“Padayon nga Magsunod” kay Jesus Pagkatapos Mo Magpabawtismo

1-2. Ano ang mga pagpakamaayo kon magpabawtismo ang isa ka tawo?

NALIPAY gid kita sang nabawtismuhan kita kag nangin bahin kita sang pamilya ni Jehova. Isa gid ka kadungganan nga mangin suod sa iya. Nagakomporme kita sa ginsiling ni salmista David: “Malipayon ang tawo nga ginapili mo [Jehova] kag ginaagda nga magpalapit sa imo agod magpuyo sa imo mga luwang.”​—Sal. 65:4.

² Ano nga klase sang mga tawo ang ginadala ni Jehova sa iya mga luwang? Suno sa ginbinagbinag sa nagligad nga artikulo, nagapalapit sia sa mga tawo nga nagapanikasog nga mangin suod sa iya. (Sant. 4:8) Sang gindedikar mo ang imo kaugalingon kay Jehova kag nagpabawtismo ka, nagsuod ka pa gid kay Jehova sa pinasahi nga paagi. Makasalig ka nga pagkatapos mo magpabawtismo, ‘ibubo niya sa imo ang mga pagpakamaayo tubtob wala na sing kulang.’—Mal. 3:10; Jer. 17:​7, 8.

 3. Pagkatapos magdedikar kag magpabawtismo ang isa ka Cristiano, ano nga serioso nga responsibilidad ang dapat niya himuon? (Manugwali 5:​4, 5)

³ Sang nagpabawtismo ka, umpisa pa lang ini. Pagkatapos mo magpabawtismo, dapat mo himuon ang imo bug-os nga masarangan para matuman mo ang imo ginpromisa kay Jehova. Nagpromisa ka nga kon may mga pagsulay kag mga pagtilaw, magapabilin ka nga matutom sa iya. (Basaha ang Manugwali 5:​4, 5.) Kag bilang disipulo ni Jesus, dapat mo sundon ang iya halimbawa kag ang iya mga sugo sa bug-os mo nga masarangan. (Mat. 28:​19, 20; 1 Ped. 2:21) Buligan ka sini nga artikulo nga mahimo ini.

“PADAYON NGA MAGSUNOD” KAY JESUS BISAN PA MAY MGA PAGTILAW KAG MGA PAGSULAY

 4. Ano ang buot silingon nga ginapas-an sang mga disipulo ni Jesus ang “usok sang pag-antos”? (Lucas 9:23)

⁴ Indi paghunahunaa nga kon nabawtismuhan ka na, wala ka na sing problema. Kay man, nagsiling si Jesus nga ang iya mga disipulo magapas-an sang “usok sang pag-antos.” Ang matuod, pas-anon nila ini “adlaw-adlaw.” (Basaha ang Lucas 9:23.) Buot silingon bala ni Jesus nga pirme lang magaantos ang iya mga sumulunod? Indi. Sa baylo, gusto ni Jesus nga mahangpan sang iya mga sumulunod nga magluwas sa mga pagpakamaayo nga ila mabaton, makaeksperiensia man sila sang mga problema. Kag posible nga mabudlay gid ang pila sa sini nga mga problema.​—2 Tim. 3:12.

 5. Ano nga mga pagpakamaayo ang ginpromisa ni Jesus para sa mga nagahimo sing mga sakripisyo?

⁵ Posible nga ginpamatukan ka sang mga miembro sang imo pamilya, ukon posible nga ginsakripisyo mo ang pagtigayon sing mas madamo nga kuarta para mauna mo ang Ginharian sa imo kabuhi. (Mat. 6:33) Makasalig ka nga nakita ni Jehova ang imo katutom sa iya. (Heb. 6:10) Posible nga naeksperiensiahan mo mismo ining ginsiling ni Jesus: “Wala sing bisan sin-o nga nagbiya sang balay ukon mga utod nga lalaki ukon mga utod nga babayi ukon iloy ukon amay ukon mga anak ukon mga uma tungod sa akon kag tungod sa maayong balita ang indi makabaton sa sini nga tion sing 100 ka pilo nga mga balay, mga utod nga lalaki, mga utod nga babayi, mga iloy, mga anak, kag mga uma, lakip ang mga paghingabot, kag sa palaabuton nga sistema sang mga butang, sing kabuhi nga wala sing katapusan.” (Mar. 10:​29, 30) Gani mas madamo ang mga pagpakamaayo nga nabaton mo sangsa imo mga ginsakripisyo.​—Sal. 37:4.

 6. Ngaa dapat mo padayon nga pakigbatuan “ang kailigbon sang unod” pagkatapos mo magpabawtismo?

⁶ Pagkatapos mo magpabawtismo, dapat mo padayon nga pakigbatuan “ang kailigbon sang unod.” (1 Juan 2:16) Kay man, indi ka gihapon perpekto. May mga tion nga posible mabatyagan mo ang ginbatyag ni apostol Pablo. Nagsiling sia: “Sa akon tagipusuon, nagakalipay gid ako sa kasuguan sang Dios, apang nakita ko sa akon lawas ang isa pa ka kasuguan nga nagapakig-away sa kasuguan sang akon hunahuna. Ini nga kasuguan amo ang sala nga yara sa akon lawas kag ginakontrol ako sini.” (Roma 7:​22, 23) Posible nga magaluya ang imo buot bangod kinahanglan mo pakigbatuan ang imo sala nga mga handum. Pero kon hunahunaon mo ang imo ginpromisa kay Jehova sang nagdedikar ka sa iya, magapabakod ini sa imo nga pakigbatuan ang pagsulay. Buligan ka sang imo ginpromisa kay Jehova kon makaeksperiensia ka sang mga pagsulay. Paano?

 7. Kon nakadedikar ka na kay Jehova, paano ini makabulig sa imo nga makapabilin nga matutom sa iya?

⁷ Sang nagdedikar ka kay Jehova, ginpanghiwala mo na ang imo kaugalingon. Buot silingon, ginsikway mo na ang imo mga handum kag mga ambisyon nga makapaakig kay Jehova. (Mat. 16:24) Gani kon makaeksperiensia ka sang pagtilaw, indi mo na pagpamensaron pa kon ano ang dapat mo himuon. Kay man, nakadesisyon ka na nga magapabilin ka nga matutom kay Jehova. Himuon mo ang imo bug-os nga masarangan para malipay sa imo si Jehova. Daw pareho ka kay Job. Bisan pa grabe gid kabudlay sang mga pagtilaw nga iya naeksperiensiahan, malig-on sia nga nagsiling: “Indi ko pag-isikway ang akon integridad!”—Job 27:5.

 8. Kon pamalandungan mo ang imo ginpromisa kay Jehova nga himuon mo ang iya kabubut-on, paano ini makabulig para mapamatukan mo ang pagsulay?

⁸ Kon pamalandungan mo ang imo ginpromisa kay Jehova nga himuon mo ang iya kabubut-on, mangin mabakod ka nga pamatukan ang bisan ano nga pagsulay. Halimbawa, indi ka gid mag-flirt ukon magpakiat sa asawa ukon bana sang iban. Kay man, nagpromisa ka kay Jehova nga indi mo gid ina paghimuon. Kon indi mo pagpunggan ang indi husto nga mga balatyagon, mabudlayan ka sa pagdula sini sa ulihi. Pero kon punggan mo ini dayon, malikawan mo ini nga problema kay ‘ginalikawan’ mo ang “banas sang malauton.”​—Hulu. 4:​14, 15.

 9. Kon pamalandungan mo ang imo ginpromisa kay Jehova nga himuon mo ang iya kabubut-on, paano ini makabulig para mauna mo ang pagsimba sa iya?

⁹ Ano abi kon hatagan ka sang obra nga makasablag sa imo regular nga pag-attend sa mga miting sang kongregasyon? Kabalo ka sang dapat mo himuon. Kay man, antes pa ginhatag sa imo ang obra, madugay ka na nakadesisyon nga indi mo pagbatunon ang mga obra nga makasablag sa imo pag-attend sa mga miting. Gani, indi mo na pagpamensaron pa nga basi mauna mo man gihapon ang paghimo sang kabubut-on ni Jehova bisan pa batunon mo ini nga obra. Pamalandungi ang halimbawa ni Jesus. Gusto gid niya nga malipay sa iya ang iya Amay. Gani pareho kay Jesus, dumduma nga nagdedikar ka na kay Jehova, kag isikway dayon ang bisan ano nga makapaakig sa Iya.​—Mat. 4:10; Juan 8:29.

10. Paano ka buligan ni Jehova pagkatapos mo magpabawtismo para ‘padayon mo nga masunod’ si Jesus?

¹⁰ Kon makaeksperiensia ka sang mga pagtilaw kag mga pagsulay, kahigayunan ini para mapakita mo nga gusto mo gid nga “padayon nga magsunod” kay Jesus. Kag makasalig ka nga buligan ka ni Jehova nga mahimo ini. Ang Biblia nagasiling: “Ang Dios matutom, kag indi sia magtugot nga sulayon kamo labaw sa inyo masarangan, apang kon mag-abot ang pagsulay magahimo man sia sang lulutsan agod mabatas ninyo ini.”​—1 Cor. 10:13.

KON ANO ANG HIMUON MO PARA PADAYON MO NGA MASUNOD SI JESUS

11. Ano ang isa sa pinakamaayo nga paagi para padayon mo nga masunod si Jesus? (Tan-awa man ang piktyur.)

¹¹ Bug-os tagipusuon nga nag-alagad si Jesus kay Jehova, kag nagpabilin sia nga suod kay Jehova paagi sa pagpangamuyo sa Iya. (Luc. 6:12) Gani, ang isa sa pinakamaayo nga paagi para padayon mo nga masunod si Jesus pagkatapos mo magpabawtismo amo ang padayon nga paghimo sang mga hilikuton nga magapasuod sa imo kay Jehova. Ang Biblia nagasiling: “Bisan ano man nga pag-uswag ang aton nahimo sa sini, padayon kita nga maglakat sa husto nga paagi sa amo gihapon nga dalanon.” (Fil. 3:16) Madamo nga kauturan ang nagdesisyon nga dugangan ang ila ginahimo sa pag-alagad kay Jehova, kag pirme kita makabati parte sa ila mga eksperiensia. Posible nga nag-eskwela sila sa School for Kingdom Evangelizers ukon nagsaylo sila sa lugar nga nagakinahanglan sang dugang nga manugbantala. Kon masarangan mo man ini himuon, kanami gid sini nga goal ukon tulumuron. Gusto gid sang katawhan ni Jehova nga dugangan ang ila ginahimo para sa iya. (Binu. 16:9) Pero, ano abi kon indi mo pa masarangan nga himuon ini subong? Indi paghunahunaa nga waaywaay ka kon ikumparar sa iban nga makasarang nga himuon ini. Ang importante, padayon ka nga nagabatas. (Mat. 10:22) Indi pagpakadiutaya ang imo ginahimo nga pag-alagad kay Jehova suno sa imo mga ikasarang kag kahimtangan. Importante ini nga paagi para padayon mo nga masunod si Jesus pagkatapos mo magpabawtismo.​—Sal. 26:1.

12-13. Ano ang puede mo himuon kon daw wala ka na nanamian nga himuon ang mga hilikuton sa pag-alagad kay Jehova? (1 Corinto 9:​16, 17) (Tan-awa man ang kahon nga “Magpadayon sa Pagdalagan sa Palumba Para sa Kabuhi.”)

¹² Ano abi kon pamatyag mo daw indi na tinagipusuon ang imo mga pangamuyo ukon daw wala ka na nanamian magbantala? Ano abi kon daw wala ka na nanamian magbasa sang Biblia? Kon bawtismado ka na kag nabatyagan mo ini, indi paghunahunaa nga wala ka na ginabuligan sang espiritu ni Jehova. Indi kita perpekto, gani nagabag-obag-o ang aton ginabatyag. Kon daw wala ka na nanamian nga himuon ang mga hilikuton sa pag-alagad kay Jehova, pamalandungi ang halimbawa ni apostol Pablo. Ginpanikasugan gid niya nga ilugon si Jesus, pero kabalo sia nga may mga tion nga wala sia sing gana nga himuon ang mga dapat niya himuon. (Basaha ang 1 Corinto 9:​16, 17.) Nagsiling sia: “Bisan pa kon ginahimo ko ini batok sa akon kabubut-on, sa gihapon hilikuton ini nga gintugyan sa akon.” Ginapakita sini nga gusto gid ni Pablo nga tumanon ang iya ministeryo bisan pa sang iya ginabatyag.

¹³ Indi mo man dapat pag-ibase sa imo ginabatyag ang imo mga desisyon. Sa baylo, himua ang husto bisan pa daw wala ka sing gana nga himuon ini. Kon pirme mo himuon ang husto, magaabot ang tion nga manamian ka na sa paghimo sini. Pero samtang wala pa ina nga tion, mangin regular sa imo personal nga pagtuon, pagpangamuyo, pag-attend sa mga miting, kag pagbantala. Makabulig ini para padayon mo nga masunod si Jesus pagkatapos mo magpabawtismo. Kon makita sang imo mga kauturan ang imo pagbatas sa pag-alagad kay Jehova, mapalig-on gid sila.​—1 Tes. 5:11.

“PADAYON NGA USISAA . . . PADAYON NGA PAMATUD-I”

14. Ano ang dapat mo usisaon sing regular, kag ngaa? (2 Corinto 13:5)

¹⁴ Pagkatapos mo magpabawtismo, importante man nga usisaon mo sing regular ang imo kaugalingon. (Basaha ang 2 Corinto 13:5.) Usisaa pirme ang imo kabuhi para makita mo kon bala nagapangamuyo ka adlaw-adlaw, kon bala nagabasa ka kag nagatuon sang Biblia, kon bala naga-attend ka sa mga miting, kag kon bala nagabantala ka kag nagatudlo sa iban. Mangita sing paagi para manamian ka sa sini nga mga hilikuton. Halimbawa, pamangkuta ang imo kaugalingon: ‘Mapaathag ko bala sa iban ang panguna nga mga panudlo sang Biblia? Ano ang puede ko himuon para manamian ako magbantala kag magtudlo sa iban? Espesipiko bala ang akon mga pangamuyo? Makita bala sa akon mga pangamuyo nga bug-os ang akon pagsalig kay Jehova? Regular bala ako nga naga-attend sa mga miting sang kongregasyon? Ano ang puede ko himuon para mas makapokus ako kag makakomento sa mga miting?’

15-16. Ano ang natun-an mo sa eksperiensia sang isa ka brother parte sa pagpamatok sa pagsulay?

¹⁵ Importante man nga kabalo ka kon ano ang imo mga kaluyahon. Binagbinaga ang eksperiensia sang isa ka brother nga si Robert. Nagsiling sia: “Sang mga 20 anyos ako, may part-time ako nga obra. Isa ka adlaw pagkatapos sang amon obra, ginhagad ako sang isa ka babayi nga kaupod ko sa obra nga magkadto sa ila balay. Nagsiling sia nga wala sing tawo sa ila balay, gani mahimo namon ang bisan ano nga gusto namon himuon. Sang primero, may ginsiling ako nga mga balibad para malikawan ko nga ipaathag sa iya kon ngaa indi ako mag-upod. Pero sang ulihi, ginpangindian ko sia kag ginpaathag ko sa iya kon ngaa.” Ginpamatukan ni Robert ang pagsulay, kag maayo gid ang iya ginhimo. Pero sang ulihi, narealisar niya nga kuntani nangin mas malig-on pa gid sia. Nagsiling sia: “Wala ako nangin malig-on sa pagpangindi sa pagsulay ukon wala ko ini ginsikway dayon. Wala ko nailog si Jose sang ginpangindian niya ang asawa ni Potifar. (Gen. 39:​7-9) Ang matuod, daw indi ako makapati nga nabudlayan ako nga pamatukan ang pagsulay. Bangod sa sini nga eksperiensia, narealisar ko nga dapat ko pabakuron ang akon kaangtanan kay Jehova.”

¹⁶ Kon usisaon mo man ang imo kaugalingon pareho sa ginhimo ni Robert, makabulig gid ini sa imo. Bisan pa napamatukan mo ang isa ka pagsulay, pamangkuta ang imo kaugalingon, ‘Daw ano kadugay antes ko ini napamatukan?’ Kon marealisar mo nga may dapat ka pauswagon, indi ka dapat maluyahan sang buot. Dapat ka magpasalamat kay nabal-an mo kon ano ang imo kaluyahon. Ipangamuyo ini kay Jehova, kag himua ang mga hilikuton nga magapalig-on sa imo nga tumanon ang iya mga kasuguan.​—Sal. 139:​23, 24.

17. Paano napadunggan ang ngalan ni Jehova sa eksperiensia ni Robert?

¹⁷ May matun-an pa gid kita sa eksperiensia ni Robert. Nagsiling sia: “Pagkatapos ko pangindian ang kaupod ko sa obra, nagsiling sia, ‘Nakapasar ka!’ Ginpamangkot ko sia kon ano ang buot niya silingon. May abyan gali sia nga isa ka Saksi sang una. Ginsilingan sia sang iya abyan nga sekreto kuno nga nagahimo sing sala ang tanan nga pamatan-on nga Saksi basta may tsansa sila. Gani ginsilingan niya ang iya abyan nga testingan niya ako. Nalipay gid ako sadto nga tion kay napadunggan ko ang ngalan ni Jehova.”

18. Ano ang gusto mo nga himuon pagkatapos mo magpabawtismo? (Tan-awa man ang kahon nga “Makabulig Gid sa Imo Ining Duha ka Artikulo.”)

¹⁸ Sang gindedikar mo ang imo kaugalingon kay Jehova kag nagpabawtismo ka, ginpakita mo nga gusto mo pakabalaanon ang iya ngalan bisan ano pa ang matabo. Kag makasalig ka nga kabalo si Jehova sang mga pagtilaw kag mga pagsulay nga imo ginabatas kag ginapamatukan. Pakamaayuhon niya ang imo mga pagpanikasog para makapabilin ka nga matutom sa iya. Makasalig ka nga pabakuron ka niya paagi sa iya balaan nga espiritu. (Luc. 11:​11-13) Sa bulig ni Jehova, padayon mo nga masunod si Jesus pagkatapos mo magpabawtismo.