Batuna Pirme ang Disiplina ni Jehova

 1. Ngaa dapat naton batunon ang disiplina halin sa Dios?

SI Hari Solomon sang dumaan nga Israel nagahatag sa tagsatagsa sa aton sing maayo nga rason agod batunon ang disiplina halin sa Dios. “Ang disiplina ni Jehova, O anak ko, indi pagsikwaya,” siling ni Solomon, “kag indi pagkangil-ari ang iya sabdong, bangod ang isa nga ginahigugma ni Jehova ginasabdong niya, subong sang ginahimo sang amay sa anak nga sa iya nahamuot sia.” (Hulubaton 3:11, 12) Huo, ginadisiplina ka sang imo langitnon nga Amay bangod ginahigugma ka niya.

 2. Ano ang kahulugan sang “disiplina,” kag paano mahimo madisiplina ang isa ka tawo?

² Ang “disiplina” nagapatuhoy sa pagsilot, pagtadlong, pagtudlo, kag paghanas. “Wala sing disiplina ang daw makalilipay sa karon, kundi masakit,” sulat ni apostol Pablo, “apang pagkatapos sa mga nahanas sa sini nagapatubas ini sing mahidaiton nga bunga, nga amo, ang pagkamatarong.” (Hebreo 12:11) Ang pagbaton kag pagsunod sa disiplina sang Dios magabulig sa imo sa paglakat sa matarong nga dalanon kag sa amo magapasuod sa imo sa balaan nga Dios nga si Jehova. (Salmo 99:5) Ang pagtadlong mahimo ihatag paagi sa isa ka masigkatumuluo, paagi sa mga butang nga natun-an sa Cristianong mga miting, kag paagi sa imo pagtuon sa Pulong sang Dios kag sa mga publikasyon sang “matutom nga tulugyanan.” (Lucas 12:42-44) Daw ano gid ang pagpasalamat mo kon ginpatalupangod sa imo ang isa ka butang nga nagakinahanglan sing pagbag-o! Apang ano nga disiplina ang mahimo kinahanglanon kon may mabug-at nga sala nga nahimo?

 3. San-o ginahimo ang pag-disfellowship?

³ Ginatun-an sang mga alagad sang Dios ang Biblia kag ang Cristianong mga publikasyon. Ginabinagbinag sa ila mga miting, asambleya, kag mga kombension ang mga talaksan ni Jehova. Busa nahibaluan gid sang mga Cristiano kon ano ang ginapatuman ni Jehova sa ila. Gina-disfellowship lamang ang isa ka katapo sang kongregasyon kon di-mahinulsulon sia nga nagahimo sing mabug-at nga sala.

4, 5. Ano nga halimbawa sang pag-disfellowship ang ginpakita diri, kag ngaa ginlaygayan ang kongregasyon nga ipanumbalik ang tawo?

⁴ Binagbinaga ang isa ka halimbawa sa Biblia sang isa nga gin-disfellowship. Ginkunsinti sang kongregasyon sa Corinto ang “amo nga pagpakighilawas [nga] wala gani bisan sa mga pungsod, nga ginapuyo sang isa ka tawo ang asawa sang iya amay.” Ginlaygayan ni Pablo ang mga taga-Corinto nga “itugyan . . . ini nga tawo kay Satanas para sa kalaglagan sang unod, agod ang espiritu maluwas.” (1 Corinto 5:1-5) Sang gin-disfellowship kag busa gintugyan kay Satanas, ang makasasala nangin bahin liwat sang kalibutan sang Yawa. (1 Juan 5:19) Ang pagsikway sa iya nagdula sing malaut kag unudnon nga impluwensia sa kongregasyon kag nagtipig sang diosnon nga “espiritu,” ukon nagapangibabaw nga panimuot sini.—2 Timoteo 4:22; 1 Corinto 5:11-13.

⁵ Pagligad sang indi tanto ka dugay nga tion, ginlaygayan ni Pablo ang mga Cristiano sa Corinto nga ipanumbalik ang makasasala. Ngaa? Agod indi sila “madaug ni Satanas,” siling sang apostol. Maathag nga naghinulsol ang makasasala kag nagsugod sa pagkabuhi sing matinlo. (2 Corinto 2:8-11) Kon wala ginpanumbalik sang mga taga-Corinto yadtong mahinulsulon nga tawo, madaug sila ni Satanas bangod mangin wala sila sing balatyagon kag di-mapinatawaron subong sang luyag sang Yawa nga mangin amo sila. Mahimo gid nga wala magdugay pagkatapos sini ‘ginpatawad kag ginlugpayan’ nila ang mahinulsulon nga tawo.—2 Corinto 2:5-7.

 6. Ano ang mahimo sang pag-disfellowship?

⁶ Ano ang mahimo sang pag-disfellowship? Ginahuptan sini ang balaan nga ngalan ni Jehova nga hilway sa bisan ano nga pagmulay kag ginaamligan sini ang maayo nga reputasyon sang iya katawhan. (1 Pedro 1:14-16) Ang pagsikway sa isa ka di-mahinulsulon nga makasasala gikan sa kongregasyon nagasakdag sa talaksan sang Dios kag nagatipig sa espirituwal nga katinlo sang kongregasyon. Mahimo man ini magbulig sa isa nga di-mahinulsulon nga marealisar ang kabug-at sang iya sala.

 7. Ano ang epekto kay David sang wala niya gintu-ad ang iya mga kalapasan?

⁷ Ang kalabanan nga nakahimo sing mabug-at nga sala matuod nga naghinulsol kag wala gin-disfellowship sa kongregasyon. Sa pagkamatuod, indi mahapos para sa iban ang matuod nga paghinulsol. Binagbinaga ang hari sang Israel nga si David, nga nagkomposo sang Salmo 32. Ginapakita sinang ambahanon nga wala dayon gintu-ad ni David ang iya mabug-at nga mga sala, ayhan nadalahig kay Bat-seba. Subong resulta, nadula ang iya kapagsik bangod sa pagkalisod sa iya mga sala, kaangay sang hun-og sa kahoy nga nagmala bangod sang init sang tingadlaw. Nag-antos si David sa pisikal kag natublag gid ang iya panghunahuna, apang sang ‘gintu-ad niya ang iya mga kalapasan, ginpatawad sia ni Jehova.’ (Salmo 32:3-5) Nian nag-amba si David: “Malipayon ang tawo nga wala ginapasangti ni Jehova sang kalautan.” (Salmo 32:1, 2) Daw ano gid ka makalilipay nga maeksperiensiahan ang kaluoy sang Dios!

8, 9. Paano ginapakita ang paghinulsol, kag daw ano ini ka importante sa pagpanumbalik sang isa ka gin-disfellowship nga tawo?

⁸ Busa, maathag nga ang isa nga nakasala dapat maghinulsol kon luyag niya nga makabaton sing kaluoy. Apang, ang paghinulsol indi amo ang pagbatyag sing kahuya ukon kahadlok nga mabuyagyag ang sala. Ang “paghinulsol” nagakahulugan sing “pagbag-o sang hunahuna sang isa” may kaangtanan sa iya malain nga paggawi, bangod sa kasubo. Ang isa ka mahinulsulon nga tawo may “buong kag nadugmok nga tagipusuon” kag luyag ‘magtadlong sang sayop’ kon posible.—Salmo 51:17; 2 Corinto 7:11.

⁹ Ang paghinulsol importante katama para sa pagpanumbalik sang isa sa Cristianong kongregasyon. Ang gin-disfellowship nga tawo wala awtomatiko nga ginabaton liwat sa kongregasyon pagligad sang isa ka partikular nga tion. Antes sia papanumbalikon, dapat ang kahimtangan sang iya tagipusuon nagbalhin gid sing daku. Dapat marealisar niya ang kabug-at sang iya sala kag ang kahuy-anan nga gindala niya kay Jehova kag sa kongregasyon. Ang nakasala dapat maghinulsol, hanuot nga mangamuyo para sa kapatawaran sang sala, kag magpahisanto sa matarong nga mga talaksan sang Dios. Kon nagapangabay nga ipanumbalik, dapat magpakita sia sing pamatuod nga naghinulsol na sia kag nagapatubas sing “mga buhat nga takus sa paghinulsol.”—Binuhatan 26:20.

10, 11. Ngaa indi naton dapat pagtaguon ang aton sala?

¹⁰ Ang pila nga nakasala mahimo mangatarungan: ‘Kon isugid ko sa iban ang akon sala, basi pamangkuton ako sing makahuluya nga mga pamangkot kag basi i-disfellowship ako. Apang kon maghipos lang ako, malikawan ko ina kag wala gid sing may makahibalo sa kongregasyon.’ Wala mabinagbinag sining panghunahuna ang importante nga mga butang. Ano ini nga mga butang?

¹¹ Si Jehova “isa ka Dios nga maluluy-on kag mainayuhon, mahinay sa pagpangakig kag bugana sa mahigugmaon nga kaayo kag sa kamatuoran, nagatipig sing mahigugmaon nga kaayo para sa linibo, nagapatawad sang kasaypanan kag kalapasan kag kasal-anan.” Apang, ginatadlong niya ang iya katawhan “sa nagakaigo nga kabaskugon.” (Exodo 34:6, 7; Jeremias 30:11) Kon nakahimo ka sing mabug-at nga sala, paano mo mabaton ang kaluoy sang Dios kon taguon mo ang imo sala? Nahibaluan ini ni Jehova, kag wala niya basta ginapasapayanan ang sala.—Hulubaton 15:3; Habacuc 1:13.

12, 13. Ano ang mahimo mangin resulta kon taguon mo ang imo sala?

¹² Kon nakahimo ka sing isa ka mabug-at nga sala, ang pagtu-ad makabulig sa imo sa pagtigayon liwat sing matinlo nga konsiensia. (1 Timoteo 1:18-20) Apang ang pagtago sini mahimo magresulta sa mahigko nga konsiensia nga mahimo magdul-ong sa mas madamo pa nga sala. Dumduma nga wala ka nakasala sa isa lamang ka tawo ukon sa kongregasyon. Nakasala ka batok sa Dios. Ang salmista nag-amba: “Si Jehova—yara sa langit sa iya trono. Ang iya mga mata nagatan-aw, ang iya masanag nga mga mata nagausisa sa mga anak sang mga tawo. Si Jehova nagausisa sa matarong subong man sa malaut.”—Salmo 11:4, 5.

¹³ Indi pagpakamaayuhon ni Jehova ang bisan sin-o nga nagatago sing mabug-at nga sala kag nagatinguha nga magpabilin sa matinlo nga Cristianong kongregasyon. (Santiago 4:6) Gani kon nakasala ka kag luyag mo himuon ko ano ang husto, indi magpangalag-ag nga magtu-ad sing bunayag. Kay kon indi, ang imo konsiensia magasukmat sa imo, ilabi na kon makabasa ka ukon makabati sing laygay may kaangtanan sa imo mabug-at nga sala. Ano abi kon kuhaon ni Jehova ang iya espiritu sa imo, subong sang ginhimo niya kay Hari Saul? (1 Samuel 16:14) Kon wala na sa imo ang espiritu sang Dios, mahimo ka makahimo sing mas mabug-at pa nga sala.

14. Ngaa dapat sundon sang isa nga nakasala ang laygay sa Santiago 5:14, 15?

¹⁴ Busa, ano dapat ang himuon sang isa ka mahinulsulon nga nakasala? “Magpatawag sia sang mga tigulang sang kongregasyon, kag pangamuyuan nila sia, nga haplasan sia sing lana sa ngalan ni Jehova. Kag ang pangamuyo sang pagtuo magaayo sa isa nga nagamasakit, kag si Jehova magabangon sa iya.” (Santiago 5:14, 15) Ang pagpalapit sa mga gulang isa ka paagi nga ‘mapakita sang isa ang bunga nga takus sa paghinulsol.’ (Mateo 3:8) Ining matutom kag mahigugmaon nga mga lalaki ‘magapangamuyo kag magahaplas sa iya sing lana sa ngalan ni Jehova.’ Kaangay sang isa ka makapaumpaw nga lana, ang ila laygay halin sa Biblia makalugpay gid sa bisan sin-o nga matuod nga nagahinulsol.—Jeremias 8:22.

15, 16. Paano mailog sang mga gulang ang halimbawa nga ginpahamtang sang Dios, nga narekord sa Ezequiel 34:15, 16?

¹⁵ Daw ano gid ka mahigugmaon nga halimbawa ang ginpahamtang sang aton Manugbantay, si Jehova, sang ginhilway niya ang mga Judiyo gikan sa pagkabihag sa Babilonia sang 537 B.C.E. kag sang ginhilway niya ang espirituwal nga Israel gikan sa “Babilonia nga Daku” sang 1919 C.E.! (Bugna 17:3-5; Galacia 6:16) Sa amo gintuman niya ang iya saad: “Pahalbon ko ang akon mga karnero, kag palukuhon ko sila . . . Pangitaon ko ang nadula, kag pabalikon ko ang gintabog, kag bugkusan ko ang nabali kag pabakuron ko ang masakiton.”—Ezequiel 34:15, 16.

¹⁶ Ginpahalab ni Jehova ang iya malaragwayon nga mga karnero, ginpaluko sila nga may kalig-unan, kag ginpangita ang mga nadula. Sing kaanggid, ginapat-od man sang Cristianong mga manugbantay nga ang panong sang Dios regular nga nagakaon sa espirituwal kag malig-on. Ginapangita sang mga gulang ang mga karnero nga napahilayo sa kongregasyon. Subong nga ‘ginbugkusan sang Dios ang nabali,’ ‘ginabugkusan’ man sang mga manugtatap ang mga karnero nga napilasan bangod sa ginhambal sang iban ukon bangod sang ila mismo ginbuhat. Kag subong nga ‘ginpabakod sang Dios ang masakiton,’ ginabuligan man sang mga gulang ang mga nagmasakit sa espirituwal, ayhan bangod sang ila nahimo nga sala.

17. Ngaa indi kita dapat magpangalag-ag sa pagpangayo sing espirituwal nga bulig sa mga gulang?

¹⁷ Hanuot nga ginasunod sang mga gulang ining laygay: “Padayon nga magpakita sing kaluoy . . . , nga ginahimo ini nga may kahadlok.” (Judas 23) Ang pila ka Cristiano nakasala sing mabug-at bangod sa paghimo sing seksuwal nga imoralidad. Apang kon matuod sila nga nagahinulsol, makapaabot sila sing maluluy-on kag mahigugmaon nga pagtratar sang mga gulang nga handa gid magbulig sa ila sa espirituwal. Ginlakip ni Pablo ang iya kaugalingon sang nagsiling sia tuhoy sa sining mga lalaki: “Indi nga mga agalon kami sang inyo pagtuo, kundi mga masigkamanugpangabudlay kami para sa inyo kalipay.” (2 Corinto 1:24) Busa, indi ka magpangalag-ag nga pangayuon ang ila espirituwal nga bulig.

18. Paano dapat buligan sang mga gulang ang isa ka masigkatumuluo nga nakasala?

¹⁸ Kon nakahimo ka sing mabug-at nga sala, ngaa makasalig ka sa mga gulang? Bangod labaw sa tanan, mga manugbantay sila sang panong sang Dios. (1 Pedro 5:1-4) Wala sing mahigugmaon nga manugbantay ang magasilot sa isa ka mahagop, nagaima nga karnero nga nasamaran bangod sa pagsakit sini sa iya kaugalingon. Busa, kon ginabuligan sang mga gulang ang isa ka nakasala nga masigkatumuluo, indi sila dapat magkonsentrar sa kon ano nga silot ang dapat ihatag, kundi sa sala nga nahimo kag sa pagpasag-uli sang espirituwalidad sang nakasala kon posible. (Santiago 5:13-20) Ang mga gulang dapat maghukom sing matarong kag “makig-angot sing mapinalanggaon sa panong.” (Binuhatan 20:29, 30; Isaias 32:1, 2) Kaangay sang tanan nga iban pa nga mga Cristiano, ang mga gulang dapat ‘maghimo sing katarungan, maghigugma sa kaayo, kag maglakat sing maugdang upod sa Dios.’ (Miqueas 6:8) Ining mga kinaiya importante katama sa paghimo sing mga desisyon may kaangtanan sa kabuhi kag sagrado nga pag-alagad sang ‘mga karnero sang halalban’ ni Jehova.—Salmo 100:3.

19. Ano dapat ang panimuot sang Cristiano nga mga gulang kon nagatinguha nga ipasibu ang isa ka tawo?

¹⁹ Ang Cristiano nga mga manugbantay gintangdo sang balaan nga espiritu kag nagatinguha sila nga magpatuytoy sa sini. Kon “ang isa ka tawo makahimo sing sayop nga tikang antes niya matalupangdan ini”—nga subong nga wala nakapangaman—ginatinguhaan sang mga lalaki nga kalipikado sa espirituwal nga “pasibuon ina nga tawo sa espiritu sang kalulo.” (Galacia 6:1; Binuhatan 20:28) May kalulo kag subong man may kalig-on sa mga talaksan sang Dios, ginatinguhaan sang mga gulang nga pasibuon ang iya panghunahuna, subong sang ginahimo sang mapailubon nga doktor nga mahalungon nga ginabalik ang nagliw-as nga tul-an, agod malikawan ang di-kinahanglanon nga kasakit kag sa amo man nga tion ginatadlong ang problema. (Colosas 3:12) Sanglit ang mga gulang nagasandig sa pangamuyo kag sa Kasulatan agod hibaluon kon bala magapakita sila sing kaluoy ukon indi, dapat mabanaag sa ila desisyon ang pagtamod sang Dios sa mga butang.—Mateo 18:18.

20. San-o mahimo kinahanglan ipahibalo sa kongregasyon nga ang isa ka tawo ginsabdong?

²⁰ Kon ang sala nahibaluan sang madamo ukon pat-od nga mabalahuba sa ulihi, ang pagpahibalo sa kongregasyon mahimo nagakaigo agod maamligan ang reputasyon sini. Ang pagpahibalo ginahimo man kon ang kongregasyon kinahanglan pahibaluon. Samtang nagapaayo sa espirituwal ang indibiduwal nga hudisyal nga ginsabdong, mapaanggid sia sa isa ka tawo nga nagapaayo sa balatian, nga nagauntat anay sa paghimo sang pila ka hilikuton. Sa sulod sang isa ka hut-ong sang tion, mas makapanginpulos ang isa ka mahinulsulon kon mamati lang sia sangsa magkomento sa mga miting. Ang mga gulang puede maghimo sing kahimusan nga may isa nga magatuon sing Biblia sa iya agod mapabakod sia kon diin sia mahuyang agod nga mangin “mapagros [sia liwat] sa pagtuo.” (Tito 2:2) Ginahimo ini tanan bangod sa gugma kag indi sa tuyo nga silutan ang nakasala.

21. Paano mahimo atipanon ang pila ka kaso sang sala?

²¹ Ang mga gulang mahimo makahatag sing espirituwal nga bulig sa nanuhaytuhay nga paagi. Halimbawa, ibutang ta nga ang isa ka utod nga lalaki nga may problema sa pag-inom sang una nag-inom sing madamo katama sing isa ukon duha ka beses samtang nagaisahanon sia sa balay. Ukon ayhan ang isa nga madugay na nga nagbiya sa paggamit sing tabako nagpanigarilyo liwat sing tago sing isa ukon duha ka beses bangod sa kaluyahon. Bisan pa nangamuyo sia kag nagapati nga ginpatawad na sia sang Dios, dapat niya gihapon pangayuon ang bulig sang gulang agod nga indi niya mangin batasan ang paghimo sining sala. Ini nga problema puede atipanon sang isa ukon duha ka gulang. Apang, dapat pahibaluon sang (mga) gulang ang nagadumala nga manugtatap, basi may iban pa nga butang nga nadalahig.

22, 23. Ngaa dapat mo padayon nga batunon ang disiplina sang Dios?

²² Agod matigayon ang kahamuot sang Dios, dapat talupangdon sang kada Cristiano ang disiplina ni Jehova. (1 Timoteo 5:20) Busa, iaplikar ang bisan ano nga pagtadlong nga mabaton mo kon nagatuon ka sing Kasulatan kag sing Cristianong mga publikasyon ukon kon nagapamati ka sing laygay sa mga miting, asambleya, kag kombension sang katawhan ni Jehova. Magpabilin nga mabinantayon sa paghimo sang kabubut-on ni Jehova. Nian ang disiplina sang Dios magabulig sa imo nga mahuptan ang isa ka espirituwal nga balwarte—isa ka mabakod kaangay pader nga depensa batok sa sala.

²³ Ang pagbaton sang disiplina gikan sa Dios magabulig sa imo nga magpabilin sa iya gugma. Matuod, ang iban ginsikway sa Cristianong kongregasyon, apang indi ini kinahanglan nga matabo sa imo kon ‘ginaamligan mo ang imo tagipusuon’ kag ‘nagalakat ka subong maalam nga tawo.’ (Hulubaton 4:23; Efeso 5:15) Apang, kon disfellowship ka karon, ngaa indi ka maghimo sing mga tikang agod makapanumbalik? Luyag sang Dios nga ang tanan nga nagdedikar sa iya magsimba sa iya sing matutom kag may “kasadya sa tagipusuon.” (Deuteronomio 28:47) Sarang mo ini mahimo sa walay katubtuban kon pirme mo ginabaton ang disiplina ni Jehova.—Salmo 100:2.