Pag-alagad Subong Nagasalig nga mga Masigka Manugpangabudlay ni Jehova

“Napahayag niya sa imo, O tawo, ang maayo. Kag ano bala ang ginakinahanglan sa imo ni Jehova kundi ang paghimo sing matarong kag ang paghigugma sang kalulo kag ang paglakat sing maugdang upod sa imo Dios?”—MIQUEAS 6:8.

 1. Sa anong Makasulatanhon nga rason nga ang tanan nga mga alagad ni Jehova karon matawag nga “mga masigka manugpangabudlay” niya?

ANG Cristianong si apostol Juan nagsulat: “Tan-awa ninyo kon daw ano nga gugma ang ginhatag sang Amay sa aton, nga pagtawgon kita nga mga anak sang Dios; kag amo ina kita.” (1 Juan 3:1) Kag si apostol Pablo nagsiling tuhoy sa iya kaugalingon kag sa iya kaupod nga si Apolo: “Mga masigka manugpangabudlay kami sang Dios.” (1 Corinto 3:9) Ining duha ka pinamulong ginpamulong sang kag nahanungod sa hinaplas nga mga sumulunod ni Jesucristo. Apang sa prinsipio naaplikar ini sa tanan nga matuod nga mga alagad sang Dios. Busa sarang ini maparaprase sa pagsiling: ‘Tan-awa ninyo kon daw ano nga gugma ang ginpakita sang Amay sa aton agod nga kita mangin mga masigka manugpangabudlay ni Jehova.’

 2. Ngaa posible para sa mga alagad ni Jehova ang mangin mga masigka manugpangabudlay niya?

² Paano ang maluya kag dihimpit nga mga tawo posible nga mangin masigka manugpangabudlay sang dakung Manunuga, nga wala sing katapusan sa gahom kag kaalam, himpit sa katarungan, kag sa personipikasyon sang gugma? Posible ini bangod kay ang aton una nga mga ginikanan ginhimo sa larawan kag kaanggid sang Manunuga kag sang iya masigka manugpangabudlay, ang Pulong, ukon ang Logos. (Genesis 1:26, 27; Juan 1:1) Gani ang aton una nga mga ginikanan ginhatagan sing kaalam, katarungan, gahom, kag gugma. Amo sina kon ngaa si Jehova makasiling sa iya dutan-on nga mga alagad paagi sa iya manalagna: “Napahayag niya sa imo, O tawo, ang maayo. Kag ano bala ang ginakinahanglan sa imo ni Jehova kundi ang paghimo sing matarong kag ang paghigugma sang kalulo kag ang paglakat sing maugdang upod sa imo Dios?”—Miqueas 6:8.

 3. Ano ang ginapakita sang Miqueas 6:8, kag ano ang ginakinahanglan sa isa ka tawo sa wala pa sia mangin isa ka masigka manugpangabudlay ni Jehova?

³ Kon mabasa naton ang mga pulong, “Ano bala ang ginakinahanglan sa imo ni Jehova kundi . . . ?” ang implikasyon amo nga ang masunod nagasumaryo sa responsabilidad sang ‘tawo’ sa Dios kag sa isigkatawo. Kon tubtob diin ini labi nga nagaathag samtang ginahambalan naton ini. Sa pagkamatuod, indi ang bisan sin-o makalakat upod kay Jehova. Ini nga pribilehiyo ginreserba para sa mga ‘nagapakigkita sa iya paagi sa appoint­ment,’ kon hambalon pa. (Amos 3:3) Paano? Paagi sa paghimo sing bug-os nga dedikasyon kay Jehova kag pagsimbulo sini paagi sa bawtismo sa tubig, subong sang ginpakita sa nagligad nga artikulo. Gani, ano ang kahulugan sang Miqueas 6:8 para sa sining mga indibiduwal?

‘Paghimo sing Matarong’

 4. Una, ano ang kahulugan sang “paghimo sing matarong”?

⁴ Sa pag-umpisa, yara ang kinahanglanon sa “paghimo sing matarong.” Subong mga masigka manugpangabudlay ni Jehova nga Dios, dapat naton huptan ang maayo nga konsiensia. Ang “paghimo sing matarong” nagakahulugan sing paghimo kon ano ang husto, kon ano ang ginakinahanglan sa aton sang Dios. Nagakahulugan ini nga dapat naton himuon ang aton mga obligasyon, ang una amo ang paghatag kay Jehova sing eksklusibo nga debosyon. (Nahum 1:2) Wala niya ginapahanugutan ang pagribalay. Indi kita mahimo nga magpaulipon sa duha ka agalon.—1 Corinto 10:22; Mateo 6:24.

 5. Paano ginpakita ni Jesucristo nga ginahigugma niya ang matarong kag ginadumtan ang kalautan?

⁵ Dugang pa, sa “paghimo sing matarong,” dapat naton ‘higugmaon ang pagkamatarong kag dumtan ang kalautan,’ subong sang ginhimo ni Jesucristo. Bangod sang iya paghigugma sa pagkamatarong, ginhuptan niya ang iya kaugalingon nga “walay kasawayan, walay dagta, nagapahain sa mga makasasala.” (Salmo 45:7; Hebreo 7:26) Kag bangod gindumtan ni Jesus ang kalautan, tungod sa matarong nga kasingkal nga ginsabdong niya ang salimpapaw kag hakugan nga relihiosong mga lider sang kaadlawan niya.—Mateo 23:13-36; Juan 8:44.

 6. Ngaa kapin pa ang kinahanglan naton sa paghunahuna lamang nga dapat naton likawan ang ginadumilian bangod malain ini?

⁶ Subong sang makita gikan sa halimbawa ni Jesus, indi bastante nga higugmaon ang pagkamatarong. Dapat man naton dumtan—huo, tamayon, kangil-aran, kangidlisan, makusog nga likawan—kon ano ang malain. Bangod ang aton mga huyog malain kutob sa aton pagkabata kag ang aton mga tagipusuon malimbungon, madayaon, kinahanglan naton ang labi pa sang sa paghunahuna lamang nga dapat dumilian ang malain. (Genesis 8:21; Jeremias 17:9) Kon indi naton makusog nga pamatukan ang makasasala nga mga huyog kag mga pagsulay, mahulog kita sa mga ganyat sini. Dapat kita may kaanggid kakusog nga paglikaw sa malain nga ginpakita ni Finehas sang gingamit niya ang espada sa pagtuhog sa mag-asawa nga nahiusa sa imoral nga pagsimba kay Baal sang Peor.—Numeros 25:5-8.

 7. Ano ang aton pamatuod nga wala ginagamit ni Jehova subong iya mga masigka manugpangabudlay ang bisan sin-o nga malaut?

⁷ Si Jehova indi maluyag kag indi magagamit subong iya mga masigka manugpangabudlay sang bisan sin-o nga indibiduwal nga malaut. Amo sini ang gin-athag sang Salmo 50:16-18, diin aton mabasa: “Apang sa malauton nagasiling ang Dios: ‘Ano ang himuon mo bala sa pagpahayag sang akon mga palatukuran, kag ang akon katipan ginbutang mo sa imo baba? Kay ginadumtan mo ang disiplina, kag ginahaboy ang akon mga pulong sa likod mo. Kon makita mo ang makawat, nagasugut ka sa iya; kag nangin umalambit sa mga makilahion.’”

 8. Ano nga mga hitabo ang nagapakita sang pasipala nga mahimo naton paagi sa pagpadala sa sala?

⁸ Mahimo kita magpabilin nga masako sa pag-alagad kay Jehova, nagabantala sang maayong balita sang Ginharian sang Dios. Apang kon indi kita maghalong sing daku sa pagpugong sa kaugalingon, mahimo kita makalapas bangod sang undanon nga mga kaluyahon kag nagadala sing pasipala sa ngalan ni Jehova. Busa, sang nagligad nga pila ka tuig isa ka gulang ang nanghilahi upod sa espirituwal nga utod nga babayi nga may ditumuluo nga bana. Sang gab-i nga ginpahibalo ang pag-dis­fel­low­ship sa isa anay ka gulang, ang akig nga bana nagsulod sa King­dom Hall nga dala ang shot­gun kag gintiro ang duha ka nakasala nga indibiduwal. Wala sila mapatay, apang pagkabuwas amo ini ang balita sa una nga pahina sang pinakadaku nga pamantalaan sang Estados Unidos! Sa pagkamatuod, ang sala nagadala sing pasipala.—Hulubaton 6:32.

 9. Suno sa Hulubaton 4:23, ano ang dapat nga bantayan naton, kag ngaa?

⁹ Busa, nagakaigo nga ginlaygayan kita: “Labaw sa tanan nga dapat bantayan, bantayi ang imo tagipusuon, kay sa sini nagaguwa ang mga ilig sang kabuhi.” (Hulubaton 4:23) Huo, dapat naton disiplinahon ang aton kaugalingon kon sa ano naton ibutang ang aton malaragwayon nga tagipusuon. Sing labi kag labi, ang telebisyon, mga magasin, kag iban nga dagway sang media nagabalhag sing dimatinlo nga mga butang, lakip ang pornograpiya. Busa, dapat kita mangin tuman ka mapilion sa kon ano ang aton ginatan-aw, ginapamatian, kag ginabasa. Importante katama ang personal nga pagkontrol sa hunahuna! Halimbawa, mahimo mahapos ang magtigayon sing kalipay gikan sa paghunahuna sa seksuwal nga dalamguhanon, mga butang nga indi naton mahunahuna nga tilawan himuon sa matuod nga kabuhi. (Mateo 5:28) Apang masunson nga ina nga panghunahuna nagaresulta sa malain nga buhat. Sa baylo nga maghunahuna sa sina nga mga butang, nian, ipakita naton ang bunga sang balaan nga espiritu nga pagpugong sa kaugalingon kag maghunahuna sa mga butang nga ginsambit sa Filipos 4:8.—Galacia 5:22, 23.

“Paghigugma sang Kalulo”

10, 11. (a) Ano ang kinatuhayan sa ulot sang katutom kag pagkamaunungon? (b) Paano ginpakita sang Anak sang Dios ang katutom kag pagkamaunungon?

¹⁰ Ang ikaduha nga kinahanglanon nga ginsambit sa Miqueas 6:8 amo nga aton ‘higugmaon ang kalulo.’ Sa The New English Bible mabasa ini nga “paghigugma sang pagkamaunungon.” Ang foot­note sa New World Translation Reference Bible nagapakita nga ang Hebreohanong tinaga nga cheʹsedh, nga ginbadbad “kalulo,” sarang man mabadbad nga “mahigugmaon nga kalulo” ukon “maunungon nga gugma.” Suno sa mga lexicógrafo, “ang maunungon nagapakita sing malig-on nga pagbato sa bisan anong pagsulay nga magpalagyo ukon magluib.” “Ang maunungon nagadugang sa katutom sing ideya nga maluyag sa pagpangapin kag pagpakig-away tungod sa tawo ukon butang, bisan batok sa daku nga dipag-ugyonay.” Sing makawiwili, makita man naton sa Kasulatan ang diutay nga kinatuhayan sa paggamit sining mga tinaga. Halimbawa, ang termino nga “pagkamaunungon” wala gid ginagamit sa walay kabuhi nga mga butang. Apang ang tinaga nga “katutom” sulitsulit nga ginagamit. Busa, ang bulan ginatawag nga “matutom nga saksi sa kalangitan.” (Salmo 89:37) Nian, ginasiling man nga ang mga pulong sang Dios matutom, kon sayuron, masaligan.a (Bugna 21:5; 22:6) Apang, ang pagkamaunungon ginapatuhoy lamang kay Jehova nga Dios kag sa iya nahamut-an nga mga alagad. Sing nahisuno, nahanungod kay Jehova, aton mabasa: “Sa maunungon magahulag ka nga maunungon.”—2 Samuel 22:26.

¹¹ Ang Anak sang Dios matutom kag maunungon kay Jehova sa langit. Sa duta, naagihan niya ang mga pagtilaw subong tawo nga si Jesucristo kag ginpamatud-an paagi sa iya pagkamatinumanon nga sia matutom kag maunungon subong tawo. Ginapakita ini sa Hebreo 5:7-9, diin aton mabasa: “Sa mga adlaw sang iya pagkaunod si Cristo nagpangamuyo kag nag-ampo nga may mabaskog nga pagsinggit kag mga luha, sa Isa nga makaluwas sa iya sa kamatayon, kag ginpamatian sia tungod sang iya kahadlok nga diosnon. Bisan sia Anak, nakatuon sia sang pagkamasinulundon paagi sa iya gin-antos; kag sang nahimpit sia nangin ginhalinan sang kaluwasan nga dayon sa tanan nga nagatuman sa iya.”

Mga Pagtilaw sa Pagkamaunungon

12. Kon kaisa, ano ang mahimo nga magatilaw sang aton pagkamaunungon, kag ano ang reaksion sang iban sa sina nga mga pagtilaw?

¹² Ang pagkamaunungon kay Jehova nga Dios nagakinahanglan nga dapat man kita mangin maunungon sa mga alagad niya sa duta, sa aton mga masigka Cristiano. Gin-athag ini ni apostol Juan sang ginpahanumdom niya kita: “Ang wala nagahigugma sa iya utod nga iya makita, indi makahigugma sa Dios, nga wala niya makita.” (1 Juan 4:20) Ang mga pagkadihimpit sang iban mahimo nga magatilaw sang aton pagkamaunungon sa sini nga bahin. Halimbawa, kon nasaklaw sila, ang iban nagpakita sing kaluya sa ila pagkamaunungon sa organisasyon ni Jehova paagi sa pagpahilayo sa Cristianong mga miting. Ang isa pa ka pagtilaw sa aton pagkamaunungon sa aton mga kauturan nagautwas kon yadtong ginagamit ni Jehova sa pagpanguna nagsayop sa pagdesisyon. Sa liwat kag liwat, ina nga mga sayop gingamit sang iban subong balibad sa paglain sing buot kag pagbulag sang ila kaugalingon sa kitaon nga organisasyon ni Jehova. Apang makatarunganon bala ang ila ginahimo? Indi gid!

13. Ngaa ang pagbulag sa organisasyon ni Jehova indi makatarunganon, kag ano nga mga tal-us ang ginahatag sa sinang mga dimaunungon?

¹³ Ngaa indi makatarunganon ang pagbiya nila sa organisasyon? Bangod kay ang iya Pulong nagapasalig sa aton: “May daku nga paghidait ang mga nagahigugma sang kasuguan [ni Jehova], kag wala sila sing kahigayunan sa pagkasandad.” (Salmo 119:165) Dugang pa, ginsugo kita nga “magmainit sa paghigugmaanay sa isa kag isa, kay ang gugma nagatabon sang kadam-an nga mga sala.” (1 Pedro 4:8; Hulubaton 10:12) Subong man, halimbawa ang isa ka tawo magabulag sang iya kaugalingon sa katawhan ni Jehova. Diin sia makadto? Indi bala nga nagaatubang sia sing kaanggid nga hulusayon nga gin-atubang sang mga apostoles ni Jesus sang ginpamangkot niya sila kon luyag man nila magbiya sa iya? Si apostol Pedro makatarunganon nga nagsabat: “Ginuo, kay sin-o bala kami makadto? Ikaw may mga pulong sang kabuhi nga walay katapusan.” (Juan 6:68) Wala na sing lugar nga makadtuan kundi ang “Babilonia nga Daku,” ang bug-os kalibutan nga emperyo sang butig nga relihion, ukon ang paghugakom sang politikal nga “sapat nga mapintas” ni Satanas. (Bugna 13:1; 18:1-5) Sa kalabanan, ang dimaunungon nga nagbiya sa kitaon nga organisasyon ni Jehova naghimo sing kaanggid nga kausa upod sa mga wala nagapadungog sa Dios nga “Babilonia nga Daku.”

“Paglakat sing Maugdang Upod sa Imo Dios”

14, 15. (a) Ano ang mga kahulugan sang Ingles nga tinaga nga “modest”? (b) Sa diin nga kahulugan sang “kaugdang” kita nabalaka diri, kag tungod sa anong mga rason? (c) Ngaa ang mga Cristiano ‘nagahatag sing haganhagan nga pagbantabanta sa ila mga ikasarang kag kabilihanan’?

¹⁴ Ang Ingles nga tinaga nga “modest” (kaugdang) may madamo nga kahulugan. Sarang ini mapatuhoy sa isa nga indi bugalon, “limitado sa kadakuon, kadamuon, ukon kasangkaron.” Ukon sarang ini magakahulugan sing kaputli, “nagatuman sa maayong pamatasan sa pamayo kag pagginawi.” (1 Timoteo 2:9) Nian yara ang kahulugan sang “kaugdang” nga labi kita nga nabalaka, nga amo, ang paghibalo sa limitasyon sang isa ukon “paghatag sing haganhagan nga pagbantabanta sa mga ikasarang ukon kabilihanan sang isa.” Indi kita mahimo nga mangin isa ka masigka manugpangabudlay ni Jehova kon tuman kataas ang aton pagkabig sa aton kaugalingon, pagtawag sing igtalupangod sa aton kaugalingon sa baylo sang pagtawag sing una nga igtalupangod kay Jehova nga Dios.

¹⁵ Ang ‘paghatag sing haganhagan nga pagbantabanta sa aton mga ikasarang kag kabilihanan’ amo ang hayag nga kahulugan nga dapat naton iangot sa Hebreohanong tinaga nga ginbadbad sing “maugdang” sa Miqueas 6:8. Makita ini gikan sa kon paano gingamit ang tinaga sa isa pa ka paggamit sini sa Hebreohanong Kasulatan. Sa Hulubaton 11:2 ginpaanggid ini indi sa seksuwal nga pagkadimatinlo kundi sa bugal, nga nagaresulta sa paghunahuna sing tuman kataas sa kaugalingon. Didto aton mabasa: “Nagaabot bala ang bugal? Nian nagaabot ang kahuluy-an; apang upod sa maugdang yara ang kaalam.” Ang kaugdang nagaupod sa kahadlok kay Jehova, nga ginabuylog man sa kaalam. (Salmo 111:10) Ang tawo nga maugdang may kahadlok kay Jehova bangod nahibaluan niya ang daku nga kinatuhayan sa ulot niya kag sang Dios, sa ulot sang pagkamatarong kag gahom ni Jehova kag sa iya kaugalingon nga pagkadihimpit kag kaluyahon. Busa, ang tawo nga maugdang nagapangabudlay para sa iya kaluwasan upod ang kahadlok kag pagkurog.—Filipos 2:12.

16. Ano ang iban nga mga kasulatan nga nagapakita kon ngaa dapat magmangin maugdang ang mga Cristiano?

¹⁶ Tuman kadamo ang rason kon ngaa ang mga masigka manugpangabudlay ni Jehova dapat mangin maugdang! Bisan ano man kadaku ang aton kaalam, ang pisikal nga kusog nga ginhatag sa aton, ang materyal nga manggad nga ginapanag-iyahan naton, wala kita sing rason sa pagpabugal. (Jeremias 9:23) Ngaa wala? Bangod sang prinsipio nga ginasambit sa 1 Corinto 4:7: “Kay sin-o bala ang nagapalabi sa imo? Ano bala ang imo nga wala mo mabaton? Nian kon imo nabaton ini, ngaa bala nga nagapabugal ka subong nga daw wala mo mabaton?” Wala man kita sing rason sa pagpabugal bangod sang mga bunga sang aton ministeryo, kay ano bala ang mabasa naton sa 1 Corinto 3:6, 7? Didto si Pablo nagsiling: “Ako nagtanum, si Apolo nagbunyag, apang ang Dios nagpatubo; gani ang nagatanum ukon ang nagabunyag indi sia bisan ano, kundi ang Dios lamang ang nagapatubo.” Ang pinamulong ni Jesus sa Lucas 17:10 nagabulig man sa aton nga magmaugdang, kay nagsiling sia: “Sang nahimo ninyo ang tanan nga ginsugo sa inyo, magsiling kamo, ‘Mga ulipon kami nga walay pulos. Ginhimo lamang namon ang amon katungdanan.’”

17. Ngaa ang pagkamaugdang amo gid ang dalanon sang kaalam?

¹⁷ Ang pagkamaugdang amo gid ang dalanon sang kaalam. Ang kaugdang nagahimo sa aton nga mangin kontento bisan diin man kita may pribilehiyo sa pag-alagad. Kon maugdang kita, indi kita ambisyuso nga magatinguha sa pagpabugal kundi mangin kontento sa paggawi subong “labing diutay.” (Lucas 9:48) Nian, matigayon man naton ang panimuot sang salmista, nga nagsiling: “Ang isa ka adlaw sa sulod sang imo mga luwang labi pa kaayo sa isa ka libo bisan diin. Maayo pa nga ako magmanugbantay sang ganhaan sa balay sang akon Dios sang sa magpuyo sa mga layanglayang sang pagkamalaut.” (Salmo 84:10) Dugang pa, kon kita maugdang, matigayon naton ang gugma nga magapahulag sa aton sa pagpanguna sa pagpakita sing kadungganan sa iban.—Roma 12:10.

Ang Kaugdang nga Nagakabagay sa Pamatan-on

18. (a) Ngaa ang pagkamaugdang labi na nga nagakaigo para sa mga pamatan-on? (b) Ang pagkakinahanglanon sang pagkamaugdang ginapakita sang ano nga rekord nga nagaulamid sa modernong-adlaw nga mga pamatan-on?

¹⁸ Labi na nga nagakaigo nga ang Cristianong pamatan-on magpuni sang ila kaugalingon sing panapton sang kaugdang. Daw ano katahom nga halimbawa ang ginhatag para sa ila ni Elihu! Bisan pa may husto sia nga mga sabat, handa sia sa paghulat sing matinahuron tubtob nakahambal na ang mga tigulang. (Job 32:6, 7) Sing masunson, ang mga pamatan-on nahuyog sa pagbatyag sing kompiansia sa kaugalingon, nga wala makahibalo sing maayo sang ila mga limitasyon. Bangod sang ila pisikal nga kusog kag sang ila natigayon nga ihibalo, mahimo nga pakanubuon nila ang mga gulang. Apang ang ihibalo indi pareho sing kahulugan sa kaalam, nga amo ang aplikasyon sang ihibalo. Ang halimbawa amo ang masubo nga rekord nga ginahimo sang modernong mga pamatan-on sa Estados Unidos. Didto, 63 porsiento sang mga pag-aresto tungod sa dalagku nga krimen ang nagaulamid sa mga pamatan-on tubtob sa 24 anyos ang edad, kag 30 porsiento sang mga pag-aresto sa mga ubos sa edad nga 18. Ginareport man nga “ang pagmaneho nga hubog ukon nakadruga amo ang una nga kabangdanan sang kamatayon sa tunga sang mga Amerikano nga nagaedad sing 15-24.” Sa sina nga pungsod, “dugang kag dugang nga pag-asawahay sang mga tin-edyer ang nagadangat sa diborsio,” samtang ginareport nga “ang pag-asawahay mahimo nga magadugay kon ang nobya kag nobyo may pila ka tuig sang kaalam sa likod nila sang magkadto sila sa altar.”

19. Anong Makasulatanhon nga laygay ang dapat ipatudok sang mga pamatan-on?

¹⁹ Daw ano ka maalamon, nian, ang laygay sang Pulong sang Dios! Sing nagakaigo, ginasugo sini ang mga pamatan-on nga tahuron ang ila amay kag ang ila iloy, nga magmasinulundon sa ila sa tanan nga butang. (Efeso 6:1-3; Colosas 3:20) Labi na gid nga dapat ipatudok sang mga pamatan-on ang maalam nga laygay: “Salig kay Jehova sa bug-os mo nga tagipusuon kag dili magsandig sa imo kaugalingon nga paghangop. Sa tanan mo nga dalanon kilalaha sia, kag magatuytoy sia sa imo mga banas.”—Hulubaton 3:5, 6.

20. Ano nga mga padya ang mapaabot sang tanan nga dedikado kag bawtismado nga mga tawo kon pamatian nila ang Miqueas 6:8?

²⁰ Ano nga mga padya ang paabuton naton tanan kon, sa tapos mapakita ang pagsalig kay Jehova paagi sa dedikasyon kag bawtismo sa tubig, aton ‘ginahimo ang matarong, ginapakita ang maunungon nga gugma, kag nagalakat sing maugdang upod sa aton Dios’? Pinakaimportante sa tanan, matigayon naton ang kahamuot ni Jehova bangod sang pagsunod sa iya mga tulumanon kag sa amo ginapahalipay ang iya tagipusuon paagi sa pagpakigbahin sa pagpakabalaan sa iya daku kag makapulunaw nga ngalan. (Hulubaton 27:11) Dugang pa, marealisar naton sa aton kaugalingon nga kabuhi ang kamatuoran sang prinsipio nga “ang diosnon nga debosyon mapuslanon sa tanan nga butang, kay nagasaad ini sing kabuhi karon kag sa palaabuton.”—1 Timoteo 4:8.

[Footnote]

Ano ang Imo mga Sabat?

◻ Nahisuno sa Miqueas 6:8, ano ang ginakinahanglan sa “paghimo sing matarong”?

◻ Ano ang labot sang pagkamaunungon kay Jehova sa aton kaangtanan sa mga masigka Cristiano?

◻ Ngaa dapat kita magmangin ‘maugdang sa paglakat upod sa Dios’?

◻ Ngaa ang kaugdang labi na nga nagakaigo sa Cristianong mga pamatan-on?

[Laragway sa pahina 17]

Ginaamligan mo bala ang imo tagipusuon paagi sa pagpili kon ano ang imo ginatan-aw, ginapamatian, kag ginabasa?

[Laragway sa pahina 18]

Nahibal-an ni Pedro nga wala na sing iban nga makadtuan bangod si Jesus ang may “mga pulong sang kabuhi nga walay katapusan.” Determinado man bala kamo sa pagpabilin nga maunungon sa organisasyon ni Jehova?