Hatagi sing Dalayon nga Igtalupangod ang Imo Panudlo

“Hatagi sing dalayon nga igtalupangod ang imo kaugalingon kag ang imo panudlo. Magpadayon ka sa sining mga butang, kay sa paghimo sini maluwas mo ang imo kaugalingon kag ang mga nagapamati sa imo.”—1 TIMOTEO 4:16.

1, 2. Ngaa kinahanglanon gid karon ang makugi nga mga manunudlo?

“LAKAT kamo . . . kag maghimo sing mga disipulo sa mga tawo sa tanan nga kapungsuran, . . . nagatudlo sa ila nga tumanon ang tanan nga butang nga ginsugo ko sa inyo.” (Mateo 28:19, 20) Bangod sining sugo ni Jesucristo, ang tanan nga mga Cristiano dapat manikasog nga mangin mga manunudlo. Kinahanglanon ang makugi nga mga manunudlo agod buligan ang mga bunayag sing tagipusuon nga makatigayon sing ihibalo tuhoy sa Dios antes mangin ulihi ang tanan. (Roma 13:11) Si apostol Pablo nagsiling: “Ibantala ang pulong, magmadagmit sa sini sa maayo nga panahon, sa magamo nga panahon.” (2 Timoteo 4:2) Nagakinahanglan ini nga magpanudlo sa sulod kag sa guwa sang kongregasyon. Sa pagkamatuod, ang sugo nga pagbantala indi lamang pagpahibalo sang mensahe sang Dios. Kinahanglan ang epektibo nga pagpanudlo agod ang mga interesado mangin mga disipulo.

² Nagakabuhi kita sa “makahalanguyos nga mga tion nga mabudlay pakigbagayan.” (2 Timoteo 3:1) Ang mga tawo ginatudluan sang kalibutanon nga mga pilosopiya kag butig nga mga panudlo. Madamo ang “ginadulman sa painuino” kag “nawad-an sing igbalatyag sa maayo nga paggawi.” (Efeso 4:18, 19) Ang iban may masakit nga mga pilas sa emosyon. Huo, ang mga tawo matuod gid nga “ginpanitan kag gintabog kaangay sang mga karnero nga wala sing manugpahalab.” (Mateo 9:36) Apang, paagi sa paggamit sang kalantip sa pagpanudlo, mabuligan naton ang mga bunayag sing tagipusuon nga himuon ang kinahanglanon nga mga pagbag-o.

Mga Manunudlo sa Sulod sang Kongregasyon

3. (a) Ano ang nalakip sa sugo ni Jesus nga magpanudlo? (b) Sin-o ang may panguna nga katungdanan sa pagpanudlo sa sulod sang kongregasyon?

³ Paagi sa kahimusan nga pagtuon sa Biblia sa puluy-an, minilyon ang natudluan sing personal. Apang, pagkatapos sang ila bawtismo, ang mga bag-uhan nagakinahanglan sing dugang nga bulig agod ‘makapanggamot kag mapasad sa sadsaran.’ (Efeso 3:17) Samtang ginatuman naton ang sugo ni Jesus nga narekord sa Mateo 28:19,20 kag ginatuytuyan ang mga bag-uhan sa organisasyon ni Jehova, nagabenepisyo sila sang pagtudlo sa sulod sang kongregasyon mismo. Suno sa Efeso 4:11-13, gintangdo ang mga lalaki nga mag-alagad “subong mga manugbantay kag mga manunudlo, sa tuyo nga pasibuon liwat ang mga balaan, para sa ministeryal nga hilikuton, para sa pagpalig-on sa lawas ni Cristo.” Kon kaisa, ang ila kalantip sa pagpanudlo nagalakip sing kinahanglanon nga “magsabdong, magbadlong, maglaygay, nga may bug-os nga pagbatas.” (2 Timoteo 4:2) Ang hilikuton sang mga manunudlo importante gid amo nga, sang nagsulat si Pablo sa mga taga-Corinto, ginlista niya ang mga manunudlo pagkatapos gid sang mga apostoles kag mga manalagna.—1 Corinto 12:28.

4. Paano ang ikasarang sa pagpanudlo nagabulig sa aton nga matuman ang laygay ni Pablo nga narekord sa Hebreo 10:​24, 25?

⁴ Matuod, indi tanan nga Cristiano mga gulang, ukon mga manugtatap. Apang, ang tanan ginapalig-on nga pukawon ang isa kag isa “sa gugma kag sa maayong mga buhat.” (Hebreo 10:24,25) Ang paghimo sini sa mga miting nagalakip sing nahanda sing maayo, tinagipusuon nga mga komento nga makapabakod kag makapalig-on sa iban. Ang eksperiensiado nga mga manugbantala sing Ginharian mahimo man ‘makapukaw sa maayong mga buhat’ paagi sa pagpaambit sang ila ihibalo kag eksperiensia sa mga bag-uhan kon nagapanghikot upod sa ila sa ministeryo sa latagon. Sa amo nga mga tion kag sa di-pormal nga mga higayon, mahimo man mapaalinton ang mapuslanon nga instruksion. Halimbawa, ginapalig-on ang hamtong nga mga babayi nga mangin “mga manunudlo sing maayo.”—Tito 2:3.

Ginbuyok nga Magtuo

5, 6. (a) Ano ang kinatuhayan sang matuod nga Cristianismo sa butig nga pagsimba? (b) Paano ginabuligan sang mga gulang ang mga bag-uhan sa paghimo sing maalamon nga mga desisyon?

⁵ Sa amo, ang matuod nga Cristianismo tuhay gid sa butig nga mga relihion, nga madamo sini ang nagatinguha nga kontrolon ang panghunahuna sang ila mga katapo. Sang si Jesus yari sa duta, gintinguhaan sang relihioso nga mga lider nga kontrolon ang halos tanan nga bahin sang kabuhi sang mga tawo paagi sa mapiguson nga mga tradisyon nga ginhimo lamang sang tawo. (Lucas 11:46) Amo man sini ang masami nga ginahimo sang klero sang Cristiandad.

⁶ Apang, ang matuod nga pagsimba “sagrado nga pag-alagad” nga ginahimo naton lakip ang aton “ikasarang sa pagpangatarungan.” (Roma 12:1) Ang mga alagad ni Jehova ‘ginbuyok nga magtuo.’ (2 Timoteo 3:14) Kon kaisa, ang mga nagapanguna kinahanglan maghimo sing pila ka pagsulundan kag pamaagi agod makapanghikot sing maayo ang kongregasyon. Apang, sa baylo nga tinguhaan nga magdesisyon para sa mga masigka-Cristiano, ginatudluan sila sang mga gulang “nga makilala ang husto kag sayop.” (Hebreo 5:14) Ilabi na nga ginahimo ini sang mga gulang paagi sa pagsagod sa kongregasyon sang “mga pulong sang pagtuo kag sang maayong mga panudlo.”—1 Timoteo 4:6.

Paghatag sing Igtalupangod sa Imo Panudlo

7, 8. (a) Paano mangin mga manunudlo ang mga tawo nga may limitado nga mga ikasarang? (b) Ano ang nagapakita nga ang personal nga panikasog kinahanglanon agod mangin isa ka epektibo nga manunudlo?

⁷ Apang, balikan naton ang aton tulumanon nga magpanudlo. Kinahanglan bala ang bisan anong partikular nga kalantip, tinun-an, ukon ikasarang sa pagpakigbahin sa sining hilikuton? Indi gid man. Ining bug-os kalibutan nga hilikuton sa pagpanudlo kalabanan nga ginahimo sang kinaandan nga mga indibiduwal nga may limitado nga mga ikasarang. (1 Corinto 1:26-29) Si Pablo nagapaathag: “May yari kami sining bahandi [ang ministeryo] sa human-sa-daga nga mga suludlan [di-himpit nga mga lawas], agod nga ang gahom nga labaw sa kinaandan mangin iya sang Dios kag indi gikan sa amon kaugalingon.” (2 Corinto 4:7) Ang daku nga kadalag-an sang bug-os globo nga pagbantala sing Ginharian nga hilikuton isa ka pamatuod sang gahom sang espiritu ni Jehova!

⁸ Walay sapayan sini, kinahanglan ang daku nga panikasog agod mangin “manugpangabudlay nga wala sing dapat ikahuya, nga nagagamit sing matadlong sang pulong sang kamatuoran.” (2 Timoteo 2:15) Ginpalig-on ni Pablo si Timoteo: “Hatagi sing dalayon nga igtalupangod ang imo kaugalingon kag ang imo panudlo. Magpadayon ka sa sining mga butang, kay sa paghimo sini maluwas mo ang imo kaugalingon kag ang mga nagapamati sa imo.” (1 Timoteo 4:16) Apang paano gid mahatagan sing igtalupangod sang isa ang iya panudlo, sa sulod man ukon sa guwa sang kongregasyon? Ang paghimo bala sini nagakinahanglan sing pagkasampaton sa pila ka ikasarang ukon mga pamaagi sa pagpanudlo?

9. Ano ang mas importante sangsa duna nga mga ikasarang?

⁹ Ginpakita gid ni Jesus ang tumalagsahon nga kalantip sa mga pamaagi sang pagpanudlo sa iya bantog nga Sermon sa Bukid. Sang nakatapos sia sa paghambal, “ang mga kadam-an natingala sa iya paagi sa pagpanudlo.” (Mateo 7:28) Sa pagkamatuod, wala sang isa sa aton ang makapanudlo subong sa ginhimo ni Jesus. Apang, indi kinahanglan nga mangin matanlas kita nga mga humalambal agod mangin epektibo nga mga manunudlo. Ti, suno sa Job 12:7, bisan ang “mahagop nga kasapatan” kag “nagalupad nga mga tinuga” makatudlo sing mahipos! Lakip sa bisan anong duna nga mga ikasarang ukon mga kalantip naton, ang labi pa ka importante amo ang “kon ano nga sahi sang mga tawo” kita—kon ano ang aton mga kinaiya kag kon ano ang ginapalambo naton nga espirituwal nga pamatasan nga mahimo mailog sang mga estudyante.—2 Pedro 3:11; Lucas 6:40.

Mga Estudyante sang Pulong sang Dios

10. Paano si Jesus nagpahamtang sing maayo nga huwaran subong isa ka estudyante sang Pulong sang Dios?

¹⁰ Ang isa ka epektibo nga manunudlo sang mga kamatuoran sa Kasulatan dapat mangin isa ka estudyante sang Pulong sang Dios. (Roma 2:21) Si Jesucristo nagpahamtang sing tumalagsahon nga huwaran sa sini. Sa tion sang iya ministeryo, ginpatuhuyan ukon ginpahayag ni Jesus ang mga ideya nga kaanggid sa mga sinulatan sa halos katunga sang mga tulun-an sa Hebreong Kasulatan.a Sa edad nga 12 anyos, napamatud-an nga sunado niya ang Pulong sang Dios sang nakita sia nga “nagalingkod sa tunga sang mga manunudlo kag nagapamati sa ila kag nagapamangkot sa ila.” (Lucas 2:46) Sang hamtong na sia, batasan ni Jesus nga magkadto sa sinagoga, diin ginabasa ang Pulong sang Dios.—Lucas 4:16.

11. Anong maayo nga pamatasan sa pagtuon ang dapat palambuon sang isa ka manunudlo?

¹¹ Palabasa bala ikaw sing Pulong sang Dios? Paagi sa pag-usisa sa sini “mahangpan mo ang kahadlok kay Jehova, kag makita mo ang ihibalo sang Dios.” (Hulubaton 2:4,5) Gani palambua ang maayo nga batasan sa pagtuon. Tinguhai nga basahon ang isa ka bahin sang Pulong sang Dios kada adlaw. (Salmo 1:2) Ugalia ang pagbasa sa tagsa ka guwa sang Ang Lalantawan kag Magmata! sa gilayon nga mabaton ini. Magpamati sing maayo sa mga miting sa kongregasyon. Tun-i ang maid-id nga pagpanalawsaw. Paagi sa pagtuon nga ‘usisaon sing sibu ang tanan nga butang,’ malikawan mo ang pagpasobra kag pagkadisibu sa imo pagpanudlo.—Lucas 1:3.

Gugma kag Pagtahod sa mga Ginatudluan

12. Ano ang panimuot ni Jesus sa iya mga disipulo?

¹² Ang isa pa ka importante nga kinaiya amo ang nagakaigo nga panimuot sa imo mga ginatudluan. Gintamay sang mga Fariseo ang mga nagpamati kay Jesus. “Ining kadam-an nga wala makahibalo sang kasuguan pinakamalaut nga mga tawo,” siling nila. (Juan 7:49) Apang si Jesus naghigugma gid kag nagtahod sa iya mga disipulo. Sia nagsiling: “Indi na ako magtawag sa inyo nga mga ulipon kay ang ulipon wala makahibalo sang ginahimo sang iya agalon. Kundi ako nagatawag sa inyo nga mga abyan, kay ang tanan nga butang nga akon nabatian sa akon amay ginapahibalo ko sa inyo.” (Juan 15:15) Ginpakita sini kon paano himuon sang mga disipulo ni Jesus ang ila pagpanudlo nga hilikuton.

13. Ano ang balatyagon ni Pablo sa mga gintudluan niya?

¹³ Halimbawa, wala ginhuptan ni Pablo ang malas-ay, pormal kaayo nga kaangtanan sa iya mga estudyante. Ginsilingan niya ang mga taga-Corinto: “Bisan kamo may napulo ka libo nga manunudlo kay Cristo, pat-od nga wala kamo sing madamo nga amay; bangod kay Cristo Jesus nangin amay ninyo ako paagi sa maayong balita.” (1 Corinto 4:15) May tion nga naghibi pa gani si Pablo samtang nagalaygay sa iya mga gintudluan! (Binuhatan 20:31) Nagpakita man sia sing tumalagsahon nga pagkamapailubon kag kaayo. Sa amo, nasiling niya sa mga taga-Tesalonica: “Nangin malulo kami sa tunga ninyo, subong sang nagabatiti nga iloy nga nagaatipan sang iya kaugalingon nga mga anak.”—1 Tesalonica 2:7.

14. Ngaa importante kaayo ang personal nga interes sa aton mga estudyante sa Biblia? Iilustrar.

¹⁴ Ginailog mo bala sanday Jesus kag Pablo? Ang hanuot nga gugma sa aton mga estudyante mahimo makatumbas sa bisan ano man nga kakulangan sa duna nga mga ikasarang naton. Nabatyagan bala sang aton mga estudyante sa Biblia nga personal kita nga interesado gid sa ila? Nagahinguyang bala kita sing tion nga makilala sila? Sang ang isa ka Cristianong babayi nabudlayan sa pagbulig sa isa ka estudyante nga mag-uswag sa espirituwal, mainayuhon sia nga namangkot: “May ginakabalak-an ka bala?” Ginpautwas sang babayi ang iya tudok nga mga balatyagon, nga nagasugid sing madamo nga problema kag kabalaka. Bangod sadtong mahigugmaon nga paghambalanay, nagbag-o sing daku ang babayi. Sa amo nga mga kahimtangan ang Makasulatanhon nga mga panghunahuna kag mga pulong sang paglugpay kag pagpalig-on nagakaigo. (Roma 15:4) Apang, isa ka paandam: Ang isa ka estudyante sa Biblia mahimo nagauswag sing madasig apang may pila gihapon ka di-cristiano nga paggawi nga dapat landason. Gani indi maalamon nga magsuod kaayo sing dinagakaigo sa indibiduwal. Dapat huptan ang nagakaigo nga Cristianong mga limitasyon.—1 Corinto 15:33.

15. Paano naton mapakita ang pagtahod sa aton mga estudyante sa Biblia?

¹⁵ Ang pagtahod sa aton mga estudyante nagalakip sing indi naton pagkontrol sang ila personal nga kabuhi. (1 Tesalonica 4:11) Halimbawa, mahimo nagatudlo kita sa isa ka babayi nga nagapuyopuyo upod sa lalaki nga indi kasal. Ayhan may kabataan sila. Bangod may sibu na nga ihibalo sa Dios, luyag sang babayi tadlungon ang mga butang suno sa mga talaksan ni Jehova. (Hebreo 13:⁠4) Dapat bala niya pakaslan ang lalaki ukon bulagan sia? Ayhan nagahunahuna gid kita nga kon pakaslan niya ang lalaki nga diutay lang ukon wala sing interes sa espirituwal nga mga butang magaupang ini sa iya pag-uswag sa palaabuton. Sa pihak nga bahin, mahimo nahangawa kita sa kaayuhan sang iya kabataan kag nagahunahuna nga mas maayo kon pakaslan niya sia. Bisan diin man sini, indi matinahuron kag indi mahigugmaon nga pahilabtan ang kabuhi sang estudyante kag ipilit ang aton kaugalingon nga mga opinyon tuhoy sini. Kon sa bagay, sia man ang manalod sing mga resulta sang iya desisyon. Indi bala labing maayo, nian, nga hanason ang amo nga estudyante sa paggamit sang iya “ikasarang sa paghantop” kag magdesisyon sa iya kaugalingon kon ano ang iya dapat himuon?—Hebreo 5:14.

16. Paano mapakita sang mga gulang ang gugma kag pagtahod sa panong sang Dios?

¹⁶ Ilabi na nga importante sa mga gulang sa kongregasyon nga pakig-angutan ang panong sing mahigugmaon kag matinahuron. Sang nagsulat kay Filemon, si Pablo nagsiling: “Bisan pa may daku ako nga kahilwayan sa paghambal may kaangtanan kay Cristo nga suguon ka nga himuon ang husto, sa baylo ginalaygayan ko ikaw pasad sa gugma.” (Filemon 8, 9) Kon kaisa, mahimo mag-utwas ang makapasubo nga kahimtangan sa kongregasyon. Mahimo nga kinahanglanon pa gani ang kalig-on. Ginpalig-on ni Pablo si Tito nga ‘padayon nga sabdungon [ang mga nakasala] sing matigdas, agod nga mangin mapagros sila sa pagtuo.’ (Tito 1:13) Bisan amo sini, ang mga manugtatap dapat maghalong nga indi gid maghambal sing maparas sa kongregasyon. “Ang ulipon sang Ginuo indi dapat makig-away,” sulat ni Pablo, “kundi dapat mangin mainayuhon sa tanan, sangkol sa pagpanudlo, nagapugong sang iya kaugalingon sa idalom sang kalautan.”—2 Timoteo 2:24; Salmo 141:3.

17. Anong sayop ang nahimo ni Moises, kag ano ang matun-an sang mga gulang sa sini?

¹⁷ Dapat pirme dumdumon sang mga manugtatap nga nagapakig-angot sila sa “panong sang Dios.” (1 Pedro 5:2) Si Moises, walay sapayan nga mapainubuson, nalipat sing makadali sa sini nga pagtamod. Ang mga Israelinhon ‘mabinatuon batok sa iya espiritu kag nagpamulong sia sing maparas sa iya mga bibig.’ (Salmo 106:33) Wala gid mahamuot ang Dios sa sining pagmaltratar sa Iya panong, bisan pa nga balasulon sila. (Numeros 20:2-12) Kon nagaatubang sing amo man nga mga problema karon, dapat panikasugan sang mga gulang nga magpanudlo kag magpanugyan sing mahinantupon kag mainayuhon. Maayo gid ang reaksion sang mga kauturan kon ginapakig-angutan sila nga may pasunaid kag ginatamod subong mga indibiduwal nga nagakinahanglan sing bulig, indi subong mga indi na makapanumbalik. Dapat huptan sang mga gulang ang positibo nga pagtamod ni Pablo sang sia nagsiling: “May pagsalig kami sa Ginuo nahanungod sa inyo, nga kamo nagahimo kag padayon nga magahimo sing mga butang nga amon ginasugo.”—2 Tesalonica 3:4.

Nagapasibu sa Ila mga Kinahanglanon

18, 19. (a) Paano kita makapasibu sa mga kinahanglanon sang mga estudyante sa Biblia nga may limitado nga ikasarang? (b) Paano naton mabuligan ang mga estudyante nga nabudlayan sa pila ka espesipiko nga mga butang?

¹⁸ Ang isa ka epektibo nga manunudlo handa magpasibu sa mga ikasarang kag mga limitasyon sang iya mga estudyante. (Ipaanggid ang Juan 16:12.) Sa ilustrasyon ni Jesus tuhoy sa mga talanton, ang agalon naghatag sing mga pribilehiyo “sa tagsatagsa suno sa iya ikasarang.” (Mateo 25:15) Mahimo naton sundon ang amo nga sulundan kon nagadumala sing mga pagtuon sa Biblia. Sing kinaandan, luyag naton matapos ang isa ka pasad-sa-Biblia nga publikasyon sa nagakaigo malip-ot nga tion. Apang, dapat batunon nga indi tanan maayo magbasa ukon makahangop gilayon sing bag-o nga mga ideya. Busa, ang paghantop kinahanglanon sa kon san-o dapat magliton halin sa isa ka punto pakadto sa isa pa sa aton pagtuon kon ang ginatun-an nabudlayan sa kadasigon sini. Ang labi nga importante sangsa pagtuptop sa materyal sa pat-od nga kadasigon amo ang pagbulig sa estudyante nga mahangpan ang ila ginatun-an.​—Mateo 13:51.

¹⁹ Amo man sini ang masiling sa mga estudyante sang Biblia nga nabudlayan sa espesipiko nga mga butang, subong sang Trinidad ukon relihioso nga mga kapiestahan. Bisan nga sa kinaandan indi kinahanglan ilakip ang mga panalawsaw sa pasad-sa-Biblia nga mga reperensia sa aton mga pagtuon, mahimo naton himuon ini kon kaisa kon maathag nga mapuslanon ini. Dapat gamiton ang maayo nga paghantop agod malikawan ang dikinahanglanon nga paghinay sa pag-uswag sang estudyante.

Mangin Mapagsik!

20. Paano si Pablo nagpahamtang sing huwaran sa pagpakita sing kapagsik kag kakugi sa iya pagpanudlo?

²⁰ “Magmainit sa espiritu,” siling ni Pablo. (Roma 12:11) Huo, nagahiwat man kita sing pagtuon sa Biblia sa puluy-an ukon nagapakigbahin sa miting sa kongregasyon, dapat naton himuon ini sing makugi kag sing mapagsik. Ginsilingan ni Pablo ang mga taga-Tesalonica: “Ang maayong balita nga amon ginabantala wala mag-abot sa inyo paagi sa pulong lamang kundi paagi man sa gahom kag sa balaan nga espiritu kag sa malig-on nga pagsalig.” (1 Tesalonica 1:5) Sa amo, ginpaalinton ni Pablo kag sang iya mga kaupod ‘indi lamang ang maayong balita sang Dios, kundi ang [ila] man kaugalingon nga mga kalag.’—1 Tesalonica 2:8.

21. Paano naton mahuptan ang kapagsik sa aton mga hilikuton sa pagpanudlo?

²¹ Ang matuod nga kapagsik nagaresulta bangod sang aton malig-on nga pagpati nga ang aton mga estudyante sa Biblia kinahanglan makabati sang aton ihambal. Indi gid naton pagkabigon ang bisan ano nga hilikuton sa pagpanudlo subong rutina. Ang escriba nga si Esdras pat-od gid nga naghatag sing igtalupangod sa iya panudlo tuhoy sini. “Ginhanda [niya] ang iya tagipusuon sa pag-usisa sang kasuguan ni Jehova kag sa paghimo sini kag sa pagtudlo sa Israel.” (Esdras 7:10) Dapat man naton ini himuon paagi sa paghanda sing maayo kag sa pagpamalandong sa importansia sang materyal. Mangamuyo kita kay Jehova nga pun-an kita sing pagtuo kag pagsalig. (Lucas 17:5) Ang aton kapagsik makabulig sa mga estudyante sang Biblia nga mapalambo ang matuod nga gugma sa kamatuoran. Sa pagkamatuod, ang paghatag sing igtalupangod sa aton panudlo mahimo man maglakip sang paggamit sing espesipiko nga mga pamaagi sa pagpanudlo. Ang aton masunod nga artikulo magabinagbinag sang pila sini.

[Footnote]

Madumduman Mo Bala?

◻ Ngaa kinahanglanon karon ang lantip nga Cristianong mga manunudlo?

◻ Anong maayo nga pamatasan sa pagtuon ang mapalambo naton?

◻ Ngaa importante kaayo ang gugma kag pagtahod sa aton mga ginatudluan?

◻ Paano kita makapasibu sa mga kinahanglanon sang aton mga estudyante sa Biblia?

◻ Ngaa importante ang kapagsik kag kakugi kon nagatudlo sa iban?

[Laragway sa pahina 10]

Ang maayo nga mga manunudlo mga estudyante mismo sang Pulong sang Dios

[Laragway sa pahina 13]

Ipakita ang personal nga interes sa mga estudyante sang Biblia