Kapitulo 17

Ang Pagbalik ni Cristo—Paano Makita?

1. (a) Ano ang ginsaad ni Cristo? (b) Ngaa kinahanglan nga magbalik si Cristo?

“MAGABALIK AKO.” (Juan 14:3) Amo ini ang ginsaad ni Jesucristo sa iya mga apostoles sang kaupod niya sila sang gab-i antes sia mapatay. Ayhan magaugyon ikaw nga daku gid sa karon ang pagkinahanglan sa paghidait, kapagros kag kabuhi nga ihatag sa katawhan sang pagbalik ni Cristo nga may gahom sa Ginharian. Apang paano magabalik si Cristo? Sin-o ang makakita sa iya, kag sa anong paagi?

2. (a) Sa iya pagbalik, sa diin dalhon ni Cristo ang iya hinaplas nga mga sumulunod, lakip ang iya mga apostoles, agod magpuyo didto? (b) Ano nga sahi sang lawas ang ila matigayon didto?

² Sa iya pagbalik, indi magakari si Jesus agod magpuyo sa duta. Sa baylo, ang mga magahari kaupod niya dalhon agod magpuyo kaupod niya sa langit. Si Jesus nagsiling sa iya mga apostoles: “Magabalik ako kag dalhon ko kamo kaupod nakon, agod nga kon diin ako didto man kamo.” (Juan 14:3) Gani, sa pagbalik ni Cristo, ang mga dalhon sa langit mangin mga espiritu, kag makita nila si Cristo sa iya nahimaya espiritu nga lawas. (1 Corinto 15:​44) Apang sa pagbalik ni Cristo, makita bala sia sang nabilin nga bahin sang katawhan nga indi magpalangit?

KON NGAA INDI SIA MAKABALIK SUBONG TAWO

3. Anong pamatuod sa Biblia ang nagapakita nga indi na liwat makita sang mga tawo si Cristo?

³ Sadto gihapon nga gab-i si Jesus nagsiling sa iya mga apostoles: “Sa diutay pa nga tion kag ang kalibutan indi na makakita sa akon.” (Juan 14:​19) Ang “kalibutan” nagapatuhoy sa katawhan. Gani maathag nga ginasiling diri ni Jesus nga ang katawhan sa duta indi na makakita sa iya liwat sa tapos sang iya kamatayon. Si apostol Pablo nagsulat: “Bisan pa nakilala naton si Cristo suno sa unod, pat-od nga wala na naton sia ginakilala sing subong.”​—⁠2 Cprinto 5:16.

4. Ano ang nagapakita nga si Cristo magabalik subong isa ka gamhanan indi makita espiritu nga persona?

⁴ Apang madamu ang nagapati nga si Cristo magabalik sa amo gihapon nga tawhanon nga lawas nga sia ginpatay, kag nga makita sia sang tanan nga nagapuyo sa duta. Apang, ang Biblia nagasiling nga si Cristo magabalik nga may himaya upod sa tanan nga anghel, kag magalingkod sia sa “iya mahimayaon nga trono.” (Mateo 25:​31) Kon si Jesus magakari kag magalingkod subong isa ka tawo sa dutan-on nga trono, mangin manubo pa sia sa mga anghel. Apang magakari sia subong amo ang pinakagamhanan kag labing mahimayaon sa tanan sining espiritu nga mga anak sang Dios kag busa indi makita, subong nga amo sila.​—⁠Filipos 2:​8-11.

5. Ngaa indi mahimu nga si Cristo magbalik sa isa ka tawhanon nga lawas?

⁵ Sa pihak nga bahin, sang nagligad nga kapin sa 1,900 ka tuig kinahanglanon nga paubson ni Jesus ang iya kaugalingon kag mangin isa ka tawo. Kinahanglan nga ihatag niya ang iya himpit tawhanon nga kabuhi subong gawad para sa aton. Ginpaathag ini ni Jesus: “Ang tinapay nga akon ihatag para sa kabuhi sang kalibutan amo ang akon unod.” (Juan 6:​51) Sa amo ginhatag ni Jesus ang iya undanon nga lawas bilang halad para sa katawhan. Tubtob san-o ang epekto sadto nga halad? Si apostol Pablo nagsabat: “Ginapakabalaan kita paagi sa paghalad sang lawas ni Jesucristo sing makaisa gid lang.” (Hebreo 10:​10) Bangod ginhatag na niya ang iya unod para sa kabuhi sang kalibutan, indi na ini mabawi ni Cristo kag mangin tawo sa liwat. Bangod sina ang iya pagbalik indi mahimu nga mangin sa tawhanon nga lawas nga iya ginhalad sing makaisa gid lang.

ANG UNDANON NGA LAWAS WALA GINADALA SA LANGIT

6. Ngaa madamu ang nagapati nga gindala ni Cristo ang iya undanon nga lawas sa langit?

⁶ Apang, madamu ang nagapati nga gindala ni Cristo ang iya undanon nga lawas sa langit. Ginatudlo nila ang kamatuoran nga sang ginbanhaw si Cristo, ang iya undanon nga lawas nadula sa lulubngan. (Marcos 16:​5-7) Kag sa tapos mapatay si Jesus nagpakita sia sa iya mga disipulo sa undanon nga lawas agod ipakita sa ila nga nabuhi sia. Sang isa ka bes ginpahikap pa gani Niya kay apostol Tomas ang buho sa Iya kiliran agod magpati si Tomas nga ginbanhaw Sia. (Juan 20:​24-27) Wala bala ini nagapamatuod nga si Cristo ginbanhaw sa amo gihapon nga lawas nga ginpatay sia?

7. Ano ang nagapamatuod nga si Cristo nagkayab sa langit subong isa ka espiritu nga persona?

⁷ Wala ini nagapamatuod sing subong sina. Maathag ang Biblia sa pagsiling: “Si Cristo napatay para sa mga sala sing makaisa gid lang . . . , nga ginpatay sa unod, apang ginbuhi sa espiritu.” (1 Pedro 3:​18) Ang mga tawo nga may unod kag dugo indi makapuyo sa langit. Tuhoy sa pagkabanhaw padulong sa langitnon nga kabuhi, ang Biblia nagasiling: “Ginasab-ug ini nga lawas nga unodnon, ginabanhaw ini nga lawas nga espirituhanon. . . . ang unod kag dugo indi makapanubli sang ginharian sang Dios.” (1 Corinto 15:​44-50) Ang mga espiritu nga persona lamang nga may espirituhanon nga lawas ang makapuyo sa langit.

8. Ano ang natabo sa tawhanon nga lawas ni Cristo?

⁸ Ano, kon amo, ang natabo sa undanon nga lawas ni Jesus? Indi bala nga wala sing nakita ang iya mga disipulo sa iya lulubngan? Wala sila sing nakita bangod ginkuha sang Dios ang lawas ni Jesus. Ngaa ginhimu ini sang Dios? Gintuman sini ang nasulat sa Biblia. (Salmo 16:​10; Binuhatan 2:​31) Sa amo nakita ni Jehova nga nagakabagay nga kuhaon ang lawas ni Jesus, subong sang ginhimu niya anay sa lawas ni Moises. (Deuteronomio 34:​5, 6) Isa pa, kon ginbilin sa lulubngan ang lawas, mahimu nga indi mahangpan sang mga disipulo ni Jesus nga ginbanhaw sia gikan sa minatay, bangod sadtong tion wala pa nila mahangpi sing bug-os ang espirituwal nga mga butang.

9. Paano nabutang ni Tomas ang iya kamut sa pilas sang nagmateryalisar nga lawas sang ginbanhaw nga si Jesus?

⁹ Apang sanglit nabutang ni apostol Tomas ang iya kamut sa buho sa kiliran ni Jesus, wala bala ina nagapakita nga si Jesus ginbanhaw sa amo gihapon nga lawas nga ginlansang sa usok? Wala, bangod nagmateryalisar lamang si Jesus ukon nagpakatawo, subong sang ginhimu anay sang mga anghel. Agod makombinse si Tomas kon sin-o Sia, gingamit Niya ang lawas nga may mga pilas. Nagpakita sia subong nga daw isa gid ka bug-os nga tawo, nga makakaon kag makainum, subong sang ginhimu anay sang mga anghel nga gin-amoma ni Abraham.​—⁠Genesis 18:​8; Hebreo 13:2.

10. Ano ang nagapakita nga si Jesus nagsuklob sing nanuhaytuhay nga pisikal nga lawas?

¹⁰ Samtang si Jesus nagpakita kay Tomas sa lawas nga kaanggid sa lawas nga Sia ginpatay, tuhay man nga lawas ang Iya ginsuklob sang magpakita Sia sa Iya mga sumulunod. Amo kon ngaa sang primero nasal-an ni Maria Magdalena si Jesus nga isa ka hardinero. Sa iban nga mga tion wala sia makilal-i sang iya mga disipulo sang primero. Sa sining mga hitabo indi ang iya personal nga panagway ang nagpakilala sa iya, kundi ang iya ginhambal ukon ginbuhat.​—⁠Juan 20:​14-16; 21:​6, 7; Lucas 24:​30, 31.

11, 12. (a) Sa anong paagi naghalin si Cristo sa duta? (b) Gani sa anong paagi dapat naton paabuton ang pagbalik ni Cristo?

¹¹ Sa sulod sang 40 ka adlaw sa tapos sia mabanhaw, makapila nga nagpakita si Jesus sa undanon nga lawas sa iya mga disipulo. (Binuhatan 1:3) Nian nagpalangit sia. Apang ang iban mahimu mamangkot: ‘Wala bala ang duha ka anghel nga didto sadto nagsiling sa mga apostoles nga si Cristo “magabalik sa amo nga paagi subong nga nakita ninyo sia nga nagapalangit”?’ (Binuhatan 1:​11) Huo, naghambal sila sini. Apang talupangda nga sila nagsiling “sa amo nga paagi,” indi sa amo gihapon nga lawas. Kag ano ang paagi sang paghalin ni Jesus? Sa paagi nga malinong, wala sing pagpasundayag sa publiko. Ang iya lamang mga apostoles ang nakahibalo sini. Wala makahibalo ang kalibutan.

¹² Binagbinaga kon paano ginalaragway sang Biblia ang paagi nga ginbiyaan ni Jesus ang iya mga apostoles sang magpalangit sia: “Samtang nagatulok sila, ginbayaw sia kag ang panganod nagbaton sa iya gikan sa ila itololok.” (Binuhatan 1:9) Gani sang magpalangit si Jesus, gintago sia sang panganod gikan sa literal nga panulok sang iya mga apostoles. Sa amo, si Jesus nga naghalin, indi na kitaon sa ila. Indi nila makita sia. Nian sa iya espirituwal nga lawas nagkayab sia sa langit. (1 Pedro 3:​18) Sa amo ang iya pagbalik mangin dimakita man, sa isa ka espirituwal nga lawas.

KON PAANO MAKITA SANG TAGSA KA MATA

13. Paano naton hangpon ang pinamulong nga ang “tagsa ka mata makakita” kay Cristo kon mag-abot sia kaupod sa mga panganod?

¹³ Paano naton hangpon ang mga pulong sa Bugna 1:​7? Didto si apostol Juan nagsulat: “Yari karon! Nagakari sia kaupod sang mga panganod, kag ang tagsa ka mata makakita sa iya, kag ang mga naghandus sa iya; kag ang tanan nga tribu sang duta magahaya bangod sa iya.” Ang Biblia nagahambal diri sing pagkakita, indi paagi sa pisikal nga mga mata, kundi sa kahulugan nga mahangpan ukon mahantop. Sa amo, kon ang isa ka tawo makahantop ukon makahangop sa isa ka butang, mahimu sia magsiling, ‘Nakita ko na.’ Sa kamatuoran, ang Biblia nagahambal tuhoy sa “mga mata sang paghangop.” (Efeso 1:​18, ­King ­James Ver­sion) Gani ang ekspresyon nga “ang tagsa ka mata makakita sa iya” nagakahulugan nga ang tanan makahangop ukon makakilala nga si Cristo yari na.

14. (a) Sin-o ang ginapatuhoyan sang “mga naghandus sa iya”? (b) Ngaa may daku nga paghaya kon makilala sang tanan sa ulihi ang presensia ni Cristo?

¹⁴ Ang mga “naghandus” kay Jesus wala na nagakabuhi sa duta. Gani nagalaragway sila sa mga tawo nga, paagi sa pagsakit sa mga sumulunod ni Cristo karon, nagailog sa paggawi sadtong mga tawo sang unang siglo. (Mateo 25:​40, 45) Malapit na ang tion nga laglagon ni Cristo ang mga malauton. Ginpaandaman na sila tuhoy sini. Kon mag-abot ang paglaglag, “makita” nila ukon makilala kon ano ang nagakatabo. Kag magahaya gid sila!

MAGABALIK BALA SI CRISTO SA DUTA?

15. Sa anong paagi ang tinaga nga “pagbalik” masami nga ginagamit?

¹⁵ Ang pagbalik wala pirme nagakahulugan nga ang isa magakadto sa isa ka literal nga duog. Sa amo ang nagabalatian nga mga tawo ginasiling nga ‘nagabalik sa kapagros.’ Kag ang isa ka nagagahom anay mahimu masiling nga ‘nagabalik sa gahom.’ Sa amo man nga paagi, ang Dios nagsiling kay Abraham: “Magabalik ako sa imo, sa masunod nga tuig sa sini nga tion, kag si Sara magaanak sing lalaki.” (Genesis 18:​14; 21:1) Ang pagbalik ni Jehova nagkahulugan, indi sing literal nga pagbalik, kundi pagliso sang iya igtalupangod kay Sara agod himuon ang iya ginsaad.

16. (a) Sa anong paagi magabalik si Cristo sa duta? (b) San-o nagbalik si Cristo, kag ano sadto ang nag-abot?

¹⁶ Sa amo man nga paagi, ang pagbalik ni Cristo wala nagakahulugan nga sia literal nga magabalik sa duta. Sa baylo, nagakahulugan ini nga gamiton niya ang gahom sa Ginharian para sa sini nga duta kag lisuon ang iya igtalupangod sa sini. Indi kinahanglan nga biyaan niya ang iya langitnon nga trono kag manaug sa duta agod himuon ini. Subong nakita na naton sa nagligad nga kapitulo, ang pamatuod sang Biblia nagapakita nga sang tuig 1914 C.⁠E. nag-abot ang tion sang Dios nga magbalik si Cristo kag magsugod sa paggahom. Sadto nabatian ang singgit sa langit: “Karon nag-abot ang kaluwasan kag ang gahom kag ang ginharian sang aton Dios kag ang awtoridad sang iya Cristo.”​—⁠Bugna 12:10.

17. Sanglit indi makita ang pagbalik ni Cristo, ano ang iya ginhatag agod mahibaloan naton nga nagbalik na sia?

¹⁷ Sanglit indi makita ang pagbalik ni Cristo, may paagi bala agod mapat-od nga natabo gid ini? Huo, may yara. Si Cristo mismo naghatag sing kitaon nga “tanda” nga paagi sa sini mahibaloan naton nga sia indi makita nga yari na kag ang katapusan sang kalibutan malapit na. Usisaon naton ina nga “tanda.”

[Piktyur sa pahina 142]

Ginhatag ni Cristo ang iya lawas subong halad. Indi na niya mabawi ini kag mangin tawo liwat.

[Mga piktyur sa pahina 144, 145]

Ngaa nasal-an ni Maria Magdalena si Jesus nga isa ka hardinero sa tapos sia ginbanhaw?

Anong undanon nga lawas ang ginpahikap sang ginbanhaw nga si Jesus kay Tomas?

[Piktyur sa pahina 147]

Magabalik si Cristo sa amo man nga paagi nga naghalin sia sa duta. Sa anong paagi sia naghalin?