Abril​—⁠Tion sa ‘Pagpangabudlay sing Lakas kag sa Pagpanikasog’

¹ Ang mga semana nga nagapalibot sa Memoryal isa ka tion sang pagpamalandong para sa katawhan ni Jehova. Tion ini agod binagbinagon sing maayo ang nahimo sang kamatayon ni Cristo kag hunahunaon ang aton hatag-Dios nga paglaum nga nangin posible bangod sang ginpaagay nga dugo ni Jesus. Kon panumdumon mo ang Abril 19 sang nagligad nga tuig, ano ang imo madumduman? Madumduman mo bala ang mga nawong nga nakita mo sadto nga gab-i? ang hamili kag espirituwal nga palibot sa Memoryal? ang serioso nga pagbinagbinag sa Biblia kag ang tinagipusuon nga mga pangamuyo? Ayhan namat-od ka nga ipakita sing labi pa ang imo daku nga pagpasalamat tungod sa gugma nga ginpakita ni Jehova kag ni Jesus sa imo. Ano na karon ang epekto sina nga pagpamalandong sa imo?

² Maathag gid nga indi lamang sa mga tinaga ginapabutyag sang katawhan ni Jehova ang pasalamat. (Col. 3:​15, 17) Sang nagligad nga Abril, ilabi na, nanikasog kita nga ipakita ang aton apresasyon sa mga aman ni Jehova para sa kaluwasan paagi sa pagpakigbahin mismo sa Cristianong ministeryo. Ang mga auxiliary payunir nagdamo sing 19,704. Bangod sang ila panikasog, kag sang tanan iban pa nga mga manugbantala sang Ginharian, natigayon naton ang bag-ong kataason sa mga manugbantala. Daku pa gid ang aton kalipay nga makita ang kapin sa 100,000 ka pagtuon sa Biblia nga ginhimo sadto nga bulan kag ang isa ka bag-o nga kataason sang tumalambong sa Memoryal!

³ Sa pagkamatuod, ginapahulag kita sa pagpanghikot bangod sang kapat-uran sang aton paglaum. Suno gid ini sa ginsulat ni apostol Pablo: “Sa sini nga katuyuan nagapangabudlay kita sing lakas kag nagapanikasog, bangod ginpahamtang naton ang aton paglaum sa buhi nga Dios, nga amo ang Manluluwas sang tanan nga sahi sang mga tawo, labi na sang mga matutom.”​—⁠1 Tim. 4:⁠10.

⁴ Karon nga panahon sang Memoryal, paano mo ipakita ang imo pagtuo sa mga aman ni Jehova para sa kabuhi? Sang nagligad nga Abril natigayon naton ang bag-ong kataason sang mga manugbantala sa Pilipinas, kag ginsundan ini sang isa pa ka kataason nga 136,396 sang Mayo. Malabawan bala naton ina nga kadamuon sini nga Abril? Mahimo gid naton ini. Apang ang tagsa ka manugbantala, bawtismado man kag di-bawtismado, kinahanglan makigbahin. Madamong bag-uhan ang mahimo man mangin kalipikado sa pagpakigbahin. Kon amo, samtang nagahimo ka sing mga plano sa pagpangabudlay sing lakas kag sa pagpanikasog sini nga Abril, binagbinaga ang mga paagi nga sarang mo mapapagsik ang iban, lakip na ang mga bag-uhan kag indi tanto ka eksperiensiado, sa pag-upod sa imo.

⁵ Pagbulig sa Iban nga Sugdan Liwat ang Ila Hilikuton: Kon may kilala ka nga wala makaalagad sa latagon sa sulod sang isa ukon duha na ka bulan, ayhan mapalig-on mo sila kag maagda sa pag-upod sa imo sa pag-alagad sa latagon. Kon ang pila sa kongregasyon nangin di-aktibo, ang mga gulang magapanikasog sing pinasahi nga duawon sila kag palig-unon sila sa pagsugod liwat sa Abril.

⁶ Kita tanan dapat magpangabay sing padayon sang espiritu ni Jehova agod pabakuron kita sa pag-alagad sa iya. (Luc. 11:13) Ano ang himuon naton agod mabaton ina nga espiritu? Basaha ang inspirado nga Pulong sang Dios. (2 Tim. 3:​16, 17) Dapat man naton ‘pamatian ang ginasiling sang espiritu sa mga kongregasyon’ paagi sa pagtambong sa tanan nga lima ka miting kada semana. (Bug. 3:6) Karon na ang nagakaigo nga tion agod buligan ang mga indi regular kag indi aktibo nga pauswagon ang ila mga batasan sa pagtuon kag mangin dalayon sa ila pagtambong sa mga miting. (Sal. 50:23) Mahimo naton ini samtang ginabantayan sing maayo ang aton mismo espirituwal nga kaayuhan. Apang, may butang pa nga kinahanglan.

⁷ Si apostol Pedro nagpaathag nga ginahatag sang Dios ang iya balaan nga espiritu “sa mga nagatuman sa iya subong manuggahom.” (Binu. 5:32) Lakip sa sini nga pagtuman amo ang pagsunod sa sugo nga ‘magbantala sa mga tawo kag maghatag sing maid-id nga panaksi.’ (Binu. 1:​8; 10:42) Busa, bisan pa kinahanglan naton ang espiritu sang Dios agod pabakuron kita sa pagbantala, si Jehova nagabulig sa aton sing labi pa samtang ginasugdan naton nga ipakita ang aton handum nga pahamut-an sia. Kabay nga indi naton pagpakadiutayon ang importansia sang paghimo sining una nga mga tikang sang kinabubut-on nga pagtuman!

⁸ Pagbulig sa mga Bata: Mga ginikanan, nakita mo bala sa imo mga anak ang kaluyag nga ipakighambal sa iban ang kamatuoran? Nagaupod bala sila sa inyo sa pag-alagad sa latagon? Huwaran bala sila sa ila paggawi? Kon amo, ngaa nagapangalag-ag kamo? Palapiti ang isa sang mga katapo sang Komite Sang Pag-alagad Sang Kongregasyon, kag hibalua kon bala kalipikado ang inyo anak nga isipon subong manugbantala sini nga Abril. (Tan-awa ang Aton Ministeryo nga libro, pahina 99-100.) Batuna nga ang inyo anak mahimo makabulig sa tumalagsahon nga paagi sa pagsinggit sing pagdayaw kay Jehova sini nga panahon sang Memoryal.​—⁠Mat. 21:​15, 16.

⁹ Pirme ginapalig-on sang isa ka Cristianong iloy nga taga-Georgia, E.⁠U.⁠A., ang iya lamharon nga anak nga babayi nga makighambal sa iban tuhoy kay Jehova. Sang nagligad nga tuig, samtang kaupod sang bata ang iya iloy sa ministeryo, nakapahamtang sia sing Ginapatuman nga brosyur sa isa ka lalaki kag ginpaathag sa malip-ot ang mga kaundan. Ginpamangkot sia sang lalaki: “Pila na ang imo edad?” Nagsabat sia: “Pito.” Nakibot ang lalaki nga makita sia nga nagahatag sing amo sini kaathag nga presentasyon. Natabuan man nga ginpadaku gali ining lalaki sa kamatuoran apang wala gid niya ini ginbinagbinag sing serioso subong dalanon sang kabuhi. Sang ulihi, isa ka pagtuon sa Biblia ang ginhiwat sa lalaki, sa iya asawa, kag sa iya anak nga babayi.

¹⁰ Madamo nga bata ang mga manugbantala na, kag nalipay kita sa pagpakig-upod sa ila samtang nagaalagad sa latagon. Mapahulag kag mapalig-on sining mga bata ang iban nga kaedad nila. Apang ang Abril isa man ka nagakaigo nga tion para pabakuron sang tagsa ka pamilya ang ila kaangtanan kag palig-unon ang espirituwalidad paagi sa pagpangabudlay sing magkaupod sa sagrado nga pag-alagad. Ang mga ulo sang pamilya dapat manguna sa sini.​—⁠Hulu. 24:⁠27.

¹¹ Pagbulig sa mga Bag-uhan: Kamusta naman ang mga bag-uhan nga ginatun-an mo sa Biblia? Mahimo bala sila makaamot sa pinasahi nga panikasog sini nga Abril? Ayhan nagpabutyag sila sing handum nga isugid sa iban ang ila natun-an samtang ginatuptupan ninyo ang kapitulo 2, parapo 22, ukon kapitulo 11, parapo 14, sa Ihibalo nga libro. Kon malapit na ninyo matapos ang libro, maghanda nga hambalan ini nga butang sing maathag samtang ginatuptupan ninyo ang kapitulo 18, parapo 8, nga nagasiling: “Ayhan nalangkag ikaw nga isugid sa imo mga paryente, mga abyan, kag sa iban pa ang imo ginatun-an. Sa katunayan, ayhan ginahimo mo na ini, kay bisan si Jesus nagpaambit sing maayong balita sa iban sa di-pormal nga mga kahimtangan. (Lucas 10:​38, 39; Juan 4:​6-15) Ayhan karon luyag mo nga kapin pa ang himuon.” Matuod bala ini sa imo ginatun-an?

¹² Ang imo bala estudyante nagapati sa Pulong sang Dios? Ginaaplikar na bala niya ang mga prinsipio sang Biblia? Ginpahisanto na bala niya ang iya kabuhi sa mga talaksan sang Dios? Nagatambong na bala sia sa mga miting sa kongregasyon? Luyag bala niya mag-alagad kay Jehova nga Dios? Nian ngaa indi sia palig-unon nga hambalon ang mga gulang agod mahibaluan nila kon bala kalipikado sia nga mangin isa ka di-bawtismado nga manugbantala kag mangabudlay upod sa imo sa Abril? (Tan-awa ang Aton Ministeryo nga libro, pahina 97-9.) Sa sining paagi maeksperiensiahan niya mismo kon paano sia buligan sang organisasyon ni Jehova sa iya mga panikasog nga alagaron si Jehova.

¹³ Matuod, ang pila ka estudyante nagauswag sing mas madasig sangsa iban. Gani, suno sa panuytoy sang Hunyo 2000 nga Ang Aton Ministeryo sa Ginharian, pahina 4, parapo 5-6, madamo ang nagatuon sang ikaduha nga libro sa mga tawo nga nagpakita primero sing interes apang nagakinahanglan sing dugang pa nga bulig agod makapakig-upod sing aktibo. Wala kita nagakadulaan sing paglaum nga ining mga bunayag sing tagipusuon mangin matuod nga mga disipulo ni Cristo “sa malip-ot man nga tion ukon sa malawig nga tion.” (Binu. 26:29) Apang, kon ang pila ka bulan nga ginhinguyang mo sa pagtuon sa sining mga indibiduwal malaragway sing nagakaigo gid subong “malawig nga tion,” ining panahon sang Memoryal mahimo bala mangin isa ka maayo nga kahigayunan agod ang imo estudyante magpakita sang pagkatudok sang iya pagpasalamat sa gawad ni Cristo?

¹⁴ Kon Paano Sila Buligan sa Pagpakigbahin: Madamo kita sing matun-an tuhoy sa pagbulig sa mga kalipikado nga makasugod sa ministeryo paagi sa pag-usisa kon paano ginhanas ni Jesus ang iban. Wala lamang sia nangita sing kadam-an kag ginsugo ang iya mga apostoles nga magsugod na sa paghambal. Ginpadaku niya una ang pagkakinahanglanon sang hilikuton nga pagbantala, ginpalig-on ang mapangamuyuon nga panimuot, kag nian ginhatag sa ila ang tatlo ka sadsaran nga aman: kaupod, teritoryo, kag mensahe. (Mat. 9:​35-38; 10:​5-7; Mar. 6:​7; Luc. 9:​2, 6) Mahimo man ninyo ini. Nagabulig ka man sa imo mismo anak, sa isa ka bag-ong estudyante, ukon sa isa nga madugaydugay na nga wala makareport sing bisan ano nga hilikuton, nagakaigo nga panikasugan gid nga himud-usan ang masunod nga mga tulumuron.

¹⁵ Ipatalupangod ang Kinahanglanon: Ipatudok sa isa ka tawo ang pagkaimportante sang hilikuton nga pagbantala. Mangin positibo sa sini. Isaysay ang mga eksperiensia nga nagapakita sang ginahimo sang kongregasyon sa ministeryo. Ipakita ang espiritu nga ginpabutyag ni Jesus sa Mateo 9:​36-38. Palig-una ang posible nga manugbantala ukon ang isa ka di-aktibo nga ipangamuyo ang tuhoy sa iya personal nga pagpakigbahin sa ministeryo subong man ang kadalag-an sang hilikuton sa bug-os nga kalibutan.

¹⁶ Palig-una Sia nga Hunahunaon ang Madamong Kahigayunan nga Makapanaksi: Sambita ang posibilidad nga makigsapol upod sa grupo sang pagtinuon sa libro para sa pagpanaksi sa pamalaybalay. Sambita ang tuhoy sa pagpakigsugilanon sa mga paryente kag mga kakilala ukon pagpakighambal sa mga katrabaho ukon kabutho sa tigpalanyaga. Kon nagasakay sa pangpubliko nga transportasyon, masunson masugdan sang isa ka tawo ang isa ka paghambalanay paagi lamang sa pagpakita sing personal nga interes sa kaupod nga pasahero. Kon maghimo kita sang una nga tikang, masunson ini nagabukas sang kahigayunan sa paghatag sing maayo nga panaksi. Sa pagkamatuod may madamo nga tion nga mapaambit naton ang aton paglaum sa iban “sa adlaw-adlaw.”​—⁠Sal. 96:​2, 3.

¹⁷ Apang, ayhan mas maayo nga, kon mahimo, kamo sang bag-ong manugbantala ang mag-updanay sa pagpamalaybalay. Kon tulumuron mo nga mapauswag ang imo pag-alagad sa Abril, pamangkuta ang territory servant kon may yara kombeniente nga teritoryo. Kon may yara, magahatag ini sa imo sing kahigayunan nga matuptupan ini sing maid-id. Halimbawa, samtang nagahingapos ka sa pag-alagad ukon nagapakadto sa mga miting ukon sa iban nga mga lugar, mahimo matalupangdan mo nga may tawo na sa isa ka balay nga wala anay sang tawo ukon nga nagpakita anay sang interes. Kon nagakaigo, maghapit sing makadali kon amo ini ang labing epektibo. Makahatag man ini sing balatyagon nga may hinimuan kag kalipay sa ministeryo.

¹⁸ Maghanda sing Isa ka Makawiwili nga Mensahe: Ang kaluyag sang isa ka tawo nga ipaambit ang mensahe sang Ginharian isa ka butang, apang isa naman ka butang para sa iya ang magbatyag nga may pagsalig kon paano niya ini ipaalinton, ilabi na kon bag-uhan pa sia ukon madugay na nga wala makaguwa sa latagon. Ang pagbulig sa mga bag-uhan kag mga di-aktibo sa paghanda takus gid. Ang mga Miting sa Serbisyo kag mga miting sa pag-alagad sa latagon makahatag sing mapuslanon nga mga ideya, apang ang personal nga paghanda wala sing tal-us.

¹⁹ Paano mo buligan ang mga bag-uhan sa paghanda para sa pag-alagad? Magsugod paagi sa pagtanyag sing magasin, kag hupti ini nga simple kag malip-ot! Pangabaya sila nga hunahunaon ang mga hitabo sa balita nga ginakabalak-an sang mga tawo sa teritoryo, kag nian pangitaon ang isa ka punto sa isa sang mga bag-ong magasin nga may kaangtanan sini. Ensayuha ninyo ang presentasyon, kag gamita ini sa gilayon sa ministeryo kon mahimo.

²⁰ Palambua ang Posibilidad para sa Aton Dugang Pa nga Pag-uswag: Sang nagligad nga tuig ang nagtambong sa Memoryal sa bug-os nga kalibutan kapin sa 14.8 milyones. Ang nagareport nga mga manugbantala nagadamo lamang sing kapin sa anom ka milyon. Nagakahulugan ini nga mga 8.8 ka milyon ka tawo ang interesado sa pagtambong sa sining pinasahi nga programa diin nabatian nila ang isa sang panguna nga mga panudlo sang Biblia nga ginpaathag. Nakilala nila sing personal ang iban sa aton, nga sa sini mahimo gid nga nagdayaw sila. Madamo sa ila ang nagahambal nga may paghangad sa aton, nagaamot sa aton bug-os kalibutan nga hilikuton, kag nagapangapin sa aton sa atubangan sang iban. Ining daku nga grupo nagapatimaan sang isa ka posibilidad para sa dugang pa nga pag-uswag. Ano ang himuon naton agod buligan sila nga mag-uswag sing labi pa?

²¹ Ang kalabanan sang mga bag-uhan nagtambong sa Memoryal bangod gin-agda sila sang isa sa aton. Sa masami, nagakahulugan ini nga sa di-magkubos may yara sila isa ka kakilala sa tumalambong. Kon ang isa nagtambong bilang pagbaton sa aton imbitasyon, salabton naton nga pabatyagon sila nga ginaabiabi kag buligan sila nga makabenepisyo sing bug-os gikan sa programa. Sanglit ang tilipunan gutok, buligi sila nga makakita sing pulungkuan. Pahulama sia sing Biblia, kag ipagamit sa iya ang imo songbook. Sabta ang bisan ano man nga pamangkot niya. Ang imo mainit nga pag-atipan mahimo mangin isa ka daku nga rason sa paglambo sang iya interes. Sa pagkamatuod, kita tanan may amo sini nga salabton​—⁠kon may nakita kita nga isa ka bag-o nga pangguyahon, abiabiha sia sing mainit kag sugilanuna sia sing makadali agod makilala sia.

²² Ang pagtambong sa Memoryal may daku gid nga epekto sa panghunahuna sang isa ka tawo. Ang katunayan nga nagkadto sia sa miting mahimo nagapahangop nga wala pa niya makita ang iya ginapangita sa iban nga lugar kag nga kita nagatanyag sing isa ka butang nga, sa banta niya, kinahanglan pa nga usisaon sing maayo. Ang paathag tuhoy sa makalilipay nga aman sang gawad mahimo nga isa gid ka daku nga pagpahayag sa isa ka tawo nga wala sing ideya tuhoy sa walay latid nga gugma ni Jehova. Mahimo nga makita niya sa gilayon nga tuhay kita​—⁠sinsero, mainabyanon, mahigugmaon, kag matinahuron. Ang aton tilipunan indi pareho sa mahimo nga nakita na niya sa mga simbahan nga may mga imahen kag walay pulos nga mga ritwal. Pat-od gid nga matalupangdan sang mga bag-uhan nga ang tumalambong ginahuman sang mga tawo halin sa lainlain nga pangabuhi kag nga wala sing kuwarta nga ginakolekta. Ini nga mga butang mahimo mangin isa ka mabaskog nga rason agod magbalik sila.

²³ Pagkatapos sang Memoryal, ang isa dapat mangin alisto nga tatapon kag buligan ang tanan nga bag-uhan nga nagtambong. Kon may gin-agda ka nga mga bag-uhan, may yara ikaw pinasahi nga salabton. Antes sila maghalin, pat-ura nga nahibaluan nila ang iban pa nga mga miting sa Kingdom Hall. Sambita ang titulo sang masunod nga pamulongpulong publiko. Sugiri sila sang lugar kag oras sang Pagtinuon Sang Kongregasyon sa Libro nga pinakamalapit sa ila puluy-an. Sa ulihi, hatagi sila sing isa ka kopya sang Kalipay sa Pamilya nga libro, kag sugiri sila nga ang binagbinagon sa semana sang Abril 30 amo ang “Amligi ang Imo Pamilya Gikan sa Makahalalit nga mga Impluwensia.” Ipaathag kon ngaa ang bug-os nga kongregasyon nagaplano sa pagtambong sa isa ka sirkito nga asambleya ukon pinasahi nga adlaw nga asambleya, kon may naiskedyul sa malapit nga palaabuton.

²⁴ Maghimo sing kahimusan nga duawon sila sa ila puluy-an. Pat-ura nga may mga kopya sila sang Ginapatuman nga brosyur kag sang Ihibalo nga libro, nga magabulig sa ila nga mangin pamilyar sa sadsaran nga mga panudlo sang Biblia. Kon wala pa sila nagatuon, tanyagi sila sing isa ka pagtuon sa Biblia. Ipanugda nga basahon nila ang bag-ong Jehovah’s Witnesses nga brosyur, nga nagahatag sing maathag nga larawan kon paano kita nagapanghikot subong isa ka organisasyon. Agdaha sila nga tan-awon ang aton mga video, subong sang Our Whole Association of Brothers. Ipakilala sila sa iban sa kongregasyon. Sa masunod nga mga bulan, pakig-anguti ang mga bag-uhan; agdaha sila sa pagtambong sa mga miting kon may pagduaw sang manugtatap sang sirkito ukon kon may sirkito nga asambleya ukon pinasahi nga adlaw nga asambleya kamo. Hatagi sila sing kahigayunan nga ipakita ang ila kaugalingon nga “nahuyog sing matarong para sa kabuhi nga walay katapusan”!​—⁠Binu. 13:⁠48.

²⁵ Kon Ano ang Mahimo sang mga Gulang: Ang kadalag-an sang daku nga panikasog sa ministeryo sini nga Abril nagadepende, sa daku nga kasangkaron, sa mga gulang. Kon ikaw isa ka konduktor sa pagtinuon sa libro, maghimo sing listahan sang mga butang nga sarang mo himuon agod buligan ang tagsatagsa sa imo grupo sang pagtinuon sa libro nga makigbahin sa pinasahi nga mga hilikuton. May pamatan-on, bag-uhan, di-regular, ukon di-aktibo bala nga katapo sa imo grupo? Hibalua kon bala ang mga ginikanan, mga payunir, ukon iban pa nga mga manugbantala naghimo sing tikang agod buligan sila. Maghatag mismo sing bisan ano man posible nga bulig. Ang isa ka utod nga babayi nga nangin indi tayuyon sa pag-alagad sa latagon sa sulod sang duha ka tuig naghinguyang sing kapin sa 50 ka oras sa ministeryo sang nagligad nga Abril. Ano ang nakabulig sa iya? Nagsiling sia nga ini amo ang makapalig-on nga mga pagduaw nga ginhimo sang mga gulang.

²⁶ Ang mga gulang kag mga ministeryal nga alagad dapat magbuligay agod pat-uron nga may bastante nga teritoryo, magasin, kag literatura para sa masunod nga bulan. Mahimos bala ang dugang pa nga miting sa pag-alagad sa latagon? Kon amo, ipahibalo ang pinasahi nga mga kahimusan. Labaw sa tanan, sa inyo publiko kag pribado nga mga pangamuyo, pangayua ang pagpakamaayo ni Jehova sa aton bulan sang dugang pa nga hilikuton sa Ginharian.​—⁠Roma 15:​30, 31; 2 Tes. 3:⁠1.

²⁷ Sang nagligad nga Abril sa isa ka kongregasyon sa North Carolina, ginpalig-on gid sang mga gulang ang dugang pa nga hilikuton sa ministeryo. Sa mga miting kada semana, gin-agda nila ang mga manugbantala nga binagbinagon sing mapangamuyuon kon bala mahimo sila makaauxiliary payunir. Sa tanan nga higayon, ang tanan sa hubon sang mga alagad mapagsik nga naghambal nga himuon ang Abril nga pinakamaayo gid nga bulan. Subong resulta, 58 porsiento sang mga manugbantala, lakip ang tanan nga gulang kag ministeryal nga alagad, nagpayunir sadto nga bulan!

²⁸ Ang Kalipay nga Makapakigbahin sing Bug-os: Ano ang mga pagpakamaayo sang ‘pagpangabudlay sing lakas kag pagpanikasog’ sa ministeryo? (1 Tim. 4:10) Tuhoy sa makugi nga hilikuton sang ila kongregasyon sang nagligad nga Abril, ang mga gulang nga ginsambit sa ibabaw nagsulat: “Ang mga kauturan masunson nagahambal kon daw ano pa ka daku nga gugma kag kasuod ang nabatyagan nila sa isa kag isa sugod sang nagpangabudlay sila sing kapin sa ministeryo sa latagon.”

²⁹ Handum gid sang isa ka pamatan-on nga lalaki nga limitado ang paggihogiho nga makapakigbahin sa pinasahi nga hilikuton sang nagligad nga Abril. Paagi sa maayo nga pagplano kag sa bulig sang iya iloy kag mga kauturan sa espirituwal, nakaagom sia sing mabungahon nga bulan subong isa ka auxiliary payunir. Ano ang balatyagon niya tuhoy sini nga eksperiensia? Sia nagsiling: “Sa nahauna nga tion sa akon kabuhi, ang pamatyag ko daw isa ako ka mapagros nga lalaki.”

³⁰ Wala duhaduha nga ginapakamaayo sing bugana ni Jehova yadtong nagahangad sing daku sang ila pribilehiyo nga makahambal tuhoy sa iya pagkahari. (Sal. 145:​11, 12) Samtang ginasaulog naton ang kamatayon sang aton Ginuo, nahangpan naton nga ang mga pagpakamaayo tungod sa diosnon nga debosyon labi pa nga magabugana sa palaabuton. Ginhandum gid ni apostol Pablo ang padya nga kabuhi nga dayon. Apang, nahibaluan niya nga indi ini isa ka butang nga mahimo lamang sia magpabuyanbuyan kag maglaum. Sia nagsulat: “Sa sini nga katuyuan nagapangabudlay gid ako sing lakas, nagapanikasog suno sa iya paghikot kag ini nagapanghikot sa akon nga may gahom.” (Col. 1:29) Ginpabakod ni Jehova, paagi kay Jesus, si Pablo agod matuman ang nagaluwas-kabuhi nga ministeryo, kag mahimo man Niya ini sa aton karon. Ina bala ang personal mo nga maeksperiensiahan sini nga Abril?

[Kahon sa pahina 3]

Sin-o ang Mapalig-on Mo nga Magbantala sa Abril?

Ang imo bata?

Estudyante sang Biblia?

Isa nga nangin di-aktibo?