Mga Pamangkot Gikan sa mga Bumalasa

Ngaa nagsiling Ang Lalantawan sang Abril 1, 2002, sa pahina 11, parapo 7, nga ang bawtismo sa tubig sang bag-ong Judiyong mga tumuluo sang Pentecostes 33 C.⁠E. simbulo sang “ila personal nga dedikasyon sa Dios paagi kay Cristo,” samtang ginpatihan anay nga ang bawtismo sang mga Judiyo sugod sang 33 C.⁠E. tubtob 36 C.⁠E. wala nagakinahanglan sining personal nga dedikasyon?

Sang 1513 B.⁠C.⁠E., ginhatagan ni Jehova nga Dios ang mga Israelinhon sing kahigayunan nga mangin isa ka balaan nga pungsod para sa iya sa kondisyon nga ‘tumanon nila sing maayo ang iya tingog kag sundon ang iya katipan.’ Sila nagsabat: “Ang tanan nga pinamulong ni Jehova himuon namon.”​​—⁠Exodo 19:​3-8; 24:​1-8.

Paagi sa pag-ugyon nga tumanon ang Mosaikong Kasuguan nga katipan, gindedikar sang mga Israelinhon ang ila kaugalingon sa Dios. Ang masunod nga mga kaliwatan sang mga Judiyo nabun-ag sa sining dedikado nga pungsod. Apang, ang bawtismo sang mga Judiyo nga nangin mga sumulunod ni Jesucristo sugod sang Pentecostes 33 C.⁠E. padayon nagdalahig sing mas kapin pa sa pagpresentar sang ila kaugalingon sa Dios subong mga katapo sang isa ka dedikado nga pungsod. Nagsimbulo ini sang ila dedikasyon kay Jehova nga Dios sa isa ka bag-o nga kaangtanan sa iya paagi kay Jesucristo. Paano?

Sa tapos ginpasagahay ang balaan nga espiritu sa mga 120 ka disipulo nga nagtipon sa naibabaw nga hulot sa Jerusalem sang Pentecostes 33 C.⁠E., si apostol Pedro nagtindog kag nagwali sa kadam-an sang mga Judiyo kag mga proselita nga nagtipon sa pagpangusisa kon ano ang natabo. Sa tapos makapanaksi sing maid-id, ginsilingan niya ang nakonsiensia gid nga mga Judiyo: “Hinulsol kamo, kag magpabawtismo ang tagsatagsa sa inyo sa ngalan ni Jesucristo para sa kapatawaran sang inyo mga sala.” Subong resulta sang ginlaygay pa ni Pedro, “ang mga nagbaton sang iya pulong sing tinagipusuon ginbawtismuhan, kag sadto nga adlaw mga tatlo ka libo ka kalag ang gindugang.”​​—⁠Binuhatan 2:​1-​41.

Indi bala nga ang ginbawtismuhan nga mga Judiyo bangod sa laygay ni Pedro mga katapo na nga daan sang isa ka dedikado nga pungsod? Indi bala nga may dedikado na sila nga kaangtanan sa Dios? Indi. Si apostol Pablo nagsulat nga ‘ginkuha sang Dios ang kasuguan paagi sa paglansang sini sa usok sang pag-antos.’ (Colosas 2:14) Paagi sa kamatayon ni Cristo sang 33 C.⁠E., ginkuha ni Jehova nga Dios ang Kasuguan nga katipan​​—⁠ang pinakasadsaran agod maangkon sang mga Israelinhon ang isa ka dedikado nga kaangtanan sa Iya. Ang pungsod nga nagsikway sa Anak sang Dios ginsikway na karon sang Dios mismo. ‘Ang undanon nga Israel’ indi na makapangangkon nga isa ka pungsod nga nadedikar sa Dios.​​—⁠1 Corinto 10:18; Mateo 21:43.

Gindula ang Kasuguan nga katipan sang 33 C.⁠E., apang ang panag-on sang pinasahi nga kahamuot kag pagtalupangod sang Dios sa mga Judiyo wala pa matapos sadto.⁠a Ini nga panag-on nagpadayon tubtob sang 36 C.⁠E., sang ginbantalaan ni Pedro ang mahinadlukon sa Dios nga Italyano nga si Cornelio kag ang iya panimalay subong man ang iban pa nga mga Gentil. (Binuhatan 10:​1-​48) Ano ang sadsaran sa sining pagpalawig pa sang kahamuot?

“Huptan [sang Mesias] nga may puwersa ang katipan para sa madamo sa sulod sang isa ka semana,” siling sang Daniel 9:⁠27. Ang katipan nga ginpatuman sa sulod sang pito ka tuig, ukon “isa ka semana,” halin sang bawtismo ni Jesus kag umpisa sang ministeryo publiko sang Mesias sang 29 C.⁠E. amo ang Abrahamiko nga katipan. Agod mangin bahin sining pagpakigkatipan, kinahanglan lamang sang isa nga mangin Hebreo nga kaliwat ni Abraham. Ining katipan nga isa lamang ka partido ang nangako sa pagtuman sa kondisyon wala nagahatag sa isa sing dedikado nga kaangtanan kay Jehova. Busa, ang Judiyo nga mga tumuluo nga nagpabawtismo sa tapos sang pamulongpulong ni Pedro sang Pentecostes 33 C.⁠E., bisan pa nagbaton sang pinasahi nga igtalupangod subong kinaugali nga mga Judiyo, wala na sing dedikado nga kaangtanan sa Dios sang gindula ang Kasuguan nga katipan. Kinahanglan personal sila nga magdedikar sa Dios.

Kinahanglan ang isa ka personal nga dedikasyon sa bahin sang mga Judiyo kag mga proselita nga nagpabawtismo sa adlaw sang Pentecostes 33 C.⁠E. bangod sa isa pa ka rason. Si apostol Pedro nagpalig-on sa iya mga tagpalamati nga maghinulsol kag magpabawtismo sa ngalan ni Jesus. Ang paghimo sini nagakinahanglan nga sikwayon nila ang dalanon sang kalibutan kag kilalahon si Jesus subong Ginuo kag Mesias, subong Mataas nga Saserdote, kag subong isa nga nagalingkod sa tuo nga kamot sang Dios sa langit. Dapat sila magtawag sa ngalan ni Jehova nga Dios agod maluwas paagi kay Cristo Jesus, nga nagalakip sa pagtuo kay Cristo kag pagkilala sa iya subong ila Lider. Bag-o na karon ang bug-os nga sadsaran sa pagtigayon sing kaangtanan sa Dios kag kapatawaran sang sala. Subong mga indibiduwal, dapat batunon sang nagatuo nga mga Judiyo ining bag-o nga kahimusan. Paano? Paagi sa pagdedikar sa Dios kag sa pagpakita sini sing dayag paagi sa pagpabawtismo sa tubig sa ngalan ni Jesucristo. Ang bawtismo sa tubig simbulo sang ila dedikasyon sa Dios, nga nagadul-ong sa ila pakadto sa isa ka bag-o nga kaangtanan sa iya paagi kay Jesucristo.​​—⁠Binuhatan 2:​21, 33-​36; 3:​19-​23.

[Nota]