“Simbaha ang Dios”

1, 2. (a) Ano nga pagpili ang dapat naton himuon? (b) Ano ang ginhimo sang matutom nga anghel sang may gusto magsimba sa iya?

DAPAT sabton sang kada isa sa aton ining importante nga pamangkot: Sin-o ang akon simbahon? Mahimo madamo ang magsiling nga kabudlay sina sabton kag makalilibog ang pililian. Pero ang matuod, maathag kag simple lang ang pililian. Mapili kita kon bala simbahon naton si Jehova nga Dios ukon simbahon naton si Satanas nga Yawa.

² Gusto gid ni Satanas nga simbahon sia. Amo gid sina ang gusto niya sang ginsulay niya si Jesus. Natun-an naton sa Kapitulo 1 sini nga publikasyon nga gintanyagan ni Satanas si Jesus sang tumalagsahon nga butang—ang awtoridad sa tanan nga ginharian sa duta. Kag ano ang gusto sang Yawa nga himuon ni Jesus? “Maghimo [ka] sing isa ka buhat sang pagsimba sa akon,” siling niya kay Jesus. (Mat. 4:9) Pero ang isa ka anghel nga nagpahayag sang bugna kay apostol Juan nangindi nga simbahon. (Basaha ang Bugna 22:8, 9.) Sang gusto simbahon ni Juan ining anghel, nagsiling ining mapainubuson nga espiritu nga anak sang Dios: “Indi ina paghimua!” Imbes magsiling nga ‘Simbaha ako,’ ang anghel nagsiling, “Simbaha ang Dios.”

 3. (a) Ano ang katuyuan sini nga publikasyon? (b) Ano ang aton binagbinagon?

³ Katuyuan gid sini nga publikasyon nga pabakuron ang aton determinasyon nga himuon ang ginsugo sang anghel—si Jehova nga Dios lamang ang dapat simbahon. (Deut. 10:20; Mat. 4:10) Rebyuhon naton ang aton natun-an parte sa putli nga pagsimba sa mga tagna kag mga palanan-awon ni Ezequiel. Paagi sa bulig sang Kasulatan, imadyinon naton ang matabo sa ulihi kon ang tanan nga tawo sa duta magaatubang sa katapusan nga pagtilaw—ang pagtilaw nga magapat-od kon sin-o ang makapasar kag masaksihan ang putli nga pagsimba kay Jehova nga napasag-uli na sing bug-os.

 4. Ano ang tatlo ka tema nga ginpadaku sa libro sang Ezequiel?

⁴ Ang libro sang Ezequiel nagatudlo sa aton nga ang putli nga pagsimba indi pakitakita nga pagsimba. Ginapatuman sini sa aton nga (1) si Jehova lamang ang dapat simbahon, (2) magpabilin nga nahiusa sa matinlo nga pagsimba, kag (3) ipakita ang gugma sa iban. Usisaa kon paano ginapadaku ining tatlo ka tema sa mga tagna kag mga palanan-awon nga ginbinagbinag sa sini nga publikasyon.

5-9. Ano ang natun-an naton sa tema nga si Jehova lamang ang dapat simbahon?

⁵ Kapitulo 3:a Ang makahalawhaw nga palanan-awon parte kay Jehova nga napalibutan sang balangaw kag nagasakay sa ibabaw sang gamhanan nga espiritu nga mga tinuga nagapadaku sa aton sang importante nga kamatuoran—ang Labing Gamhanan lamang ang nagakabagay sang aton pagsimba.—Ezeq. 1:4, 15-28.

⁶ Kapitulo 5: Makapakibot gid ang palanan-awon parte sa templo ni Jehova nga ginhigkuan! Ginapakita sini nga palanan-awon nga wala sing natago kay Jehova. Nakita niya ang pagsupak sa iya, pareho sang pagsimba sang iya katawhan sa mga diosdios, bisan pa ini nga buhat indi makita sang mga tawo. Naakig gid sia sa sini nga mga buhat kag ginsilutan niya ang mga naghimo sini.—Ezeq. 8:1-18.

⁷ Kapitulo 7: Ang paghukom nga ginpahayag sa palibot nga mga pungsod nga ‘nagtamay’ sa Israel nagapamatuod nga ginapapanabat ni Jehova ang mga tawo nga indi maayo ang pagtratar sa iya katawhan. (Ezeq. 25:6) Pero may natun-an pa gid kita sa pagpakig-angot sang Israel sa sini nga mga pungsod—dapat kita mangin mainunungon kay Jehova labaw sa tanan. Indi gid naton pagpanubuon ang aton mga talaksan para lang mapalipay ang aton mga pamilya nga wala nagasimba kay Jehova. Indi man kita magsalig sa manggad ukon magkompromiso sang aton neutralidad kay ang aton katutom para lang kay Jehova kag indi sa gobierno sang mga tawo.

⁸ Kapitulo 13 kag 14: Ang palanan-awon parte sa templo nga ara sa mataas nga bukid nagatudlo sa aton nga dapat naton sundon ang mataas nga mga talaksan ni Jehova, kag kilalahon sia nga labaw sa tanan nga dios.—Ezeq. 40:1–48:35.

⁹ Kapitulo 15: Ang paglaragway sa Israel kag Juda pareho sa mga prostityut nagapahanumdom sa aton nga ginakangil-aran gid ni Jehova ang espirituwal nga pagpakighilawas.—Ezeq., kap. 16, 23.

10-14. Paano ginpadaku ang tema nga dapat kita magpabilin nga nahiusa sa matinlo nga pagsimba?

¹⁰ Kapitulo 8: Ang mga tagna nga nagapromisa nga si Jehova magatangdo sing “manugbantay” sa pagtatap sang Iya katawhan nagapadaku nga kinahanglan kita manghikot sing nahiusa kag mahidaiton sa idalom sang pagpanguna ni Jesus.—Ezeq. 34:23, 24; 37:24-28.

¹¹ Kapitulo 9: Ang mga tagna ni Ezequiel parte sa katawhan sang Dios nga ginhilway sa pagkabihag sa Babilonia kag napasag-uli sa ila duta nga natawhan, may mensahe para sa mga nagatinguha nga mapahamut-an si Jehova subong. Ang matinlo nga mga sumilimba ni Jehova dapat magpalayo kag maglikaw sa mahigko nga impluwensia sang butig nga relihion. Bisan pa halin kita sa sarisari nga relihion, kahimtangan sa kabuhi, kag rasa, dapat huptan naton ang paghiusa nga nagabulig para makilala kita nga katawhan sang Dios.—Ezeq. 11:17, 18; 12:24; Juan 17:20-23.

¹² Kapitulo 10: Ang tema parte sa paghiusa ginpadaku sa palanan-awon parte sa mamala nga mga tul-an nga nabuhi. Pribilehiyo gid naton nga mangin bahin sang napasag-uli nga grupo sang matinlo nga mga sumilimba nga nagapanghikot subong kasuldadusan!—Ezeq. 37:1-14.

¹³ Kapitulo 12: Ginpadaku pa gid ang paghiusa sa tagna parte sa duha ka lipak nga gintingob. Makapabakod gid sang pagtuo kay nakita naton nga ini nga tagna ginatuman sang mga hinaplas kag sang iban nga mga karnero! Bisan pa nagakabuhi kita sa kalibutan nga nabahinbahin bangod sa pagdumtanay sang relihion kag pulitika, nagapabilin kita nga nahiusa bangod sa aton gugma kag pagkamainunungon.—Ezeq. 37:15-23.

¹⁴ Kapitulo 16: Ang palanan-awon parte sa lalaki nga may suludlan sang tinta nga sungay kag sang mga lalaki nga may dala nga inuglampos may mabaskog nga paandam—ang mga makalab-ot lang sa “dakung kapipit-an” bilang putli nga mga sumilimba amo ang markahan para sa kaluwasan.—Mat. 24:21; Ezeq. 9:1-11.

15-18. Ngaa dapat padayon naton nga ipakita ang gugma, kag paano naton mahimo ina?

¹⁵ Kapitulo 4: Ang palanan-awon parte sa apat ka buhi nga tinuga nagatudlo sa aton parte sa mga kinaiya ni Jehova, kag ang panguna gid sini amo ang gugma. Kon ginapakita naton ang aton gugma sa aton ginahambal kag ginahimo, ginapamatud-an naton nga si Jehova ang aton Dios.—Ezeq. 1:5-14; 1 Juan 4:8.

¹⁶ Kapitulo 6 kag 11: Ang gugma sang Dios nagpahulag sa iya nga magtangdo sing mga bantay, pareho kay Ezequiel. Ang Dios gugma, gani indi niya gusto nga malaglag ang bisan sin-o kon tapuson na niya ang paggahom ni Satanas sa duta. (2 Ped. 3:9) May pribilehiyo kita nga ipakita ang gugma sang Dios paagi sa pagtuman sang aton responsibilidad sa pagsuporta sa hilikuton sang modernong adlaw nga bantay.—Ezeq. 33:1-9.

¹⁷ Kapitulo 17 kag 18: Kabalo si Jehova nga madamo ang indi magbaton sang iya kaluoy kag magtinguha nga papason ang iya mainunungon nga mga sumilimba. Ang gugma ni Jehova magapahulag sa iya nga amligan ang iya katawhan kon salakayon sang “Gog sa duta sang Magog” ang mga mainunungon sa Iya. Ang gugma sa iban magapahulag man sa aton nga himuon ang tanan para paandaman ang madamo nga tawo nga laglagon ni Jehova ang mga nagahingabot sa iya katawhan.—Ezeq. 38:1–39:20; 2 Tes. 1:6, 7.

¹⁸ Kapitulo 19, 20, kag 21: Ang gugma ni Jehova sa katawhan makita gid sa mga palanan-awon parte sa suba nga nagahatag sing kabuhi kag sa pagpanagtag sing duta. Ginalaragway sang mga palanan-awon ang resulta sang daku nga gugma ni Jehova paagi sa paghalad sang kabuhi sang iya Anak para mapatawad ang aton mga sala kag matigayon ang perpekto nga kabuhi bilang bahin sang pamilya sang Dios. Ang isa sa pinakamaayo nga paagi nga mapakita naton ang aton gugma sa mga tawo amo ang pagsugid sa ila parte sa matahom nga palaabuton nga ginpromisa ni Jehova sa mga nagatuo sa iya Anak.—Ezeq. 45:1-7; 47:1–48:35; Bug. 21:1-4; 22:17.

19. Ano ang himuon ni Jesus sa tion sang Isa ka Libo ka Tuig nga Paggahom? (Tan-awa man ang kahon nga “Pag-atubang sa Katapusan nga Pagtilaw.”)

¹⁹ Sa tion sang Isa ka Libo ka Tuig nga Paggahom, binilyon ang banhawon ni Jesus kag dulaon niya ang pag-antos nga resulta sang aton ‘kaaway nga kamatayon.’ (1 Cor. 15:26; Mar. 5:38-42; Binu. 24:15) Ang kasaysayan sang katawhan daw pareho sa masubo kag masakit nga istorya. Pero samtang ginabanhaw niya ang kada henerasyon, panason ni Jesus inang masubo nga istorya kag hatagan sing kahigayunan ang mga ginbanhaw nga makahimo sing makalilipay nga istorya. Paagi sa halad-gawad, dulaon niya ang tanan nga kahalitan bangod sang balatian, inaway, kag gutom. Isa pa, buligan niya kita nga madula ukon magabot ang gamot sang aton kasubo—ang sala nga napanubli naton kay Adan. (Roma 5:18, 19) ‘Gub-on sing bug-os ni Jesus ang mga binuhatan sang Yawa.’ (1 Juan 3:8) Ano dayon ang matabo?

20. Paano ipakita ni Jesus kag sang 144,000 ang dalayawon nga pagkamapainubuson? Ipaathag. (Tan-awa ang piktyur sa umpisa sini nga kapitulo.)

²⁰ Basaha ang 1 Corinto 15:24-28. Kon perpekto na ang tanan nga tawo, kag kon Paraiso na ang duta suno sa orihinal nga katuyuan ni Jehova, ipakita ni Jesus kag sang iya 144,000 ka kaupod nga manuggahom ang dalayawon nga pagkamapainubuson kay itugyan nila ang Ginharian kay Jehova. Kinabubut-on kag mahidaiton nila nga ibalik ang awtoridad nga ginhatag sa ila sa sulod sang isa ka libo ka tuig. Ang tanan nga hinimuan sang Ginharian magapadayon sing wala katapusan.

21, 22. (a) Ano ang sitwasyon sa kalibutan sa katapusan sang isa ka libo ka tuig? (b) Ngaa buy-an ni Jehova si Satanas kag ang mga demonyo?

²¹ Si Jehova may himuon dayon nga tumalagsahon nga butang, nga nagapakita sang iya daku nga pagsalig sa iya mga sakop sa duta. Magamando sia nga buy-an si Satanas kag ang mga demonyo halin sa kadadalman diin gintagbong sila sa sulod sang isa ka libo ka tuig. (Basaha ang Bugna 20:1-3.) Ang katawhan kag duta nga makita nila lain na gid. Antes sang Armageddon, ang kalabanan sang katawhan napatalang ni Satanas kag wala sila sing paghiusa bangod sang dumot kag pagpasulabi. (Bug. 12:9) Pero sa katapusan sang isa ka libo ka tuig, ang tanan nga katawhan magasimba kay Jehova, bilang isa ka nahiusa kag mahigugmaon nga pamilya. Ang bilog nga duta mangin malinong nga Paraiso.

²² Ngaa buy-an ni Jehova ang mga kriminal pareho kay Satanas kag sa mga demonyo sa sining matinlo nga duta? Kay ang kalabanan sa nagakabuhi diri sa katapusan sang isa ka libo ka tuig wala pa matilawan kon bala mainunungon gid sila nga mga sumilimba ni Jehova. Ang kalabanan sa ginbanhaw sa Paraiso wala makakilala kay Jehova antes sila napatay. Ginhatagan sila ni Jehova indi lang sang kabuhi kundi sang tanan nila nga kinahanglanon sa pisikal kag sa espirituwal. Wala sing malain nga impluwensia sa ila, kay puro maayo nga mga tawo ang kaupod nila. Ang mga tawo sa palibot nila nagahigugma kag nagaalagad kay Jehova. Mahimo isumbong ni Satanas ining mga banhawon, pareho sa iya pagsumbong kay Job—nga nagaalagad lang sila sa Dios kay ginaamligan kag ginapakamaayo Niya sila. (Job 1:9, 10) Gani antes isulat sing permanente ni Jehova ang aton ngalan sa libro sang kabuhi, hatagan niya kita sing kahigayunan nga pamatud-an ang aton katutom sa iya bilang aton Amay kag Soberano.—Bug. 20:12, 15.

23. Ano nga pagsulay ang maatubang sang kada isa?

²³ Sa malip-ot nga tion, tugutan si Satanas nga sulayon ang katawhan nga mag-untat sa pag-alagad sa Dios. Ano ang himuon niya nga pagsulay? Sigurado ang kada isa makaatubang sing pagsulay pareho sa naatubang nanday Adan kag Eva. Ang kada isa magadesisyon kon bala sundon niya ang mga talaksan ni Jehova, suportahan ang iya paggahom kag simbahon sia, ukon magrebelde sa Dios kag suportahan si Satanas.

24. Ngaa ang mga rebelde gintawag nga Gog kag Magog?

²⁴ Basaha ang Bugna 20:7-10. Talalupangdon nga ang mga rebelde sa katapusan sang isa ka libo ka tuig tawgon nga Gog kag Magog. Ang ila mga batasan kag ginahimo pareho sa ginhimo sang mga rebelde nga gintagna ni Ezequiel nga magasalakay sa katawhan sang Dios sa tion sang dakung kapipit-an. Ining mga rebelde, ang “Gog sa duta sang Magog,” nabahinbahin sa mga pungsod nga nagpamatok sa paggahom ni Jehova. (Ezeq. 38:2) Pareho man sini, ang mga rebelde sa katapusan sang Isa ka Libo ka Tuig nga Paggahom sang Cristo ginatawag man nga “mga pungsod.” Talalupangdon gid ini nga pagtawag. Ngaa? Kay sa tion sang Isa ka Libo ka Tuig nga Paggahom, wala na ang tanan nga nabahinbahin nga pungsod; ang tanan nga katawhan mangin sakop sang isa ka gobierno, ang Ginharian sang Dios. Tanan kita mangin isa na lang ka espirituwal nga pungsod. Paagi sa pagtawag sa mga rebelde nga Gog kag Magog kag pagtawag sa ila nga “mga pungsod,” ginapakita sang tagna nga magamadinalag-on si Satanas sa pagbahinbahin sa pila ka katawhan sang Dios. Wala sing may magapilit sa isa nga magdampig kay Satanas. Ang kada perpekto nga indibiduwal ang magahimo sang iya desisyon.

25, 26. Pila ang magabuylog kay Satanas, kag ano ang matabo sa ila?

²⁵ Pila ang magabuylog kay Satanas? Ang kadamuon sang mga rebelde “subong sang balas sang dagat.” Ini nga ekspresyon wala nagapahangop nga daku nga porsiento sang katawhan ang magarebelde. Paano naton nabal-an? Binagbinaga ang promisa kay Abraham. Si Jehova nagsiling nga padamuon niya ang kaliwat ni Abraham pareho sang “mga balas sa baybayon.” (Gen. 22:17, 18) Pero, ang kadamuon lang sang iya kaliwat 144,001 ka indibiduwal. (Gal. 3:16, 29) Bisan pa madamo ini, gamay lang ini kon ikumparar sa kabilugan nga kadamuon sang katawhan. Pareho man sini, masiling nga madamo ang magabuylog kay Satanas, pero indi man tama kadamo. Ini nga mga rebelde indi man gid makahimo sing daku nga halit sa mainunungon nga mga alagad ni Jehova.

²⁶ Ang magabuylog sa pagrebelde laglagon dayon. Upod kay Satanas kag sa mga demonyo, indi na sila magluntad kag wala na sila sing paglaum nga mabuhi liwat. Ang madumduman na lang sa ila amo ang ila sala nga mga desisyon kag ang malain nga mga resulta sini.—Bug. 20:10.

27-29. Ano ang nagahulat sa mga makapasar sa katapusan nga pagtilaw?

²⁷ Pero, ang mga ngalan naman sang makapasar sa katapusan nga pagtilaw masulat sing permanente sa “libro sang kabuhi.” (Bug. 20:15) Dayon, bilang nahiusa nga pamilya, ang tanan nga mainunungon nga mga anak ni Jehova magahatag sing pagsimba nga para gid lang sa iya.

²⁸ Pamensara ina nga palaabuton. Nagahulat sa imo ang kabuhi nga may makalilipay nga obra kag mga pag-abyanay. Ikaw kag ang imo mga pinalangga indi na gid mag-antos. Kon perpekto ka na, indi na kinahanglan ang serbisyo sang Mataas nga Saserdote ukon ang gawad para mangin matarong ang imo tindog sa atubangan ni Jehova. Kag labaw sa tanan, mangin putli na ang pagsimba sang tanan sa langit kag sa duta. Amo na ini ang bug-os nga pagpasag-uli sang putli nga pagsimba!

²⁹ Ara ka bala sa sinang makalilipay nga adlaw? Ara ka didto kon padayon mo nga iaplikar ang tatlo ka panguna nga leksion sa libro sang Ezequiel—si Jehova lamang ang dapat simbahon, magpabilin nga nahiusa sa matinlo nga pagsimba, kag ipakita ang gugma sa iban. Pero ang mga tagna ni Ezequiel may katapusan pa kag importante nga leksion. Ano ina?

30, 31. Ano ang buot silingon sang pagpahayag nga “makilala nila nga ako amo si Jehova” para sa (a) mga kaaway sang Dios? (b) katawhan sang Dios?

³⁰ Sa bilog nga libro sang Ezequiel, ang pagpahayag nga “makilala nila nga ako amo si Jehova” sulitsulit nga ginapadaku. (Ezeq. 6:10; 39:28) Para sa mga kaaway sang Dios, ini nga pagpahayag magakahulugan sing inaway kag kamatayon. Mapilitan sila nga kilalahon indi lang ang pagluntad ni Jehova kundi matun-an man nila sa masakit nga paagi ang kahulugan sang iya dungganon nga ngalan—“Ginapahanabo Niya nga Mangin Amo.” Si “Jehova sang mga kasuldadusan” mangin “isa ka gamhanan nga hangaway” nga magapakig-away batok sa ila. (1 Sam. 17:45; Ex. 15:3) Maintiendihan nila ang importante nga kamatuoran parte kay Jehova: Wala sing makapugong sa iya sa pagtuman sang iya katuyuan. Pero ulihi na ang tanan.

³¹ Para naman sa katawhan sang Dios, ang pagpahayag nga “makilala nila nga ako amo si Jehova” magakahulugan sing paghidait kag kabuhi. Pahanabuon ni Jehova nga mangin amo ang iya orihinal nga katuyuan sa aton—mangin mga anak nga perpekto nga nagasunod sa iya mga kinaiya. (Gen. 1:26) Si Jehova isa gid ka mahigugmaon nga Amay kag aton Manugbantay. Sa indi madugay, bilang Hari, daugon niya ang aton mga kaaway. Pero antes pa ina, sundon naton ang mensahe ni Ezequiel. Pamatud-an naton sa aton ginahambal kag ginahimo kada adlaw kon sin-o si Jehova kag kon ano ang ginarepresentar sang iya ngalan. Dayon kon buy-an na ang mabaskog nga hangin sang dakung kapipit-an, indi kita mahadlok. Kundi, ihangad naton ang aton ulo, kay nahibaluan naton nga malapit na ang pagtubos sa aton. (Luc. 21:28) Samtang wala pa ini, buligan naton ang mga tawo bisan diin nga makilala kag mahigugma ang lamang nga Dios nga nagakabagay simbahon, ang Isa nga may pinakadungganon sa tanan nga ngalan—si Jehova.—Ezeq. 28:26.