Daku gid Bala ang Imo Personal nga Opinyon?

“BAG-ONG Simbahan Nabahinbahin Tuhoy sa Agi nga mga Pari,” siling sang ulong dinalan. Ini nga balita nagbuyagyag sang daku nga pagbinahinbahin sa Church of England bangod sang palaligban nahanungod sa homoseksuwal nga mga pari.

“May lugar para sa mga homoseksuwal sa simbahan,” siling sang ministro nga nagadumala sang pagrikrut sa bag-ong klero sang simbahan. Sa pagtamod niya, ang homoseksuwal nga ‘bunayag kag responsable’ sa iya kaangtanan upod sa isa ka lalaki may kinamatarong nga ordenan.

“Ang homoseksuwal nga klero makasasala kag dapat maghalin” amo ang nagapamatok nga pagpati sang rektor sang simbahan. Sa banta niya ang mga klerigo dapat mangin huwaran sa ila moral nga paggawi.​—⁠The Sunday Times, London, Nobiembre 8, 1987.

Walay duhaduha nga ang kada isa sining mga lalaki kombinsido nga ang iya opinyon husto. Apang dapat bala nga ang personal nga opinyon amo ang katapusan nga awtoridad sa mga butang nga kabalak-an? Ayhan magasiling kamo sing huo, nagapangatarungan nga “ang tagsatagsa may kinamatarong sa iya kaugalingon nga opinyon.”

Apang, binagbinaga ining duha ka inspirado nga komento sa Biblia: “Nian, sundon ta ang nagahimo nga sa paghidait kag sa pagpalig-on sa isa kag isa.” “Ginapakiluoy ko sa inyo, mga kauturan, . . . nga maghilisugot kamo tanan sa inyo, kag nga walay pagbinahinbahin sa inyo, kundi mag-isa kamo ka painoino kag kaisipan.”​—⁠Roma 14:​19; 1 Corinto 1:⁠10.

Gani, ano abi kon ikaw, subong isa ka Cristiano, nabudlayan sa pag-ugyon upod sa Cristianong kongregasyon sa pila ka importante nga butang? Paano mo ini pakig-angotan agod huptan ang paghidait kag paghiusa sa kongregasyon?​—⁠Mateo 5:​9; 1 Pedro 3:⁠11.

Binagbinaga ang isa ka hitabo nga natabo sa unang-siglo nga Cristianong kongregasyon sang gintamod sang iban ang ila personal nga opinyon nga daku. Tan-awa kon sa ano ini nagdul-ong sa ulihi kag pamangkota ang imo kaugalingon: ‘Ano bala kuntani ang ginhimo ko kon didto ako?’

Mga Kasuayon Nahanungod sa Sirkunsisyon

Sang 36 C.⁠E. ang disirkunsidado nga mga Gentil una nga ginbaton pasulod sa Cristianong kongregasyon. Bisan pa nga ginhanda sang Dios si apostol Pedro para sa sining dramatiko nga hitabo, si Pedro kag yadtong kaupod niya natingala nga makita ang balaan nga espiritu nga ginpasagahay sa disirkunsidado nga katawhan. (Binuhatan 10:​1-16, 34-48) Nabudlayan ang madamo pa nga Judiyong Cristiano sa pagbaton sini. Sa katunayan, ang iban nga Judiyong mga Cristiano, “mga sumalakdag sang sirkunsisyon,” nagmulay kay Pedro bangod sang pagpakig-upod sa disirkunsidado nga katawhan.​—⁠Binuhatan 11:​2, 3.

Ngaa natublag ining mga kritiko? Bangod sa sulod sang halos 2,000 ka tuig, ang sirkunsisyon nangin tanda sang isa ka pinasahi nga kaangtanan upod sa Dios. Sang ginsugo ni Jehova nga Dios si Abraham nga isirkunsidar ang tanan nga lalaki sa iya panimalay, nagsiling Sia: “Ini mangin tanda sang katipan sa tunga nakon kag ninyo . . . tubtob sa tion nga dinapat-od.” (Genesis 17:​10-13) Madamong siglo sang ulihi, ang sirkunsisyon importante gihapon katama sa mga Judiyo. Madamo sa ila ang nagbatyag nga ang pagkadinasirkunsidar nagakahulugan sing pagkadimatinlo. (Isaias 52:1) Nagbatyag sila nga ang balaan nga katawhan sang Dios dapat nga wala sing pagpakig-angot sa dimatinlo, disirkunsidado nga mga Gentil.

Sang 49 C.⁠E. ginkompronta si apostol Pablo sa Siriahanon nga Antioquia sang iban sining “mga sumalakdag sang sirkunsisyon.” Sa katapusan sang iya unang misyonero nga paglakbay, nagreport sia sa kongregasyon didto kon paano ang Dios “nagbukas sa [disirkunsidado] nga mga pungsod sang ganhaan sang pagtuo.” Nangin maathag sa iya nga indi na kinahanglan para sa sining katawhan sang mga pungsod nga sirkunsidahon. Apang, lain ang opinyon sang iban nga mga tawo gikan sa Judea. “Kon indi kamo magpasirkunsidar suno sa kinabatasan ni Moises,” siling nila, “indi kamo maluwas.” Nagbatyag sila nga ang sirkunsasyon kinahanglanon para sa kaluwasan kag nga ang tanan nga Gentil nga mga kombertido sa Cristianismo dapat nga sirkunsidahon.​—⁠Binuhatan 14:​26⁠–​15:⁠1.

Nadalahig ang makusog nga mga balatyagon. Walay duhaduha nga makahatag sila sing makahalaylo nga mga argumento sa pagsakdag sa ila opinyon. Paano huptan ang paghidait kag paghiusa sa kongregasyon? Pagkatapos sang daku nga diskusyonay tuhoy sa sina, ang kongregasyon sa Antioquia “nagtangdo kay Pablo kag kay Bernabe kag sa pila pa sa ila nga magtaklad sa Jerusalem sa mga apostoles kag sa mga tigulang nahanungod sining kasuayon.” (Binuhatan 15:2) Wala ginapakita nga bangod sang kabug-at, ang kada isa may kinamatarong sa iya kaugalingon nga opinyon. Ining mga Cristiano nagpakita sing pagpaubos kag katutom sa teokratikong kahimusan agod malab-ot ang awtoritatibo nga desisyon gikan sa ila sentro nga hubon sang pagpanudlo.​—⁠1 Corinto 14:​33, 40; Santiago 3:​17, 18; 1 Pedro 5:​5, 6.

Nahimo nga Desisyon

Ang mga apostoles kag ang mga tigulang sa Jerusalem (maathag nga ginakilala subong ang nagadumala nga hubon sa unang Cristianong kongregasyon) nag-usisa sing maayo sang inspirado sang espiritu nga mga Kasulatan kag nagrepaso kon paano gintuytuyan sang balaan nga espiritu ang mga butang sang nagligad nga 13 ka tuig. Ang ila pamat-od? Para sa Gentil nga mga kombertido, ang sirkunsisyon indi una nga kinahanglanon para sa kaluwasan. (Binuhatan 15:​6-29) Yari diri ang maathag nga direktiba sa pagtal-us sa personal nga opinyon.

Ang mga kongregasyon nga nagtuman sini nga panuytoy “padayon nga naglig-on sa pagtuo kag nagdugang sa kadamuon adlaw-adlaw.” (Binuhatan 16:​4, 5) Apang, wala pagbatona sang iban nga mga tawo ang desisyon sang nagadumala nga hubon. Kombinsido sila gihapon nga ang ila opinyo husto kag nga ang pagsunod sa Mosaikong Kasuguan amo ang kinahanglanon para sa kaluwasan. Ano kuntani ang ginhimo mo? Nangin makatalagam kag nagabahinbahin nga impluensia sila sa tunga sang mga Cristiano. Tan-awa ang laygay nga ginhatag ni apostol Pablo sa masunod nga 15 ka tuig samtang gintinguhaan niya nga amligan ang matutom nga mga Cristiano gikan sa impluensia sang mga matig-a sa ila opinyon.

Galacia, Asia Minor, c. 50-52 C.⁠E. Ang kahilwayan nga natigayon sang mga Cristiano paagi sa halad ni Jesucristo nabutang sa katalagman. Ang kahadlok nga hingabuton sang Judiyong mga kaaway naghimo sa iban nga mga Cristiano nga ipilit ang mga kinutlo gikan sa Mosaikong Kasuguan sa mga masigka Cristiano. (Galacia 6:​12, 13) Ginpahanumdom ni apostol Pablo ang mga disipulo nga ang pagbaton sa Judiyong mga batasan subong sang sirkunsisyon mangin pagtugot sa ila kaugalingon nga ‘magpagota liwat sa kahiolipnan.’ Bangod kay sila mga makasasala, wala sing isa sa ila ang makatuman sing himpit sang Kasuguan, busa mahimo sila tagudilian sang Kasuguan, subong sang mga Judiyo. Ang halad ni Jesus lamang ang makahimo sa ila nga matinlo kag makaluwas sa ila. “Kon magpasirkunsidar kamo [kag busa mangin obligado sa pagtuman sa bug-os nga Kasuguan],” siling ni Pablo, “si Cristo mangin walay pulos sa inyo.”​—⁠Galacia 5:​1-4; Binuhatan 15:​8-11.

Corinto, Gresya, c. 55 C.⁠E. Ang mga pagbais nahanungod sa sirkunsisyon nagbahinbahin sa kongregasyon. Nahibal-an ni Pablo nga ang sirkunsisyon mismo indi sala. Bahin ini sang himpit nga Kasuguan sang Dios. (Salmo 19:​7; Roma 7:12) Ginhimos ni Pablo mismo nga ang iya lamharon nga kaupod nga si Timoteo (nga ang iloy isa ka Judiyo) masirkunsidar. Ginhimo ina ni Pablo, indi bangod obligado ini, kundi bangod indi niya luyag nga hatagan ang mga Judiyo sing bisan anong kabangdanan nga masandad bangod sang maayong balita. (Binuhatan 16:3) Ginpalig-on niya ang mga Cristiano nga mag-untat na sa makatulublag nga pagpakigbais. “May tawo bala nga nasirkunsidar na sang sia gintawag?” pamangkot niya. “Dili sia mangin disirkunsidado. May tawo bala nga disirkunsidado sang sia tinawag? Dili sia magpasirkunsidar [nagahunahuna nga importante ini para sa kaluwasan].” Ang importante nga butang amo ang pagtuman sa maathag nga mga sugo sang Dios, lakip yadtong naghalin sa Cristianong kongregasyon.​—⁠1 Corinto 7:​18-20; Hebreo 13:⁠17.

Filipos, Gresya, c. 60-61 C.⁠E. Yadtong nagbatyag nga ang mga Cristiano nahigut gihapon sa Judiyong kasuguan padayon nga wala magsapak sa maathag nga ebidensia nga ginapakamaayo ni Jehova ang Cristianong kongregasyon, nga naglakip na karon sa madamong disirkunsidado nga mga matinuohon. Yadtong nagasakdag sang sirkunsisyon nagtuga sing espirituwal nga halit sa iban paagi sa pagpilit nga ipalapnag ang ila nagapabahinbahin nga personal nga mga opinyon. Busa, ang pamulong ni apostol Pablo mas makusog karon: “Mag-andam sa mga ido [ginkabig sing seremonyal nga dimatinlo sang mga Judiyo], mag-andam sa malaut nga mga manugpangabudlay, mag-andam sa manugkumpol.”​—⁠Filipos 3:⁠2.

Creta, c. 61-64 C.⁠E. Ginbilin ni apostol Pablo si Tito sa pagtatap sa buluhaton sang mga Cristiano sa Creta. Sing makawiwili, ang di-Judiyo nga si Tito wala mapilit nga magpasirkunsidar. (Galacia 2:3) Karon ginsugo ni Pablo si Tito nga pakig-angotan sing malig-on ang mga kaaway sang kamatuoran, nga sa sini nangin amo ining mga sumalakdag sang sirkunsisyon. Dapat sila paguwaon sa kongregasyon kon magpadayon sila sa pagpalapnag sang ila personal nga mga opinyon. Naghambal sia tuhoy sa “balingag nga mga tawo, palahambal sang walay pulos, kag madaya, labi na gid sila nga sa sirkunsisyon,” kag nagpadayon: “Sila pagpahipuson, sanglit ginatublag nila ang bug-os nga mga panimalay bangod sa pagtudlo sang indi dapat itudlo nila.”​—⁠Tito 1:​10, 11; 3:​10, 11; 1 Timoteo 1:​3, 7.

Daw ano kasubo nga mga resulta! Tuman sila ka bugalon sa ila personal nga mga opinyon sa bagay nga ginsikway nila ang panuytoy sang Cristianong kongregasyon, nagtublag sang pagtuo sang iban, kag naghalit sang ila maayong kaangtanan upod sa Dios.​—⁠Ipaanggid ang Numeros 16:​1-3, 12-14, 31-35.

Ano ang Himuon Mo?

Sarang bala naton malikawan ang amo man nga sayop karon? Huo, kon una ginapat-od naton nga ang aton personal nga opinyon wala nagasumpakil sa maathag nga panudlo sang Biblia. Nahanungod sa homoseksuwalidad, halimbawa, ang Biblia nagasiling: “Ang imoral sa sekso . . . ukon homoseksuwal nga mga makasasala . . . indi makapanubli sang ginharian sang Dios.” (1 Corinto 6:​9, 10, New International Version) Apang, kon ang Makasulatanhon nga panuytoy daw bukas para sa aton sa lainlain nga mga opinyon, dapat naton ipakita ang mapainubuson nga reaksion nga ginpakita sang unang mga Cristiano kag batunon ang mga desisyon kag mga direksion gikan sa kongregasyon sang Dios. Sang ulihi, bisan sa mga lugar diin ang isa ka butang indi husto ukon sayop sing Makasulatanhon kundi yara na sa personal nga desisyon, dapat naton tahuron sing mataas ang paghidait upod sa iban, busa bukas sa pagpaubos sing tayuyon.

Handa bala kamo sa pagpadayag sina nga espiritu? Kon amo, nagapakita kamo sing husto nga pagbatyag sing pagkatimbang, nagakilala nga ang paghidait kag paghiusa mas hamili sang sa inyo personal nga opinyon.