7. Mas maayo ang mga kasuguan sang Ginharian sang Dios

Ang mga gobierno nagahimo sing mga kasuguan para sa kaayuhan sang ila mga sakop. Ang Ginharian sang Dios may mga kasuguan man nga dapat tumanon sang mga sakop sini. Basaha ang 1 Corinto 6:9-11, dayon binagbinaga ini nga mga pamangkot:

• Ano sa banta mo ang resulta kon sundon sang tanan ang mga kasuguan sang Dios?a

• Insakto bala nga magpaabot si Jehova nga tumanon sang tanan nga sakop sang Ginharian ini nga mga kasuguan? Ngaa?

• Posible bala magbag-o ang mga wala nagasunod sa sini nga mga kasuguan?—Tan-awa ang bersikulo 11.

Madamo nga tawo ang nasaw-ahan nga istoryahan ang parte sa sex. Sa Biblia, kon ginaistoryahan ang parte sa sex, prangka ini pero indi sa bastos nga paagi. Makabenepisyo kita sa ginasiling sang Biblia, kay man si Jehova ang aton Manunuga. Gani kabalo gid sia kon ano ang pinakamaayo para sa aton. Ginatudluan niya kita kon ano ang dapat naton himuon para mapalipay sia kag kon ano ang makabulig sa aton para mabaton ang kabuhi nga wala sing katapusan.

1. Ano ang pagtamod ni Jehova sa sex?

Ang sex regalo halin kay Jehova. Gusto niya nga malipay sa sini ang lalaki kag babayi nga mag-asawa. Paagi sa sini nga regalo, makabata ang mag-asawa kag mapabutyag nila ang ila pagpalangga sa isa kag isa. Amo kon ngaa nagsiling ang Biblia: “Kabay nga magkalipay ka sa imo asawa nga ginpangasawa mo sang bataon ka pa.” (Hulubaton 5:18, 19) Gusto ni Jehova nga mangin matutom ang Cristiano nga mga mag-asawa sa isa kag isa, para indi sila makapanghilahi.—Basaha ang Hebreo 13:4.

2. Ano ang seksuwal nga imoralidad?

Ang Biblia nagsiling nga “ang mga nagahimo sang seksuwal nga imoralidad . . . indi makapanubli sang Ginharian sang Dios.” (1 Corinto 6:9, 10) Ang mga manunulat sang Biblia nga nagsulat sa Griego naggamit sang tinaga nga por·neiʹa para sa seksuwal nga imoralidad. Nalakip sa sini ang (1) seksuwal nga mga relasyona sang duha ka tawo nga wala makasal, (2) homoseksuwalidad, kag (3) bestialidad. Mapalipay naton si Jehova kag makabenepisyo kita kon ‘maglikaw kita sa seksuwal nga imoralidad.’—1 Tesalonica 4:3.

USISAA PA GID

3. Magpalagyo sa seksuwal nga imoralidad

Indi mahapos para sa matutom nga si Jose nga padayon nga mangin matinlo sa moral. Basaha ang Genesis 39:1-12, dayon binagbinaga ini nga mga pamangkot:

• Ngaa nagpalagyo si Jose? —Tan-awa ang bersikulo 9.

• Sa banta mo, insakto bala ang ginhimo ni Jose? Ngaa?

VIDEO: Palagyo sa Imoralidad (5:06)

Gusto ni Jehova nga isikway naton ang imoralidad. Basaha ang 1 Corinto 6:18, dayon binagbinaga ini nga mga pamangkot:

• Ano nga mga sitwasyon nga posible makahimo ang isa sing seksuwal nga imoralidad?

• Paano ka makapalagyo sa imoralidad?

4. Malikawan mo ang tentasyon

VIDEO: Batui ang Pagsulay Paagi sa Pagbasa sang Biblia (3:02)

• Sa video, ano ang ginhimo sang brother sang narealisar niya nga ang iya ginahunahuna kag ginahimo posible magresulta sa pagluib sa iya asawa?

Bisan ang matutom nga mga Cristiano nabudlayan kon kaisa nga mangin matinlo ang ila hunahuna. Paano mo malikawan nga magpamensar pirme sang imoral nga mga butang? Basaha ang Filipos 4:8, dayon binagbinaga ini nga mga pamangkot:

• Ano nga mga butang ang dapat naton hunahunaon?

• Paano ang pagbasa sang Biblia kag ang masako nga pag-alagad kay Jehova makabulig sa aton nga malikawan ang tentasyon nga maghimo sang sala?

5. Makabenepisyo gid kita kon sundon naton si Jehova

VIDEO: Kulang sa Maayo nga Paghangop (9:31)

• Ngaa nakalab-ot ang pamatan-on nga lalaki sa sitwasyon nga mahimo sia matentar?—Tan-awa ang Hulubaton 7:8, 9.

• Suno sa Hulubaton 7:23, 26, malain gid ang resulta sang seksuwal nga imoralidad. Kon padayon kita nga mangin matinlo sa moral, ano ang malikawan naton nga mga problema?

• Paano ang katinlo sa moral makabulig sa aton nga mabaton ang kabuhi nga wala sing katapusan?

Para sa iban, ang ginasiling sang Biblia parte sa homoseksuwalidad wala sing pagpalangga. Pero gusto ni Jehova, ang Dios sang gugma, nga ang tanan mabuhi sing wala katapusan. Para mabaton ini, dapat naton sundon ang iya mga ginasiling. Basaha ang 1 Corinto 6:9-11, dayon binagbinaga ini nga pamangkot:

• Sa pagtamod sang Dios, ang homoseksuwalidad lang bala ang malain?

Para mapalipay ang Dios, dapat kita maghimo sing mga pagbag-o. Makabenepisyo bala kita kon himuon naton ini? Basaha ang Salmo 19:8, 11, dayon binagbinaga ini nga mga pamangkot:

• Sa banta mo, husto bala ang ginasiling ni Jehova parte sa moral? Ngaa?

SUMARYO

Ang sex regalo halin kay Jehova kag para lang ini sa lalaki kag babayi nga mag-asawa.

Rebyu

• Ano ang nalakip sa seksuwal nga imoralidad?

• Ano ang makabulig para malikawan naton ang seksuwal nga imoralidad?

• Ano ang mga benepisyo kon sundon naton ang ginasiling ni Jehova parte sa moral?

DUGANG NGA IMPORMASYON

Usisaa kon ngaa importante sa Dios nga magpakasal ang lalaki kag babayi antes sila mag-upod.

“Ano ang Ginasiling sang Biblia Parte sa Pag-live-in?” (Artikulo sa website)

Hibalua kon ngaa ang ginasiling sang Biblia parte sa homoseksuwalidad wala nagapakita nga dumtan ang mga homoseksuwal.

“Sala Bala ang Homoseksuwalidad?” (Artikulo sa website)

Hibalua kon ngaa ang kasuguan sang Dios parte sa sex proteksion para sa aton.

“Ang Oral Sex Bala Pag-sex Gid?” (Artikulo sa website)

Sa eksperiensia nga “Ginarespeto Nila Ako,” basaha kon ano ang nagpabag-o sa isa ka homoseksuwal para mapalipay niya ang Dios.

“Ang Biblia Nagapabag-o sang Kabuhi” (Ang Lalantawan, Abril 1, 2011)

Sa bilog nga kalibutan, lainlain ang opinyon sang mga tawo parte sa ilimnon. Ang iban nagainom-inom kon kaisa upod sa ila mga abyan. Ang iban wala gid nagainom. Ang iban naman sobra gid mag inom asta mahubog sila. Ano ang ginasiling sang Biblia parte sa ilimnon?

1. Sala bala ang pag-inom sang makahulubog nga ilimnon?

Ang Biblia wala nagsiling nga sala ang pag-inom. Kundi, isa ini sa madamo nga regalo nga ginhatag sang Dios sa aton. Ang Biblia nagasiling nga ang ‘alak makapasadya sa tagipusuon sang tawo.’ (Salmo 104:14, 15) Mabasa sa Biblia nga may pila ka matutom nga lalaki kag babayi nga nag-inom sang alak.—1 Timoteo 5:23.

2. Ano ang laygay sang Biblia sa mga nagainom?

Indi gusto ni Jehova ang sobra nga pag-inom kag pagpahubog. (Galacia 5:21) Ang iya Pulong nagsiling: “Indi ka mangin palainom sing alak.” (Hulubaton 23:20) Kon gusto naton mag-inom—bisan isa lang kita—indi kita dapat mag-inom sing sobra nga indi na kita makapamensar sing maayo, indi na naton makontrol ang aton ginahambal kag ginahimo, ukon mahalitan na ang aton lawas. Kon indi na naton makontrol ang aton pag-inom, dapat determinado kita nga untatan ini.

3. Paano naton mapakita nga ginarespeto naton ang desisyon sang iban parte sa pag-inom?

Ang kada isa makadesisyon kon mainom sia ukon indi. Indi naton paghukman ang iban kon haganhagan lang ang ila pag-inom, kag indi man naton pagpiliton ang iban kon indi sila mag-inom. (Roma 14:10) Wala kita nagainom kon magaresulta ini sing problema sa iban. (Basaha ang Roma 14:21.) Ginahunahuna naton ‘indi ang aton kaayuhan, kundi ang kaayuhan sang iban.’—Basaha ang 1 Corinto 10:23, 24.

USISAA PA GID

4. Ikaw ang makadesisyon kon mainom ka ukon indi

Ano ang pagtamod ni Jesus parte sa pag-inom? Binagbinaga ang una niya nga milagro. Basaha ang Juan 2:1-11, dayon binagbinaga ini nga mga pamangkot:

• Sa sini nga milagro, ano ang matun-an naton sa pagtamod ni Jesus sa ilimnon kag sa mga nagainom sini?

• Wala nagsiling si Jesus nga malain ang pag-inom, gani ano dapat ang pagtamod sang Cristiano sa isa nga nagainom?

Pero indi buot-silingon nga puede na makainom ang isa ka Cristiano, pagusto na lang sia. Basaha ang Hulubaton 22:3, dayon binagbinaga ang masunod nga mga sitwasyon kon mainom ka ukon indi:

• Madrayb ka ukon maopereyt sang makina.

• Nagabusong ka.

• Ginsilingan ka sang doktor nga indi mag-inom.

• Nabudlayan ka kontrolon ang imo pag-inom.

• Ginadilian sang kasuguan sa inyo lugar ang pag-inom.

• Ang upod mo indi mag-inom kay nabudlayan sia sa pagkontrol sini sang una.

Maserbe ka bala sang ilimnon sa kasal ukon sa iban nga pagtilipon? Para mabuligan ka sa pagdesisyon, tan-awa ang VIDEO.

VIDEO: Maserbe Bala Ako sang Ilimnon? (2:41)

Basaha ang Roma 13:13 kag 1 Corinto 10:31, 32. Sa tapos mabasa ang kada bersikulo, binagbinaga ini nga pamangkot:

• Paano ini nga prinsipio makabulig sa imo sa pagdesisyon nga makapalipay kay Jehova?

5. Ikaw ang makadesisyon kon daw ano kadamo ang imo imnon

Kon mainom ka, tandai ini: Wala nagsiling si Jehova nga malain ang pag-inom, pero indi niya gusto ang sobra nga pag-inom. Ngaa? Basaha ang Oseas 4:11, 18, dayon binagbinaga ini nga pamangkot:

• Ano ang matabo kon sobra ang pag-inom sang isa?

Paano naton malikawan ang sobra nga pag-inom? Dapat kabalo kita sang aton masarangan, ukon limitasyon. Basaha ang Hulubaton 11:2, dayon binagbinaga ini nga pamangkot:

• Ngaa mas maayo nga limitahan mo ang kadamuon sang imo pag-inom?

6. Mauntatan mo ang sobra nga pag-inom

VIDEO: “Ginakapoy Na Ako sa Akon Kabuhi” (6:32)

• Sa video, ano ang epekto kay Dmitry kon makainom sia?

• Nauntatan niya bala dayon ang pag-inom?

• Ano ang nakabulig sa iya nga mauntatan ang sobra nga pag-inom?

Basaha ang 1 Corinto 6:10, 11, dayon binagbinaga ini nga mga pamangkot:

• Ano ang malain nga resulta kon palahubog ang isa?

• Ano ang nagapakita nga puede magbag-o ang isa nga palainom?

Basaha ang Mateo 5:30, dayon binagbinaga ini nga pamangkot:

• Ang buot silingon sang pag-utod sang kamot amo nga dapat may isakripisyo kita para mapalipay si Jehova. Ano ang himuon mo kon nabudlayan ka untatan ang sobra nga pag-inom?a

Basaha ang 1 Corinto 15:33, dayon binagbinaga ini nga pamangkot:

• Ano ang epekto sang imo mga abyan sa imo pag-inom?

SUMARYO

Naghatag si Jehova sing ilimnon para malipay kita, pero indi niya gusto ang sobra nga pag-inom kag pagpahubog.

Rebyu

• Ano ang pagtamod sang Biblia sa ilimnon?

• Ano ang malain nga resulta sang sobra nga pag-inom?

• Paano naton mapakita nga ginarespeto naton ang desisyon sang iban parte sa pag-inom?

DUGANG NGA IMPORMASYON

Paano makahimo sang husto nga desisyon ang mga pamatan-on parte sa pag-inom?

Pamensara ang Resulta Kon Mag-inom Ka (2:31)

Hibalua ang mga puede mo himuon para mauntatan ang sobra nga pag-inom.

“Ang Husto nga Pagtamod sa Ilimnon” (Ang Lalantawan, Enero 1, 2010)

Dapat bala mag-toast ang mga Cristiano?

“Mga Pamangkot Gikan sa mga Bumalasa” (Ang Lalantawan, Pebrero 15, 2007)

Sa eksperiensia nga “Daw Busluton Ako nga Dram,” basaha kon ano ang nagpabag-o sa isa ka palahubog.

“Ang Biblia Nagapabag-o sang Kabuhi” (Ang Lalantawan, Mayo 1, 2012)

Bisan pa palangga mo gid si Jehova kag nagatinguha ka nga likawan ang mga butang nga makapasubo sa iya, makasala ka gid kon kaisa. Pero, may pila ka sala nga malain ukon mabug-at gid. (1 Corinto 6:9, 10) Kon nakahimo ka sing mabug-at nga sala, tandai nga palangga ka gihapon ni Jehova, kag handa sia nga patawaron kag buligan ka.

1. Ano ang himuon naton para patawaron kita ni Jehova?

Nasubuan gid ang mga nagapalangga kay Jehova kon nakahimo sila sing mabug-at nga sala. Pero nakahatag sa ila sing paumpaw ang ginsiling ni Jehova sa iya katawhan: “Bisan pa ang inyo mga sala mapula, papution ini kaangay sang niebe.” (Isaias 1:18) Kon nagahinulsol gid kita, patawaron kita ni Jehova. Paano naton mapakita nga nagahinulsol kita? Bangod ginhinulsulan gid naton ang aton mga sala, ginalikawan naton ang paghimo sing malain kag ginapangabay ang pagpatawad ni Jehova. Dayon ginatinguhaan naton nga bag-uhon ang sala nga panghunahuna ukon batasan nga nagaresulta sa paghimo sang sala kag ginasunod naton ang mga sugo ni Jehova.—Basaha ang Isaias 55:6, 7.

2. Paano ginagamit ni Jehova ang mga gulang para buligan kita kon nakasala kita?

Kon nakahimo kita sing mabug-at nga sala, nagsiling si Jehova nga ‘magtawag kita sang mga gulang sang kongregasyon.’ (Basaha ang Santiago 5:14, 15.) Palangga sini nga mga gulang si Jehova kag ang mga nagaalagad sa iya. Kabalo sila kon paano kita buligan para mabalik ang aton maayo nga kaangtanan kay Jehova.—Galacia 6:1.

Paano kita ginabuligan sang mga gulang kon makahimo kita sing mabug-at nga sala? Duha ukon tatlo ka gulang ang mabulig sa aton, kag gamiton nila ang Biblia. Laygayan nila kita kag palig-unon para malikawan naton nga makasala liwat. Para maproteksionan ang kongregasyon sa malain nga impluwensia, ginasikway sang mga gulang sa kongregasyon ang isa nga nakahimo sang mabug-at nga sala kag wala nagahinulsol.

USISAA PA GID

3. Mabuligan kita kon isugid naton ang aton sala

Masubuan gid si Jehova kon makahimo kita sing sala, gani dapat naton ini isugid sa iya. Basaha ang Salmo 32:1-5, dayon binagbinaga ini nga pamangkot:

• Ngaa mas maayo nga isugid naton kay Jehova ang aton mga sala imbes nga taguon ini?

VIDEO: “Ang Ginahigugma ni Jehova Ginadisiplina Niya” (3:01)

• Sa video, paano ginbuligan sang mga gulang si Canon nga magbalik kay Jehova?

Dapat naton isugid sa mga gulang kon ano ang matuod, kay handa sila nga buligan kita. Basaha ang Santiago 5:16, dayon binagbinaga ini nga pamangkot:

• Ngaa mas mahapos kita buligan sang mga gulang kon isugid naton sa ila ang matuod?

4.Ginapakitaan ni Jehova sing kaluoy ang mga nakasala

Kon ang isa nakahimo sing mabug-at nga sala kag indi na niya gusto sundon ang mga talaksan ni Jehova, ginasikway sia sa kongregasyon, kag wala kita nagapakig-upod sa iya. Basaha ang 1 Corinto 5:6, dayon binagbinaga ini nga pamangkot:

• Pareho sang lebadura nga nagapaalsa sang tinapay, ano ang epekto sa kongregasyon kon nagapakig-upod gihapon kita sa nakasala nga wala nagahinulsol?

Paano ang pagpakig-angot ni Jehova sa mga nakasala nagapakita nga makatarunganon sia, maluluy-on, kag mapinalanggaon?

5. Ginapatawad kita ni Jehova kon nagahinulsol kita

Si Jesus naggamit sang ilustrasyon para maintiendihan naton ang ginabatyag ni Jehova kon nagahinulsol ang isa. Basaha ang Lucas 15:1-7, dayon binagbinaga ini nga pamangkot:

• Ano ang ginatudlo sini sa imo parte kay Jehova?

Basaha ang Ezequiel 33:11, dayon binagbinaga ini nga pamangkot:

• Ano ang dapat naton himuon nga nagapakita nga nagahinulsol kita?

SUMARYO

Kon nakahimo kita sang mabug-at nga sala pero nagahinulsol gid kita kag determinado nga indi na maghimo sing malain, patawaron kita ni Jehova.

Rebyu

• Ngaa mas maayo kon isugid naton ang aton mga sala kay Jehova?

• Ano ang dapat naton himuon para patawaron kita sa aton mga sala?

• Kon nakahimo kita sing mabug-at nga sala, ngaa dapat kita magpabulig sa mga gulang?

DUGANG NGA IMPORMASYON

Hibalua kon paano nabatyagan sang isa ka lalaki ang kaluoy ni Jehova nga mabasa sa Isaias 1:18.

Indi Gid Pagduhaduhai ang Kaluoy ni Jehova (5:02)

Paano ginabuligan sang mga gulang ang mga nakahimo sang serioso nga sala?

“Kon Paano Ginapakitaan sang Gugma kag Kaluoy ang mga Nakahimo sang Serioso nga Sala” (Ang Lalantawan, Agosto 2024)

Binagbinaga kon paano ginapakitaan sing gugma kag kaluoy ang mga nakasala nga wala nagahinulsol.

“Kon Paano Ginabuligan ang mga Ginsikway sa Kongregasyon” (Ang Lalantawan, Agosto 2024)

Sa eksperiensia nga “Dapat Ako Magbalik kay Jehova,” hibalua kon paano ginbuligan ni Jehova ang isa ka lalaki nga magbalik sa kamatuoran.

“Ang Biblia Nagapabag-o sang Kabuhi” (Ang Lalantawan, Abril 1, 2012)