nahanungod kay Jesucristo, ginsumbong si Pablo sang Judiyong awtoridad subong “tawo nga magamo, manugpatigayon sang mga ribok sa tunga sang tanan nga Judiyo sa bug-os nga napuy-an nga duta kag pangulo sang sekta sang mga Nazaretnon.” (Binuhatan 24:5) Ang tinaga nga “sekta” diri ginbadbad gikan sa Griegong tinaga nga haiʹre·sis, nga nagakahulugan “pinili,” kon sayoron, “ang pilini nga opinyon nga batok sa kinaandan nga ginabaton.” Sa amo, ang “sekta” isa ka grupo ukon hubon sang mga tawo nga nagapili sa pagsunod sing isa ka dalanon ukon pagtuluohan nga tuhay sa kinaandan nga ginabaton.

Ginkabig sang Judiyong relihioso nga mga lider ang mensahe nga ginbantala ni Pablo kag sang iya mga masigka-Cristiano subong batok sa ila kag makatulublag. Sa amo, gintawag nila sila nga isa ka sekta. Apang husto bala sila? Sa pagkamatuod indi, kay kon batunon naton ang ila pangatarungan subong makatarunganon, nian silingon naton nga ang Cristianismo nga ginbantala ni Jesus nga Nazaretnon kag ni apostol Pablo isa ka sekta!

Sa kabaliskaran, ang Biblia nagahambal tuhoy sa “sekta sang mga Fariseo” kag “sekta sang mga Saduceo.” (Binuhatan 15:5; 5:17) Ngaa? Bangod ginpili nila nga sundon ang isa ka dalanon ukon pagtuluohan nga tuhay sa ginatudlo sang Biblia. Ginpakita ni Jesus ang ila sayop sang sia magsiling: “Ginasikway ninyo sing bug-os gid ang sugo sang Dios agod nga mabantayan ninyo ang inyo tradisyon. . . . Nagapakawalay pulos sang pulong sang Dios bangod sang inyo tradisyon.” (Marcos 7:9, 13) Bisan pa ginkabig nila nga ang ila relihion sadto malig-on kag daku, nagporma sila sing mga sekta sadtong mga adlaw.

Bangod sang ila pagpabilin sa ila kaugalingon nga mga ideya sang kon ano ang matarong, ginsikway sadtong nagapakamatarong sa kaugalingon nga relihiosong mga lider si Jesus. Busa, ginsilingan sila ni Jesus: “Busa nagasiling ako sa inyo, Ang ginharian sang Dios kuhaon sa inyo kag ihatag sa pungsod nga makapatubas sing mga bunga sini.”—Mateo 21:43.

Sin-o ang mga Sekta Karon?

Sa karon, ang termino nga “sekta” hilway nga ginagamit sang relihioso nga mga manunulat, mga kritiko, kag sang iban, ginahaboy ini kaangay sang daga sa bisan sin-o nga nagasaklaw sang ila relihioso nga balatyagon. Apang isa bala ina ka makatarunganon nga sadsaran sa paghukom? Sa baylo, indi bala labing maayo nga sundon ang panuytoy nga ginhatag ni Jesus kag usisaon ang ila mga “bunga”? Sia nagsiling: “Paagi sa ila mga bunga makilala ninyo sila.”—Mateo 7:16.

Pasad sa sini nga talaksan, madamo sang mga grupo kag mga kahublagan nga aton mabasahan ang sa pagkamatuod sarang matawag nga mga sekta. Sa baylo nga magpatubas sing “mga bunga sang espiritu,” nagapakita sila sing bugana nga “mga bunga sang unod,” nga nagalakip sa “pagmakihilawason, pagkahigko, pagkaulag, pagsimba sa mga idolo, espiritismo,” kag iban pa. (Galacia 5:19-24) Madamo sini ang makabig gid nga mga kulto, kay ginaidolo nila ang pila ka makagalanyat nga mga lider kag ginasunod ang ila mga panudlo sa baylo sang Pulong sang Dios, ang Biblia.

Apang kamusta ang ginatawag nga dalagku nga mga relihion? Ti, ginasakdag bala nila ang mataas nga mga talaksan sang Biblia sa mga bagay sang moral, ukon may yara bala sila kaugalingon nga mga ideya nahanungod sini? (1 Corinto 6:9, 10) Nagahigugmaanay bala sila sa isa kag isa, nga siling ni Jesus amo ang tanda sang matuod nga pagkadisipulo, ukon naapektuhan bala sila sang nasyonalismo kag politika sa pagpatyanay sa tion sang inaway? (Juan 13:35) Ginasakdag bala nila ang Biblia subong inspirado nga Pulong sang Dios, subong sang ginhimo ni Jesus, ukon ginatawag bala nila subong mito kag ginasakdag sa baylo ang mga pilosopiya sang tawo kag ang nagapakahuya sa Dios nga teoriya sang ebolusyon? (Juan 17:17) Maathag nga, walay sapayan sang ila “pagkatalahuron,” ang ginatawag nga dalagku nga mga relihion dimatuod lamang nga mga sekta nga nagapakunokuno subong matuod nga Cristianismo.

Kon Ano ang Dapat Mo Himuon

Ang matuod nga Cristianismo indi isa ka sekta, kag wala ini nabahinbahin. Kon ang isa natungod sa isa ka iglesia, nian kinahanglan nga usisaon mo sing mahalungon kon ano ang ginatudlo sang imo iglesia kag kon ano nga “mga bunga” ang ginapatubas sang mga katapo sini. Bug-os bala ini nga napasad kag nahisanto sa Biblia? Ukon mahimo ayhan nga ginpili sang imo iglesia ang isa ka dalanon nga tuhay sa ginatudlo sang Biblia, sa amo nagahimo sini nga isa ka sekta? Ang isa ka maukod nga pagtuon sa Biblia amo lamang ang paagi agod mahibaluan mo ini sing pat-od.

[Kapsion sa pahina 23]

Ginsumbong si apostol Pablo subong “pangulo sang sekta sang mga Nazaretnon”

[Kapsion sa pahina 23]

Ginasakdag bala sang imo iglesia ang Biblia subong Pulong sang Dios ukon ginatawag bala sini ini nga mito kag leyenda?