May Butang Bala nga Makapahamulag sa Imo Gikan sa Gugma sang Dios?

“Kay kombinsido ako nga bisan ang kamatayon ukon kabuhi ukon mga manugtonda ukon mga pangulohan ukon mga butang nga sa karon ukon mga butang nga palaabuton ukon mga gahom ukon kataasan ukon kadadalman ukon bisan ano nga iban nga tinuga indi sarang makapahamulag sa aton sa gugma sang Dios nga yara kay Cristo Jesus nga aton Ginuo.”—ROMA 8:38, 39.

 1. Sa anong mga paagi ginapakita ang gugma sang Dios sa adlaw-adlaw?

ANG Dios gugma. Ginapabutyag ini sa aton sa adlaw-adlaw paagi sa mga butang nga nagasakdag sang kabuhi. Ang hangin nga aton ginaginhawa, ang tubig nga aton ginainum, ang kalan-on nga aton ginakaon—tanan tanda sang gugma sang Dios. Dugang pa, nagaabot sila sa maayo kag malain, ginaapresyar man ini ukon wala. Si Jesus nagpamatuod sa sini sang magsiling sia tuhoy sa iya langitnon nga Amay: “Nagapasubang sia sang iya adlaw sa mga malauton kag sa mga maayo kag nagapaulan sa mga matarong kag sa mga dimatarong.” (Mateo 5:45) Dapat pasalamatan sa Dios sang tagsa ka nagakabuhi nga tinuga sa duta ang iya padayon nga pagkabuhi.—Salmo 145:15, 16.

 2. Paano ginpakita ang daku nga gugma ni Jehova sa katawhan, kag paano si Jesus nagpakita sing apresasyon sa luyag ni Jehova?

² Para sa tawhanon nga mga tinuga ang gugma sang Dios indi lamang ang pagsakdag sang kabuhi karon nga nagakapulak subong sang bulak kag nagakalaya subong sang hilamon. (1 Pedro 1:24) May gin-aman sia agod ang katawhan mabuhi sing dayon: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi mawala kundi may kabuhi nga walay katapusan.” (Juan 3:16) Daku ang ginbayad sang Amay kag Anak para sa sini nga aman. Sa Getsemane, sang gab-i sa wala pa sia mapatay, nagluhod si Jesus sa duta kag nangamuyo sia nga may kasakit sa bagay nga ang “iya balhas nangin kaangay sang dalagku nga tinulo sang dugo nga nagatupa sa duta.” Sini nga tinion sang kasakit, gindumdom ni Jesus ang pagpakahuya sa ngalan sang Dios, kag nangabay pa gani sia nga ipahilayo sa iya ang tagayan. Apang nagdugang sia: “Apang indi suno sa buot ko, kundi sa buot mo.” (Lucas 22:44; Marcos 14:36) Bisan pa daku ang pag-antos ni Jesus, gin-una niya ang luyag ni Jehova. Bisan ang masakit kag hinayhinay nga kamatayon sang ginlansang sia sa usok wala makapain sa iya gikan sa gugma sang Dios.

 3. Ano nga mga pulong ni Pablo ang ginailog karon sang mga Saksi ni Jehova, kag ano ang mga resulta sini sa ila?

³ Ang luyag ni Jehova amo man ang ginauna sang mga Saksi ni Jehova nga karon nagasunod sang mga tikang ni Jesus. “Kon ang Dios apin sa aton,” siling nila, sa pag-ilog sang mga pulong ni apostol Pablo, “sin-o bala ang batok sa aton? Sin-o bala ang magapahamulag sa aton sa gugma ni Cristo? Ang kangitngitan bala, ukon kasakit ukon paghingabot ukon tiggulutom ukon kahubo ukon katalagman ukon espada? Sa kabaliskaran, sa sining tanan nagadaug kita paagi sa iya nga naghigugma sa aton.” (Roma 8:31, 35, 37) Sa sulod sining siglo ang mga Saksi ni Jehova ginsalakay, ginsakit, ginbulitan sing alkitran kag bulbol, gin-utod ang iban nga bahin sang lawas, ginlugos, ginpagutuman, ginpatay paagi sa firing squad, kag ginpugotan pa sing ulo sa mga kampo konsentrasyon sang Nazi—ini tanan bangod sang ila pagpangindi sa pagbulag sa gugma sang Dios.

 4. Paano ikaw nahamuot sa pagpangindi sang isa ka pamatan-on nga lalaki sa pagbulag sa gugma sang Dios?

⁴ Kap-atan ka tuig sang una, ang isa ka pamatan-on nga lalaki, nga isa sang mga Saksi ni Jehova, nagsulat sa iya mga ginikanan gikan sa kampo konsentrasyon sang Nazi, nga nagasiling, sa bahin:

“Alas 9 na karon sang adlaw sang akon kasaba, apang mahulat pa ako tubtob alas 11:30. Ginahimo ko ining sulat sa napain nga selda sang militar. May kalinong ako, nga daw indi mapatihan; apang natugyan ko na ang tanan sa Ginuo, kag may kalinong nga ginahulat ko ini nga oras kag sa masunson nga paggapos sa akon. Ginsilingan nila kamo nga indi ako pagkadenahan. Binutig! Adlaw kag gab-i: para lamang sa pag-ilis sing bayo kag sa pagpaninlo sang selda nga ginahukas ang kadena sang isa . . .

“12:35. Tapos na karon. Bangod sang kamatuoran nga ginhuptan ko ang akon pagpamatok [sa ila ginapangayo nga isikway niya ang iya pagsimba kay Jehova nga Dios], ang pamatbat nga kamatayon ginmando na. Namati ako, kag nian sa tapos ko mahambal ang mga pulong ‘Magmatutom ka tubtob sa kamatayon’ kag ang pila pa ka pulong sang aton Ginuo, natapos na ang tanan. Apang indi kamo magkabalaka. May paghidait ako, may kalinong ako, nga indi ninyo mahanduraw. . . . Ining kalinong, ining kalipay nga nabatyagan ko sang didto ako sa sulod sang korte, nga indi gid mahangpan sang kalibutan, naglatom kag nagpuno sa akon sang magsulod ako liwat sa akon selda . . . Indi kamo maghibi. . . . Amo ini ang pinakamatahom nga mahatag ko sa inyo, kag sa tanan nga hinigugma nga kauturan karon, ang katapusan nga Domingo sa wala pa ang pagpatay sa akon (pagpugot sang ulo), nga sa amo nga adlaw hukason ang akon kadena.”a

‘Palig-unon Niya Kamo, Pabakuron Niya Kamo’

5, 6. Ano nga mga pasalig nga ginhatag ni Pablo kag ni Pedro ang makapalig-on sa mga ginatilawan bangod sang ila pagpabilin sa gugma sang Dios?

⁵ Ining pamatan-on nga lalaki ginbulag sa kabuhi apang indi sa gugma sang Dios. Kaanggid man sini nga mga kapintas ang naeksperiensiahan sang mga Saksi ni Jehova sa bug-os nga mga siglo. Ang ikasarang sang mga alagad sang Dios sa pagbatas sina nga mga paghingabot, bisan tubtob sa kamatayon, indi sa ila kaugalingon nga kusog kundi sa kusog sang Dios. “Ang Dios matutom,” pasalig sa aton ni Pablo, “kag indi magtugot nga sulayon kamo labaw sa inyo masarangan, kundi kaupod sang pagsulay magahatag man sia sing lulutsan, agod nga makasarang kamo sa pagbatas.” (1 Corinto 10:13) Sang gintilawan, ang matutom nga mga saksi ni Jehova karon nakasiling man sang ginsiling ni Pablo sang mabilanggo sia: “Ang Ginuo nagtupad sa akon kag nagpabakod sa akon.”—2 Timoteo 4:17.

⁶ Si apostol Pedro, sa tapos magpaandam sa aton nga magbantay batok sa Yawa, nga nagaluyong subong sang nagangurob nga leon nga nagatinguha sa pagtukob sa aton, nagapasalig: “Sa tapos kamo makaantos sa diutay nga tion, ang Dios sang bug-os nga dibagay nga kaluoy, nga nagtawag sa inyo sa iya himaya nga dayon sa paghiusa kay Cristo, magatapos sang inyo paghanas, palig-unon niya kamo, pabakuron niya kamo.” (1 Pedro 5:8-10) Bangod sining pagsakdag sang Dios, isa ka butang ang maathag: Ang gugma sang Dios wala sing katapusan; kita ang may sala kon magbulag kita sa sini, indi sia.

 7. Ano nga mga taktika ang gingamit ni Satanas kay Jesus, kag paano sia nalutos ni Jesus?

⁷ Ang pagsalakay ni Satanas indi pirme subong sang nagangurob nga leon. Madamo nga beses nga nagapalapit sia subong sang isa ka ‘malalangon nga man-ug’ kag subong gani sang isa ka apostata nga “anghel sang kapawa.” Malaut ang iya mga pahito batok sa aton, gani dapat kita mangin alisto agod nga indi niya kita madakpan. Dapat naton isuklob ang bug-os nga hinganib sang Dios ‘agod nga makatindog sing malig-on batok sa malalangon nga mga buhat sang Yawa.’ (Genesis 3:1; The Jerusalem Bible; 2 Corinto 2:11; 11:13-15; Efeso 6:11, Ref. Bi., footnote) Sang magsugod si Jesus sang iya ministeryo, nagpalapit sa iya si Satanas nga nagabalikwat sing mga kasulatan, sayop nga nagaaplikar sini sa tuyo nga sulayon si Jesus sa paghimo sing sala. Makatlo nga ginsulay niya si Jesus kag makatlo nga napaslawan sia. Gintumba ni Jesus ang pagpatiko ni Satanas sa Kasulatan paagi sa nagakaigo nga pag-aplikar sa mga teksto. Nian ginsilingan ni Jesus si Satanas nga magpalayo. Apang si Satanas “nagpalayo [lamang] sa iya tubtob sa nagakaigo nga tion.”—Lucas 4:13; Mateo 4:3-11.

8, 9. Sa anong malimbungon nga mga paagi nagbalik si Satanas sa pagsalakay kay Jesus, kag ano ang ginlaygay ni Pablo nga himuon naton bilang pangamlig?

⁸ Si Satanas indi madali mag-ampo. Nagbalikbalik sia nga may nanuhaytuhay nga pagpakunokuno. Nagbalik sia kay Jesus paagi sa relihioso nga klero sadtong tion. Nahangpan ini ni Jesus kag tampad nga nagsiling sa ila: “Kamo iya sang inyo amay nga Yawa.” Ang iban nga tawo mahimo nga sing dihungod nagaalagad para sa katuyoan ni Satanas. Ginhimo ini ni apostol Pedro sang, bisan pa maayo ang iya katuyoan, ginsaway niya si Jesus, nga nagasiling: “Kaluy-i ang imo kaugalingon, Ginuo, indi gid ini mahanabo sa imo.” Mabaskog nga ginlaygayan ni Jesus si Pedro: “Halin ka sa atubangan ko, Satanas! Kasandaran ka sa akon.” (Juan 8:44; Mateo 16:22, 23) Sing kaanggid man, ang mga katuyoan ni Satanas mahimo nga sing dihungod ginaalagaran sang isa ka amo, kaupod sa trabaho, kaeskwela, abyan, paryente, ginikanan, ukon sang tiayon. Dapat kita magbantay pirme kag indi pagtugutan ang bisan ano nga magpaluya sang aton kaangtanan kay Jehova.

⁹ Gani importante nga “isuklob ang bug-os nga hinganib sang Dios agod nga makatindog kamo sing malig-on batok sa mga daya sang Yawa; bangod nagapakig-away kita, indi batok sa dugo kag unod, kundi batok sa . . . malauton nga mga kabon sang espiritu sa langitnon nga mga duog.”—Efeso 6:11, 12.

Ang Pag-ulipon sang Sala sa Napukan nga Unod

10. Ano ang kahulugan sang tinaga nga “sala,” kag ano nga mga buhat ang magabulag sa aton sa gugma sang Dios?

¹⁰ Ginaigo ni Satanas ang aton kaluyahon. Gani ang paborito nga puntariya niya amo ang aton undanon nga huyog sa pagpakasala. (Salmo 51:5) Ang Griegong tinaga nga ginbadbad sala amo ang ha·mar·tiʹa. Ang berbo amo ang ha·mar·taʹno, nga nagakahulugan “sa pagtalang sa tanda.” (Roma 3:9, Ref. Bi., footnote) Sa dugang nga pagtalang naton sa tanda kag indi pagtuman sang mga sugo sang Dios, dugang pa nga nagapahilayo kita sa gugma sang Dios, kay “ini amo ang gugma sang Dios, nga bantayan ta ang iya mga sugo.” (1 Juan 5:3) Panghilahi, pagpakighilawas, pagpatiko sang sekso, pagpahubog, wala sing kontrol nga mga sinalusalo, wala sing kontrol nga pagpasugot sa mga kailigbon sang unod, paghinisaay, kaakig, materyalistiko nga paghamkon—ina tanan nga butang nagabulag sa aton sa gugma sang Dios, kag “ang mga nagahimo [sina] indi magapanubli sang ginharian sang Dios.”—Galacia 5:19-21.

11. Paano ang sala amat-amat nga makaulipon sa aton, kag ano ang resulta sa ulihi?

¹¹ Ang mga pelikula, mga libro, mga drama, mga programa sa TV—puno sing materyalistiko, ako-anay, may lakip nga sekso nga pasayod—nagapabaskog sa pagtinguha sing patuyang kag wala sing pagpugong nga pagpangalipay. Ang nahauna nga sala nagapahapos sa ikaduha, sa ikatlo kag sa ikaapat, kag sa indi madugay ang pagtugdang sa pagkakalibutanon may bug-os nga kadasigon. Sa ulihi, ang mga “mahigugmaon sa kinasadya sa baylo nga mangin mahigugmaon sa Dios” masako sa “pagplano para sa mga kailigbon sang unod.” (2 Timoteo 3:4; Roma 13:14) Ang tigulang kag bata ginalamon sang sala, kag ang ila konsiensia bug-os nga nahirohan. “Bangod nawad-an sila sing igbalatyag, gintugyan nila ang ila kaugalingon sa kaulag sa pagbuhat sang tanan nga kahigkoan nga may paghamkon.”—Efeso 4:19; 1 Timoteo 4:2.

12. Ano nga mga kasulatan ang nagapakita sang gahom sang sala sa aton, kag paano si Pablo nanganduhoy bangod sini?

¹² Ang mga determinado sa pagpabilin sa gugma sang Dios dapat magpabakod sang ila kaugalingon batok sa pag-ulipon sang sala sa napukan nga unod. Isa ini ka makahaladlok nga kaaway, subong sulitsulit nga ginapadaku sang Biblia: “Ang tagsatagsa nga nagapakasala ulipon sang sala,” “ang tanan [yara] sa idalom sang sala,” “ang tanan nakasala,” “dili ninyo pagpaharia ang sala sa inyo mamalatyon nga mga lawas,” “mga ulipon kamo niya bangod ginatuman ninyo sia,” “ang bayad sang sala kamatayon,” kag ang tanan yara “sa idalom sang sala.” (Juan 8:34; Roma 3:9, 23; 6:12, 16, 23; Galacia 3:22) Si Pablo “ginbaligya sa idalom sang sala,” isa ka ‘bihag sang kasugoan sang sala,’ amo kon ngaa sia nanganduhoy: “Ang maayo nga luyag ko wala ko ginahimo, apang ang malaut nga indi ko luyag ginahimo ko.” (Roma 7:14, 19, 23) Gani nagtuaw sia: “Kailo ako nga tawo! Sin-o bala ang magaluwas sa akon sa sining lawas sang kamatayon?” Nian nag-abot ang makalilipay nga sabat: “Nagapasalamat ako sa Dios paagi kay Jesucristo nga aton Ginuo!”—Roma 7:24, 25.

13, 14. (a) Sa anong paagi mahilway kita sa sala? (b) Paano kita makapabilin sa gugma ni Cristo?

¹³ Tubtob indi mag-abot si Cristo Jesus, “naghari ang sala sa kamatayon.” (Roma 5:14, 17, 21) Apang bangod sang kamatayon kag pagkabanhaw ni Jesus, ang hari nga sala ginpahalin sa trono para sa mga nagabaton sang mahigugmaon nga dulot sang Dios nga amo ang Iya Anak. Ginluwas niya kita gikan sa aton mga sala, ginhugasan kita, gintinloan gikan sa sini, ginhilway kita gikan sa sini, kag bug-os nga ginpanas niya ini para sa aton. (Mateo 1:21; Binuhatan 3:19; 22:16; 2 Pedro 1:9; 1 Juan 1:7; Bugna 1:5) Sa amo indi lamang si apostol Pablo kundi ang tanan nga nagatuo sa ginpatulo nga dugo ni Cristo Jesus ang dapat magpasalamat sa Dios paagi kay Jesucristo nga aton Ginuo bangod nabuksan ang dalan padulong sa kahilwayan gikan sa makaluluoy nga pagkaulipon sang unod sa sala kag kamatayon.

¹⁴ Gani importante gid nga indi lamang likawan ang pagbulag sa gugma sang Dios kundi magpabilin man sa gugma ni Cristo. Ang pormula sa pagpabilin nga suod kay Jesus pareho man sa pagpakigsuod sa Dios. Ginpakita ini ni Jesus, nga nagasiling: “Subong nga ang Amay naghigugma sa akon kag ginhigugma ko kamo, pabilin kamo sa akon gugma. Kon magbantay kamo sang akon mga sugo, magapabilin kamo sa akon gugma, subong nga ako nagbantay sang mga sugo sang akon Amay kag nagapabilin sa iya gugma.”—Juan 15:9, 10.

Ang Katalagman sang Pagpaanod

15. Sa ano kita madali madaug, kag ano ang dapat himuon naton agod malikawan ang katalagman?

¹⁵ Indi pagwasiha ining kahilwayan gikan sa pagkaulipon sa sala kag kamatayon paagi sa pagpadaldal ukon pagpaanod. Mahimo ini matabo sing amat-amat nga indi naton mabatyagan. Subong ginasiling sang Galacia 6:1: “Mga kauturan, bisan pa ang isa ka tawo magsayop sa pagtikang sa wala pa niya matalupangdi ini, kamo nga may espirituwal nga mga ikasarang tinguhai ninyo nga ipasag-uli ina nga tawo sa espiritu sang pagkalum-ok, samtang ang tagsatagsa sa inyo nagabantay sang inyo kaugalingon, kay basi kamo man masulay.” Samtang ang isa nagalaygay sa isa, dapat niya ‘bantayan ang iya kaugalingon.’ Madali kita tanan masalakay! “Kinahanglan kita magpakita sing kapin pa sa kinaandan nga igtalupangod sa mga butang nga aton nabatian, agod nga indi kita magpalayo.”—Hebreo 2:1.

16, 17. Ano ang nagailustrar sang katalagman sang pagpaanod sa espirituwal, kag ano ang dapat himuon naton agod malikawan ini?

¹⁶ Ang pagpaanod wala sing panikasog. Amo kon ngaa kahapos gid sini—kag makatalagam gid, sa espirituwal nga paghambal. Masapwan mo ang imo kaugalingon nga nagabulag sa gugma sang Dios antes mo matalupangdan ini. Subong ini sang mga karnero nga nagatalang. Paano ini nagatalang? Ang manugbantay nagapaathag: ‘Nagakawili ini sa paghalab. Makakita ini sing berde nga mga hilamon mga pila ka tapak ang kalayuon, nagakadto sia didto agod maghalab. Nian makakita ini sing lain naman nga halalban napulo ka tapak ang kalayuon kag nagahalab sia didto. Ang ikatlo nga halalban makagalanyat, kag nagakadto didto ang karnero agod maghalab. Sa indi madugay malayo na ini sa panong. Nawili ini sa paghalab kag nagtalang.’

¹⁷ Gani amo man sa mga nagapalayo sa espirituwal. Mahimo magsugod ini nga wala sing malain nga tuyo sa pila ka materyal nga mga butang, ukon kalibutanon nga mga pagpakig-upod, ukon kaugalingon nga mga paghaumhaom sa mga kasulatan. Apang sing amat-amat, nagapalayo sila sa panong sang Dios, kag sa indi madugay nagbulag na sila sa kongregasyon kag sa gugma sang Dios. Wala nila ginpamatian ang laygay ni Pablo: “Padayon nga mangusisa kon bala yara kamo sa pagtuo, padayon nga pamatod-i kon ano kamo.”—2 Corinto 13:5.

18, 19. Paano ang Yawa magpalagyo sa aton, kag paano kita magpalapit sa Dios?

¹⁸ “Sumpunga ang Yawa,” siling sa aton, “kag magapalagyo sia sa imo.” Paagi sa lantip nga paggamit sa “espada sang espiritu, nga amo ang pulong sang Dios,” mapamatokan naton ang malalangon nga mga pagsalakay ni Satanas. Paagi sa sini ginpalayoan ni Satanas si Jesus. Ginasilingan man kita: “Magpalapit sa Dios, kag sia magapalapit sa inyo.” (Santiago 4:7, 8; Efeso 6:17) Kaangay sang mga manunulat sang Mga Salmo, dapat kita magpabilin nga suod sa Dios paagi sa pagsunod sa iya pulong: “Ang pahanumdom ni Jehova masaligan, nga nagapaalam sa wala sing eksperiensia.” “Ginatalupangod ko ang imo mga pahanumdom. Ang imo pulong suga sa akon mga tiil, kag kapawa sa akon banas. . . . Wala ako magbulag sa imo mga pahanumdom.”—Salmo 19:7; 119:95, 105, 157.

¹⁹ Paagi sa pangamuyo, paagi sa pagtuon sang Pulong sang Dios, paagi sa paghigugma sa aton kauturan, kag regular nga pagpakigtipon upod sa ila, paagi sa pagsugid sa iban nahanungod sa Ginharian sang Dios—paagi sa sini tanan nagapakigsuod kita sa Dios kag ang iya gugma ginapakita paagi kay Cristo Jesus nga aton Ginuo.—1 Tesalonica 5:17; Roma 12:2; Hebreo 10:24, 25; Lucas 9:2.

20. Anong determinasyon ang ginpabutyag ni Pablo nga ginailog karon sang mga Saksi ni Jehova?

²⁰ Paagi sa bug-os kag mabaskog nga deklarasyon, ginpabutyag ni Pablo ang determinasyon sang tanan nga matutom nga mga saksi ni Jehova sa duta karon, nga nagasiling: “Kombinsido ako nga bisan ang kamatayon ukon kabuhi ukon mga manugtonda ukon mga pangulohan ukon mga butang nga sa karon ukon mga butang nga palaabuton ukon mga gahom ukon kataasan ukon kadadalman ukon bisan ano nga iban nga tinuga indi sarang makapahamulag sa aton sa gugma sang Dios nga yara [ginpakita, JB] kay Cristo Jesus nga aton Ginuo.”—Roma 8:38, 39.

[Footnote]

Madumduman Mo Bala?

◻ Paano ginpakita ang gugma ni Jehova sa iya mga aman para sa kabuhi?

◻ Agod mabulag ang mga Saksi ni Jehova sa gugma sang Dios, ano nga mga paagi ang gintilawan ni Satanas?

◻ Ano nga mga kasulatan ang nagapakita sang pag-ulipon sang sala sa aton, kag paano ini mabungkag?

◻ Ngaa makatalagam gid ang pagpaanod, kag paano ini mapamatokan?

[Laragway sa pahina 13]

Ang karnero amat-amat nga nagatalang tubtob nga madula ini