Ang Pagtamod sang Biblia

Kompirmasyon​—Isa Bala Ini ka Cristianong Kinahanglanon?

“Ang kompirmasyon isa ka sakramento nga nagahatag sa nabawtismuhan nga Cristiano sing bug-os nga pagkahimpit sang Cristianong pagkabuhi, nagahimo sa iya nga hamtong sa espirituwalidad, isa ka soldado, kag isa ka saksi ni Cristo.”​—The Catholic Encyclopedia for School and Home.

GINASIKWAY sang kalabanan nga Protestante nga ang kompirmasyon isa ka sakramento. Apang, ang ika-13 siglo nga Katolikong teologo nga si Thomas Aquinas nagsulat nga ang “kompirmasyon amo ang hingapusan nga paghimpit sa sakramento sang bawtismo.” Bisan diin man sini, ang mga pamangkot nagautwas: Ginbuhat bala sang una nga mga Cristiano ang kompirmasyon? Isa bala ka Cristianong kinahanglanon karon ina nga seremonyal nga buhat?

“Wala gid ginapakita sang Ebanghelyo nga si Jesus Mismo ang nagpatok sang Sakramento sang Kompirmasyon,” baton sang New Catholic Encyclopedia. Gani ngaa ginsakdag sang mga manunudlo sang iglesia sang ulihi ang ideya nga pagkatapos sang bawtismo, ang ikaduha nga rito, nga mahimo nagalakip sing paghaplas sing lana kag pagtakdong sing mga kamot, kinahanglanon agod nga ang isa ka tawo mangin bug-os nga katapo sang iglesia?

Paano Nagsugod ang Kompirmasyon?

Ang pagbawtismo sa mga lapsag amo ang isa sang mga kabangdanan nga nagdul-ong sa pagkinahanglan sa isa pa ka sakramento. “Nahibaluan ang mga problema nga ginpautwas sang pagbawtismo sa mga lapsag,” siling sang libro nga Christianity, “ang mga simbahan . . . nagapahanumdom sa mga nabawtismuhan kon ano ang kahulugan sini paagi sa ‘pagkompirma’ sa ila sa ulihi.” Ginapahanumdom gid bala sila sang kompirmasyon kon ano ang kahulugan sang bawtismo, ukon ginapalubog bala sini ang kamatuoran nahanungod sa bawtismo?

Ang kamatuoran amo nga ang pagbawtismo sa mga lapsag wala ginasakdag sang Kasulatan. Ang pagwisik sing tubig sa lapsag, halimbawa, wala nagahilway sa lapsag gikan sa orihinal nga sala; ang pagtuo lamang sa halad nga gawad ni Cristo Jesus ang makahimo sina. (Juan 3:​16, 36; 1 Juan 1:7) Ang pagpabawtismo sa tubig isa ka naguwa nga simbulo nga ang isa nga ginabawtismuhan nakahimo sing bug-os nga dedikasyon paagi kay Jesus nga himuon ang kabubut-on ni Jehova nga Dios. Ang pagpabawtismo sa tubig para sa mga disipulo​—mga tumuluo—​indi sa mga lapsag.​—Mateo 28:​19, 20; Binuhatan 8:12.

“Sa diin natapos ang Bawtismo kag sa diin nagsugod ang Kompirmasyon?” pamangkot sang New Catholic Encyclopedia. Ini nagasabat: “Mahimo nga indi naton dapat pag-ipatuhay sing sibu gid, kay isa lamang ka rito sa unang Iglesia ang aton ginahambalan.” Huo, sang nahaunang siglo, ang “isa ka rito” nga naghimo sa isa nga bug-os nga katapo sang Cristianong kongregasyon amo ang bawtismo.​—Binuhatan 2:​41, 42.

Ang seremonya bala sang kompirmasyon, upod ang pagtakdong sing mga kamot, kinahanglanon antes makabaton ang isa sing balaan nga espiritu? Indi. Sa unang Cristianong kongregasyon, ang katuyuan sang pagtakdong sing mga kamot sa tapos sang bawtismo kinaandan nga amo ang paghimo sing pinasahi nga mga pagtangdo ukon pagpaalinton sing milagruso nga mga dulot sang espiritu. Ining mga dulot nagtaliwan sang mapatay ang mga apostoles. (1 Corinto 13:​1, 8-10) Kag ang pagtakdong sing mga kamot masami nga ginaangot, indi sa bawtismo sa tubig, kundi sa espisipiko nga mga hilikuton nga dapat himuon may kaangtanan sa Cristianong hilikuton sang pagmisyonero. (Binuhatan 6:​1-6; 13:​1-3) Sa amo, ang ideya nga ginapadayon sang kompirmasyon ina nga pagtakdong sing mga kamot sang mga apostoles kag, suno sa ginasiling sang Basics of the Faith: A Catholic Catechism, isa ka “sakramento nga nagabag-o sa isa ka tawo sing bug-os sa bagay nga ini mabaton sing kis-a lamang,” mapamatud-an nga sayop kon usisaon sing maayo.

Si apostol Pablo nagpaandam batok sa pagsipak gikan sa sadsaran nga kamatuoran sang Biblia: “Ang tion pat-od nga magaabot nga ang mga tawo nga indi na kontento sa maayo nga panudlo, magahandum sing bag-o nga butang . . . kag dayon, sa baylo nga mamati sa kamatuoran, magaliso sila sa mga mito.” (2 Timoteo 4:​3, 4, The Jerusalem Bible) Apang, ang mga nagapati sa rito sang kompirmasyon nagasambit sing duha ka Makasulatanhon nga mga halimbawa subong pamatuod.

Isa Bala ka Makasulatanhon nga Sadsaran?

Ang kasaysayan nga masapwan sa Binuhatan 8:​14-17 masami ginagamit subong sadsaran sang kompirmasyon. Apang, ining pagtakdong sing mga kamot agod mabaton ang balaan nga espiritu isa ka tumalagsahon nga okasyon. Paano nga subong? Ang mga Samariahanon indi Judiyo nga mga proselita. Busa, sila ang nangin una nga mga di-Israelinhon nga gindugang sa Cristianong kongregasyon. Sang magbantala si disipulo Felipe sa Samaria, madamo nga mga Samariahanon ang “ginbawtismuhan, mga lalaki kag mga babayi,” apang wala sila sa gilayon makabaton sing balaan nga espiritu. (Binuhatan 8:12) Ngaa?

Dumduma, kay Pedro gintugyan ni Cristo Jesus “ang mga yabi sang ginharian”​—ang pribilehiyo sang una nga pagtanyag sang kahigayunan sa pagsulod sa “ginharian sang mga langit” sa nanuhaytuhay nga mga grupo sang mga kombertido. (Mateo 16:19) Gani ginpasagahay ang balaan nga espiritu sa sining una nga di-Judiyo nga mga disipulo subong tanda nga sila palaabuton nga mga katapo sang “ginharian sang mga langit,” sang magkadto lamang si Pedro kag si Juan sa Samaria kag gintakdong ang ila mga kamot sa ila.

Ginakabig sang iban ang Binuhatan 19:​1-6 subong pamatuod nga ang unang mga Cristiano naghimo sing napain nga rito sa tapos sang bawtismo. Apang, sa sini nga kaso, maathag nga ang rason kon ngaa gindingot anay ang balaan nga espiritu gikan sa pila ka disipulo sa siudad sang Efeso amo nga ining bag-ong mga tumuluo nabawtismuhan “sa bawtismo ni Juan,” nga indi na importante. (Tan-awa man ang Binuhatan 18:​24-26.) Sang ginpaathag ini sa ila, sila sa gilayon “nagpabawtismo sa ngalan ni Ginuong Jesus.” Kag sa sini nga hitabo, ‘gintakdong [ni apostol Pablo] ang iya mga kamot sa ila’ agod nga mabaton nila ang pila sang milagruso nga mga dulot sang balaan nga espiritu sang Dios luwas sa adoptaron sila subong espirituwal nga mga anak sang Dios.​—Roma 8:​15, 16.

Tuhoy sa sining mga kasaysayan, ang New Dictionary of Theology nagasiling: “Indi maasoy nga ining mga hitabo padayon nga gingamit, kag, bisan pa kon ining mga hitabo nagahatag sing halimbawa, maduhaduhaan kon bala dapat sila tamdon subong talaksan agod mangin Cristiano subong sang pagbawtismo sa tubig. . . . Ang Mga Binuhatan sang mga Apostoles nagarekord sing madamo nga hitabo nga ginhimo ang pagbawtismo sa tubig apang wala ginsundan sing pagtakdong sing mga kamot (gani ining mga hitabo daw mga eksepsion).” Huo, tumalagsahon ini nga mga buhat agod atubangon ang tumalagsahon nga mga kahimtangan.

“Ang rito nga gintawag ‘kompirmasyon,’ ” hinakop sang New Dictionary of Theology, “nangin isa ka ‘rito sa pagpangita sing isa ka teolohiya.’ ” Sa kamatuoran, isa ini ka dimakasulatanhon nga rito, isa ka produkto sang sayop nga mga panudlo, kag indi gid isa ka kinahanglanon para sa mga Cristiano.