“Mangin Saksi Ko Kamo”

1-3. Paano nagbiya si Jesus sa iya mga apostoles, kag ano nga mga pamangkot ang dapat sabton?

INDI nila gusto nga matapos ini. Makalilipay gid para sa mga apostoles ang nagligad nga mga sinemana! Kay man, ang ila kasubo nabuslan sang kalipay sang ginbanhaw si Jesus. Sa sulod na sang 40 ka adlaw, pila ka beses nga nagpakita si Jesus, kag gintudluan kag ginpalig-on pa gid niya sila. Pero ini nga adlaw amo na ang iya katapusan nga pagpakita.

² Samtang nagatindog sila sa Bukid sang mga Olibo, namati sing maayo ang mga apostoles sa ginasiling ni Jesus. Daw kadasig nga natapos ang pagpakig-istorya ni Jesus sa ila, kag ginbayaw niya ang iya mga kamot kag ginpakamaayo sila. Dayon nagpaibabaw sia padulong sa langit samtang nagatan-aw ang iya mga sumulunod! Sang ulihi, ginlipdan sia sang panganod. Bisan wala na sia, padayon gihapon sila nga nagatan-aw sa langit.—Luc. 24:50; Binu. 1:9, 10.

³ Ginbag-o sini nga hitabo ang kabuhi sang mga apostoles ni Jesus. Ano na ang ila himuon kay nagkayab na si Jesucristo nga ila Agalon? Sigurado kita nga ginhanda sila sang ila Agalon para padayunon ang hilikuton nga iya ginsugdan. Paano niya sila ginhanda sa sining importante nga asaynment, kag ano ang ila reaksion? Ano ang epekto sini sa mga Cristiano subong? Mabasa sa una nga kapitulo sang Mga Binuhatan ang makapalig-on nga mga sabat.

4. Paano ginsugdan ni Lucas ang pagsulat sang libro sang Mga Binuhatan?

⁴ Ginsugdan ni Lucas ang iya sulat paagi sa pagsambit kay Teofilo, ang tawo nga ginsulatan man niya sang iya Ebanghelyo.a Para ipakita nga sugpon ini sang iya una nga sulat, ginsumaryo ni Lucas ang mga hitabo nga ginrekord sa katapusan sang iya Ebanghelyo, pero naggamit sia sing lain nga mga tinaga kag nagdugang sing bag-o nga impormasyon.

5, 6. (a) Ano ang makapabakod sang pagtuo sang mga sumulunod ni Jesus? (b) Ngaa ang pagtuo sang mga Cristiano subong nabase sa “indi mapanghiwala nga mga pamatuod”?

⁵ Ano ang makapabakod sang pagtuo sang mga sumulunod ni Jesus? Ang Binuhatan 1:3 may ginsiling parte kay Jesus: “Madamo nga beses nga nagpakita sia sa ila paagi sa indi mapanghiwala nga mga pamatuod nga buhi sia.” Sa Biblia, ang “hinigugma nga manugbulong” lang nga si Lucas ang naggamit sing tinaga nga “indi mapanghiwala nga mga pamatuod.” (Col. 4:14) Ini nga termino ginagamit sa mga sinulatan sa medisina, kag ginapakita sini nga masaligan ang pamatuod. Kag naghatag gid si Jesus sing pamatuod. Pila sia ka beses nga nagpakita sa iya mga sumulunod, kon kaisa sa isa ukon sa duha, kon kaisa sa tanan nga apostoles, kag may bes pa nga nagpakita sia sa sobra 500 ka kauturan. (1 Cor. 15:3-6) Indi gid mapanghiwala ini nga mga pamatuod!

⁶ Ang pagtuo sang matuod nga mga Cristiano subong nabase man sa “indi mapanghiwala nga mga pamatuod.” May pamatuod bala nga nagkabuhi si Jesus sa duta, napatay para sa aton mga sala, kag ginbanhaw? Huo! Ang Pulong sang Dios may masaligan nga rekord sang mga tawo nga nakakita mismo sini nga mga hitabo, kag indi gid ina mapanghiwala nga pamatuod. Ang pagtuon sa sini nga mga hitabo kag pagpangamuyo nga maintiendihan ang aton ginabasa, makapabakod sang aton pagtuo. Dumduma, ang matuod nga pagtuo nabase sa malig-on nga pamatuod kag indi pagpatipati lang dayon. Kinahanglanon gid ang matuod nga pagtuo para mabaton ang kabuhi nga wala sing katapusan.—Juan 3:16.

7. Ano nga halimbawa sa pagtudlo kag pagbantala ang ginpakita ni Jesus sa iya mga sumulunod?

⁷ Si Jesus ‘nagpaathag man tuhoy sa Ginharian sang Dios.’ Halimbawa, ginpaathag niya ang mga tagna nga nagapakita nga dapat mag-antos kag mapatay ang Mesias. (Luc. 24:13-32, 46, 47) Sang ginpaathag ni Jesus ang iya papel bilang Mesias, ginhambal niya ang parte sa Ginharian sang Dios, kay sia ang palaabuton nga Hari. Ang Ginharian amo pirme ang tema sang pagbantala ni Jesus, kag amo man ini ang tema sang pagbantala sang iya mga sumulunod subong.—Mat. 24:14; Luc. 4:43.

8, 9. (a) Ano ang duha ka sala nga pagpati sang mga apostoles ni Jesus? (b) Paano gintadlong ni Jesus ang pagpati sang mga apostoles, kag ano nga leksion ang ginatudlo sini sa mga Cristiano subong?

⁸ Sang nagtipon ang mga apostoles sa Bukid sang mga Olibo, amo na ato ang ila katapusan nga pagpakigkita kay Jesus sa duta. Namangkot sila sa iya: “Ginuo, ipasag-uli mo bala ang ginharian sa Israel sa sini nga tion?” (Binu. 1:6) Sa sini nga pamangkot, maathag nga ang mga apostoles may duha ka sala nga pagpati. Una, ginhaumhaum nila nga ipasag-uli ang Ginharian sang Dios sa pungsod sang Israel. Ikaduha, ginpaabot nila nga ang ginpromisa nga Ginharian magagahom na “sa sini nga tion.” Paano gintadlong ni Jesus ang ila sala nga pagpati?

⁹ Mahimo nahibaluan ni Jesus nga madali na lang matadlong ang ila una nga sala nga pagpati. Ang matuod, napulo na lang ka adlaw kag masaksihan na sang iya mga sumulunod ang pagtukod sang isa ka bag-o nga pungsod, ang Israel sang Dios! Manugtapos na ang pagpakig-angot sang Dios sa Israel. Parte naman sa ila ikaduha nga pagpati, mainayuhon nga ginpahanumdom sila ni Jesus: “Ang Amay lamang sa langit ang may awtoridad sa pagtalana sang tion kon san-o mahanabo ang mga butang, kag indi kinahanglan nga mahibaluan ninyo ina nga mga tion.” (Binu. 1:7) Si Jehova amo ang nagatalana sang tion. Antes mapatay si Jesus, sia mismo ang nagsiling nga bisan ang Anak wala makahibalo sang “adlaw kag oras” kon san-o maabot ang katapusan, kundi “ang Amay lamang.” (Mat. 24:36) Kon nagakabalaka gid ang mga Cristiano subong kon san-o ang katapusan sang sistema sang mga butang, nagapalibog lang sila sa mga butang nga wala sila sing labot.

10. Ano nga panimuot sang mga apostoles ang dapat man naton ipakita, kag ngaa?

¹⁰ Pero indi naton dapat paghukman ang mga apostoles ni Jesus, kay mga tawo sila nga may mabakod nga pagtuo. Mapainubuson nga ginbaton nila ang pagtadlong. Dugang pa, bisan sala ang ila pagpati, nagpakita man sila sing maayo nga panimuot. Sulitsulit nga ginpalig-on ni Jesus ang iya mga sumulunod: “Padayon kamo nga magbantay.” (Mat. 24:42; 25:13; 26:41) Alisto gid sila kag nagabantay sing maayo kon san-o manghikot si Jehova. Amo man sini nga panimuot ang dapat naton ipakita subong. Ang matuod, dapat pa gid naton ini ipakita kay nagakabuhi na kita sa “katapusan nga mga adlaw.”—2 Tim. 3:1-5.

11, 12. (a) Ano ang sugo ni Jesus sa iya mga sumulunod? (b) Ngaa ginsambit ni Jesus ang balaan nga espiritu sang nagsugo sia nga magbantala?

¹¹ Ginpahanumdom ni Jesus ang iya mga apostoles kon ano gid ang dapat nila unahon. Sia nagsiling: “Magabaton kamo sing gahom kon ang balaan nga espiritu mag-abot sa inyo, kag mangin saksi ko kamo sa Jerusalem, sa bug-os nga Judea kag Samaria, kag tubtob sa pinakamalayo nga bahin sang duta.” (Binu. 1:8) Dapat nila nga ibantala ang pagkabanhaw ni Jesus una sa Jerusalem, sa lugar sang mga tawo nga nagpatay sa iya. Halin didto palapnagon nila ang mensahe pakadto sa Judea, dason sa Samaria, kag sa iban pa nga lugar.

¹² Antes ginsugo ni Jesus ang iya mga disipulo nga magbantala, ginpahanumdom niya sila sang iya promisa nga ipadala niya ang balaan nga espiritu para buligan sila. Ini nga teksto isa sa sobra 40 ka beses diin mabasa ang ekspresyon nga “balaan nga espiritu” sa Mga Binuhatan. Sulitsulit nga ginapakita sing maathag sini nga libro sang Biblia nga indi naton matuman ang kabubut-on ni Jehova kon wala ang bulig sang balaan nga espiritu. Gani, importante gid nga pangayuon naton pirme sa pangamuyo ini nga espiritu! (Luc. 11:13) Kinahanglan gid naton ini subong.

13. Daw ano kalapad ang dapat bantalaan sang katawhan sang Dios subong, kag ngaa dapat mangin masako kita sa paghimo sini?

¹³ Nagbag-o na ang kahulugan sang mga tinaga nga “tubtob sa pinakamalayo nga bahin sang duta” kay subong nagabantala na kita sa bilog nga kalibutan. Pero natun-an naton sa nagligad nga kapitulo nga tinagipusuon nga ginbaton sang mga Saksi ni Jehova ang asaynment nga magbantala, kay nahibaluan nila nga gusto sang Dios nga ang tanan nga sahi sang tawo makabati sang maayong balita sang iya Ginharian. (1 Tim. 2:3, 4) Masako ka bala sa sining hilikuton nga nagaluwas sang kabuhi? Wala na sing mas makalilipay pa sangsa sini nga hilikuton! Hatagan ka ni Jehova sing kusog para mahimo ini. Madamo ka sing matun-an sa libro sang Mga Binuhatan parte sa insakto nga mga pamaagi kag panimuot nga dapat mo ipakita para mangin epektibo nga manugbantala.

14, 15. (a) Ano ang ginsiling sang mga anghel parte sa pagbalik sang Cristo, kag ano ang ila buot silingon? (Tan-awa man ang footnote.) (b) Paano ang pagbalik sang Cristo sa “amo man sini nga paagi” pareho sa iya pagbiya?

¹⁴ Ginsambit sa umpisa sini nga kapitulo nga nagkayab si Jesus kag ginlipdan sang panganod. Pero ang 11 ka apostoles padayon gihapon nga nagatangla sa langit. Sang ulihi, nagpakita ang duha ka anghel kag malulo nga nagsabdong sa ila: “Mga tawo sang Galilea, ngaa nagatindog kamo kag nagatangla sa langit? Ining Jesus nga nakita ninyo nga ginbaton sa langit magaabot sa inyo sa amo man sini nga paagi.” (Binu. 1:11) Buot bala silingon sang mga anghel nga magabalik si Jesus sa amo gihapon nga lawas, pareho sang ginatudlo sang iban nga relihion? Indi. Paano naton nahibaluan?

¹⁵ Ang mga anghel nagsiling nga magabalik si Jesus, indi sa amo nga lawas, kundi sa “amo man sini nga paagi.”b Sa ano nga paagi sia nagbiya? Indi na sia kitaon sang naghambal ang mga anghel. Ang mga apostoles lang ang nakaintiende nga nagbiya si Jesus sa duta kag nagkadto sa iya Amay sa langit. Mangin pareho sa sini ang paagi sang pagbalik sang Cristo. Kag amo gid sina ang natabo. Subong, ang mga nakaintiende lang sang Kasulatan ang nakarealisar nga nagagahom na si Jesus. (Luc. 17:20) Dapat naton hangpon ang ebidensia sang iya presensia kag isugid ini sa iban para mahangpan man nila nga dapat gid sila mag-alagad sa Dios subong.

16-18. (a) Sa Binuhatan 1:13, 14, ano ang matun-an naton sa pagtinipon sang mga Cristiano para magsimba? (b) Ano ang matun-an naton sa halimbawa sang iloy ni Jesus nga si Maria? (c) Ngaa importante subong ang Cristianong mga miting?

¹⁶ Indi katingalahan nga ang mga apostoles “nagbalik sa Jerusalem nga may daku nga kalipay.” (Luc. 24:52) Pero paano sila nagsunod sa paggiya kag instruksion sang Cristo? Sa bersikulo 13 kag 14 sang Binuhatan kapitulo 1, nahibaluan naton nga nagtipon sila sa “kuarto sa ibabaw,” kag may matun-an kita nga pila ka talalupangdon nga mga detalye sa sini nga pagtinipon. Ang mga balay sadto sa Palestina masami nga may kuarto sa ibabaw, kag ang hagdanan pakadto sa sini nga kuarto ara sa gua. Posible ayhan nga ining “kuarto sa ibabaw” ara sa ibabaw sang balay nga ginsambit sa Binuhatan 12:12, nga iya sang iloy ni Marcos? Bisan diin man ini, mahimo nga simple lang ini nga kuarto para tipunan sang mga sumulunod sang Cristo. Pero sin-o ang nagtilipon, kag ano ang ila ginhimo?

¹⁷ Talupangda nga indi lang mga apostoles ukon mga lalaki ang nagtipon. May “pila ka babayi” didto, lakip ang iloy ni Jesus nga si Maria. Amo ini ang katapusan nga pagsambit kay Maria sa Biblia. Makapalig-on gid nga ara sia sa sining pagtinipon para magsimba upod sa iya espirituwal nga mga kauturan, indi para hatagan sing espesyal nga atension. Mahimo nalipay sia nga ang iya apat ka anak nga lalaki nga wala sadto magtuo sang buhi pa si Jesus, kaupod na niya subong. (Mat. 13:55; Juan 7:5) Nagbag-o lang sila sang mapatay kag mabanhaw ang ila utod sa iloy.—1 Cor. 15:7.

¹⁸ Talupangda man kon ngaa nagtipon ining mga disipulo: “Nahiusa sila tanan nga nagpadayon sa pagpangamuyo.” (Binu. 1:14) Ang pagtipon sing tingob importante sa pagsimba sang mga Cristiano. Nagatipon kita para magpalig-unay, para magbaton sing instruksion kag laygay, kag ang pinakaimportante, para magsimba sa aton Amay sa langit nga si Jehova. Ang aton mga pangamuyo kag mga ambahanon sang pagdayaw sa mga miting nagapalipay sa iya kag importante man para sa aton. Kabay nga indi naton pagpabay-an ining sagrado kag makapalig-on nga mga pagtinipon!—Heb. 10:24, 25.

19-21. (a) Ano ang matun-an naton sa papel ni Pedro sa kongregasyon? (b) Ngaa dapat buslan si Judas, kag ano ang matun-an naton sa pamaagi nga ginhimo?

¹⁹ Ang mga sumulunod sang Cristo may gin-atubang nga importante nga isyu, kag si apostol Pedro ang nanguna sa pagsolbar sini. (Bersikulo 15-26) Makapalig-on gid nga gingamit liwat ni Jehova si Pedro bisan pa nga ginpanghiwala niya sing tatlo ka beses si Jesus sang nagligad nga mga sinemana. (Mar. 14:72) Kita tanan makasasala kag kinahanglan kita pahanumdumon nga si Jehova “maayo kag handa sa pagpatawad” sa mga sinsero nga nagahinulsol.—Sal. 86:5.

²⁰ Narealisar ni Pedro nga dapat may ibulos kay Judas, ang apostol nga nagluib kay Jesus. Pero sin-o ang ibulos? Ang bag-o nga apostol dapat nagsunod na kay Jesus sa iya bug-os nga ministeryo kag nakasaksi sang iya pagkabanhaw. (Binu. 1:21, 22) Base ini sa promisa ni Jesus: “Kamo nga nagsunod sa akon magapungko man sa 12 ka trono agod hukman ang 12 ka tribo sang Israel.” (Mat. 19:28) Gintuyo ni Jehova nga ang 12 ka apostoles nga nagsunod kay Jesus sa iya ministeryo sa duta amo ang mangin ‘12 ka sadsaran nga bato’ sang Bag-o nga Jerusalem. (Bug. 21:2, 14) Gani ginbuligan sang Dios si Pedro nga mahangpan nga ang tagna nga “kuhaon sang iban ang iya katungdanan subong manugtatap” natuman kay Judas.—Sal. 109:8.

²¹ Paano ginhimo ang pagpili? Paagi sa pagabutgabot, nga ginahimo sadto sa panahon sang Biblia. (Hulu. 16:33) Pero, amo ini ang katapusan nga tion nga mabasa sa Biblia nga gingamit ang pagabutgabot sa sini nga paagi. Maathag nga wala na ini gingamit sang ginbubo ang balaan nga espiritu. Pero talupangda kon ngaa gingamit ang pagabutgabot. Ang mga apostoles nangamuyo: “Ikaw, O Jehova, nga nakahibalo sang tagipusuon sang tanan, ipakita kon sin-o sa sining duha ka lalaki ang imo ginpili.” (Binu. 1:23, 24) Gusto nila nga si Jehova ang mapili. Napilian si Matias, nga mahimo lakip sa 70 ka disipulo nga ginpadala ni Jesus para magbantala. Gani si Matias nangin isa sa “12 ka apostoles.”c—Binu. 6:2.

22, 23. Ngaa dapat kita magpasakop kag magtuman sa mga nagapanguna sa kongregasyon subong?

²² Ini nga hitabo nagapahanumdom sa aton nga importante nga organisado ang hilikuton sang katawhan sang Dios. Asta subong, ginapili ang responsable nga mga lalaki para mangin mga manugtatap sa kongregasyon. Ginabinagbinag sing maayo sang mga gulang ang mga kalipikasyon base sa Biblia para sa sini nga mga manugtatap, kag nagapangamuyo sila para giyahan sang balaan nga espiritu. Gani ini nga mga lalaki ginakabig sang kongregasyon nga gintangdo sang balaan nga espiritu. Kon padayon kita nga nagapasakop kag nagatuman sa direksion nga ila ginahatag, nagabulig kita nga mahiusa ang kongregasyon.—Heb. 13:17.

²³ Napalig-on gid ang mga disipulo sang pagkabanhaw ni Jesus kag napabakod sa mga pagbag-o sa organisasyon. Gani handa na sila nga atubangon ang bisan ano nga matabo sa palaabuton. Ang masunod nga kapitulo magabinagbinag sining importante nga hitabo.