Ginhimo Nila ang Kabubut-on ni Jehova

Ginbawtismuhan ni Felipe ang Etiopiahanon nga Opisyal

SAMTANG nagasakay sa iya kangga, gingamit sing maalamon sang isa ka Etiopiahanon ang iya tion. Nagabasa sia sing mabaskog​—⁠isa ka kinaandan nga batasan sa tunga sang nahaunang-siglo nga mga manlalakbay. Ining partikular nga tawo isa ka opisyal nga “yara sa kagamhanan sa idalom ni Candace nga reyna sang mga Etiopiahanon.”⁠a Sia ang tulugyanan sang “tanan niya nga bahandi”​—⁠sa katunayan, isa sia ka ministro sa pamilak. Ining opisyal nagabasa gikan sa Pulong sang Dios agod makatigayon sing ihibalo.​—⁠Binuhatan 8:​27, 28.

Sa kaiping amo ang ebanghelisador nga si Felipe. Gintudlo sia sang anghel sa sining lugar, kag karon ginsugo sia: “Palapit ka kag magbuylog sa sining kangga.” (Binuhatan 8:​26, 29) Mahanduraw naton si Felipe nga ginapamangkot ang iya kaugalingon, ‘Sin-o ining lalaki? Ano ang iya ginabasa? Ngaa ginsugo ako sa iya?’

Samtang nagadalagan si Felipe sa higad sang kangga, nabatian niya ang Etiopiahanon nga nagabasa sining mga tinaga: “Subong sang isa ka karnero gindala sia sa ihawan, kag subong sang isa ka kordero nga wala sing tingog sa atubangan sang iya manug-alot, gani wala sia magbuka sang iya baba. Sa panahon sang iya pagpaubos ang paghukom ginkuha gikan sa iya. Sin-o bala ang magaasoy sang mga detalye sang iya kaliwatan? Bangod ang iya kabuhi ginkuha gikan sa duta.”​—⁠Binuhatan 8:​32, 33.

Nakilala gilayon ni Felipe ang mga pinamulong. Naghalin ini sa sinulatan ni Isaias. (Isaias 53:​7, 8) Naligban ang Etiopiahanon sa iya ginabasa. Ginsugdan ni Felipe ang paghambalanay paagi sa pagpamangkot: “Nahibaluan mo gid bala ang imo ginabasa?” Ang Etiopiahanon nagsabat: “Tunay, paano ko bala ini mahimo, luwas kon may isa nga magtuytoy sa akon?” Nian nagpakiluoy sia kay Felipe nga buylugan sia sa iya kangga.​—⁠Binuhatan 8:​30, 31.

“Ano Bala ang Nagasablag sa Akon sa Pagpabawtismo?”

“Nagapakiluoy ako sa imo,” siling sang Etiopiahanon kay Felipe, “nahanungod bala kay sin-o ginapamulong ini sang manalagna? Nahanungod bala sa iya kaugalingon ukon nahanungod sa iban pa nga tawo?” (Binuhatan 8:34) Ang pagpalibog sang Etiopiahanon indi makapakibot, kay ang pagkilala sa “karnero,” ukon sa “alagad,” sang tagna ni Isaias madugay na nga isa ka misteryo. (Isaias 53:11) Ayhan tuman gid kaathag sang ginsugid ni Felipe sa Etiopiahanon ang “maayong balita nahanungod kay Jesus”! Pagligad sang pila ka tion ang Etiopiahanon nagsiling: “Tuluka! Isa ka duog nga may tubig; ano bala ang nagasablag sa akon sa pagpabawtismo?” Gani ginbawtismuhan sia gilayon ni Felipe.​—⁠Binuhatan 8:​35-38.

Isa bala ini ka padasudaso nga buhat? Indi! Ang Etiopiahanon isa ka Judiyong proselita.⁠b Gani isa na sia ka sumilimba ni Jehova nga may ihibalo sa Kasulatan, lakip na sa Mesianikong mga tagna. Apang, ang iya ihibalo indi kompleto. Karon nga nakabaton sia sining importante nga impormasyon nahanungod sa papel ni Jesucristo, nahangpan sang Etiopiahanon kon ano ang ginasugo sang Dios sa iya kag nakahanda sia sa pagtuman. Ang bawtismo nagakaigo.​—⁠Mateo 28:​18-20; 1 Pedro 3:⁠21.

Pagkatapos sadto, “ginbalitbit sang espiritu ni Jehova si Felipe.” Nagkadto sia sa masunod nga asaynment. Ang Etiopiahanon “nagpadayon sa iya dalanon nga malipayon.”​—⁠Binuhatan 8:​39, 40.

Leksion Para sa Aton

Subong mga alagad karon ni Jehova, may obligasyon kita sa pagbulig sa bunayag sing tagipusuon nga mga indibiduwal sa pagtuon sa kamatuoran sang Pulong sang Dios. Madamo ang madinalag-on nga nakatanyag sang maayong balita sa iban samtang nagalakbay ukon sa iban pa dipormal nga mga sirkunstansia. Subong resulta sang pagbantala sang Ginharian nga hilikuton, kada tuig ginatos ka libo ang nagasimbulo sang ila dedikasyon kay Jehova nga Dios paagi sa pagpabawtismo.

Sa pagkamatuod, ang mga bag-uhan indi dapat magdali sa pagpabawtismo. Una dapat sila magkuha sing sibu nga ihibalo tuhoy kay Jehova nga Dios kag tuhoy sa iya Anak, si Jesucristo. (Juan 17:⁠3) Nian dapat sila maghinulsol, nagabiya sang sayop nga pagginawi kag nagaliso agod magpahisuno sa mga talaksan sang Dios. (Binuhatan 3:19) Nagakinahanglan ini sing tion, ilabi na kon ang sayop nga panghunahuna kag pagginawi nanggamot sing madalom. Samtang dapat binagbinagon sing maayo sang mga bag-uhan ang sakripisyo nga nadalahig sa Cristianong pagkadisipulo, dakung mga pagpakamaayo ang nagaresulta gikan sa pagsulod sa isa ka dedikadong kaangtanan kay Jehova nga Dios. (Ipaanggid ang Lucas 9:23; 14:​25-33.) Ang mga Saksi ni Jehova mapagsik nga nagatuytoy sa sining mga bag-uhan sa organisasyon nga ginagamit sang Dios sa pagtuman sang iya kabubut-on. (Mateo 24:​45-47) Kaangay sang Etiopiahanon, magakasadya sila sa pagtuon kag sa pagsunod sa kon ano ang ginasugo sang Dios sa ila.

[Mga footnote]

[Kahon sa pahina 8]

Ngaa Gintawag nga Isa ka Eunuco?

Sa bug-os nga kasaysayan sang Binuhatan kapitulo 8, ang Etiopiahanon ginapatuhuyan subong isa ka “eunuco.” Apang, sanglit wala ginabaton sang Mosaikong Kasuguan ang isa ka kinapon nga lalaki pasulod sa kongregasyon, ining lalaki maathag nga indi isa ka eunuco sa literal nga kahulugan. (Deuteronomio 23:⁠1) Ang Griegong tinaga para sa “eunuco” nagapatuhoy sa isa ka tawo nga may mataas nga katungdanan. Sa amo, ang Etiopiahanon isa ka opisyal sa idalom sang reyna sang Etiopia.