“Ang Espiritu Mismo Nagahatag sing Pamatuod”

 1-2. Ano ang tumalagsahon nga natabo sang adlaw sang Pentecostes sang 33 C.E.?

DOMINGO sang aga sadto, tuig sang 33 C.E., kag adlaw sang Pentecostes. Nagtipon ang mga 120 ka disipulo sa kuarto sa ibabaw sang isa ka balay sa Jerusalem. (Binu. 1:13-15; 2:1) Pila ka adlaw antes sini, ginsilingan sila ni Jesus nga indi maghalin sa Jerusalem bangod makabaton sila sang pinasahi nga regalo. (Binu. 1:4, 5) Ano dayon ang natabo?

² “Sa hinali lang, may gahod halin sa langit nga daw nagahagunos nga huyop sang hangin.” Nabatian ini sa bug-os nga balay. Dayon, “ang mga dila nga daw kalayo” nagtungtong sa ulo sang mga disipulo, kag “napuno sila tanan sing balaan nga espiritu.” (Binu. 2:2-4) Sa sining tumalagsahon nga paagi, ginhatagan sila ni Jehova sang iya balaan nga espiritu. (Binu. 1:8) Sila ang una nga ginhaplasan sang balaan nga espiritub kag ginhatagan sang paglaum nga maggahom kaupod ni Jesus sa langit.

3. Ngaa sigurado gid ang mga nagtipon sang Pentecostes nga ginhaplasan sila sang balaan nga espiritu?

³ Kon isa ikaw sa mga disipulo nga nagtipon sang Pentecostes sa kuarto sa ibabaw sang isa ka balay, indi mo gid ini malipatan. Nagtungtong sa imo ulo ang dila nga daw kalayo, kag nakahambal ka sang iban nga lenguahe! (Binu. 2:5-12) Sigurado ka gid nga ginhaplasan ka sang balaan nga espiritu. Pero ang tanan bala nga ginhaplasan sang balaan nga espiritu nakabaton sini sa tumalagsahon nga paagi kag sa pareho nga tion sang ila kabuhi? Indi. Ngaa?

4. Ginhaplasan bala ang tanan nga hinaplas sang unang siglo sa pareho nga tion sang ila kabuhi? Ipaathag.

⁴ Binagbinagon naton kon san-o mahimo mangin hinaplas ang isa. Indi lang ang mga 120 ka Cristiano ang ginhaplasan sang balaan nga espiritu sang Pentecostes, 33 C.E. Sang ulihi sa sina man nga adlaw, mga 3,000 pa ang nakabaton man sang balaan nga espiritu. Ginhaplasan sila sang ginbawtismuhan sila. (Binu. 2:37, 38, 41) Pero sang masunod nga mga tuig, indi tanan sang hinaplas nga mga Cristiano ang ginhaplasan sang ginbawtismuhan sila. Ginhaplasan sang balaan nga espiritu ang mga Samaritano pagligad pa sang pila ka tion sa tapos sila mabawtismuhan. (Binu. 8:14-17) Kag tumalagsahon ang paghaplas kay Cornelio kag sa iya panimalay kay natabo ini antes pa sila ginbawtismuhan.—Binu. 10:44-48.

5. Suno sa 2 Corinto 1:21, 22, ano ang nagakatabo kon ang isa ginhaplasan sang balaan nga espiritu?

⁵ Binagbinagon man naton ang nagakatabo kon ang isa ginhaplasan sang balaan nga espiritu. Sa primero, may pila ka hinaplas ang daw indi makapati nga ginpili sila ni Jehova. Nagapalibog sila, ‘Ngaa ginpili ako sang Dios?’ Pero mahimo nga indi amo sini ang ginabatyag sang iban. Ano man ang ginabatyag sang isa, ginpaathag ni apostol Pablo ang nagakatabo sa tanan nga hinaplas: “Sang nagtuo kamo, ginpat-inanc kamo paagi sa iya sang ginsaad nga balaan nga espiritu, nga isa ka pauna nga garantiya sang aton palanublion.” (Efe. 1:13, 14; footnote) Gani ginagamit ni Jehova ang iya balaan nga espiritu para mangin maathag gid sa sini nga mga Cristiano nga ginpili niya sila. Sa sini nga paagi, ang balaan nga espiritu isa ka “garantiya” ukon promisa nga nagapasalig sa ila nga may paglaum sila nga mabuhi sing wala sing katapusan sa langit, indi sa duta.—Basaha ang 2 Corinto 1:21, 22.

6. Ano ang dapat himuon sang isa ka hinaplas nga Cristiano para mabaton niya ang iya padya sa langit?

⁶ Kon ginhaplasan ang isa ka Cristiano, sigurado na bala sia nga mapalangit? Indi. Sigurado sia nga ginpili sia nga mabuhi sa langit. Pero dapat niya dumdumon ini nga laygay: “Mga kauturan, himua gid ninyo ang inyo bug-os nga masarangan agod mapat-od ninyo ang pagtawag kag pagpili sa inyo, kay kon padayon ninyo ini nga ginahimo, indi gid kamo mapaslawan.” (2 Ped. 1:10) Gani bisan pa ginpili ang isa ka hinaplas nga Cristiano nga mabuhi sa langit, mabaton lamang niya ang iya padya kon mangin matutom sia.—Fil. 3:12-14; Heb. 3:1; Bug. 2:10.

7. Paano mabal-an sang mga hinaplas nga gin-agda sila sa langit?

⁷ Pero paano mabal-an sang isa nga gin-agda sia sa langit? Maathag ang sabat sa ginsiling ni Pablo sa mga taga-Roma nga “ginpili agod mangin mga balaan.” Nagsiling sia sa ila: “Ang espiritu sang Dios wala nagahimo sa aton nga mangin mga ulipon kag mahadlok kita liwat, kundi paagi sa sini nga espiritu ginaadoptar kita subong mga anak, kag ini nga espiritu nagapahulag sa aton sa pagsinggit: ‘Abba, Amay!’ Ang espiritu mismo nagahatag sing pamatuod sa aton espiritu nga kita mga anak sang Dios.” (Roma 1:7; 8:15, 16) Gani paagi sa balaan nga espiritu sang Dios, nangin maathag sa mga hinaplas nga gin-agda sila sa langit.—1 Tes. 2:12.

8. Suno sa 1 Juan 2:20, 27, ngaa indi na kinahanglan sang hinaplas nga mga Cristiano ang pamatuod sang iban nga hinaplas sila?

⁸ Ginsigurado gid ni Jehova nga indi magduhaduha ang mga gin-agda niya nga mabuhi sa langit. (Basaha ang 1 Juan 2:20, 27.) Matuod, kinahanglan tudluan ni Jehova ang hinaplas nga mga Cristiano paagi sa kongregasyon pareho man sa iban. Pero indi na kinahanglan nga pamatud-an sang iban nga hinaplas sila. Gingamit ni Jehova ang pinakagamhanan nga puersa sa uniberso, ang iya balaan nga espiritu, para mangin maathag gid sa ila nga hinaplas sila!

9. Suno sa Efeso 1:18, ano nga pagbag-o ang naeksperiensiahan sang isa ka hinaplas?

⁹ Mahimo nga mabudlay sa kalabanan nga alagad sang Dios subong nga mahangpan ang nagakatabo sa isa kon ginhaplasan sia sang Dios. Normal lang ini bangod wala sila ginhaplasan. Gintuga sang Dios ang mga tawo para mabuhi sing wala sing katapusan sa duta, indi sa langit. (Gen. 1:28; Sal. 37:29) Pero may ginpili si Jehova para mabuhi sa langit. Kon ginhaplasan niya sila, ginabag-o gid niya ang ila paglaum kag panghunahuna amo nga nagalaum na sila nga mabuhi sa langit.—Basaha ang Efeso 1:18.

10. Ano ang buot silingon kon ang isa “mabun-ag liwat”? (Tan-awa man ang footnote.)

¹⁰ Ang ginhaplasan sang balaan nga espiritu nga mga Cristiano ‘nabun-ag liwat,’ ukon ‘nabun-ag halin sa ibabaw.’d Ginsiling man ni Jesus nga imposible nga ipaathag sing bug-os sa isa nga indi hinaplas ang nabatyagan sang isa nga ‘nabun-ag liwat,’ ukon “nabun-ag paagi sa espiritu.”—Juan 3:3-8; footnote.

11. Paano nagabag-o ang panghunahuna sang isa ka hinaplas?

¹¹ Paano nagabag-o ang panghunahuna sang hinaplas nga mga Cristiano? Antes ginhaplasan ni Jehova ini nga mga Cristiano, nagalaum gid sila nga mabuhi sing wala sing katapusan sa duta. Ginapaabot gid nila ang tion nga dulaon ni Jehova ang tanan nga kalautan kag himuon nga paraiso ang duta. Mahimo nga ginahanduraw na nila nga makaupod liwat ang miembro sang ila pamilya ukon ang ila abyan nga napatay. Pero sang ginhaplasan sila, nagbag-o ang ila panghunahuna. Ngaa? Indi ini bangod natak-an na sila sa kabuhi sa duta. Nagbag-o ang ila handum indi bangod sang depresyon ukon grabe nga problema. Indi buot silingon nga hinali lang sila nga nagbatyag nga makatalaka ang kabuhi nga wala sing katapusan sa duta. Sa baylo, gingamit ni Jehova ang iya balaan nga espiritu para bag-uhon ang ila panghunahuna kag paglaum.

12. Suno sa 1 Pedro 1:3, 4, ano ang ginabatyag sang hinaplas nga mga Cristiano parte sa ila paglaum?

¹² Mahimo man magbatyag ang isa ka hinaplas nga indi sia takus sa sining hamili nga pribilehiyo. Pero wala gid sia nagaduhaduha nga ginpili sia ni Jehova. Nalipay gid sia kag nagapasalamat kon ginahunahuna niya ang iya paglaum nga mabuhi sa langit.—Basaha ang 1 Pedro 1:3, 4.

13. Paano ginatamod sang mga hinaplas ang ila kabuhi diri sa duta?

¹³ Buot silingon bala sini nga gusto mapatay sang mga hinaplas? Ginsabat ni apostol Pablo ini nga pamangkot. Ginpaanggid niya sa tolda ang ila lawas kag nagsiling: “Ang matuod, kita nga yari sa sini nga tolda nagaugayong, nga ginabug-atan. Indi man naton luyag nga ubahon ini, kundi luyag naton nga isuklob ang isa, agod ang mamalatyon mabuslan sang kabuhi.” (2 Cor. 5:4) Wala natak-an ini nga mga Cristiano sa kabuhi sa duta, kag indi nila gusto nga mapatay dayon. Sa baylo, nalipay gid sila mabuhi kag gusto nila nga mag-alagad kay Jehova kada adlaw upod sang ila pamilya kag mga abyan. Pero, ano man ang ila ginahimo, pirme nila ginadumdom ang ila dalayawon nga paglaum sa palaabuton.—1 Cor. 15:53; 2 Ped. 1:4; 1 Juan 3:2, 3; Bug. 20:6.

14. Ano nga mga kahimtangan ang wala nagapamatuod nga ginhaplasan sang balaan nga espiritu ang isa?

¹⁴ Basi nagapalibog ka kon bala ginhaplasan ka sang balaan nga espiritu. Pamalandungi ining importante nga mga pamangkot: Handum mo gid bala nga himuon ang kabubut-on ni Jehova? Tumalagsahon bala ang imo kakugi sa ministeryo? Nanamian ka bala magtuon sa Pulong sang Dios kag mabal-an ang “madalom nga mga butang sang Dios”? (1 Cor. 2:10) Masiling mo bala nga ginapakamaayo gid ni Jehova ang imo pagbantala? Nagabatyag ka bala nga responsibilidad mo gid nga buligan ang iban sa espirituwal? May nakita ka bala nga pamatuod nga ginbuligan ka ni Jehova? Kon huo ang imo sabat sa sini nga mga pamangkot, nagapamatuod bala ini nga gin-agda ka sa langit? Wala. Ngaa? Bangod mahimo ini batyagon sang tanan nga alagad sang Dios, hinaplas man sila ukon indi. Kag mabuligan ni Jehova ang tanan niya nga alagad paagi sa balaan nga espiritu, ano man ang ila paglaum. Ang matuod, kon indi ka sigurado kon bala ginhaplasan ka sang balaan nga espiritu, pamatuod ini nga indi ka hinaplas. Ang mga ginpili ni Jehova wala nagapalibog kon bala hinaplas sila ukon indi! Sigurado sila!

15. Ngaa masiling naton nga indi tanan nga nakabaton sang espiritu sang Dios ang ginpili nga mabuhi sa langit?

¹⁵ Sa Biblia, may madamo nga halimbawa sang mga tawo nga may pagtuo nga nakabaton sang balaan nga espiritu, pero wala sila ginhatagan sang paglaum nga mabuhi sa langit. Si David gintuytuyan sang balaan nga espiritu. (1 Sam. 16:13) Ginbuligan sia sini para mahangpan ang madalom nga mga butang parte kay Jehova kag gintuytuyan sia sini sa pagsulat sang pila ka bahin sang Biblia. (Mar. 12:36) Pero ginsiling ni apostol Pedro nga si David “wala magkayab sa langit.” (Binu. 2:34) Si Juan nga Manugbawtismo ‘napuno sing balaan nga espiritu.’ (Luc. 1:13-16) Nagsiling si Jesus nga wala sing tawo nga labaw pa kay Juan, pero nagsiling man sia nga si Juan indi magagahom sa Ginharian sa langit. (Mat. 11:10, 11) Gingamit ni Jehova ang iya balaan nga espiritu para buligan sila nga makahimo sang gamhanan nga mga buhat, pero wala niya gingamit ini nga espiritu para pilion sila nga mabuhi sa langit. Nagakahulugan bala ini nga indi sila pareho katutom sa mga ginpili nga magagahom sa langit? Wala. Nagakahulugan lang ini nga banhawon sila ni Jehova para mabuhi sa Paraiso nga duta.—Juan 5:28, 29; Binu. 24:15.

16. Ano ang paglaum sang kalabanan nga alagad sang Dios subong?

¹⁶ Ang kalabanan nga alagad sang Dios sa duta subong wala ginhatagan sang paglaum nga mabuhi sa langit. Pareho kanday Abraham, Sara, David, Juan nga Manugbawtismo, kag sang iban pa nga mga lalaki kag babayi sang panahon sang Biblia, may paglaum sila nga mabuhi sing wala sing katapusan sa duta kon maggahom na ang Ginharian sang Dios sa ila.—Heb. 11:10.

17. Ano nga mga pamangkot ang binagbinagon naton sa masunod nga artikulo?

¹⁷ Bangod kaupod pa naton ang pila ka hinaplas subong, posible nga may mga pamangkot kita. (Bug. 12:17) Halimbawa, paano dapat tamdon sang mga hinaplas ang ila kaugalingon? Kon may utod sa inyo kongregasyon nga magkaon sang tinapay kag mag-inom sang alak sa tion sang Memoryal, paano mo sia dapat tamdon? Ano abi kon padayon nga nagadamo ang nagasiling nga hinaplas sila? Dapat ka bala mabalaka sa sini? Sabton naton ini nga mga pamangkot sa masunod nga artikulo.