Buligi ang Imo Kaugalingon kag ang Iban Paagi sa Paggamit sang Pulong sang Dios

 1. Ngaa dapat may bug-os kita nga pagsalig sa Pulong sang Dios?

SA TION nga ginabinagbinag sang mga gulang kon bala ang isa ka Bible study makalipikar sa pagpakigbahin sa ministeryo, ginapamangkot nila ang ila kaugalingon, ‘Makita bala sa komento sang tawo nga nagapati sia nga ang Biblia inspirado nga Pulong sang Dios?’a Para sa mga luyag mangin manugbantala sang Ginharian kag sa tanan nga mga alagad sang Dios, dapat nga huo gid ang sabat sa sini nga pamangkot. Ngaa? Ang aton pagsalig sa Pulong sang Dios kag ang aton ikasarang sa paggamit sini sa ministeryo magabulig sa aton para buligan ang iban nga makilala si Jehova kag makatigayon sing kaluwasan.

 2. Ngaa dapat kita ‘magpadayon sa mga butang nga aton natun-an’?

² Ginpadaku ni apostol Pablo ang balor sang Pulong sang Dios sang nagsulat sia kay Timoteo: “Magpadayon ka sa mga butang nga imo natun-an kag nabuyok ka nga patihan.” Ang “mga butang” nga ginsambit ni Pablo amo ang mga kamatuoran sa Biblia nga nagpahulag kay Timoteo nga magtuo sa maayong balita. Ini nga mga kamatuoran may amo man nga epekto sa aton, kag padayon ini nga nagabulig sa aton nga magpabilin nga ‘maalam para sa kaluwasan.’ (2 Tim. 3:​14, 15) Ang masunod nga ginsiling Pablo masami naton ginagamit para ipakita sa iban nga ang Biblia naghalin sa Dios, pero mahimo may matun-an pa kita sa ginsiling sang 2 Timoteo 3:​16. (Basaha.) Binagbinagon naton sing mas detalyado ini nga bersikulo. Paagi sa sini, mapabakod naton ang aton pagsalig nga “matarung” ang tanan nga panudlo ni Jehova.​—Sal. 119:128.

3-5. (a) Ano ang reaksion sang kadam-an sa pamulongpulong ni Pedro sang Pentecostes, kag ngaa? (b) Ngaa madamo sa Tesalonica ang nagbaton sang kamatuoran? (c) Ano ang nagapadayaw sa mga tawo karon parte sa aton ministeryo?

³ Ginsilingan ni Jesus ang pungsod sang Israel: “Nagapadala ako sa inyo sang mga manalagna kag maalam nga mga lalaki kag mga manunudlo sang mga tawo.” (Mat. 23:34) Ginpatuhuyan diri ni Jesus ang iya mga disipulo, nga gintudluan niya nga gamiton ang Kasulatan sa ila ministeryo. Sang Pentecostes 33 C.E., ang isa sining “mga manunudlo sang mga tawo,” nga si apostol Pedro, nagpamulongpulong sa kadam-an sa Jerusalem diin ginkutlo niya ang pila ka bahin sang Hebreong Kasulatan. Sang nabatian sang mga tagpalamati kon paano ginpaathag ni Pedro ang mga bersikulo, madamo ang “napilasan [sa] ila tagipusuon.” Naghinulsol sila sa ila mga sala. Mga tatlo ka libo sa ila ang nangayo sing kapatawaran sang Dios kag nangin Cristiano.​—Binu. 2:​37-​41.

⁴ Ang isa pa ka manunudlo sang mga tawo, nga si apostol Pablo, nagbantala sang maayong balita indi lang sa Jerusalem. Halimbawa, sa Tesalonica, nga isa ka siudad sa Macedonia, namulongpulong sia sa sinagoga. Sa tatlo ka Inugpahuway, “nagpangatarungan [si Pablo] sa ila pasad sa Kasulatan . . . nga nagapaathag kag nagapamatuod paagi sa mga reperensia nga ang Cristo kinahanglan mag-antos kag mabanhaw gikan sa mga patay.” Ano ang resulta? “Ang pila sa ila [mga Judiyo] nangin mga tumuluo,” subong man ang “daku nga kadam-an sang mga Griego.”​—Binu. 17:​1-4.

⁵ Sa karon, madamo man ang nagadayaw sa mga alagad sang Dios sa ila paggamit sing Biblia. Sa tapos mapamatian sang isa ka tagbalay sa Switzerland ang pagbasa sing teksto sang isa ka sister, namangkot ang tagbalay: “Ano ang imo relihion?” Ang sister nagsabat: “Ako kag ang akon kaupod mga Saksi ni Jehova.” Nagsiling sia: “Dapat nahibaluan ko na ini. Kay wala na sing iban nga nagakadto diri kag nagabasa sing Biblia magluwas sa mga Saksi ni Jehova.”

6, 7. (a) Paano magamit sing maayo sang mga nagatudlo sa kongregasyon ang Biblia? (b) Ngaa importante nga gamiton sing epektibo ang Kasulatan sa mga pagtuon sa Biblia sa puluy-an?

⁶ Paano naton magamit sing maayo ang Biblia sa aton pagpanudlo? Kon ginhatagan ka sing bahin sa kongregasyon, maggamit sing espesipiko nga mga teksto sa Biblia. Sa baylo nga ihambal lang ang ginasiling sang teksto ukon basahon sa naimprinta nga papel ukon sa elektroniko nga mga kagamitan, buksi ang Biblia kag basaha ini, kag palig-una ang mga tumalambong nga buksan man ang ila Biblia. Ipaathag man kon ano ang aplikasyon sang teksto para mabuligan ang mga tumalambong nga magsuod pa gid kay Jehova. Imbes nga maggamit sing komplikado nga mga ilustrasyon kag mga eksperiensia nga nagalingaw lang, gamita ang tion sa pagpaathag sa Pulong sang Dios.

⁷ Ano ang dapat naton dumdumon kon nagahiwat sing mga pagtuon sa Biblia sa puluy-an? Bisan pa ginagamit naton ang aton mga publikasyon, indi naton dapat pagbalewalaon ang ginlakip nga mga teksto. Dapat naton palig-unon ang estudyante nga basahon ang mga teksto kag buligan sia nga mahangpan ang kahulugan sini. Paano? Imbes nga maghatag sing malawig nga mga eksplinasyon nga daw nagasermon ka, palig-una ang estudyante nga ipabutyag ang iya kaugalingon. Sa baylo nga hambalan sia kon ano ang patihan ukon himuon, maggamit sing makapainteres nga mga pamangkot nga magabulig sa iya nga mahangpan ang ginatudlo sang Biblia.b

 8. Ano ang ginpakigbatuan ni Pablo?

⁸ Masami naton ginatamod ang “pagsabdong” nga obligasyon lang sang mga gulang. Matuod, ang mga manugtatap may responsibilidad sa ‘pagsabdong sa padayon nga nagapakasala.’ (1 Tim. 5:​20; Tito 1:​13) Pero importante man ang pagsabdong sa aton kaugalingon. Si Pablo isa ka huwaran nga Cristiano nga may matinlo nga konsiensia. (2 Tim. 1:⁠3) Pero nagsulat sia: “Nakita ko sa mga bahin sang akon lawas ang isa pa ka kasuguan nga nagapakig-away batok sa kasuguan sang akon hunahuna kag nagadala sa akon nga bihag sa kasuguan sang sala.” Kon tun-an naton ang konteksto sini nga mga pinamulong, mahangpan naton sing maayo kon ano nga pagpakig-away ang ginpakigbatuan ni Pablo para makontrol ang iya makasasala nga huyog.​—Basaha ang Roma 7:​21-​25.

9, 10. (a) Ano ang posible nga mga kaluyahon nga ginpakigbatuan ni Pablo? (b) Paano mahimo nagpakig-away si Pablo batok sa sala?

⁹ Ano nga mga kaluyahon ang ginpakigbatuan ni Pablo? Bisan wala niya ini ginsambit sing espesipiko, nagsulat sia kay Timoteo nga sia “tampalasan nga tawo.” (1 Tim. 1:​13) Antes sia makumbertir, grabe gid ang kaakig ni Pablo sa mga Cristiano. Parte sa iya nabatyagan sa mga sumulunod sang Cristo, nagsiling sia: “Akig gid ako sa ila.” (Binu. 26:11) Natun-an ni Pablo nga kontrolon ang iya kaakig, pero kon kaisa kinahanglan niya pakigbatuan ang iya balatyagon kag ang iya ginahambal. (Binu. 15:​36-​39) Ano ang nakabulig sa iya?

¹⁰ Sang nagsulat sia sa mga Cristiano sa Corinto, ginlaragway ni Pablo ang paagi nga iya gingamit para sabdungon ang iya kaugalingon. (Basaha ang 1 Corinto 9:​26, 27.) Ginsakit niya ang iya kaugalingon, mahimo paagi sa pagpangita sing mga laygay sa Kasulatan, pagpangabay sing bulig ni Jehova para maaplikar ini, kag pagpanikasog nga mag-uswag.c Makabenepisyo kita sa iya halimbawa bangod nagapakig-away man kita batok sa aton makasasala nga mga huyog.

11. Paano naton ‘padayon nga matilawan’ ang aton kaugalingon kon bala nagalakat kita sa dalanon sang kamatuoran?

¹¹ Indi kita dapat mangin kampante sa aton pag-alagad. Sa baylo, dapat naton ‘padayon nga tilawan’ ang aton kaugalingon para mapat-od nga nagalakat gid kita sa dalanon sang kamatuoran. (2 Cor. 13:⁠5) Kon ginabasa naton ang mga kasulatan pareho sang Colosas 3:​5-​10, mahimo naton pamangkuton ang aton kaugalingon: ‘Nagapanikasog bala ako sa pagpatay sa akon makasasala nga mga huyog, ukon nagaluya na ako sa moral? Kon nagagamit sing Internet kag gulpi lang naggua ang imoral nga mga site, ginasira ko bala ini dayon, ukon padayon nga naga-search sing indi nagakaigo nga mga Web site?’ Ang aton personal nga pag-­aplikar sa laygay sang Pulong sang Dios magabulig sa aton nga “magpabilin . . . nga nagamata kag nagahupot sang aton kaligdong.”​—1 Tes. 5:​6-8.

12, 13. (a) Ano dapat ang aton tulumuron sa “pagtadlong sa mga butang,” kag paano naton mailog ang halimbawa ni Jesus sa paghimo sini? (b) Ano nga mga hambal ang dapat naton likawan kon ‘nagatadlong sang mga butang’ sa iban?

¹² Ang Griego nga termino nga ginbadbad “pagtadlong sa mga butang” nagakahulugan sang “paghimo sing maayo, pagpasibu, pagpasag-uli sa nagakaigo kag husto nga kahimtangan.” Kon kaisa, kinahanglan nga maghimo kita sing tikang sa pagtadlong sang mga butang sa iban nga wala nakahangop sa aton ukon sa aton mga ginahimo. Halimbawa, ang Judiyo nga mga lider sang relihion nagreklamo nga si Jesus mainayuhon sa “mga manugsukot sing buhis kag mga makasasala.” Nagsabat si Jesus: “Ang mga tawo nga mapagros wala nagakinahanglan sang manugbulong, kundi ang mga nagamasakit. Lakat kamo kag hibalua kon ano ang kahulugan sini, ‘Luyag ko ang kaluoy, kag indi ang halad.’ ” (Mat. 9:​11-​13) Mapinasensiahon kag mainayuhon niya nga ginpaathag sa tanan ang mga pinamulong sang Dios. Gani nakilala sang mga mapainubuson si Jehova subong “Dios nga maloloy-on kag mainayohon, makuli sa pagpangakig, kag bugana sa malig-on nga paghigugma kag sa pagkatutum.” (Ex. 34:⁠6) Bangod sa panikasog sang Anak sang Dios nga ‘tadlungon ang mga ­butang,’ madamo ang nagtuo sa maayong balita.

¹³ Ang halimbawa ni Jesus nagatudlo sa aton kon paano buligan ang iban. Ang isa nga nasaklaw mahimo magsiling sing maakigon sa isa, ‘May gusto lang ko tadlungon sa imo.’ Pero ini nga paagi indi amo ang buot silingon sang 2 Timoteo 3:​16. Ang “bug-os nga Kasulatan” wala nagahatag sa aton sing awtoridad nga maghambal nga wala sing konsiderasyon sa iban. Kaangay ini sang “mga pagsuntok sang espada,” nga sa masami nagaresulta sing daku nga kasakit kag indi gid makabulig.​—Hulu. 12:⁠18.

14-16. (a) Paano matadlong sang mga gulang ang mga butang para mabuligan ang iban sa pagsolbar sang ila mga problema? (b) Ngaa ang “pagtadlong sang mga butang” paagi sa Kasulatan importante sa pagpadaku sang kabataan?

¹⁴ Paano kita mangin mapinasensiahon kag mainayuhon kon ‘nagatadlong sang mga butang’? Ibutang ta nga ang isa ka mag-asawa nangayo sing bulig sa isa ka gulang para mauntat ang pirme nila nga pagbaisay. Ano ang himuon sang gulang? Dapat wala sia sing dampigan. Mahimo niya ipaathag sa mag-asawa ang mga prinsipio sa Biblia, ayhan paagi sa paggamit sang impormasyon sa kapitulo 3 sang libro nga Ang Sekreto sang Kalipay sa Pamilya. Samtang ginabinagbinag nila ini, mahimo marealisar sang mag-asawa kon ano pa nga laygay ang dapat gid nila iaplikar. Sa ulihi, mahimo mamangkot ang gulang kon kamusta na ang pamilya kag maghatag sing dugang nga bulig kon kinahanglanon.

¹⁵ Paano matadlong sang mga ginikanan ang mga butang para mapabakod ang ila kabataan sa espirituwal? Ibutang ta nga gusto mo buligan ang imo bata nga babayi nga likawan ang indi maayo nga pagpakig-abyan. Una, usisaa kon sin-o gid ang iya mga kaupod. Dayon, kon may butang nga dapat kabalak-an, mahimo ka makighambal sa iya, ayhan nagagamit sing mga punto sa Questions Young People Ask​—Answers That Work, Volume 2. Sa madason nga mga inadlaw, mahimo ka maghinguyang sing dugang nga tion upod sa iya. Mahimo mo man obserbahan ang iya panimuot samtang nagapakigbahin sa pagbantala ukon samtang nagalingawlingaw ang inyo pamilya. Kon mangin mapinasensiahon ka kag mainayuhon, mabatyagan sang imo bata ang imo pag-ulikid. Mahimo man sia mapahulag nga iaplikar ang imo laygay kag likawan ang sala nga mga desisyon sa iya kabuhi.

¹⁶ Paagi man sa pagkamapinasensiahon kag pagkamainayuhon, mapalig-on naton ang mga nagakabalaka sa ila panglawas, mga naluyahan bangod sa pagkadula sang ila trabaho, ukon mga nagaduhaduha sa pila ka panudlo sang Kasulatan. Ang paggamit sing Pulong sang Dios sa “pagtadlong sang mga butang” nagahatag sing daku nga benepisyo sa katawhan ni Jehova.

17. Ngaa dapat naton batunon sing mapinasalamaton ang disiplina?

¹⁷ “Wala sing disiplina nga daw makalilipay sa karon, kundi makapasubo.” Pero, “sa ulihi sa mga nahanas sini nagapatubas ini sang mahidaiton nga bunga, nga amo ang pagkamatarong.” (Heb. 12:11) Kalabanan sang adulto nga mga Cristiano nagaugyon nga nakabulig sa ila ang disiplina sang ila tumuluo nga mga ginikanan. Kag ang pagbaton sang disiplina halin kay Jehova, paagi sa mga gulang, nagabulig sa aton nga magpabilin sa dalanon sang kabuhi.​—Hulu. 4:​13.

18, 19. (a) Ngaa ang laygay sang Hulubaton 18:13 importante gid sa “pagdisiplina sa pagkamatarong”? (b) Ano ang masami nga resulta kon magpakita ang mga gulang sing kalulo kag gugma sa pagpakig-angot sa nakasala?

¹⁸ Dapat tinguhaan nga mangin epektibo ang paghatag sing disiplina. Ginsilingan ni Jehova ang mga Cristiano nga himuon ini “sa pagkamatarong.” (2 Tim. 3:​16) Gani, dapat gamiton naton subong giya ang mga prinsipio sa Biblia. Ang isa sini nga mga prinsipio makita sa Hulubaton 18:13: “Ang nagasabat sa wala pa sia makabati, kabuangan ini kag kahuluy-an sa iya.” Gani, kon kinahanglan istoryahon sang mga gulang ang indibiduwal nga gin-akusahan nga nakahimo sang mabug-at nga sala, dapat sila mag-imbestigar sing maayo para mahibaluan ang tanan nga detalye. (Deut. 13:14) Kon nahimo nila ini, makahatag na sila sing disiplina “sa pagkamatarong.”

¹⁹ Luwas sini, ang Pulong sang Dios nagsugo sa mga gulang nga tadlungon ang iban “nga may kalulo.” (Basaha ang 2 Timoteo 2:​24-​26.) Matuod, ang isa ka indibiduwal mahimo magdala sing kahuy-anan kay Jehova kag kahalitan sa mga inosente. Pero indi gid sia mabuligan kon maakigon nga laygayan sia sang isa ka gulang. Apang, kon ilugon sang mga gulang “ang kaayo sang Dios,” mahimo mapahulag ang nakasala nga maghinulsol.​—Roma 2:⁠4.

20. Ano nga mga prinsipio ang dapat iaplikar sang mga ginikanan kon nagadisiplina sa ila kabataan?

²⁰ Sa pagpadaku sa ila kabataan “sa disiplina kag nagatuytoy nga panghunahuna ni Jehova,” dapat iaplikar sang mga ginikanan ang mga prinsipio sa Biblia. (Efe. 6:⁠4) Indi dapat pagsilutan sang amay ang iya bata kon ginsugiran lang sia nga may ginhimo nga malain ang iya bata. Kag ang mapintas nga kaakig indi dapat makita sa Cristiano nga pamilya. “Si Jehova mapinalanggaon gid kag maluluy-on,” kag ang mga may responsibilidad sa pagdisiplina sa mga kabataan dapat may amo man sini nga mga kinaiya.​—Sant. 5:​11.

21, 22. Ano nga mga pinamulong sa Salmo 119:​97-​104 ang nagalaragway sang imo nabatyagan sa Pulong ni Jehova?

²¹ Ginpahayag sadto sang isa ka diosnon nga tawo kon ngaa ginhigugma niya ang kasuguan ni Jehova. (Basaha ang Salmo 119:​97-​104.) Paagi sa pagtuon sini, nakatigayon sia sing kaalam, paghantop, kag paghangop. Ang pagtuman sang laygay sini nakabulig sa iya nga likawan ang sala nga mga dalanon nga naghatag sing kasakit sa iban. Para sa iya, ang pagtuon sa Kasulatan makalilipay gid. Determinado sia nga tumanon ang Dios nga naghatag sa iya sing mga panuytoy sa pagtigayon sang madamo nga kaayuhan sa kabuhi.

²² Ginapabaloran mo bala ang “bug-os nga Kasulatan”? Paagi sa sini, mapabakod mo ang imo pagtuo nga tumanon sang Dios ang iya katuyuan. Ang mga laygay sini nagaamlig sa imo batok sa makamamatay nga epekto sang paghimo sing sala. Kag paagi sa epektibo nga pagpaathag sini, mabuligan mo ang iban nga makalakat kag makapabilin sa dalanon sang kabuhi. Kabay nga gamiton naton sing maayo ang “bug-os nga Kasulatan” samtang ginaalagad naton ang aton maalam gid kag mahigugmaon nga Dios, si Jehova.