Si Jehova Nagalugpay Kon Ginatilawan Kita

1, 2. Paano si Jehova nagalugpay sa aton kon ginatilawan kita, kag ano ang ginapasalig sa aton sang iya Pulong?

ISA ka pamatan-on nga utod nga tawgon naton nga Eduardo ang nagsugid sang iya mga kabalaka kay Stephen nga isa ka gulang nga may asawa. Ginapamensaran ni Eduardo ang parte sa iya nabasa sa 1 Corinto 7:28: “Ang mga nagaminyo may kapipit-an sa unod.” Namangkot sia, “Ano ining ‘kapipit-an,’ kag paano ko ini atubangon kon mangasawa na ako?” Antes ginsabat ni Stephen ang pamangkot, ginpangabay niya anay si Eduardo nga binagbinagon ang isa pa nga ginsulat ni apostol Pablo, nga si Jehova “ang Dios nga nagahatag sang tanan nga sahi sang lugpay, nga nagalugpay sa aton sa tanan naton nga mga pagtilaw [“kapipit-an,” footnote].”—2 Cor. 1:3, 4.

² Si Jehova isa gid ka mahigugmaon nga Amay, kag ginalugpayan niya kita sa tion sang kabudlayan. Mahimo nga naeksperiensiahan mo mismo ang bulig kag pagtuytoy sang Dios, nga masami paagi sa iya Pulong. Makasigurado kita nga luyag niya ang pinakamaayo para sa aton, kay amo man ini ang luyag niya para sa iya mga alagad sang una.—Basaha ang Jeremias 29:11, 12.

 3. Ano nga mga pamangkot ang binagbinagon naton?

³ Kon nahibaluan naton ang mga kabangdanan sang aton mga problema ukon kapipit-an, mas mahapos sa aton nga atubangon ini. Gani kon nahibaluan sang mag-asawa ukon pamilya ang kabangdanan sang ila kapipit-an, maatubang nila ini sing madinalag-on. Ano ang pila ka kabangdanan sang “kapipit-an sa unod” nga ginsambit ni Pablo? Ano nga mga halimbawa sa Biblia kag sa aton tion ang makabulig para malugpayan kita? Binagbinagon naton ini.

4, 5. Ano ang pila ka kabangdanan sang “kapipit-an sa unod”?

⁴ Amo ini ang ginsiling sang Dios sa umpisa sang kasaysayan sang tawo: “Bayaan sang lalaki ang iya amay kag ang iya iloy kag magahiusa sia sa iya asawa, kag sila mangin isa ka unod.” (Gen. 2:24) Ginsiling ini ni Jehova sang ginkasal niya ang una nga mag-asawa. Pero, bangod sang pagkadihimpit, ang pagpakasal kag pagtukod sang bag-o nga pamilya mahimo bangdan sang mga problema. (Roma 3:23) Halimbawa, kon wala pa sing bana ang isa, may ginapasakupan sia, nga sa masami ang iya mga ginikanan. Pero kon mamana na sia, ang iya bana amo na ang iya mangin ulo suno sa Pulong sang Dios. (1 Cor. 11:3) Ang pila ka bag-o nga bana kag asawa nabudlayan sa sini. Suno sa Pulong sang Dios, dapat batunon sang asawa nga ang iya bana amo ang magapanguna sa iya, indi ang iya mga ginikanan. Ang mga ugangan kag mga bayaw mahimo man bangdan sang kapipit-an sang bag-ong kasal.

⁵ Masami nga nagadugang ang mga kabalaka kon pahibaluon sang asawa ang iya bana, “Nagabusong ako.” Ang kalipay sang mag-asawa kay makabata na sila masami nga may upod nga kabalaka sa posible nga mga komplikasyon sa tion sang pagbusong ukon sa ulihi. Kag paligban man nila ang mga galastuhan subong kag sa palaabuton. Kon magbata na ang asawa, madamo pa gid nga pagbag-o ang dapat himuon. Ang tion kag atension sang bag-o nga iloy halos ara na tanan sa iya bata. Madamo nga bana ang nagasunggod bangod masako ang ila asawa sa pag-atipan sa ila bata. Nadugangan man ang responsibilidad sang bag-o nga amay bangod may bag-o nga miembro ang ila pamilya nga dapat atipanon kag amanan.

6-8. Ngaa mahimo mangin kapipit-an sa mag-asawa kon indi sila makabata?

⁶ Tuhay naman nga kapipit-an ang ginaatubang sang pila ka mag-asawa. Indi sila makabata bisan pa gusto gid nila. Kon ang asawa indi magbusong, mahimo nga masubuan gid sia. Ang pagpakasal ukon ang pagtigayon sang bata mahimo bangdan sang mga kabalaka, pero isa man ka “kapipit-an sa unod” kon wala sing bata ang mag-asawa. (Hulu. 13:12) Sang panahon sang Biblia, ang pagkabaw-as isa ka kahuy-anan. Si Raquel, nga asawa ni Jacob, nasubuan gid kay makabata ang iya utod pero sia indi. (Gen. 30:1, 2) Ang mga misyonero nga nagaalagad sa mga pungsod nga kinaandan ang daku nga pamilya masami nga ginapamangkot kon ngaa wala sila bata. Bisan pa ipaathag nila ini sing maayo, mahimo nga silingan gihapon sila, “Ahay, ipangamuyo na lang namon kamo.”

⁷ Binagbinaga ang natabo sa isa ka utod sa England nga gusto gid kuntani makabata pero wala gid asta na lang nga nag-menopause sia. Gin-aku niya nga grabe gid ang iya kasubo, kay ang iya handum indi na niya matigayon subong. Nagdesisyon sila sang iya bana nga mag-adoptar. Pero, siling niya: “Nasubuan gihapon ako. Lain gid man siguro kon may kaugalingon gid ako nga bata.”

⁸ Ang Biblia nagasiling nga ang Cristiano nga babayi “pagaamligan paagi sa pagpanganak.” (1 Tim. 2:15) Wala ini nagapahangop nga ang pagpanganak nagaresulta sa pagtigayon sing kabuhi nga wala sing katapusan. Sa baylo, ginapahangop sini nga kon ang babayi may bata na nga dapat atipanon kag masako sa pag-atipan sang iya pamilya, mahimo nga malikawan niya ang pagkutsokutso kag paghilabot sa iban. (1 Tim. 5:13) Pero, may mga kapipit-an gihapon sia nga maatubang.

 9. Ngaa masiling naton nga isa gid ka pagtilaw ang pagkapatay sang tiayon?

⁹ Kon ginahambalan ang mga kapipit-an sa pag-asawahay, mahimo nga indi naton mapensaran ang pagkapatay sang pinalangga. Pero isa gid ini ka pagtilaw kag madamo ang nakaeksperiensia sini. Mahimo nga wala gid ginapaabot sang mga napatyan sing tiayon nga matabo ini sa ila. Pero, nagatuo gid ang mga Cristiano sa promisa ni Jesus nga pagkabanhaw. (Juan 5:28, 29) Ano ang mabulig sini nga promisa sa buhi nga tiayon? Makalugpay ini sa iya. Paagi sa Pulong sang aton mahigugmaon nga Amay, ginabuligan niya kag ginalugpayan ang mga nagaatubang sang kapipit-an. Binagbinagon naton kon paano ginlugpayan ni Jehova ang pila niya ka alagad kag kon paano sila nakabenepisyo.

10. Paano nalugpayan si Hana sa iya kasubo? (Tan-awa ang piktyur sa umpisa sini nga artikulo.)

¹⁰ Si Hana, nga pinalangga nga asawa ni Elkana, nakaatubang sing pagtilaw. Baw-as sia, pero ang isa pa ka asawa ni Elkana, nga si Penina, makabata. (Basaha ang 1 Samuel 1:4-7.) Ginayaguta ni Penina si Hana “kada tuig.” Nagpasubo gid ini kay Hana. Para maumpawan sia, ginpangamuyo niya ini kay Jehova. Ang matuod, ‘nagpangamuyo sia sing malawig kay Jehova.’ Nagalaum bala sia nga ihatag ni Jehova ang iya pangabay? Posible. Gani, “wala na sia nagkalisod.” (1 Sam. 1:12, 17, 18) Nagsalig sia nga masarangan ni Jehova nga pahanabuon nga makabata sia, ukon may iban pa nga paagi si Jehova para malugpayan sia.

11. Paano makalugpay sa aton ang pagpangamuyo?

¹¹ Samtang indi kita himpit kag ari kita sa sistema nga ginagamhan ni Satanas, indi madula ang mga pagtilaw kag mga kapipit-an. (1 Juan 5:19) Pero, nalipay gid kita nga si Jehova amo “ang Dios nga nagahatag sang tanan nga sahi sang lugpay”! Ang isa ka paagi nga makabaton kita sing bulig para maatubang naton ang mga pagtilaw ukon mga kapipit-an amo ang pagpangamuyo sa iya. Ginpabutyag ni Hana kay Jehova ang tanan niya nga kabalaka. Sing kaanggid, kon makaatubang kita sang kapipit-an, indi bastante nga ihambal lang naton kay Jehova ang aton ginabatyag. Dapat kita mag-ampo sa iya, buot silingon, hanuot gid naton nga ipabutyag ang tanan naton nga kabalaka.—Fil. 4:6, 7.

12. Paano nalugpayan ang balo nga si Ana?

¹² Bisan pa nagabatyag kita nga may kulang sa aton kabuhi bangod wala kita sang bata ukon napatay ang aton pinalangga, malugpayan gihapon kita. Sang panahon ni Jesus, may isa ka balo nga manalagna nga si Ana. Napatay sadto ang iya bana sang pito ka tuig pa lang sila nga mag-asawahay. Wala ginasiling sang Biblia kon bala may bata sila. Ano ang ginahimo ni Ana bisan pa 84 anyos na sia? Ang Lucas 2:37 nagasiling: “Wala gid sia nagapalya sa pagsimba, pagpuasa kag pag-ampo adlaw kag gab-i sa templo.” Huo, nalugpayan si Ana paagi sa pagsimba kay Jehova kag nakahatag ini sa iya sing kalipay.

13. Paano makahatag sing lugpay ang matuod nga mga abyan kon indi ini mahimo sang aton pamilya? Maghatag sing halimbawa.

¹³ Kon magpakig-upod kita sa aton mga kauturan, makakita kita sing matuod kag suod nga mga abyan. (Hulu. 18:24) Nadumduman ni Paula ang iya grabe nga kasubo sang lima pa lang sia ka tuig sang ginbiyaan sang iya iloy ang kamatuoran. Mabudlay ini nga pagtilaw. Pero napalig-on gid sia sa pag-ulikid sa iya sang isa ka payunir sa ila kongregasyon nga si Ann, nga nagbulig sa iya nga magbakod ang iya espirituwalidad. “Bisan pa indi kami paryentihanay ni Ann, napalig-on gid ako sa iya gugma kag pag-ulikid,” paathag ni Paula. “Nakabulig ini sa akon nga padayon nga mag-alagad kay Jehova.” Padayon nga nag-alagad si Paula sing matutom. Kag malipayon gid sia nga kaupod na niya liwat ang iya iloy sa pag-alagad sa kongregasyon. Malipayon man si Ann, kay daw nangin iloy sia ni Paula paagi sa pagbulig sa iya nga mangin malig-on.

14. Ano nga mga pagpakamaayo ang maeksperiensiahan sang mga nagalugpay sa iban?

¹⁴ Kon nagaulikid kita sa iban, mahimo nga malipatan naton ang pila sa aton ginakabalak-an. Ang mga utod nga babayi, may bana man ukon wala, nakahibalo sang kalipay nga resulta sang pagbantala sang maayong balita bilang masigkamanugpangabudlay sang Dios. Luyag nila padunggan ang Dios paagi sa paghimo sang iya kabubut-on. Ang pagpakigbahin sa ministeryo nakapaumpaw sa iban. Kon nagaulikid kita sa mga tawo sa aton teritoryo kag sa aton mga kauturan, makabulig ini nga mangin suod ang kongregasyon. (Fil. 2:4) Maayo nga halimbawa sa sini si apostol Pablo. Daw nangin ‘iloy sia nga nagbatiti’ sa mga kauturan sa kongregasyon sang Tesalonica; kag daw nangin amay man sia nga nagpalig-on sang ila espirituwalidad.—Basaha ang 1 Tesalonica 2:7, 11, 12.

15. Sin-o ang may panguna nga responsibilidad sa pagtudlo sa kabataan sang kamatuoran?

¹⁵ Dapat man naton binagbinagon kon paano naton malugpayan kag mabuligan ang mga pamilya. May mga tion nga ang mga bag-uhan nagapangabay sa hamtong nga mga manugbantala nga buligan sila sa pagtudlo sa ila kabataan sang kamatuoran, kag gusto pa gani nila kon kaisa nga ini nga mga manugbantala ang magdumala sang pagtuon sang Biblia sa ila bata. Suno sa Kasulatan, ang may panguna nga responsibilidad sa pagtudlo kag paghanas sa kabataan amo ang mga ginikanan. (Hulu. 23:22; Efe. 6:1-4) Sa pila ka sitwasyon, mahimo nga kinahanglan nila ang bulig. Pero wala sini ginakuha ang responsibilidad sang mga ginikanan. Gani, importante ang regular nga komunikasyon sa pamilya.

16. Kon nagabulig sa kabataan, ano ang dapat dumdumon?

¹⁶ Kon magdesisyon ang ginikanan nga iban ang magtudlo sang Biblia sa iya bata, indi dapat maghunahuna ang nagatudlo nga daw sia na ang ginikanan. May mga tion nga ginatudluan sang isa ka utod ang kabataan sang indi Saksi. Dapat dumdumon sang utod, nga bisan pa sia ang nagabulig nga maglig-on ang espirituwalidad sang bata, wala ini nagapahangop nga sia na ang ginikanan. Kag mas maayo nga himuon sa balay sang bata ang pagtuon nga ara ang mga ginikanan ukon may upod nga hamtong nga Saksi, ukon puede man sa pangpubliko nga lugar. Paagi sini, indi masal-an sang iban nga may ginahimo sila nga indi nagakaigo. Sa ulihi, mas maayo nga ang mga ginikanan na ang magpalig-on sa espirituwalidad sang ila kabataan kay responsibilidad ini nga gintugyan sa ila sang Dios.

17. Paano makalugpay ang mga kabataan?

¹⁷ Ang mga pamatan-on nga nagahigugma sa matuod nga Dios kag nagatuman sang iya mga laygay mahimo makalugpay sa pamilya. Mahimo nila ini paagi sa pagtahod sa ila mga ginikanan kag pagbulig sa ila sa materyal. Makabulig man sila nga maglig-on ang espirituwalidad sang pamilya. Antes sang Baha, ang kaliwat ni Set nga si Lamec nagasimba kay Jehova. Amo ini ang ginsiling ni Lamec parte sa iya anak nga si Noe: “Magadala [sia] sa aton sing kaumpawan sa aton buluhaton kag sa masakit nga pagpangabudlay sang aton mga kamot bangod sang duta nga ginpakamalaut ni Jehova.” Natuman ini nga tagna sang gindula ang pagpakamalaut sa duta. (Gen. 5:29; 8:21) Gani ang kabataan nga nagasakdag sa matuod nga pagsimba makalugpay sa ila pamilya. Makabulig man sila nga malampuwasan indi lang ang mga pagtilaw subong, kundi pati man ang mas makahaladlok pa sa Baha sang una.

18. Ano ang makabulig sa aton nga mangin maisog kag mabatas ang tanan nga kapipit-an ukon pagtilaw?

¹⁸ Ang pangamuyo, pagpamalandong sa mga halimbawa sa Biblia, kag pagpakig-upod sa katawhan ni Jehova nagabulig sa minilyon subong nga malugpayan sa tanan nga pagtilaw nga ila ginaatubang. (Basaha ang Salmo 145:18, 19.) Bangod nakahibalo kita nga si Jehova ang Tuburan sang lugpay, mabuligan kita sini nga mangin maisog kag mabatas ang tanan nga kapipit-an subong kag sa palaabuton.