Ang Aton Bahandi, ang Modernong-Adlaw nga Ministeryo sang Himaya

“May amon sining bahandi sa mga suludlan nga duta, agod nga ang tama nga pagkadaku sang gahom mangin iya sang Dios kag indi sa amon kaugalingon.”​—⁠2 CORINTO 4:⁠7.

 1. (a) Ano ang aton mahimayaon nga bahandi, kag ngaa? (b) Paano ginalaragway sang Biblia ang paghatag sang Mosaikong Kasuguan?

ANG ministeryo sang pagbantala ‘sining maayong balita sang ginharian’ sa konklusion sang sistema sang mga butang isa gid ka bahandi, isa ka pagkabutang nga labing hamili. Bangod si Jehova isa ka Dios sang himaya, ang pag-alagad sa Dios isa ka ministeryo sang himaya, busa isa ka bahandi. (Mateo 24:​14; 2 Corinto 3:​18⁠–​4:1) Nahanungod sa mahimayaon nga paghatag sang Mosaikong Kasuguan, ang Exodo 34:​29, 30 nagasiling: “Sang nagdulhog si Moises sa Bukid nga Sinai nga may duha ka tapitapi sang Pagpamatuod sa kamot ni Moi­ses sang sia nagdulhog sa bukid, kag si Moises wala makahibalo nga ang panit sang iya nawong nagsilak bangod sang iya pagpakighambal [kay Jehova]. Sang nakita ni Aaron kag sang tanan nga katawhan sang Israel si Moises, yari karon! ang panit sang iya nawong nagsilak kag nahadlok sila sa pagpalapit sa iya.”

 2. Ano ang ginalandong sang pag-alagad sang Mosaikong Kasuguan, kag ngaa ang ulihi nga ministeryo mas mahimayaon?

² Ang mga bersikulo 32 tubtob 34 nagadugang: “Kag sang ulihi nagpalapit ang tanan nga katawhan sang Israel, kag ginhatag niya sa ila sa sugo ang tanan nga napamulong sa iya ni Jehova sa Bukid nga Sinai. Kag sang nakatapos si Moises sa pagpakighambal sa ila, nagbutang sia sing isa ka tabon sa iya nawong. Apang kon si Moises magsulod sa pag-atubang kay Jehova sa pagpakighambal sa iya, ginkuha niya ang tabon tubtob nga nagguwa sia.” Ang pag-alagad sang Mosaikong Kasuguan naglandong sang ministeryo sang bag-ong katipan sang Manugpatunga, si Jesucristo. Gani, kon ang unang ministeryo mahimayaon, daw ano pa gid ang ulihi, “ang pagpanghikot sang espiritu,” nagalabaw sa himaya! (2 Corinto 3:​7-11) Labi ini ka mahimayaon bangod ini may himaya nga nagapabilin, kag ang mga sumulunod ni Jesucristo nagapakigbahin sa sini.​—⁠Roma 12:⁠11.

 3. (a) Ano ang matuod nahanungod sa ministeryo sang mga Saksi ni Jehova, kag ngaa indi ini maathag sa madamo nga tawo? (b) Ano ang nagapamatuod nga si Moises yadto anay sa mahimayaon nga presensia ni Jehova?

³ Busa, nagakahulugan ini nga ang ministeryo sang mga Saksi ni Jehova mahimayaon. Apang, indi ini hayag sa madamo nga ginbulag sang dimatuod nga relihion. Bisan pa madamo ang may Biblia kag ayhan nagabasa sini, wala sila sing ‘mata nga nagatan-aw.’ (2 Pedro 1:​5-9) Agod makuha ang tabon sa ila mga mata, dapat sila magliso kay Jehova nga Dios sa pagtuo, kay sang si Moises nag-atubang sa presensia ni Jehova, ginkuha niya ang tabon nga nagatabon sang iya nawong sa mga Judiyo. (2 Corinto 3:16) Ang mga Israelinhon hinadlukan sa pagtan-aw sang himaya sang Dios sa nawong sang ila manugpatunga kag nangabay nga tabunan ini gikan sa ila mga mata. Subong nga ang nagasilak nga butang nga nadayag sa kapawa nagaidlak sa kadulom, gani si Moises, ang ila manugpatunga, nagpabanaag sang himaya ni Jehova, nagapamatuod nga halin sia sa atubangan ni Jehova.

 4. Paano karon ginailog sang mga dimatinuohon ang mga Judiyo sang una, apang ano ang wala ginakahadlukan sang mga sumulunod sang Daku Pa nga Moises?

⁴ Si Moises naglandong sa daku nga Manalagna sang Dios, si Jesucristo. Kaangay sang iya prototipo, ining Daku Pa nga Moises wala mahadlok sa pagtan-aw sing direkta sang himaya ni Jehova. Tubtob karon, walay sapayan, ang dimatinuohon nga katawhan nga ginbulag sang Yawa kag sang iya Babilonianhon nga relihion nagailog sa mga Judiyo sang una kag nagadumili sa pagtan-aw, ukon sa paghangop, sang himaya sang Daku Pa nga Moises, si Jesucristo. (2 Corinto 3:​12-15) Apang, ang iya matuod nga mga sumilimba wala nahadlok sa pagtan-aw sa banaag sang himaya ni Jehova nga nagsilak gikan sa nawong ni Jesucristo. Nahilway sa Babilonianhon nga impluensia, ginpalig-on sila nga ipakita ang himaya sang Dios. “Busa,” sulat ni Pablo, “sanglit nga may amo kami nga paglaum, kami masidla gid.”​—⁠2 Corinto 3:⁠12.

Mga Manugpabanaag sang Himaya sang Dios

 5. Paano naton mapabanaag ang himaya sang Dios kag mangin kaangay ni Moises sa ibabaw sang bukid sa presensia ni Jehova?

⁵ Ginkuha ni Jesucristo ang tabon paagi sa pagpakilala kag pagbantala kay Jehova nga Dios sa aton. (Juan 1:​14, 17, 18) Gani dapat kita magsiga, kag sa amo ang himaya sang Dios magasiga paagi sa “mahimayaon nga maayong balita nahanungod kay Cristo, nga larawan sang Dios,” nga dapat naton ibantala. Ang iya kasanag amo “ang mahimayaon nga ihibalo sa Dios sa nawong ni Cristo.” Dapat naton ipabanaag ini nga himaya paagi sa pagpakighambal sang himaya ni Jehova kag sang himaya sang iya Ginharian paagi sa iya Anak. (2 Corinto 4:​4-6) Kaangay kay Moises sa ibabaw sang Bukid sa presensia ni Jehova, ang Iya mga Saksi sa duta wala nagatabon sang ila tagipusuon gikan sa himaya ni Jehova. Ginadayaw nila ang himaya nga ginapabanaag sa nawong sang Anak kag Hari ni Jehova, si Jesucristo. Gani, dapat nila ipaiwag ang kapawa nahanungod sa himaya sang Dios.

 6. Paano ginalaragway ni Pablo ang aton ministeryo sang himaya sa 2 Corinto 3:​18, kag sa anong paagi kita “ginabalhin”?

⁶ Sa tanan nga mga masigkasaksi sang himaya ni Jehova, ginalaragway ini ni apostol Pablo sa sining mga pulong: “Kag kita tanan, sa guya nga walay tabon, nga nagatulok sang himaya ni Jehova, ginabalhin sa iya kaangay gikan sa isa ka himaya pa himaya, subong gid sang ginhimo ni Jehova nga Espiritu.” (2 Corinto 3:18) Sa pagbaton naton sing labi pa sa himaya sini nga kapawa, busa labi pa nga dapat kita magsiga, kag sa amo labi pa gid kita nga magbalhin. Ang mga hunahuna ginbag-o kag gin-islan, bisan pa indi makita ang pagbalhin sa lawas ukon guya. Ang kapawa sang mahimayaon nga mensahe nga ginaiwag naton ang nagapatubas sing kinatuhayan sa aton. Ang aton kabuhi ginbalhin nga mangin kaangay kay Cristo, samtang ginahanda naton ang aton kaugalingon nga tumanon ang pribilehiyo nga pag-alagad sang pagpalapnag sining mahimayaon nga kapawa sa iban.​—⁠Hebreo 13:⁠15.

 7. Gikan sa anong tuburan ang matuod nga himaya, kag paano naton mapabutyag ina nga himaya?

⁷ Inang tanan nga pagbalhin tuga sang espiritu, ukon aktibo nga kusog, sang Dios. Ang klero sang Cristiandad wala nagapabanaag sang himaya ni Jehova nga Dios kundi nagahimo sing pakitakita nga danyag agod makatuga sing talan-awon. Ang himaya indi aton himaya, kag indi kinahanglan nga punihan naton ang aton kaugalingon sing magarbo eklesiastiko nga panapton nga seda, bulawan, kag nagaidlak nga alahas. Ang matuod nga himaya naghalin sa espiritu sang Dios kag ginapabutyag paagi sa paghatag sing mahimayaon nga panaksi nahanungod kay Jehova nga Espiritu.

Ang Tanan May Pribilehiyo nga Manugdala sang Kapawa

 8, 9. Anong pagpalig-on ang ginahatag ni Pablo sa aton sa 2 Corinto 4:​1, 2, kag ano nga determinasyon naton ang ginakinahanglan sini?

⁸ Sa 2 Corinto 4:​1, 2, aton mabasa: “Amo kon ngaa, bangod may amon kami sining ministeryo suno sa kaluoy nga ginpakita sa amon, wala kami nagapakaluya; kundi nasikway namon ang natago nga mga butang nga dapat ikahuya, wala nagalakat nga may pagdaya, ukon nagasimbog sang pulong sang Dios, kundi paagi sa pagpadayag sang kamatuoran nagapakilala kami sang amon kaugalingon sa konsiensia sang tagsa ka tawo sa atubangan sang Dios.” Ginpakita sang Dios ang kaluoy sa aton paagi sa pagtangdo sa aton sini nga ministeryo. Isa ini ka laygay nga nagapalig-on sa aton nga magpadayon sing maisugon, kag amo ini ang himuon naton! Bangod ginkahamut-an kita sang kapawa gikan sa Pulong sang Dios, obligado kita nga iiwag ini sa iban.​—⁠Ipaanggid ang Mateo 5:​14-16.

⁹ Ang mga butang nga ginakahuya sang mga tawo, subong sang pangdaya, ginatago nila paagi sa daya kag limbong. Apang wala kita sing rason nga mahuya bangod ang aton mensahe kag hilikuton indi malimbungon kundi matarong kag matuod. Gani, mahimo naton mapaiwag ang bug-os nga himaya sang kapawa. Wala naton ginagamit ang Pulong sang Dios sing madayaon. Ang paghimo sini nagakahulugan sang paggamit sini sing makagod para sa personal nga ganansia, himaya, bentaha, kag kalibutanon nga gahom kag agod makalikaw sa pagpamatok kag paghingabot sang kalibutan. Ang mga wala nahadlok sa pagkadto kay Jehova nga wala sing tabon ang mga nawong kag sa pagtan-aw sa mahimayaon nga kapawa sang kamatuoran indi man mahadlok sa pag-atubang sa ila responsabilidad. Ipabanaag nila ang kapawa.

10. Ngaa indi sala sang mga Saksi ni Jehova kon ang maayong balita sang Ginharian ginatabunan sa itololok sang iban nga mga tawo?

¹⁰ Kon ang maayong balita sang Ginharian natabunan sa itololok sang iban, indi ini sala sang mga Saksi ni Jehova kundi sala gid nila. Ang maayong balita sang Ginharian wala ginatago. Ang bug-os kalibutan nga pagbantala sang mga Saksi ni Jehova kilala katama. Busa, makasiling sila subong sang ginsiling ni apostol Pablo: “Wala ini mahimo sa tago.” Sa pagkamatuod, subong sang ginsulat niya, ang maayong balita “ginwali sa bug-os nga tinuga sa idalom sang langit.”​—⁠Binuhatan 26:​26; Colosas 1:⁠23.

11. Ngaa ang mahimayaon nga maayong balita ginatabunan sa tunga sang madamo nga katawhan?

¹¹ Yadtong sa ila ang maayong balita sang Ginharian sang Dios natago amo ang mga manugpamatok, ang mga ginbulag sang Yawa. (Ipaanggid ang Mateo 12:⁠30.) Kon indi sila magpalayo sa dimatuod nga relihion kag sa mga siod sang Yawa, nalinya sila para sa kalaglagan. Sa idalom sang impluensia sang yawa, ina nga mga tawo nagatabon sang ila mga mata, kay si apostol Pablo nagasiling sa 2 Corinto 4:​3-5: “Kag bisan ang maayong balita nga aton ginabantala natabonan, natabonan ini sa ila nga nagakawala, sa ila nga ang dios sining sistema sang mga butang nagbulag sang mga painoino sang mga dimatinuohon, agod nga indi sila makakita sang mahimayaon nga kapawa sang maayong balita ni Cristo. Kay wala namon ginawali ang amon kaugalingon, kundi si Cristo Jesus subong Ginuo, kag kami subong nga inyo mga ulipon tungod kay Jesus.”

12. Kabaliskaran sa mga bulag sing painoino, paano nagahulag ang katawhan ni Jehova sa ginasiling sang 2 Corinto 4:​6?

¹² Ang mga nabulag sa kaisipan indi luyag magpati. Ang indi nila pagpati nagbukas sang ila painoino sa pagsakop sang mga demonyo. (1 Timoteo 4:1) Indi nila makita ang himaya ni Jehova ukon ang pagbanaag sini gikan sa nawong ni Jesus, ang Daku Pa nga Moises. Ang katawhan ni Jehova nakakita sang mahimayaon nga kapawa gikan sa Biblia kag ginapaiwag ini sa iban. Gani ang tanan nga mga alagad sang Dios mga manugdala sang kapawa, kag ang Dios nagasugo nga mag-iwag ang kapawa. Ang kapawa dapat magbanaag gikan sa katawhan sang Dios kag magaiwag sa iban nga yara sa kadudulman kag sa katalagman sang kalaglagan. Amo gid sini ang ginasiling sang 2 Corinto 4:​6: “Kay ang Dios amo sia nga nagasiling: ‘Ang kapawa magsilak gikan sa kadudulman,’ kag nagsilak sia sa aton mga tagipusuon sa paghatag sang kapawa sang pagkilala sang himaya sang Dios sa nawong ni Cristo.” Bangod sini, ang mga Saksi ni Jehova nagatuman sang balaan nga sugo kag nagaiwag sang ila kapawa sa iban, sa himaya sang Dios.

Mahimayaon nga Bahandi sa Maluya nga Suludlan

13. Ano ang resulta sang paghatag sing ginpakamaayo nga pag-alagad subong mga manugdala sang kapawa sa mga tinuga sang unod?

¹³ Sa sining daku kaayo nga pribilehiyo sang pag-alagad, importante gid nga ang mga manugdala sang kapawa mapamatud-an nga takus sa pagdala sang kapawa paagi sa paghupot sang ila integridad sa Dios. Agod mahimo ining matahom nga pribilehiyo sang pag-alagad, wala gingamit sang Dios ang balaan nga mga anghel, nga maluyag sa paglili sa sining mga butang, kundi ginhatag niya ining ginpakamaayo nga pag-alagad sa mga tinuga sa unod. (1 Pedro 1:12) Ginhimo niya ini nga nagapadaku sang iya kaugalingon nga ikasarang walay sapayan sang tawhanon nga mga kaluyahon. Subong sang ginasiling sang 2 Corinto 4:​7: “Apang, may amon sining bahandi sa mga suludlan nga duta, agod nga ang gahom labaw sa kon ano ang kinaandan mangin iya sang Dios kag indi sa amon kaugalingon.”

14. (a) Ano “ining bahandi sang mga suludlan nga duta”? (b) Ngaa si Moises kag si Jesucristo maalamon nga mga halimbawa para sa aton kon tuhoy sa bahandi?

¹⁴ Ang mga suludlan sang una nga panahon masunson nga ginagamit subong mga bulutangan sang mga bahandi. Ano ining mahimayaon nga bahandi nga ginapanag-iyahan sang mga Saksi ni Jehova sa mga suludlan nga maluya kag duta​—⁠sila mismo, subong maluya nga mga tinuga gikan sa yab-ok sang duta? Ini nga bahandi indi lamang ang kapawa nga nagaiwag sa ila mga tagipusuon. Amo ini ang ministeryo sina nga kapawa, nga ang ministeryo, ukon pag-alagad, dapat himuon sa ila dutan-on nga mga lawas. Ang ministeryo amo ang pag-iwag sang kapawa nga ginpasilak sang Dios sa ila mga tagipusuon. Ini nga ministeryo isa ka maayo nga bahandi subong nga ini isa ka hamili nga pribilehiyo sang pag-alagad nga ginapakigbahinan karon indi lamang sang hinaplas nga nagkalabilin sang “diutay nga panong” kundi man sang “dakung kadam-an” sang “iban nga mga karnero” sang Maayo nga Manugbantay, si Jesucristo. (Lucas 12:​32; Juan 10:​14-16; Bugna 7:9) Si Moises kag ang iya antitipo, si Jesucristo, maalam nga mga halimbawa para sa aton, nga ihugod ang aton tagipusuon sa sining bahandi sang balaan nga pag-alagad, “kay kon diin ang imo bahandi, didto man ang imo tagipusuon.”​—⁠Mateo 6:​19-21; Hebreo 11:⁠26.

15, 16. (a) Paano ginpakita ang gahom nga labaw sa kon ano ang kinaandan sa iya sang Dios kag indi aton? (b) Ngaa ang tanan nga pagpamatok sang kalibutan indi makabuka sa mga suludlan nga duta sang Dios?

¹⁵ Paano, nian, nga ang gahom nga labaw sa kon ano ang kinaandan ginapakita nga iya sang Dios kag indi sa aton kaugalingon? Sa sining paagi: Ang suludlan nga maluya kag duta kasubong naton nga may amo sining hamili nga pag-alagad kag sugo indi takus kag indi gid makatigayon sina nga kadungganan sa aton kaugalingon. Dugang pa, kita nga mga Saksi ni Jehova napaidalom sa tanan nga sahi sang pag-ipit sang kaaway sa panikasog nga kita maglitik kag mabuka agod indi kita nagakabagay nga magdala sang komisyon gikan sa Dios. Gani, ang gahom sang Daku nga Komisyoner nga nagabulig sa aton nga mabatas ang indi maayo nga paggamit sini nga kalibutan kag matuman ang komisyon kag mapamatud-an nga takus nga magpabilin sa iya pag-alagad. Busa, ang tanan nga pagpamatok sang kalibutan napaslawan sa pagbuka sa mga suludlan nga duta sang Dios kag sa pagkawat sa ila sang ila bilidhon nga bahandi, kay nasulat sa 2 Corinto 4:​8-12:

¹⁶ “Ginaipit kami sa tagsa ka luyo, apang wala mapioti; ginapalibog, apang wala mawad-i sang paglaum; ginahingabot, apang wala mapatumbayai; ginapanglampusan, apang wala malaglag. Ginadala namon pirme sa amon lawas ang kamatayon ni Jesus, agod nga ang kabuhi man ni Jesus mapahayag sa amon unod nga mamalatyon. Kay kami nga nagakabuhi ginapanugyan gihapon sa kamatayon tungod kay Jesus, agod nga ang kabuhi man ni Jesus mapahayag sa amon unod nga mamalatyon. Gani ang kamatayon nagahikot sa amon, apang ang kabuhi [paagi sa pagbantala sang maayong balita sang Ginharian] sa inyo.”

Ginahamili Katama sang Dakung Kadam-an “Ining Bahandi”

17. Paano ginatamod sang dakung kadam-an “ining bahandi” sang ministeryo sang himaya?

¹⁷ “Ang kamatayon nagahikot sa amon, apang ang kabuhi sa inyo.” Ini nga pinamulong naaplikar sa hinaplas sang espiritu nga mga Cristiano. Apang, nagapahunahuna ini sa aton nahanungod sa kaangtanan sang hinaplas nga nagkalabilin sang Dios sa dakung kadam-an sang iban nga mga karnero. Nahibaluan sang hinaplas nga dapat nila tapuson sa ulihi ang ila dutan-on nga dalanon sa kamatayon subong sang ginhimo ni Jesus, apang may yara sila mga kaupdanan nga magapakig-ambit sa ila sa mahimayaon nga bahandi sang pag-alagad, sa pagbulig sa ila paagi sa paghimo sang hilikuton nga pagbantala sang maayong balita sang Ginharian. Kaangay sang hinaplas nga nagkalabilin, ginaapresyar karon sang dakung kadam-an sang iban nga mga karnero nga ang lamang nga bahandi nga makalampuwas sa kalayuhon nga inaway sang Armagedon kag padayon nga indi masunog kag indi maano pasulod sa bag-ong kalibutan amo ining bahandi sang ginpakamaayo nga ministeryo, ang pag-alagad kay Jehova nga Dios kag sa iya mahimayaon nga Hari, si Jesucristo. Ang dakung kadam-an magapabilin, “nagahimo [sa Dios] sing balaan nga pag-alagad adlaw kag gab-i sa iya templo.”​—⁠Bugna 7:⁠15.

18. (a) Ano sa ulihi ang matabo sa dimatuod nga himaya sining kalibutan? (b) Ano nga “himaya” ang wala pagbatuna ni Jesus, kag paagi sa paghimo sing ano nga natigayon niya ang superyor nga himaya?

¹⁸ Sa indi madugay, tapuson sang Dios ang dimatuod nga himaya sining karon malauton nga sistema sang mga butang​—⁠ang “himaya” nga nagpadayon kutob sang gindala ni Satanas nga Yawa si Jesus sa mataas nga bukid kag ginpakita sa iya ang tanan nga mga ginharian sang kalibutan kag “ang himaya nila.” (Lucas 4:​5, 6) Wala pagbatuna ni Jesus ang tanyag nga himaya gikan sa tuburan subong sina kag nagpadayon nga nagahimud-os sang pagginawi sa duta nga ginakahamut-an sang Dios. Sa paghimo sina, purungpurungan sia sing himaya nga labaw pa sa himaya nga natigayon niya, ang lamang bugtong nga Anak sang Dios, sa langit sa wala pa niya ginhimo ang iya dutan-on nga asaynment nga ginhatag ni Jehova.​—⁠Juan 5:​36; 17:​5; Filipos 2:​9-11.

19. Anong dungganon nga pribilehiyo sang pag-alagad ang nagahilapit sang iya bug-os nga katumanan, kag ano ang aton determinasyon nahanungod sini?

¹⁹ Ang gintagna nga katapusan sining yawan-on nga sistema sang mga butang indi magaabot sa wala pa mahatag ang pagpanaksi sa Ginharian sa bug-os nga duta subong daku nga katapusan sang hilikuton sang mga sumulunod ni Jesucristo, ang mga Saksi ni Jehova. (Mateo 24:14) Ang pagpanaksi sang Ginharian ginahatag karon sa sulod sang kapitoan kag lima ka tuig, kag subong sang ginapakita sang mga hitabo sa kalibutan sa panahon naton, inang gintagna nga katapusan mahimo nga malapit na. Gani, ang dungganon nga pribilehiyo sang pagpakigbahin sa ministeryo sang harianon kag balaan nga pangulohan dapat nga nagahilapit na sa iya bug-os nga katumanan. (Mateo, kapitulo 24, 25; Marcos, kapitulo 13; Lucas, kapitulo 21) Ang aton pribilehiyo sa pagpakigbahin sa paghatag sing bug-os duta nga panaksi sa gintukod na nga Ginharian isa gid ka mahimayaon nga bahandi nga ginapakabahandi sing daku sang mga Saksi ni Jehova, subong mga sumulunod sang iya ginpalingkod nga Anak, si Jescuristo. Hanuot nila nga ginahandum nga magpabilin sa sini tubtob matapos ang pagpanaksi sa Ginharian kag mapurungpurungan sang Dios nga Labing Gamhanan, si Jehova, ang bug-os uniberso nga kahimtangan upod sang iya kaugalingon nga personal nga panaksi sa iya bug-os uniberso nga pagkasoberano.​—⁠Sofonias 3:⁠8.

Ano ang Imo mga Sabat?

◻ Ngaa ang ministeryo sang mga Saksi ni Jehova mahimayaon?

◻ Ngaa ang maayong balita ginatabunan sa madamo gid karon?

◻ Ano “ining bahandi sang mga suludlan nga duta”?

◻ Ngaa ang Dios naggamit sing mga suludlan nga maluya kag duta para sa iya hamili nga pag-alagad?

◻ Paano ginatamod sang katawhan ni Jehova “ining bahandi,” kag ngaa?

[Piktyur sa pahina 17]

Ang himaya sang Dios ginapabanaag gikan sa guya ni Jesucristo, ang Daku Pa nga Moises. Ang mga Saksi ni Jehova may pribilehiyo sa pagbaton sang mahimayaon nga kapawa sang Dios halin sa Biblia kag ginapabanaag ini sa iban