Ining Maayong Balita Kinahanglan Ibantala Anay

“Sa tanan nga kapungsuran ang maayong balita kinahanglan ibantala anay.” ​—⁠MARCOS 13:⁠10.

1, 2. Ano ang tanda sang mga Saksi, kag ngaa?

NGAA padayon gid nga nagabantala ang mga Saksi ni Jehova? Pat-od gid nga kilala kita sa bug-os nga kalibutan bangod sang aton publiko nga ministeryo, sa balay-balay man, sa mga dalan, ukon sa dipormal nga mga paagi. Sa tagsa ka nagakaigo nga paagi, ginapakilala naton ang aton kaugalingon subong mga Saksi kag ginatinguhaan nga ipaalinton sing mataktikanhon ang maayong balita nga ginapakabahandi naton. Sa katunayan, makasiling kita nga ini nga ministeryo amo ang tanda naton!​—⁠Colosas 4:⁠6.

² Hunahunaa lamang​—⁠kon ang mga tawo makakita sa ila lugar sing isa ka grupo sang nakapanapot sing maayo nga mga lalaki, mga babayi, kag kabataan nga may dala nga mga bag, ano sa masami ang una nila nga ginahunahuna? Ini bala, ‘O, yari na naman ang mga Katoliko (ukon mga Ortodokso)!’ ukon, ‘Yari na naman ang mga Pentecostal (ukon mga Baptist)!’ Indi. Nahibaluan sang mga tawo nga wala nagabuhat sing balay-balay nga ministeryo ang bug-os nga mga pamilya sa sina nga mga relihion. Ayhan ang iban nga relihioso nga mga grupo nagapadala sing pila ka “misyonero” para sa duha ka tuig nga hilikuton pakadto sa pila ka lugar, apang ang mga miembro sang ila organisasyon wala nagapakigbahin sa bisan anong amo sina nga ministeryo. Mga Saksi ni Jehova lamang ang kilala sa bug-os nga kalibutan bangod sang ila kakugi sa pagpaalinton sang ila mensahe sa iban sa tagsa ka nagakaigo nga okasyon. Kag kilala sila bangod sang ila mga magasin, Ang Lalantawan kag Magmata!​—⁠Isaias 43:​10-12; Binuhatan 1:⁠8.

Kabaliskaran sa mga Klero sang Cristiandad

 3, 4. Paano masunson nga ginalaragway sang media ang mga klero sang Cristiandad?

³ Sa kabaliskaran gid, liwat kag liwat nga ginapakita sang mga balita nga madamo sa mga klero sa iban nga kadutaan ang mga pedophile (nagabuhat sing seksuwal nga paghulid sa kabataan), imoral nga mga suwitik, kag madaya. Ang ila mga buhat sa unod kag ang ila maluho kaayo nga mga estilo sang pagkabuhi dayag nga makita sang tanan. Ginpabutyag ini sang isa ka popular nga manunulat sang kanta sa iya ambahanon nga natig-uluhan sing “Magasuksok Bala si Jesus sing Rolex [malahalon katama nga relo nga bulawan] sa Iya Programa sa Telebisyon?” Namangkot sia: “Si Jesus bala mangin politiko kon magbalik Sia sa Duta? Mapatindog bala sia sang Iya ikaduha nga balay sa Palm Springs [isa ka manggaranon nga komunidad sa California] kag ilikom ang Iya bili?” Nagakaigo gid ang mga pinamulong ni Santiago: “Nangabuhi kamo sing maluho sa ibabaw sang duta kag nagpatuyang sa pagpangalipay sa unod. Ginpatambok ninyo ang inyo mga tagipusuon sa adlaw sang pagpamatay.”​—⁠Santiago 5:5; Galacia 5:​19-21.

⁴ Ang pagpakig-upod sang mga klero sa mga politiko kag bisan ang pag-entra sa mga piniliay subong mga kandidato sa politika nagabuyagyag sa ila subong modernong-adlaw nga mga escriba kag mga Fariseo. Sa amo man nga tion, sa mga pungsod subong sang Estados Unidos kag Canada, ang relihioso nga mga grupo nagakaubusan sang kuwarta bangod sang mataas nga galastuhan sa demanda kag mga pamatbat batok sa mga klero, bangod sang ila malaw-ay nga mga buhat upod sa mga bata kag mga hamtong.​—⁠Mateo 23:​1-3.

 5. Ngaa ang klero sang Cristiandad wala mapamatud-an subong ang “matutom kag mainandamon nga ulipon”?

⁵ Makasiling gid si Jesus sing husto sa mga klero sang panahon niya: “Kailo kamo, mga escriba kag mga Fariseo, mga salimpapaw! kay kaangay kamo sang mga lulubngan nga ginpaputi, nga sa guwa nagapakita nga matahom apang sa sulod puno sang mga tul-an sang mga minatay kag sang tanan nga sahi sang kahigkuan. Sa sina nga paagi kamo man, sa guwa gid, nagapakita nga matarong sa mga tawo, apang sa sulod puno kamo sang pagkasalimpapaw kag kalautan.” Busa, wala ginhatag sang Dios sa mga klero sang Cristiandad, Katoliko man, Protestante, Ortodokso, ukon iban pa nga indi katapo sang bisan anong pormal nga relihiosong organisasyon, ang sugo nga ibantala ang maayong balita. Wala sila mapamatud-i subong ang gintagna nga “matutom kag mainandamon nga ulipon.”​—⁠Mateo 23:​27, 28; 24:​45-47.

Ngaa Ibantala Anay ang Maayong Balita?

 6. Anong mga hitabo ang mahanabo sa dili madugay?

⁶ Sa iya malip-ot nga bersion sang sugo ni Jesus nga ibantala ang maayong balita sa tanan nga kapungsuran, si Marcos lamang ang naggamit sang tinaga nga “anay.” (Marcos 13:10; ipaanggid sa Mateo 24:14.) Ang bersion ni J. B. Phillips mabasa: “Kay sa wala pa mag-abot ang katapusan ang ebanghelyo kinahanglan iwali sa tanan nga kapungsuran.” Ang adberbiyo nga paggamit sang “anay” nagakahulugan nga magasunod ang iban pa nga mga hitabo sa bug-os kalibutan nga hilikuton sa pag-ebanghelyo. Yadtong mga hitabo magalakip sa ginsaad nga dakung kapipit-an kag sa matarong nga pagginahom ni Cristo sa ibabaw sang bag-ong kalibutan.​—⁠Mateo 24:​21-31; Bugna 16:​14-16; 21:​1-4.

 7. Ngaa luyag sang Dios nga ibantala anay ang maayong balita?

⁷ Gani ngaa luyag sang Dios nga ibantala anay ang maayong balita? Ang isa ka rason amo nga sia isa ka Dios sang gugma, katarungan, kaalam, kag gahom. Bilang katumanan sang pinamulong ni Jesus nga narekord sa Mateo 24:14 kag Marcos 13:​10, masalapuan naton ang tumalagsahon nga pagpadayag sini nga mga kinaiya ni Jehova. Usisaon naton ini sa malip-ot sing isa-isa kag tan-awon kon paano ini nagahilabot sa pagbantala sang maayong balita.

Ang Maayong Balita kag ang Gugma ni Jehova

 8. Paano ang pagbantala sang maayong balita isa ka pagpadayag sang gugma sang Dios? (1 Juan 4:​7-16)

⁸ Paano ginapabanaag sang pagbantala sang maayong balita ang gugma sang Dios? Una sa tanan, bangod indi ini isa ka mensahe nga gintuyo lamang para sa isa ka rasa ukon grupo. Maayong balita ini para sa “tanan nga pungsod.” Ginahigugma gid sang Dios ang tawhanon nga panimalay nga ginpadala niya ang iya bugtong nga Anak sa duta agod mangin halad gawad para sa mga kasal-anan sang tanan nga katawhan, indi sa isa ka rasa lamang. Si apostol Juan nagsulat: “Ginhigugma gid sang Dios ang kalibutan sa bagay nga ginhatag niya ang iya bugtong nga Anak, agod nga ang bisan sin-o nga magtuo sa iya indi malaglag kundi may kabuhi nga walay katapusan. Kay ginpadala sang Dios ang iya Anak sa kalibutan, indi agod hukman ang kalibutan, kundi agod maluwas ang kalibutan paagi sa iya.” (Juan 3:​16, 17) Pat-od gid nga ang maayong balita, ang mensahe nga nagasaad sing isa ka bag-ong kalibutan nga may paghidait, paghiusa, kag katarungan, isa ka pamatuod sang gugma sang Dios.​—⁠2 Pedro 3:⁠13.

Ang Maayong Balita kag ang Gahom ni Jehova

 9. Ngaa wala gingamit ni Jehova ang gamhanan nga mga relihion sang Cristiandad sa pagbantala sang maayong balita?

⁹ Paano ginapadayag ang gahom ni Jehova sa pagbantala sang maayong balita? Binagbinaga ang masunod, sin-o ang gingamit niya sa pagtuman sini nga sugo? Ang labing gamhanan nga relihiosong organisasyon bala sang Cristiandad, subong ang Iglesia Katolika Romana ukon ang prominente nga mga denominasyon sang Protestante? Indi, indi sila kalipikado sa sini bangod sang pag-entra nila sa politika. (Juan 15:19; 17:14; Santiago 4:⁠4) Ang ila manggad kag ang ila mga kaangtanan kag impluwensia upod sa elitista nga nagagahom nga klase wala magpahamuot kay Jehova nga Dios, ni ang ila teolohiya nga naangot sing suod sa tradisyon. Indi kinahanglan ang tawhanon nga gahom agod mahimo ang kabubut-on sang Dios.​—⁠Zacarias 4:⁠6.

 10. Sin-o ang ginpili sang Dios nga magabantala?

¹⁰ Kaangay ini sa ginsiling ni apostol Pablo sa iya sulat sa kongregasyon sang Corinto: “Nakita ninyo ang pagtawag niya sa inyo, mga kauturan, nga indi madamong maalam sa undanon nga paagi ang gintawag, indi madamong gamhanan, indi madamong may dungganon nga pagkabun-ag; kundi ginpili sang Dios ang mga buangbuang sang kalibutan, agod mapakahuy-an niya ang mga maalam; kag ginpili sang Dios ang mga maluya sa kalibutan, agod mapakahuy-an niya ang mga makusog; kag ginpili sang Dios ang kubos nga mga butang sa kalibutan kag ang mga butang nga ginatamay, ang mga butang nga indi amo, agod mapawalay pulos niya ang mga butang nga amo, agod nga walay unod nga magpabugal sa itululok sang Dios.”​—⁠1 Corinto 1:​26-29.

 11. Anong mga katunayan nahanungod sa mga Saksi ang nagahimo sa ila nga pinasahi?

¹¹ Pila lamang ang manggaranon nga mga katapo sa tunga sang mga Saksi ni Jehova kag pat-od nga wala gid sing mga gamhanan sa politika. Ang ila lubos nga pagkawalaynadampigan sa politika nagakahulugan nga wala sila sing impluwensia sa sini. Sa kabaliskaran, masami sila nga nangin mga biktima sang malaut nga paghingabot nga ginsugyot sang mga lider sang relihion kag politika sa sining ika-20 nga siglo. Apang, walay sapayan sang mapintas nga paghingabot nga ginhimo batok sa ila sang mga disipulo sang Nasismo, Pasismo, Komunismo, nasyonalismo, kag butig nga relihion, ang mga Saksi wala lamang nagabantala sang maayong balita sa bug-os nga kalibutan kundi makatilingala man nga nagadugang ang ila kadamuon.​—⁠Isaias 60:⁠22.

 12. Ngaa nangin madinalag-on ang mga Saksi?

¹² Sa ano ginapatungod sang mga Saksi ang ila kadalag-an? Si Jesus nagsaad sa iya mga disipulo: “Magabaton kamo sing gahom kon ang balaan nga espiritu mag-abot sa inyo, kag mangin mga saksi ko kamo sa Jerusalem kag sa bug-os nga Judea kag Samaria kag tubtob sa pinakamalayo nga bahin sang duta.” Gani, ano gid bala ang ginhalinan sang ila kadalag-an? Si Jesus nagsiling: “Magabaton kamo sing gahom kon ang balaan nga espiritu mag-abot sa inyo.” Amo man sa karon, ang gahom gikan sa Dios, indi sa tawhanon nga ikasarang, ang nangin pangunang rason nga nagapaposible sang kadalag-an sang mga Saksi sa ila bug-os kalibutan nga ministeryo. Nagagamit sang daw pinakamaluya sa katawhan, ginahimo sang Dios ang pinakadaku nga hilikuton sa pagpanudlo sa maragtas.​—⁠Binuhatan 1:8; Isaias 54:⁠13.

Ang Maayong Balita kag ang Kaalam ni Jehova

 13. (a) Ngaa ang mga Saksi nagaalagad sing boluntaryo kag walay bayad? (b) Paano ginsabat ni Jehova ang hangkat ni Satanas?

¹³ Ang maayong balita ginabantala sang mga boluntaryo. Si Jesus nagsiling: “Ginbaton ninyo sa walay bayad, ihatag sa walay bayad.” (Mateo 10:⁠8) Busa, wala sing isa sa mga Saksi ni Jehova ang nagabaton sing sweldo tungod sang pag-alagad sa Dios, ni nagatinguha sila nga makabaton sini. Sa katunayan, wala gani sila sing ginakolekta nga kuwarta sa ila mga miting. Malipayon sila, paagi sa ila debotado nga dimakagod nga pag-alagad, sa paghatag sa Dios sing sabat sa iya manunumbong, nga si Satanas nga Yawa. Ang espiritu nga manugpamatok sang Dios sa katunayan nagsiling nga ang mga tawo indi magaalagad sa Dios nga may dimakagod nga motibo. Sa iya kaalam si Jehova naghatag sing dimabais nga sabat sa hangkat ni Satanas​—⁠minilyon ka matutom nga Cristianong mga Saksi ang nagabantala sang maayong balita sa balay-balay, sa mga dalan, kag sing dipormal.​—⁠Job 1:​8-11; 2:​3-5; Hulubaton 27:⁠11.

 14. Ano ang “tinago nga kaalam” nga ginapatuhuyan ni Pablo?

¹⁴ Ang isa pa ka pamatuod sang kaalam sang Dios sa pagpabantala sang maayong balita amo nga ang saad nga Ginharian mismo isa ka pagpadayag sang kaalam sang Dios. Si apostol Pablo nagsulat: “Karon nagahambal kami sing kaalam sa tunga sang mga hamtong, apang indi sa kaalam sining sistema sang mga butang ukon ila sang mga gumalahom sining sistema sang mga butang, nga pakawalaon. Kundi nagahambal kami sang kaalam sang Dios sa isa ka sa sagrado nga likom, ang tinago nga kaalam, nga natangduan nga daan sang Dios sa wala pa ang sistema sang mga butang para sa aton himaya.” Inang “tinago nga kaalam” nagapatuhoy sa maalamon nga paagi sang Dios sa pagtapos sang pagrebelde nga ginsugdan sa Eden. Ang kaalam sinang sagrado nga likom ginpahayag kay Jesucristo, nga may importante nga bahin sa pagbantala sang maayong balita sang Ginharian sang Dios.⁠a​—⁠1 Corinto 2:​6, 7; Colosas 1:​26-28.

Ang Maayong Balita kag ang Katarungan sang Dios

 15. Paano naton nahibaluan nga si Jehova amo ang Dios sang katarungan? (Deuteronomio 32:4; Salmo 33:⁠5)

¹⁵ Ilabi na may kaangtanan sa katarungan nga makita naton ang pagkaimportante sang tinaga nga “anay” sa Marcos 13:10. Si Jehova isa ka Dios sang katarungan nga ginatimbangan sing mahigugmaon nga kalulo. Nagasiling sia paagi sa iya manalagna nga si Jeremias: “ ‘Tuguti ang isa nga nagapakataas sang iya kaugalingon nga magpakataas nahanungod sa iya kaugalingon bangod sini gid nga butang, ang may paghangop kag may ihibalo sa akon, nga ako amo si Jehova, ang Isa nga nagahikot sing mahigugmaon nga kalulo, katarungan kag pagkamatarong sa duta; kay sa sining mga butang nagakalipay ako,’ siling ni Jehova.”​—⁠Jeremias 9:⁠24.

 16. Paano mahimo iilustrar nga ang katarungan nagakinahanglan sang paghatag anay sing paandam?

¹⁶ Paano ang katarungan ni Jehova ginapakita may kaangtanan sa pagbantala sang maayong balita? Iilustar naton ini sa isa ka iloy nga nagluto sing manamit nga choco­late ­cake nga pagakaunon pag-abot sang mga bisita pagkahapon sina nga adlaw. Kon ibilin niya ini sa lamesa sa kusina nga wala man lang sing pasidaan sa iya mga anak kon san-o ini pagakaunon, ano ang natural nga huyog sang kabataan? Kita tanan nangin mga bata anay! Ang magagmay nga mga tudlo sang bata maluyag makatilaw sina nga cake! Karon kon ang iloy wala makahatag sing nagakaigo nga pasidaan, wala sia sing mabakod nga rason sa pagdisiplina. Sa pihak nga bahin, kon maathag niya nga ginsiling nga ang cake pagakaunon sa ulihi pag-abot sang mga bisita kag busa indi dapat pagtandugon, nian nakahatag sia sing maathag nga paandam. Kon may maglapas, may kinamatarong sia sa paghatag sing malig-on kag makatarunganon nga disiplina.​—⁠Hulubaton 29:⁠15.

 17. Paano ginpadayag ni Jehova ang katarungan sa pinasahi nga paagi sugod sang 1919?

¹⁷ Si Jehova, sa iya katarungan, indi magahimo sing hudisyal nga buhat batok sining malauton nga sistema sang mga butang nga wala anay nagahatag sing nagakaigo nga paandam. Busa, ilabi na sugod sang 1919, pagkatapos nga ang nahaunang inaway sa kalibutan nagdala sing “kasakit sang kalisdanan,” ginpalakat ni Jehova ang iya mga Saksi sa bug-os nga duta nga nagabantala sing makugi sang maayong balita. (Mateo 24:​7, 8, 14) Ang mga pungsod indi makapangangkon sing makatarunganon nga wala sila makahibalo sining tumalagsahon nga paandam.

Daw Ano ka Lapnag Gintuptupan ang Kalibutan?

 18. (a) Ano ang pamatuod nahanungod sa pagpanghikot sang mga Saksi sa nabaw-ing nga mga lugar? (b) Anong iban pa nga mga halimbawa ang imo nahibaluan?

¹⁸ Ang isa ka butang nga nagapakita sang pagkaepektibo sining bug-os kalibutan nga hilikuton sa pagtudlo sarang makita gikan sa libro nga Last Places​—⁠A Journey in the North. Ang awtor sini nagasugid nga sang gintan-aw niya ang mga tsart sa dagat para sa nabaw-ing nga pulo sang Foula, isa sa mga Kapuluan sang Shetland sa aminhan sang Scotland, ginpakita sang mga tsart nga “sa bug-os nga palibot sang pulo WKS (­wrecks ukon kagulub-an), RKS (­rocks ukon kabatuhan), LDGS (ledg­es ukon nagaulhot nga mga bato), kag OBS (obstructions ukon mga bara).” Ini “nagapaandam sa manugpadulong nga marinero nga magpalayo. Ang katubigan sang Foula makahaladlok katama nga mine­field, nga nagahimo sa pulo nga ginadumilian sa mga manugyate, mga manuglakbay sa kaadlawon, kag bisan sa daku nga grupo sang Reyna sang Inglaterra nga nagahimo sing mga pantalan, eskwelahan, kbp., apang indi​—⁠nabalitaan ko pila ka adlaw lamang​—⁠sa mga Saksi ni Jehova.” Sia nagpadayon: “Kon paano nila ginaid-id ang mga iskwater sang dalagku nga siudad kag ang imol nga mga pungsod sa pagpangita sing mga makombertir, nangumbertir man sila para sa ila pagtuo sa nabaw-ing nga Foula.” Ginsugid niya nga ang isa ka lokal nga pumuluyo, si Andrew, may isa ka kopya sang Ang Lalantawan nga ginbilin sa ganhaan sang iya balay mga pila ka bulan antes. Nian sia nagdugang: “Isa ka semana sang ulihi nakakita ako sing isa ka kopya sang [Magmata! sa Danes] sa Faeroes [mga kapuluan sa North Sea] kag duha ka bulan sang ulihi sing isa ka kopya sang [Ang Lalantawan sa Danes] sa Nuuq, Greenland.” Daw ano ka tumalagsahon nga pamatuod sa makugi nga hilikuton sang mga Saksi ni Jehova sa sadtong naaminhan nga mga rehiyon!

Ano ang Nagatiklod sa mga Saksi sa Pagpadayon sa Pagbantala?

 19, 20. (a) Ano ang nagatiklod sa mga Saksi sa pagpadayon sa pagbantala? (b) Anong mga pamangkot ang masunod nga pagasabton?

¹⁹ Sa pagkamatuod, indi mahapos ang magbantala sa balay-balay sa mga dumuluong, bisan nga pila ka tuig na nga ang isa nangin Saksi. Nian ano ang nagatiklod sa sining mga Cristiano sa pagpadayon sa pagbantala? Ang ila Cristianong dedikasyon kag paghantop sang katungdanan. Si Pablo nagsulat: “Karon, kon ginawali ko ang maayong balita, wala sing rason nga magpabugal ako, kay ang kinahanglanon gintugyan sa akon. Tunay gid, kailo ako kon indi ko pag-iwali ang maayong balita!” Ang matuod nga mga Cristiano may mensahe nga nagakahulugan sing kabuhi, gani paano nila taguon ang mensahe gikan sa iban nga mga tawo? Ang prinsipio mismo sang kasal-anan sa dugo tungod sa indi paghatag sing paandam sa panahon sang katalagman isa ka nagapahulag nga rason agod ibantala ang maayong balita.​—⁠1 Corinto 9:16; Ezequiel 3:​17-21.

²⁰ Paano, nian, ginabantala ang maayong balita? Ano ang panguna nga rason sa kadalag-an sang mga Saksi? Anong mga bahin sang ila ministeryo kag organisasyon ang nagabulig sa pagpakilala sa ila subong ang matuod nga relihion? Sabton sang masunod nga artikulo ina nga mga pamangkot.

[Footnote]

Madumduman Mo Bala?

◻ Ano ang nagapakilala sa mga Saksi ni Jehova gikan sa mga klero?

◻ Paano ang pagbantala nagapabanaag sang gugma, gahom, kag kaalam sang Dios?

◻ Paano ang pagbantala sang maayong balita nagapabanaag sang katarungan sang Dios?

◻ Ano ang nagatiklod sa mga Saksi ni Jehova sa pagpadayon sa ila ministeryo?

[Mga piktyur sa pahina 15]

Bisan kon daw ano ka baw-ing ang mga tawo, luyag sang mga Saksi ni Jehova sila lab-uton