Sigurado Gid ang Pagkabanhaw!

1-2. Ano ang dalayawon nga paglaum sang mga alagad ni Jehova?

IMPORTANTE gid nga may ara kita ginalauman. Ang iban nagalaum nga kuntani mangin malipayon ang pag-updanay nila sang ila asawa ukon bana, indi magmasakit ang ila kabataan, ukon mag-ayo sila sa ila balatian. Posible nga ginalauman man naton ini. Pero may ginalauman pa gid kita. Nagalaum kita nga mabuhi sing wala sing katapusan kag nagalaum kita nga mabanhaw ang aton mga pinalangga nga napatay.

² Si apostol Pablo nagsiling: “May paglaum ako sa Dios . . . nga may pagkabanhaw sang mga matarong kag mga indi matarong.” (Binu. 24:15) Indi si Pablo ang una nga may ginsiling parte sa pagkabanhaw. May ginsiling man si Job parte sa sini. Sigurado si Job nga dumdumon sia sang Dios kag banhawon.—Job 14:7-10, 12-15.

 3. Ano ang benepisyo kon binagbinagon naton ang 1 Corinto kapitulo 15?

³ “Ang pagbanhaw sa mga patay” nalakip sa “sadsaran,” ukon “panguna nga doktrina,” nga ginapatihan sang mga Cristiano. (Heb. 6:1, 2) Ang ginsiling ni Pablo parte sa pagkabanhaw mabasa sa 1 Corinto kapitulo 15. Mahimo gid nga napalig-on ang mga Cristiano sang unang siglo sa sulat ni Pablo. Bisan pa madugay ka na nga nagapati nga may ara gid pagkabanhaw, ang 1 Corinto kapitulo 15 magapalig-on sa imo pagsalig nga matuman gid ang imo ginalauman.

 4. Ngaa nagapati gid kita sa pagkabanhaw?

⁴ Bangod nabanhaw si Jesucristo, nagapalig-on ini sa aton pagsalig nga mabanhaw ang aton mga pinalangga nga napatay. Nalakip ini sa “maayong balita” nga ginsulat ni Pablo sa mga taga-Corinto. (1 Cor. 15:1, 2) Nagsiling pa gani sia nga kon ang isa ka Cristiano wala nagapati sa pagkabanhaw, wala sing pulos ang iya pagtuo. (1 Cor. 15:17) Gani bangod nabanhaw si Jesus, nagapati gid kita sa pagkabanhaw.

5-6. Paano kita nakabenepisyo sa ginsiling sa 1 Corinto 15:3, 4?

⁵ Sa umpisa sang sulat ni Pablo parte sa pagkabanhaw, ginsambit niya ang tatlo ka kamatuoran: (1) “Ang Cristo napatay tungod sa aton mga sala.” (2) “Ginlubong sia.” (3) “Ginbanhaw sia sa ikatlo nga adlaw suno sa Kasulatan.”—Basaha ang 1 Corinto 15:3, 4.

⁶ Paano kita nakabenepisyo kay napatay si Jesus, ginlubong sia, kag ginbanhaw? Si manalagna Isaias nagtagna nga ‘patyon’ ang Mesias kag ‘ilubong sia kaupod sang mga malauton.’ Pero nagsiling pa gid si Isaias nga ‘dalhon sang Mesias ang sala sang madamo nga tawo.’ Ginhimo ini ni Jesus sang ginhatag niya ang iya kabuhi bilang gawad. (Isa. 53:8, 9, 12; Mat. 20:28; Roma 5:8) Gani bangod napatay si Jesus, ginlubong sia, kag ginbanhaw, may mabakod kita nga basihan sa aton ginalauman nga hilwayon kita sa sala kag kamatayon kag makaupod naton liwat ang aton mga pinalangga nga napatay.

7-8. Ngaa nagapati gid ang mga Cristiano nga nabanhaw si Jesus?

⁷ Para magpati kita nga may ara gid pagkabanhaw, dapat anay kita magpati nga nabanhaw gid si Jesus. Ngaa makasigurado kita nga ginbanhaw gid ni Jehova si Jesus?

⁸ Madamo ang nakakita kay Jesus pagkatapos sia mabanhaw, kag ginsugid nila ini sa iban. (1 Cor. 15:5-7) Ang una nga ginsambit ni Pablo nga nakakita kay Jesus amo si apostol Pedro (Cefas). May mga disipulo nga nagsiling nga nakita ni Pedro si Jesus pagkatapos sia mabanhaw. (Luc. 24:33, 34) Nakita man sang mga apostoles si Jesus. Dayon ‘nagpakita ang Cristo sa kapin sa 500 ka kauturan sa isa ka higayon,’ nga posible nagapatuhoy sa makapalig-on nga pagtilipon sa Galilea nga mabasa sa Mateo 28:16-20. ‘Nagpakita man si Jesus kay Santiago’ nga utod niya sa iloy. Wala pa sadto nagatuo si Santiago nga si Jesus amo ang Mesias. (Juan 7:5) Pero nagtuo sia sang makita niya nga nabanhaw si Jesus. Sang ginhimo ni Pablo ang iya sulat sang mga 55 C.E., buhi pa ang madamo nga nakakita kay Jesus pagkatapos sia mabanhaw, gani puede sila pamangkuton sang mga nagaduhaduha nga nabanhaw si Jesus.

 9. Base sa Binuhatan 9:3-5, ngaa makapamatuod man si Pablo nga nabanhaw gid si Jesus?

⁹ Sang ulihi, nagpakita si Jesus kay Pablo. (1 Cor. 15:8) Nagapakadto si Pablo (Saulo) sa Damasco sang nabatian niya ang tingog ni Jesus nga nabanhaw na, kag nakita niya sa palanan-awon ang himaya ni Jesus sa langit. (Basaha ang Binuhatan 9:3-5.) Ang naeksperiensiahan ni Pablo isa pa gid ka dugang nga pamatuod nga nabanhaw gid si Jesus.—Binu. 26:12-15.

10. Ano ang ginhimo ni Pablo bangod sigurado sia nga nabanhaw gid si Jesus?

¹⁰ Interesado gid ang iban sa ginsiling ni Pablo kay ginhingabot niya sadto ang mga Cristiano. Pero sang nakumbinsi sia nga nabanhaw gid si Jesus, nagpanikasog si Pablo para bantalaan ang iban parte sa sini. Madamo nga beses sia nga ginbunal, ginbilanggo, kag nalunod ang ginsakyan niya nga barko, pero ginbatas niya ini para mabantala niya nga matuod gid nga napatay si Jesus kag nabanhaw. (1 Cor. 15:9-11; 2 Cor. 11:23-27) Sigurado si Pablo nga nabanhaw gid si Jesus kay bisan pa patyon sia, ginbantala niya gihapon ang parte sa sini. Mabakod gid nga pamatuod ang mga ginsiling sang mga nakakita kay Jesus pagkatapos sia mabanhaw. Indi bala nga nagakumbinsi pa gid ini sa aton nga nabanhaw gid si Jesus? Kag indi bala nga nagapabakod pa gid ini sa aton pagpati sa pagkabanhaw?

11. Ngaa indi husto ang paghangop sang pila sa Corinto parte sa pagkabanhaw?

¹¹ Sa siudad sang Corinto, nga sakop sang Gresya, may pila nga indi husto ang paghangop parte sa pagkabanhaw. May iban pa gani nga nagsiling nga “wala sing pagkabanhaw.” Ngaa? (1 Cor. 15:12) Kay man, ginayaguta sang maalam nga mga tawo sa siudad sang Atenas, nga sakop man sang Gresya, ang mga nagapati nga nabanhaw si Jesus. Mahimo nakaimpluwensia ini sa pagpati sang iban nga taga-Corinto. (Binu. 17:18, 31, 32) May iban naman nga nagapati nga indi literal ang pagkabanhaw. Nagapati sila nga makabig nga “patay” ang isa ka tawo kay makasasala sia, pero makabig na sia nga “buhi” kon mangin Cristiano na sia. Ano man ang ila rason, wala gid sing pulos ang ila pagtuo kay wala sila nagapati sa pagkabanhaw. Kay man, kon wala ginbanhaw sang Dios si Jesus, indi mapatawad ang aton mga sala kay wala sing may naggawad sa aton. Gani wala sing matuod nga paglaum ang mga wala nagapati sa pagkabanhaw.—1 Cor. 15:13-19; Heb. 9:12, 14.

12. Base sa 1 Pedro 3:18, 22, ano ang kinalain sang pagkabanhaw ni Jesus kag sang nauna nga mga pagkabanhaw?

¹² Makapamatuod si Pablo nga “ginbanhaw na ang Cristo.” Mas maayo ini nga pagkabanhaw sangsa nauna nga mga pagkabanhaw. Ngaa? Kay napatay man sang ulihi ang nauna nga mga ginbanhaw. Nagsiling si Pablo nga si Jesus “ang una nga bunga sa mga nagtulog sa kamatayon.” Ano ang buot silingon nga si Jesus ang una? Sia ang una nga tawo nga ginbanhaw nga isa ka espiritu, kag sia ang una nga tawo nga ginbanhaw para magkabuhi sa langit.—1 Cor. 15:20; Binu. 26:23; basaha ang 1 Pedro 3:18, 22.

13. Suno kay Pablo, ano ang kinalain ni Adan kag ni Jesus?

¹³ Paano ang kamatayon sang isa ka tawo makahatag sing kabuhi sa minilyon? Ginsabat ini ni Pablo. Ginpaathag niya ang natabo sa katawhan bangod sang ginhimo ni Adan kag ang aton paglaum bangod sang halad-gawad sang Cristo. Parte kay Adan, si Pablo nagsulat: “Tungod sa isa ka tawo may kamatayon.” Bangod sang sala ni Adan, napatay sia kag mapatay man ang iya mga kaliwat. Nagaantos kita tanan asta subong bangod sang indi pagtuman ni Adan. Pero bangod ginbanhaw sang Dios ang iya Anak, may paglaum kita! Nagsiling si Pablo: “Tungod man sa isa ka tawo [nga si Jesus] may pagkabanhaw.” Gani ginpaathag ni Pablo ang kinalain ni Adan kag ni Jesus: “Tungod kay Adan ang tanan nagakapatay, kag tungod man sa Cristo ang tanan mabanhaw.”—1 Cor. 15:21, 22.

14. Mabanhaw bala si Adan? Ipaathag.

¹⁴ Ano ang buot silingon ni Pablo sang nagsiling sia nga “tungod kay Adan ang tanan nagakapatay”? Ginapatuhuyan ni Pablo ang tanan nga tawo. Napanubli sang tanan nga kaliwat ni Adan ang iya sala gani indi na sila perpekto kag mapatay man sila. (Roma 5:12) Indi malakip si Adan sa mga “mabanhaw.” Indi sia makabenepisyo sa halad-gawad sang Cristo. Ngaa? Bangod perpekto sia nga tawo nga hungod nga nagpakasala sa Dios. Sa tion sang paghukom sang “Anak sang tawo,” silutan man ang “mga kanding” sing “kamatayon nga wala sing katapusan” pareho kay Adan.—Mat. 25:31-33, 46; Heb. 5:9.

15. Sang nagsiling si Pablo nga “ang tanan mabanhaw,” sin-o ang nalakip sa “tanan”?

¹⁵ Talupangda nga nagsiling si Pablo nga “tungod man sa Cristo ang tanan mabanhaw.” (1 Cor. 15:22) Ginhimo ni Pablo ang iya sulat para sa hinaplas nga mga Cristiano sa Corinto nga pagabanhawon para magkabuhi sa langit, gani nalakip sila sa ‘tanan nga mabanhaw.’ “Ginpakabalaan [sila] nga nahiusa kay Cristo Jesus, nga gintawag agod mangin mga balaan.” Ginsambit man ni Pablo “ang mga nagtulog sa kamatayon nga nahiusa sa Cristo.” (1 Cor. 1:2; 15:18; 2 Cor. 5:17) Sa isa pa ka sulat ni Pablo, nagsiling sia nga ang mga ‘napatay pareho kay Jesus, banhawon man pareho sa iya, kag sa sini nga mga paagi nahiusa sila sa iya.’ (Roma 6:3-5) Ginbanhaw si Jesus nga isa ka espiritu kag nagpalangit sia. Amo man sini ang matabo sa tanan nga “nahiusa sa Cristo,” ukon sa tanan nga hinaplas nga Cristiano.

16. Ano ang buot silingon sang ginsiling ni Pablo nga si Jesus ang “una nga bunga”?

¹⁶ Nagsulat si Pablo nga ginbanhaw ang Cristo bilang “ang una nga bunga sa mga nagtulog sa kamatayon.” Tandai nga may iban pa nga ginbanhaw man sang una, pareho kay Lazaro. Pero si Jesus ang una nga ginbanhaw nga isa ka espiritu kag nakabaton sing kabuhi nga wala sing katapusan. Daw pareho sia sa una nga patubas nga ginhalad sang mga Israelinhon sa Dios. Kag sang ginsiling ni Pablo nga si Jesus ang “una nga bunga,” buot silingon sini nga may iban pa nga banhawon para magkabuhi sa langit. Maabot ang tion nga banhawon man ang mga apostoles kag ang iban pa nga “nahiusa sa Cristo” para magkabuhi sila sa langit, pareho kay Jesus.

17. San-o banhawon ang mga “nahiusa sa Cristo” para magkabuhi sila sa langit?

¹⁷ Sang nagsulat si Pablo sa mga taga-Corinto, wala pa nag-umpisa ang pagbanhaw sa mga “nahiusa sa Cristo” para magkabuhi sila sa langit. Ginapahangop sang sulat ni Pablo nga matabo ini sa palaabuton. Nagsiling sia: “Ang kada isa mabanhaw sa iya kaugalingon nga turno: ang Cristo ang una nga bunga, dayon ang mga iya sang Cristo sa tion sang iya presensia.” (1 Cor. 15:23; 1 Tes. 4:15, 16) Ari na kita subong sa gintagna nga “presensia” sang Cristo. Gani ang mga apostoles kag ang iban pa nga hinaplas nga napatay dapat anay maghulat asta sa tion sang iya presensia antes sila ‘banhawon para magkabuhi sa langit kag mahiusa sila kay Jesus.’

18. (a) Ngaa makasiling kita nga may isa pa ka pagkabanhaw pagkatapos mabanhaw ang mga mapalangit? (b) Ano nga mga hitabo sa langit ang ginasiling sang 1 Corinto 15:24-26?

¹⁸ Ano naman ang matabo sa tanan nga matutom nga mga Cristiano nga indi mangin kaupod sang Cristo sa langit? May paglaum man sila nga mabanhaw. Ginatawag sang Biblia ang pagkabanhaw ni Pablo kag sang iban pa nga nagpalangit nga “mas temprano nga pagkabanhaw.” (Fil. 3:11) Ginapahangop sini nga may masunod pa nga pagkabanhaw. Amo ini ang pagkabanhaw nga ginsiling ni Job nga matabo sa iya sa palaabuton. (Job 14:15) Pero, “ang mga iya sang Cristo sa tion sang iya presensia” mangin kaupod ni Jesus sa langit kon laglagon na niya ang tanan nga panguluhan kag ang tanan nga awtoridad kag gahom. Laglagon man niya ‘ang kamatayon nga amo ang katapusan nga kaaway.’ Gani, wala na sing kamatayon ang mga banhawon para magkabuhi sa langit. Ano naman ang paglaum sang iban?—Basaha ang 1 Corinto 15:24-26.

19. Ano ang mapaabot sang mga may paglaum nga mabuhi sing wala sing katapusan sa duta?

¹⁹ Ano ang mapaabot sang mga may paglaum nga mabuhi sing wala sing katapusan sa duta? Si Pablo nagsiling: “May paglaum ako sa Dios . . . nga may pagkabanhaw sang mga matarong kag mga indi matarong.” (Binu. 24:15) Indi gid makapalangit ang indi matarong nga tawo, gani ginapahangop sini nga may mga banhawon diri sa duta sa palaabuton.

20. Paano napalig-on ang imo pagsalig nga may ara gid pagkabanhaw?

²⁰ Sigurado gid nga “may pagkabanhaw”! Ang mga banhawon sa duta may paglaum nga mabuhi sing wala sing katapusan. Makasalig kita nga matuman gid ini nga promisa. Makapaumpaw gid ini kon madumduman naton ang aton mga pinalangga nga napatay. Matabo ini nga pagkabanhaw sa tion nga ang Cristo kag ang iban pa ‘magagahom na subong mga hari sa sulod sang 1,000 ka tuig.’ (Bug. 20:6) Makasalig man kita nga kon mapatay kita antes magsugod ang Isa ka Libo ka Tuig nga Paggahom sang Cristo, banhawon man kita. Kay man, “ang [aton] paglaum wala nagaresulta sa kapaslawan.” (Roma 5:5) Pabakuron kita sini kag buligan nga mangin mas malipayon sa pag-alagad sa Dios. Pero may matun-an pa gid kita sa 1 Corinto kapitulo 15. Binagbinagon ini sa masunod nga artikulo.