Ang Katawhan ni Jehova Ginalig-on sa Pagtuo

“Ang mga kongregasyon naglig-on sa pagtuo kag nagdugang sa kadamuon adlaw-adlaw.”​—⁠BINUHATAN 16:⁠5.

 1. Paano gingamit sang Dios si apostol Pablo?

GINGAMIT ni Jehova nga Dios si Sau­lo sang Tarso subong “galamiton nga pinili.” Sang nangin si apostol Pablo, ‘nag-antos [sia] sing madamong butang.’ Apang bangod sang iya hilikuton kag sang iban, ang organisasyon ni Jehova nakatigayon sing nahiusa kag makalilipay nga pag-uswag.​—⁠Binuhatan 9:​15, 16.

 2. Ngaa mapuslanon nga binagbinagon ang Binuhatan 13:​1⁠–​16:​5?

² Ang mga Gentil nga nangin mga Cristiano nagadamo, kag daku ang nahimo sang importante nga miting sang nagadumala nga hubon sa pagpauswag sang paghiusa sa tunga sang katawhan sang Dios kag sa paglig-on sa ila sa pagtuo. Mapuslanon gid nga binagbinagon ini kag ang iban pa nga hitabo nga narekord sa Binuhatan 13:​1⁠–​16:​5, kay ang mga Saksi ni Jehova nagaeksperiensia karon sing kaanggid nga pag-uswag kag espirituwal nga mga pagpakamaayo. (Isaias 60:22) (Sa pribado nga pagtuon sang mga artikulo nahanungod sa Mga Binuhatan sini nga guwa, ginapanugda namon nga basahon ninyo ang mga teksto gikan sa tolon-an nga ginasulat sa madukot nga letra.)

Mga Misyonero Nagapanghikot

 3. Ano nga buluhaton ang ginhimo sang “mga manalagna kag mga manunudlo” sa Antioquia?

³ Ang mga lalaki nga ginpadala sang kongregasyon sa Antioquia, Siria, nagbulig sa mga tumuluo nga mangin malig-on sa pagtuo. (Binuhatan 13:​1-5) Sa Antioquia didto ang “mga manalagna kag mga manunudlo” nga sanday Bernabe, Simeon (Niger), Lucio nga taga-Cirene, Manaen, kag Saulo sang Tarso. Ginpaathag sang mga manalagna ang Pulong sang Dios kag ang gintagna nga mga hitabo, samtang ang mga manunudlo nagpanudlo sa Kasulatan kag sa diosnon nga pagkabuhi. (1 Corinto 13:​8; 14:4) Nakabaton sing pinasahi nga asaynment sanday Bernabe kag Saulo. Upod si Marcos nga pakaisa ni Bernabe, nagkadto sila sa Cipre. (Colosas 4:10) Nagbantala sila sa mga sinagoga sa nasidlangan nga pantalan sang Salamis, apang wala sing rekord nga ang mga Judiyo nagpamati. Bangod maarang-arang sila sa materyal, ano ang kinahanglan nila para sa Mesias?

 4. Ano ang natabo samtang ang mga misyonero nagpadayon sa pagbantala sa Cipre?

⁴ Ginpakamaayo sang Dios ang iban pa nga hilikuton sa pagpanaksi sa Cipre. (Binuhatan 13:​6-12) Sa Pafo, nakita sang mga misyonero ang Judiyo nga manugbabaylan kag dimatuod nga manalagna nga si Bar-Jesus (Elimas). Sang gintinguhaan niya nga punggan si Proconsul Sergio Paulo gikan sa pagpamati sa pulong sang Dios, si Saulo napuno sang balaan nga espiritu kag nagsiling: ‘Ikaw nga puno sang tanan nga limbong kag kalag-it, anak sang Yawa, kaaway sang tanan nga pagkamatarong, indi ka bala mag-untat sa pagpatiko sang matadlong nga mga banas ni Jehova?’ Sa sina, ang kamot ni Jehova nagbulag kay Elimas sa pila ka tion, kag si Sergio Paulo “nagtuo, kay naorongan sia sang pagtulun-an ni Jehova.”

 5, 6. (a) Sang nagpamulongpulong si Pablo sa sinagoga sa Antioquia sa Pisidia, ano ang ginsiling niya nahanungod kay Jesus? (b) Ano ang epekto sang pamulongpulong ni Pablo?

⁵ Halin sa Cipre, naglayag sila pakadto sa siudad sang Perga sa Asia Minor. Nian si Pablo kag si Bernabe nagpaaminhan nga naglatas sa kabukiran, ayhan ‘sa katalagman sa mga suba kag sa mga buyong,’ sa Antioquia, Pisidia. (2 Corinto 11:​25, 26) Didto nagpamulong si Pablo sa sinagoga. (Binuhatan 13:​13-41) Ginrepaso niya ang pagpakig-angot sang Dios sa Israel kag ginkilala si Jesus nga kaliwat ni David subong ang Manluluwas. Bisan pa ginpangayo sang Judiyong gumalahom ang kamatayon ni Jesus, ang saad sa ila mga ginikanan natuman sang ginbanhaw sia sang Dios. (Salmo 2:​7; 16:​10; Isaias 55:3) Ginpaandaman ni Pablo ang mga nagapamati sa iya nga indi pag-uligyaton ang dulot sang Dios nga kaluwasan paagi kay Cristo.​—⁠Habacuc 1:​5, Septuagint.

⁶ Ang pamulongpulong ni Pablo nagpukaw sing interes, kag amo man ang mga pamulongpulong nga ginahatag sang mga Saksi ni Jehova karon. (Binuhatan 13:​42-52) Sang masunod nga Inugpahuway halos ang bilog nga siudad nagtipon sa pagpamati sa pulong ni Jehova, kag bangod sini nahisa ang mga Judiyo. Ti, sa sulod lamang sang isa ka semana, ang mga misyonero nakakombertir sing mas madamo nga Gentil sang sa nakombertir sang mga Judiyo sa bug-os nila nga kabuhi! Bangod mapasipalahon nga ginsumpong sang mga Judiyo si Pablo, tion na para mag-iwag ang espirituwal nga kapawa, kag ginsilingan sila: ‘Sanglit ginsikway ninyo ang pulong sang Dios kag ginhukman ang inyo kaugalingon nga ditakus sang kabuhi nga walay katapusan, nagaliso kami sa mga pungsod.’​—⁠Isaias 49:⁠6.

 7. Ano ang reaksion nanday Pablo kag Bernabe sa paghingabot?

⁷ Karon ang mga Gentil nagsugod sa pagkasadya, kag ang tanan nga gintangdoan sa kabuhi nga walay katapusan nangin mga tumuluo. Apang, sang ang pulong ni Jehova naglapnag sa pungsod, ginsugyot sang mga Judiyo ang kilala nga mga babayi (ayhan sa pag-ipit sa ila mga bana ukon sa iban pa) kag ang mga punoan nga hingabuton si Pablo kag si Bernabe kag subulon sila pagguwa sa ila ginsakpan. Apang wala ina nagpauntat sa mga misyonero. Ila lamang “gintaktak ang yab-ok sa ila mga till” kag nagkadto sa Iconio (modernong Konya), ang daku nga siudad sa probinsia sang Galacia sa Roma. (Lucas 9:​5; 10:11) Ti, kamusta ang mga disipulo nga nabilin sa Antioquia sa Pisidia? Bangod ginlig-on sa pagtuo, “padayon [sila] nga napun-an sang kalipay kag balaan nga espiritu.” Nagabulig ini sa aton sa paghangop nga ang pagpamatok indi kinahanglan nga magpugong sa espirituwal nga pag-uswag.

Malig-on sa Pagtuo Walay Sapayan sang Paghingabot

 8. Ano ang natabo subong resulta sang madinalag-on nga pagbantala sa Iconio?

⁸ Sanday Pablo kag Bernabe mismo napamatud-an nga malig-on sa pagtuo walay sapayan sang paghingabot. (Binuhatan 14:​1-7) Bilang sabat sa pagpanaksi nila sa sinagoga sa Iconio, madamong mga Judiyo kag mga Griego ang nangin mga tumuluo. Sang ginsugyot sang ditumuluo nga mga Judiyo ang mga Gentil batok sa bag-ong mga tumuluo, ang duha masidla nga nagpamulong paagi sa awtoridad sang Dios, kag ginpakita niya ang iya kahamuot paagi sa paghatag sa ila sing gahom nga makahimo sing mga tanda. Nagbahinbahin ini sa kadam-an, ang iban nag-ugyon sa mga Judiyo kag ang iban sa mga apostoles (mga pinadala). Indi talawan ang mga apostoles, apang sang nasat-uman nila nga batuhon sila, maalamon nga nagpalagyo sila agod magbantala sa Lacaonia, isa ka rehiyon sang Asia Minor sa nabagatnan nga Galacia. Paagi sa pagkamainandamon, masunson man kita nga makapabilin nga aktibo sa ministeryo walay sapayan sang pagpamatok.​—⁠Mateo 10:⁠23.

 9, 10. (a) Ano ang reaksion sang mga pumuluyo sa Listra sa pag-ayo sang tawo nga piang? (b) Ano ang reaksion nanday Pablo kag Bernabe sa Listra?

⁹ Ang siudad sang Listra sa Lacaonia amo ang masunod nga ginpanaksihan. (Binuhatan 14:​8-18) Gin-ayo didto ni Pablo ang isa ka tawo nga lupog kutob sa pagkabun-ag. Wala nakahibalo nga si Jehova amo ang responsable para sa milagro, ang kadam-an nagsinggit: “Ang mga dios nagkunsad sa aton sa kaanggid sang mga tawo!” Bangod ginpamulong ini sa Licaoniahanon nga hambal, wala nahangpan ni Bernabe kag ni Pablo ang nagakatabo. Bangod kay si Pablo ang nanguna sa pagpamulong, ginkabig sia sang mga tawo subong si Hermes (ang talunsay nga mensahero sang mga dios) kag nagdumdom nga si Bernabe amo si Zeus, ang pangulo nga Griegong dios.

¹⁰ Ang saserdote ni Zeus nagdala pa gani sing mga baka nga lalaki kag mga purungpurung kag buot kuntani maghalad kanday Pablo kag Bernabe. Ayhan nagapamulong sa nahangpan sing kinaandan nga Griego ukon nga nagagamit sing manugbadbad, ginpaathag sang mga bisita nga sila mga tawo man nga may mga kaluyahon kag nga sila nagawali sang maayong balita agod ang mga tawo magliso gikan sa “sining walay pulos nga mga butang” (walay kabuhi nga mga dios, ukon mga idolo) pakadto sa Dios nga buhi. (1 Hari 16:​13; Salmo 115:​3-9; 146:6) Huo, gintugutan anay sang Dios ang mga pungsod (apang indi ang mga Hebreo) nga maglakat sa ila kaugalingon nga mga dalanon, bisan pa nga wala sia magpabaya sa iya kaugalingon nga walay saksi kag naghimo sing maayo ‘sa paghatag sa ila sing ulan kag mga panag-on nga mapatubason, nga nagapuno sang ila mga tagipusuon sing pagkaon kag kaasdya.’ (Salmo 147:8) Walay sapayan sina nga pangatarungan, halos wala napunggan nanday Bernabe kag Pablo ang kadam-an sa pagdulot sing halad sa ila. Apang, wala pagbatuna sang mga misyonero ang mga pagsimba subong mga dios, kag wala nila paggamita ina nga awtoridad agod ipasad ang Cristianismo sa sina nga duog. Isa gid ka maayo nga halimbawa, labi na kon nagahandum kita sing daku nga pagdayaw tungod sang ginatugot ni Jehova sa aton nga himuon sa pag-alagad sa iya!

11. Ano ang maton-an naton gikan sa pinamulong: “Paagi sa madamong kapipit-an kita magsulod sa ginharian sang Dios”?

¹¹ Sing hinali, nag-ulhot ang malaw-ay nga ulo sang paghingabot. (Binuhatan 14:​19-28) Paano? Nahaylo sang mga Judiyo halin sa Antioquia sa Pisidia kag Iconio, ginbato sang katawhan si Pablo kag ginguyud sia sa guwa sang siudad, nga nagahunahuna sila nga patay sia. (2 Corinto 11:​24, 25) Apang sang nagtipon sa palibot niya ang mga disipulo, nagtindog sia kag nagsulod sa Listra nga wala mamulalungi, ayhan sa kagab-ihon. Sa madason nga adlaw, naglakat sia kaupod ni Bernabe sa Derbe, diin may pila nga nangin mga disipulo. Sang nagbalik sila sa Listra, Iconio, kag Antioquia, ginpabakud sang mga misyonero ang mga disipulo, nagalaygay sa ila nga magpabilin sa pagtuo, kag nagsiling: “Paagi sa madamong kapipit-an kita magsulod sa ginharian sang Dios.” Subong mga Cristiano, nagapaabot man kita nga makatigayon sing mga kapipit-an kag indi dapat magtinguha sa paglikaw sa sini paagi sa pagkompromiso sang aton pagtuo. (2 Timoteo 3:12) Sadto anay, ang mga gulang gintangdo sa mga kongregasyon nga sa ila ginsulat ni Pablo ang sulat sa mga Galacia.

12. Sang natapos ang unang misyonero nga paglakbay ni Pablo, ano ang ginhimo sang duha ka misyonero?

¹² Naglatas sa Pisidia, ginpamulong ni Pablo kag ni Bernabe ang pulong sa Perga, ang kilala nga siudad sa Panfilia. Sang ulihi, nagbalik sila sa Antioquia, Siria. Bangod natapos na ang nahauna nga paglakbay ni Pablo, ginsugid sang mga misyonero sa mga kongregasyon “ang tanan nga nahimo sang Dios upod sa ila, kag kon paano ang pagbukas niya sang ganhaan sang pagtuo sa mga pungsod.” Nagpabilin sila sing diutay nga tion kaupod sang mga disipulo sa Antioquia, kag walay duhaduha nga nagpalig-on gid ini sa ila sa pagtuo. Ang pagduaw sang nagalakbay nga mga manugtatap karon may amo man nga epekto sa espirituwal.

Ang Isa ka Importante nga Pamangkot Nalubad

13. Ano ang kinahanglan agod ang Cristianismo indi mabahinbahin sa Hebreo kag indi Judiyo nga grupo?

¹³ Ang kalig-on sa pagtuo nagakinahanglan sing paghiusa sa hunahuna. (1 Corinto 1:10) Kon ang Cristianismo indi bahinon sa grupo sang mga Hebreo kag indi Judiyo, ang nagadumala nga hubon dapat mamat-od kon bala ang mga Gentil nga nagasulod sa organisasyon sang Dios dapat magtuman sang Mosaikong Kasuguan kag magpasirkunsidar. (Binuhatan 15:​1-5) Ang iban nga mga lalaki halin sa Judea naglakbay na pakadto sa Antioquia, Siria kag nagsugod sa pagtudlo sa Gentil nga mga tumuluno didto nga kon indi sila magpasirkunsidar, indi sila maluwas. (Exodo 12:48) Busa, ginpadala si Pablo, si Bernabe, kag ang iban pa sa mga apostoles kag sa mga gulang sa Jerusalem. Bisan didto, ang mga tumuluo nga sadto anay may panghunahuna sang Fariseo nag-insister nga ang mga Gentil magpasirkunsidar kag magtuman sang Kasuguan.

14. (a) Bisan pa may natabo nga pagbaisay sa komperensia sa Jerusalem, anong maayo nga halimbawa ang ginpahamtang? (b) Ano ang kahulugan sang pangatarungan ni Pedro sa sina nga okasyon?

¹⁴ Ginhiwat ang isa ka komperensia agod mapat-od ang kabubut-on sang Dios. (Binuhatan 15:​6-11) Kag, natabo ang pinuyasay, apang wala sing kaawayon samtang ang mga lalaki nga may makusog nga kombiksion nagpautwas sang ila kaugalingon​—⁠isa ka maayo nga halimbawa para sa mga gulang karon! Sang ulihi si Pedro nagsiling: ‘Ang Dios nagpili nga paagi sa akon baba ang mga Gentil [kaangay ni Cornelio] magpamati sang maayong balita kag magtuo. Nagsaksi sia sa ila paagi sa paghatag sa ila sang balaan nga espiritu kag wala sia sing ginpasulabi sa aton kag sa ila. [Binuhatan 10:​44-47] Busa ngaa bala ginatilawan ninyo ang Dios sa bagay nga ginagotahan [ang obligasyon nga tumanon ang Kasuguan] ninyo ang ila liog nga bisan kita ukon ang aton mga ginikanan wala makasarang sa pagdala? Nagatuo kita [mga Judiyo suno sa unod] nga maluwas kita paagi sa dibagay nga kaluoy ni Ginuong Jesus kaangay sa ila.’ Ginapakita sang pagbaton sang Dios sa disirkunsidado nga mga Gentil nga ang sirkunsisyon kag ang pagtuman sa Kasuguan wala ginakinahanglan para sa kaluwasan.​—⁠Galacia 5:⁠1.

15. Anong sadsaran nga mga punto ang ginhimo ni Santiago, kag ano ang ginpanugda niya nga nagasulat sa Gentil nga mga Cristiano?

¹⁵ Naghipus ang kongregasyon sang naghinakop si Pedro, apang madamo pa ang dapat isiling. (Binuhatan 15:​12-21) Sanday Bernabe kag Pablo naghambal nahanungod sa mga tanda nga ginhimo sang Dios paagi sa ila sa tunga sang mga Gentil. Nian ang tsirman, si Santiago nga utod sa iloy ni Jesus, nagsiling: ‘Si Simeon [Hebreo nga ngalan ni Pedro] nagsugod kon paano nga ang Dios nagliso sang iya igtalupangod sa mga pungsod sa pagkuha sa ila sing katawhan sa iya ngalan.’ Ginpakita ni Santiago nga ang gintagna nga pagtukod liwat sa “kayangkayang ni David” (pagtukod liwat sa pagkahari sa linya ni David) natuman sang gintipon ang mga disipulo (mga manunubli sang Ginharian) ni Jesus gikan sa mga Judiyo kag mga Gentil. (Amos 9:​11, 12, Septuagint; Roma 8:17) Bangod gintuyo ini sang Dios, dapat ini batunon sang mga disipulo. Si Santiago naglaygay nga nagasulat sa Gentil nga mga Cristiano nga maglihi sa (1) mga butang nga nadagtaan sang mga diosdios, (2) pakighilawas, kag (3) dugo kag mga nakuga. Ini nga mga pagdumili makita sa mga sinulatan ni Moi­ses nga ginbasa sa mga sinagoga kada adlaw sang Inugpahuway.​—⁠Genesis 9:​3, 4; 12:​15-17; 35:​2, 4.

16. Sa anong tatlo ka punto ang sulat sadtong nahaunang siglo nga nagadumala nga hubon nagahatag sing panuytoy tubtob karon?

¹⁶ Ang nagadumala nga hubon nagpadala karon sing sulat sa Gentil nga mga Cristiano sa Antioquia, Siria, kag Silicia. (Binuhatan 15:​22-35) Ginpangabay sang balaan nga espiritu kag sang mga manunulat sang sulat ang paglihi gikan sa mga butang nga ginhalad sa mga diosdios; dugo (regular nga ginakaon sang iban nga mga tawo); mga butang nga nakuga nga wala ginpatulo ang ila dugo (ginatamod sang madamong mga pagano ina nga karne subong espesyal nga pagkaon); kag pakighilawas (Griego, por·neiʹa, nagapatuhoy sa relasyon sa sekso sa guwa sang Makasulatanhon nga pag-asawahay). Paagi sa paglihi, magauswag sila sa espirituwal, kaangay sang mga Saksi ni Jehova karon bangod ginatuman nila “ining kinahanglanon nga mga butang.” Ang pinamulong nga “Maayong panglawas sa inyo!” katumbas sa pagsiling “Paalam,” kag indi dapat ihinakop nga ini may kaangtanan una sa kapagros. Sang ginbasa ang sulat sa Antioquia, ang kongregasyon nagkalipay sa ginhatag sini nga pagpalig-on. Sadto nga tion, ang katawhan sang Dios sa Antioquia ginlig-on man sa pagtuo paagi sa makapalig-on nga mga pulong nanday Pablo, Silas, Bernabe, kag iban pa. Kabay nga pangitaon man naton ang mga paagi nga mapalig-on kag mapabakud ang mga masigka tumuluo.

Nagsugod ang Ikaduhang Misyonero nga Paglakbay

17. (a) Ano nga problema ang nag-utwas sang ginbuko ang ikaduhang misyonero nga paglakbay? (b) Paano ginlubad nanday Pablo kag Bernabe ang ila pagbanggi­anay?

¹⁷ Nag-utwas ang isa ka problema sang ang ikaduhang misyonero nga paglakbay ginbuko. (Binuhatan 15:​36-41) Ginpanugda ni Pablo nga duawon nila liwat ni Bernabe ang mga kongregasyon sa Cipre kag Asia Minor. Sugot si Bernabe apang luyag niya paupdon ang iya pakaisa nga si Marcos. Wala nagpasugot si Pablo bangod ginbayaan anay sila ni Marcos sa Panfilia. Bangod sina, natabo ang “isa ka matigdas nga pagbanggianay.” Apang sanday Pablo kag Bernabe wala nagtinguha nga pakamatarunganon ang ila kaugalingon paagi sa pag-ulamid sa iban nga mga gulang ukon sa nagadumala nga hubon sa ila pribado nga problema. Isa gid ka maayo nga halimbawa!

18. Ano ang resulta sang pagbulagay nanday Pablo kag Bernabe, kag paano kita makabenepisyo gikan sini nga hitabo?

¹⁸ Apang, ini nga pagbanggianay nagtuga sing pagbulagay. Gin-upod ni Bernabe si Marcos sa Cipre. Si Pablo, kag si Silas nga kaupod niya, ‘naglatas sa Siria kag Cilicia, nga nagapalig-on sang mga kongregasyon.’ Mahimo nga naimpluensiahan si Bernabe sang pagkaparyentahanay, apang ginkilala niya kuntani ang pagkaapostol kag pagpili kay Pablo subong “pinili nga suludlan.” (Binuhatan 9:15) Kag kamusta kita? Ini nga hitabo dapat magpatudok sa aton sang pagkakinahanglanon sang pagkilala sa teokratikong awtoridad kag sa pagkooperar sing bug-os sa “matutom kag mainandamon nga ulipon”!​—⁠Mateo 24:​45-47.

Pag-uswag sa Paghidait

19. Anong halimbawa ang matigayon sang karon nga Cristianong mga pamatan-on kay Timoteo?

¹⁹ Ini nga pagbanggianay wala gintugutan nga makaapektar sa paghidait sang kongregasyon. Ang katawhan sang Dios padayon nga ginlig-on sa pagtuo. (Binuhatan 16:​1-5) Sanday Pablo kag Silas nagkadto sa Derbe kag sa Listra. Didto nagapuyo si Timoteo, nga anak sang isa ka Judiyong tumuluo nga si Eunice kag sang iya ditumuluo nga Griegong bana. Si Timoteo lamharon pa, kay bisan sang 18 ukon 20 ka tuig sang ulihi, ginsilingan sia: “Dili pagpatamaya ang bisan sin-o sang imo pagkapamatan-on.” (1 Timoteo 4:12) Bangod kay sia “ginsugid nga maayo sang mga kauturan sa Listra kag [mga 29 kilometros] sa Iconio,” kilala sia tungod sang iya maayong ministeryo kag diosnon nga mga kinaiya. Ang Cristianong mga pamatan-on karon dapat mangayo sing bulig ni Jehova nga pabakuron ang kaanggid nga reputasyon. Ginpasirkunsidar ni Pablo si Timoteo bangod manugkadto sila sa mga puluy-an kag mga sinagoga sang mga Judiyo nga nakahibalo nga ang amay ni Timoteo isa ka Griego, kag luyag sang apostol nga wala sing makaupang sa ila pagpakig-angot sa Judiyong mga lalaki kag mga babayi nga nagakinahanglan nga makatuon nahanungod sa Mesias. Wala nagalapas sa mga prinsipio sang Biblia, luyag man sang mga Saksi ni Jehova himuon ang tanan nga masarangan nila agod ang maayong balita batunon sang tanan nga sari sang mga tawo.​—⁠1 Corinto 9:​19-23.

20. Ano ang epekto sang pagtuman sa sulat sang nahaunang siglo nga nagadumala nga hubon, kag paano sa banta mo ini dapat mag-apektar sa aton?

²⁰ Upod kay Timoteo subong attendant, sanday Pablo kag Silas nagpamulongpulong sa mga disipulo agod tumanon ang mga kasuguan sang nagadumala nga hubon. Kag ano ang resulta? Ayhan nagapatuhoy sa Siria, Cilicia, kag Galacia, si Lucas nagsulat: “Ang mga kongregasyon naglig-on sa pagtuo kag nagdugang sa kadamuon adlaw-adlaw.” Huo, ang pagsunod sa sulat sang nagadumala nga hubon nagresulta sa paghiusa kag espirituwal nga kabuganaan. Daw ano kaayo nga halimbawa para sa aton ital-ital nga tion, nga ang katawhan ni Jehova kinahanglan nga magpabilin nga nahiusa kag malig-on sa pagtuo!

Paano Ka Magasabat?

◻ Ano ang reaksion nanday Pablo kag Bernabe sa paghingabot?

◻ Ano ang maton-an gikan sa pinamulong: “Paagi sa madamong kapipit-an kita magsulod sa ginharian sang Dios”?

◻ Anong laygay ang matigayon naton gikan sa apat ka punto sa sulat nga ginpadala sang nahaunang siglo nga nagadumala nga hubon?

◻ Paano nga ang mga butang nga naglig-on sa pagtuo sang nahaunang siglo nga mga saksi ni Jehova naaplikar sa aton karon?