Ginhimo Nila ang Kabubut-on ni Jehova

Nalikawan sang Maalam nga Babayi ang Kalaglagan

ISA ka maalam nga babayi nga nakapamana sing wala sing pulos nga lalaki​—⁠amo sina ang kahimtangan sadto nanday Abigail kag Nabal. Si Abigail “mahinantupon kag maanyag.” Sa kabaliskaran, si Nabal “maparas kag malain sing batasan.” (1 Samuel 25:3) Ang kasaysayan nagalakip sa sining indi bagay nga magtiayon nga naghimo sang ila ngalan nga indi mapanas sa kasaysayan sang Biblia. Tan-awon naton kon paano.

Ang Kaayo nga Ginpasapayanan

Ika-11 nga siglo B.⁠C.⁠E. sadto. Si David ginhaplas subong palaabuton nga hari sang Israel, apang sa baylo nga maghari nagpalagyo sia. Luyag gid sia patyon sang nagagahom nga hari nga si Saul. Subong resulta, napilitan si David nga magkabuhi subong isa ka laaslaas. Sia kag ang mga 600 niya ka kaupdanan nagpatupling sang ulihi sa kahanayakan sang Paran, bagatnan sang Juda padulong sa kahanayakan sang Sinai.​—⁠1 Samuel 23:​13; 25:⁠1.

Sang didto na sila, nakilala nila ang mga manugpahalab nga nagapamugon kay Nabal. Ining manggaranon nga kaliwat ni Caleb nagapanag-iya sing 3,000 ka karnero kag 1,000 ka kanding, kag nagaalot sia sa iya mga karnero sa Carmelo, isa ka siudad sa bagatnan sang Hebron kag ayhan mga 40 kilometros lamang halin sa Paran.⁠a Ginbuligan ni David kag sang iya mga tinawo ang mga manugpahalab ni Nabal sa pagbantay sa ila panong batok sa mga kawatan nga nagalagaw sa kamingawan.​—⁠1 Samuel 25:​14-16.

Sadto nga tion, nagsugod ang pagpang-alot sa mga karnero sa Carmelo. Isa ini ka masadya nga okasyon, kaanggid sa tig-alani sa mga mangunguma. Tion man ini sang pagkaalwan, diin ginapadyaan sang mga tag-iya sang karnero ang iya mga mamumugon. Gani indi matinaastaason sa bahin ni David sang magpadala sia sing napulo ka lalaki sa siudad sang Carmelo agod mangayo sing pagkaon kay Nabal subong bayad sa serbisyo nga ila ginhimo para sa iya mga panong.​—⁠1 Samuel 25:​4-9.

Wala gid sing makita nga kaalwan sa sabat ni Nabal. “Sin-o si David?” yaguta niya. Nian, ginapahangop nga sanday David kag ang iya mga tinawo mga layas lamang nga mga alagad, namangkot sia: “Kuhaon ko bala ang akon kalan-on kag ang akon tubig kag ang akon inihaw nga gin-ihaw ko nga sa akon mga manug-alot, kag ihatag ini sa mga tawo nga wala ko mahibalui kon diin sila maggikan?” Sang mabatian ini ni David, nagsiling sia sa iya mga tinawo: “Magtaklus ang tagsa sang iya espada!” Mga 400 ka lalaki ang naghanda sa pagpakig-away.​—⁠1 Samuel 25:​10-13.

Ang Kaalam ni Abigail

Ang malain nga mga ginhambal ni Nabal nabatian sang iya asawa, nga si Abigail. Ayhan indi ini ang una nga tion nga nagpatunga sia kag nagpanghikot subong manugtambag para kay Nabal. Walay sapayan, gilayon nga naghulag si Abigail. Lipod kay Nabal, nagtipon sia sing mga regalo​—⁠lakip ang lima ka karnero kag madamo nga pagkaon​—⁠kag naglakat agod sugataon si David sa kahanayakan.​—⁠1 Samuel 25:​18-20.

Sang makita ni Abigail si David, gilayon nga nagyaub sia sa iya atubangan. “Dili magsapak ang akon ginuo sa sining tawo nga wala sing pulos, nga si Nabal,” pangabay niya sa iya. “Kag ining dulot sang pagpakamaayo nga gindala sang imo alagad sa akon ginuo, ihatag ini sa mga pamatan-on nga nagasunod sa akon ginuo.” Nagdugang sia: “Ini [ang kahimtangan tuhoy kay Nabal] mangin dihuol sa imo ukon kasandaran sang tagipusuon sang akon ginuo.” Ang Hebreong tinaga diri nga ginbadbad “kahuol” nagapahangop sing pagsukmat sang konsiensia. Gani ginpaandaman ni Abigail si David batok sa paghimo sing padasudaso nga buhat nga iya hinulsulan sa ulihi.​—⁠1 Samuel 25:​23-31.

Ginpamatian ni David si Abigail. “Bulahan ang imo pagkamahinantupon kag bulahan ikaw nga nagpugong sa akon sining adlaw gikan sa pagpakasala sa dugo,” siling ni David kay Abigail. “Kon wala ka magdalidali kag magkari sa pagsugata sa akon, sa pagkamatuod wala na sing nabilin pa kay Nabal sa pamanagbanag bisan sing isa nga nagaihi sa pader.”⁠b​—⁠1 Samuel 25:​32-34.

Leksion Para sa Aton

Ginapakita sining rekord sa Biblia nga indi sayop para sa isa ka diosnon nga babayi ang magmatumato sing nagakaigo kon kinahanglanon. Si Abigail naghulag batok sa luyag sang iya bana nga si Nabal, apang wala sia ginpakamalaut sang Biblia bangod sini. Sa baylo, gindayaw sia subong isa ka babayi nga maalam kag mahinantupon. Paagi sa paghulag sa sining ital-ital nga kahimtangan, naluwas ni Abigail ang madamo nga kabuhi.

Walay sapayan nga sa kinaandan ang asawa dapat magpakita sing espiritu sang diosnon nga pagpasakop, mahimo sia makapamatok sa iya bana kon nadalahig ang matarong nga mga prinsipio. Sa pagkamatuod, dapat niya tinguhaan nga mahuptan ang isa ka “malinong kag malulo nga espiritu” kag indi maghulag sing independiente bangod sang kalain sing buot, bugal, ukon pagrebelde. (1 Pedro 3:4) Apang, ang diosnon nga asawa indi dapat magbatyag nga napilitan sa paghimo sing bisan ano nga nahibaluan niya nga indi maalamon ukon supak sa mga prinsipio sang Biblia. Sa pagkamatuod, ang kasaysayan tuhoy kay Abigail isa ka malig-on nga pamatuod batok sa mga nagasiling nga ginalaragway sang Biblia ang mga babayi subong mga ulipon lamang.

Ini nga kasaysayan nagatudlo man sa aton tuhoy sa pagpugong sa kaugalingon. Isa ka bes, ginpakita sing bug-os ni David ini nga kinaiya. Halimbawa, wala niya ginpapatay ang matimaluson nga si Hari Saul, walay sapayan nga may daku sia nga kahigayunan nga himuon ini kag ang kamatayon ni Saul makahatag kuntani sing paghidait kay David. (1 Samuel 24:​2-7) Sa kabaliskaran, sang naakig sia sa mga pag-insulto ni Nabal, naimpito si David kag luyag niya magbalos. Isa ini ka maathag nga paandam sa mga Cristiano, nga nagatinguha nga “indi magbalos sa kay bisan sin-o sing malaut sa malaut.” Sa tanan nga kahimtangan, dapat nila sundon ang laygay ni Pablo: “Kon mahimo, sa masarangan ninyo, mangin mahidaiton sa tanan nga tawo. Indi kamo magtimalos, mga hinigugma, kundi hatagi ninyo sing duog ang kaakig.”​—⁠Roma 12:​17-19.

[Mga footnote]

[Kapsion sa pahina 15]

Gindalhan ni Abigail sing mga regalo si David