Ginhimo Nila ang Kabubut-on ni Jehova

Masidla nga Nagpanaksi si Pablo sa Atubangan sang Dungganon nga mga Tawo

MAKITA sing maathag ang pagkatuhay sa tunga sang duha ka tawo. Ang isa may korona samtang ang isa may mga kadena. Ang isa hari; ang isa bilanggo. Pagkatapos sang duha ka tuig sa bilangguan, nagaatubang karon si apostol Pablo sa gumalahom sang mga Judiyo, si Herodes Agripa II. Ang hari kag ang iya ginapuyo, si Bernice, nagsulod “upod ang daku nga kadayawan kag nagsulod sila sa hulot nga palamatian kaupod ang mga kumander sang militar kag ang dungganon nga mga tawo sang siudad.” (Binuhatan 25:23) Ang isa ka reperensia nagasiling: “Mahimo nga ginatos ka tawo ang nagtambong.”

Ang bag-o gintangdo nga gobernador, si Festo, naghimos sang miting. Ang gobernador nga ginbuslan niya, si Felix, kontento na nga pabay-an si Pablo sa bilangguan. Apang ginduhaduhaan ni Festo ang pagkamakatarunganon sang mga panumbungon batok kay Pablo. Ti, si Pablo tama ka mapiliton sang iya pagkainosente nga nangabay sia nga ipahusay ang kaso kay Cesar! Napukaw ang igtalupangod ni Hari Agripa sang kaso ni Pablo. “Luyag ko man mabatian ini nga tawo,” siling niya. Naghimo dayon sing mga kahimusan si Festo, ayhan nagapalibog kon ano ang ginahunahuna sang hari tuhoy sa sining pinasahi nga bilanggo.​—⁠Binuhatan 24:​27–25:⁠22.

Sang madason nga adlaw, nasapwan ni Pablo ang iya kaugalingon nga nagaatubang sa isa ka daku nga kadam-an sang dungganon nga mga tawo. “Ginakabig ko ang akon kaugalingon nga malipayon nga magahimo ako sing pagpangapin sa imo atubangan karon nga adlaw,” siling niya kay Agripa, “ilabi na gid bangod nga ikaw sampaton sa tanan nga kinabatasan kag kasuayon sa tunga sang mga Judiyo. Busa ginapakiluoy ko sa imo nga pamatian mo ako sing mapailubon.”​—⁠Binuhatan 26:​2, 3.

Ang Masidla nga Depensa ni Pablo

Una, ginsugiran ni Pablo si Agripa tuhoy sa iya nagligad subong manughingabot sang mga Cristiano. “Ginpilit ko sila nga magpanghiwala,” siling niya. “Ginhingabot ko sila sing lakas bisan tubtob sa iban nga mga siudad.” Ginsugid ni Pablo kon paano sia nakabaton sing isa ka makapulunaw nga palanan-awon nga sa diin ang ginbanhaw nga si Jesucristo namangkot sa iya: “Ngaa bala ginahingabot mo ako? Mabudlay sa imo nga tindakan mo ang mga suntok.”⁠a—⁠Binuhatan 26:​4-14.

Ginsugo dayon ni Jesus si Saulo nga magpanaksi sa katawhan sang tanan nga kapungsuran “sang mga butang nga imo nakita kag sang mga butang nga ipakita ko tuhoy sa akon.” Ginsugid ni Pablo nga makugi nga ginatuman niya ang iya asaynment. Apang, “bangod sining mga butang,” ginsilingan niya si Agripa, “gindakop ako sang mga Judiyo sa templo kag gintinguhaan ako nga patyon.” Sa pagpukaw sang interes ni Agripa sa Judaismo, ginpadaku ni Pablo nga ang iya pagpanaksi nagalakip gid “sing mga butang nga ginasiling sang mga Manalagna kag subong man ni Moises nga mahanabo” tuhoy sa kamatayon kag pagkabanhaw sang Mesias.​—⁠Binuhatan 26:​15-23.

Nagsaligbat si Festo. “Ang tama nga tinun-an nagapabuang sa imo!” singgit niya. Si Pablo nagsabat: “Indi ako buang, Labing Halangdon nga Festo, kundi nagahambal ako sing mga pulong sang kamatuoran nga may kaligdong sang panghunahuna.” Si Pablo nian nagsiling kay Agripa: “Ang hari nga akon ginahambalan upod ang kahilwayan sa paghambal nakahibalo sing maayo tuhoy sining mga butang; kay nabuyok ako sa pagpati nga walay isa sining mga butang ang nalipdan sa iya, kay wala ini mahimo sa tago.”​—⁠Binuhatan 26:​24-26.

Ginpamangkot dayon ni Pablo sing direkta si Agripa. “Haring Agripa, nagatuo ka bala sa mga manalagna?” Pat-od nga nahinalian si Agripa sa pamangkot. Ti, ginaamligan niya ang iya popularidad, kag ang pag-ugyon kay Pablo isa ka pagdampig sa ginasiling ni Festo nga “kabuangan.” Ayhan natalupangdan ang pagpangalag-ag ni Agripa, ginsabat ni Pablo ang iya mismo pamangkot. “Nahibaluan ko nga ikaw nagatuo,” siling niya. Naghambal dayon si Agripa, apang wala sia mag-ugyon. “Sa malip-ot lamang nga tion,” siling niya kay Pablo, “buyukon mo ako nga mangin isa ka Cristiano.”​—⁠Binuhatan 26:​27, 28.

Gingamit sing malantipon ni Pablo ang nagalikaw nga pinamulong ni Agripa agod ipautwas ang isa ka daku nga punto. “Ginapangabay ko sa Dios,” siling niya, “sa madali man ukon sa madugay nga indi lamang ikaw kundi subong man ang tanan nga nagapamati sa akon karon nga adlaw nga mangin kaangay man sa akon, luwas lamang sining mga gapos.”​—⁠Binuhatan 26:⁠29.

Wala sing nakita si Agripa kag si Festo kay Pablo nga takus sang kamatayon ukon pagkabilanggo. Apang, ang iya pangabay nga dalhon ang kaso kay Cesar indi na mabawi. Amo kon ngaa nakasiling si Agripa kay Festo: “Ini nga tawo mahimo mabuhian kon wala sia mag-apelar kay Cesar.”​—⁠Binuhatan 26:​30-32.

Leksion Para sa Aton

Ang paagi sa pagpanaksi ni Pablo sa atubangan sang dungganon nga mga tawo nagaaman sing maayo gid nga halimbawa sa aton. Sa pagpakighambal kay Haring Agripa, nangin mahinantupon si Pablo. Pat-od nga nahibaluan niya ang iskandalo sa tunga nanday Agripa kag Bernice. Ginadumilian ang ila relasyon, kay si Bernice utod ni Agripa. Apang sa sini nga okasyon wala ginpili ni Pablo ang maghambal tuhoy sa moralidad. Sa baylo, ginpadaku niya ang mga punto nga ginaugyunan nila ni Agripa. Dugang pa, bisan gintudluan si Pablo sang maalamon nga Fariseo nga si Gamaliel, ginbaton niya nga si Agripa eksperto sa Judiyong mga kinabatasan. (Binuhatan 22:3) Walay sapayan sang tindog sa moral ni Agripa, naghambal si Pablo nga may pagtahod bangod si Agripa nagakapot sing isa ka posisyon sang awtoridad.​—⁠Roma 13:⁠7.

Samtang ginapanaksi naton sing masidla ang aton mga pagpati, indi tulumuron naton nga ibuyagyag ukon pakamalauton ang dimatinlo nga mga buhat sang aton mga tagpalamati. Sa baylo, agod nga mangin mahapos sa ila nga batunon ang kamatuoran, dapat naton padakuon ang positibo nga bahin sang maayong balita, nagapadaku sa mga paglaum nga aton ginaugyunan. Kon nagapakighambal kita sa mga tawo nga mas gulang sa aton ukon may awtoridad, dapat kilalahon naton ang ila palangakuan. (Levitico 19:32) Sa sini nga paagi, mailog naton si Pablo, nga nagsiling: “Nangin tanan ako nga butang sa tanan nga sahi sang mga tawo, agod nga mahimo ko maluwas ang pila.”​—⁠1 Corinto 9:⁠22.

[Footnote]